1, 2. (a) Ni migisha ki ey’eby’omubiri ei oyiniire ekihika kutunga omu Paradiso? (Reeba ekishushani aha kutandika.) (b) Nihaija kubaho migisha ki ey’eby’omwoyo omu nsi ensya?

“AMAGARA AGAABUZIMA.” Baingi ahariitwe, ebigambo ebyo nibikwata aha matsiko gaitu ag’okutunga amagara agatahwaho omu Paradiso. Buzima, entumwa Paulo akooreka ngu “amagara agatahwaho” nikyo kimwe ‘n’amagara agaabuzima.’ (Shoma 1 Timoseo 6:12, 19.) Twine amatsiko g’okutunga amagara agarikugumaho ebiro byona, kandi eki nikiija kutureetera kutunga okumarwa n’okushemererwa. Kigumire kuteebereza oku turaije kuba nitwehurira turikwimuka buri izooba turi gye omu mubiri, ebiteekateeko, n’enyehurira. (Isa. 35:5, 6) Teekateeka oku kiraije kuba kiri kirungi kuba hamwe n’abakundwa baitu, na banywani baitu, otwariiremu abaraabe bazookire! (Yoh. 5:28, 29; Byak. 24:15) Nitwija kutunga n’omugisha gw’okutunguuka omu byasayansi, okweshongora, okwombeka, n’emiringo endiijo ey’obwengye.

² N’obu turaabe tutegyereize ebintu birungi ebyo, emigisha mikuru omu nsi ensya neija kuba ey’eby’omwoyo. Ka nitwija kutunga okumarwa kukimanya ngu eiziina rya Ruhanga waitu Yehova ryeziibwe, kandi ngu ayorekire obuhame ku niwe  ahikire kutegyeka byona! (Mat. 6:9, 10) Nitwija kushemererwa kureeba ekigyendererwa kye ahabw’abantu n’ensi nikihikiirira. Kandi teekateeka oku kirikwija kuba kyorobi kwirira haihi Yehova obwo turikweyongyera kuba abahikiriire!—Zab. 73:28; Yak. 4:8.

3. Niki eki twine kwetebeekanisiza hati?

³ Emigisha egi nitubaasa kugitunga, ahakuba Yesu akatuhamiza ngu “ahari Ruhanga byona nibibaasika.” (Mat. 19:25, 26) Kwonka ku turaabe nitwenda kutuura omu nsi ensya kandi tukagumaho na bwanyima y’emyaka rukumi ey’okutegyeka kwa Kristo, obu nibwo bwire bw’okukorerera “amagara” agatahwaho. Twine kuguma tutegyereize emperu y’ensi egi embi, kandi tukagira eki twakora hati kwetebeekanisiza okutuura omu nsi ensya. Eki nitubaasa kukikora tuta kandi obwo tukiri omu nsi egi embi?

4. Ha eky’okureeberaho kworeka oku turikubaasa kwetebeekanisa hati kwija kutuura omu nsi ensya.

⁴ Hati nitubaasa kwetebeekanisiza tuta okutuura omu nsi ensya? Ka tugire ngu nitwenda kuza omu ihanga erindi. Nitubaasa kwetebeekanisa tuta? Nitubaasa kutandika kwega orurimi rw’abantu abarikutuurayo. N’okumanya oku barikutwaza nikibaasa kwetengyesa. Nitubaasa kuroza n’ahari bimwe aha by’okurya byabo. Kandi nitubaasa kutandika kwetwara nk’abatuuzi b’eihanga eryo. Ahakuba nigwo muringo ogu turikwija kutwazamu twahikayo. Nikyo kimwe, nitubaasa kwetebeekanisa kutuura omu nsi ensya hati nk’oku kirikubaasika, nk’abaine amatsiko g’okwija kutuurayo omu biro by’omumaisho. Omu nshonga egi, teekateeka aha by’okureeberaho ebi.

5, 6. Okworobera obwebembezi bwa Yehova nikituhwera kita kwetendeka kutuura omu nsi ensya?

⁵ Omu nsi ensya, nibwo turaaheere kimwe Ruhanga ekitiinisa nk’ohikire kutegyeka byona. Eki ka nikiija kuba nikitaana n’omutima gw’okwenda kwetegyeka oguri omu nsi egi eri omu bushoboorozi bwa Sitaane! Abamwe nibabaasa kuba nibatwara okwenda kwetegyeka n’okuremera aha ki barikukunda nka bikuru, kwonka shi kirugiremu ki? Okwanga kwikiriza obuhabuzi bwa Ruhanga kurugiremu okubonabona, enaku, n’okugwerwa akagwe. (Yer. 10:23) Ka twine ekihika ky’okureeba abantu barikweta ahansi y’obushoboorozi bwa Yehova!

⁶ Nikiija kuba nikishemeza kushagika entebeekanisa za Yehova ez’ensi ensya obwo turikuboneza ensi, turikwegyesa abaraazoorwe, tukahikiiriza n’ekigyendererwa kya Yehova ahabw’abantu. Kwonka shi ku twakuragiirwa kukora omurimo ogu tutarikukunda? Nitwija kworobera obuhabuzi obwo, tukore kyona ekirikubaasika kuhikiiriza omurimo gwaitu tushemereirwe? Baingi ahariitwe nibabaasa kugarukamu ngu eego! Mbwenu shi nitugumizamu kworobera obwebembezi bwa Yehova hati? Ku turaabe nitukikora, turiyo nitwetebeekanisiza amagara agatahwaho ahansi y’obutegyeki bwe.

7, 8. (a) Ahabw’enki twine kugira omutima gw’okukwatanisa hati? (b) Habaireho mpindahinduka ki omu buheereza bw’Abakristaayo abamwe? (c) Twine amatsiko g’okutunga ki omu nsi ensya?

⁷ Nitubaasa kwetebeekanisiza okutuura omu nsi ensya turikworobera entebeekanisa za Yehova hati, tukagira n’omutima gw’okumarwa n’okukwatanisa. Twakwatanisa n’abo abarikwebembera ekibiina hati, obundi turikutunga okumarwa omu buheereza obu turimu, nitubaasa kwija kugira emiteekateekyere niyo emwe omu nsi ensya. (Shoma Abaheburaayo 13:17.) Omu Nsi Eyaaraganisiibwe, Abaisraeli bakaba nibatunga obuhunguzi barikuteera enteenyu. (Kub. 26:52-56; Yos. 14:1, 2) Hati titurikumanya  ahu buri omwe ahariitwe arikwija kuheebwa kutuura omu nsi ensya. Kwonka, okukwatanisa nikwija kutubaasisa kutunga okumarwa n’okushemererwa kwingi obwo turikukora ebi Yehova arikukunda, hoona ahu turaabe nitutuura omu nsi ensya.

⁸ Okutegyekwa Obukama bwa Ruhanga omu nsi ensya nikikirira kimwe ebi turikwefeerereza hati twaba nitukwatanisa n’ekibiina kya Yehova turikuhikiiriza n’obuheereza bwaitu. Hatariho kubanganisa, embeera zaitu nizibaasa kuhinduka haahinguraho obwire. Nk’eky’okureeberaho, Ababeseeli abamwe omuri United States bakahindurwa kuruga aha Beseeli kuza omu kubuurira, kandi hati baine emigisha mingi omu buheereza busya obu barimu. Bamwe ahari abo abaabaire bari omu buheereza bw’okutaayaayira ebibiina, ahabw’emyaka ya bukuru n’ezindi nshonga, bahindwirwe baapayoniya ab’omutaano. Twateeraho kutunga okumarwa, tukashaba Ruhanga obuhwezi, kandi tukakora kyona ekirikubaasika omu buheereza bwe, nitwija kutunga emigisha mingi nangwa n’omu biro ebi eby’emperu. (Shoma Enfumu 10:22.) Kandi shi ebigyendererwa byaitu eby’omumaisho? Nitubaasa kuba twine ahu turikwenda kutuura omu nsi ensya, kwonka nitubaasa kushabwa kuza omu mwanya ogundi. Hoona ahu turaabe nituheerereza obunaku obwo n’eki turaakore kyona, nitubaasa kuhamya ngu nitwija kuba tushemereirwe kandi twine okumarwa.—Neh. 8:10.

9, 10. (a) Ni nshonga ki erikwija kwetengyesa okugumisiriza omu nsi ensya? (b) Nitubaasa kworeka tuta ngu nitugumisiriza?

⁹ Omu nsi ensya, nihabaasa kwija kubaho obwire obu kiraayetengyese kugumisiriza. Nk’eky’okureeberaho, nitubaasa kwija kureeba abantu bashemereirwe ahabw’okuzooka kw’abanyabuzaare na banywani baabo. Kwonka, itwe nikibaasa kwetengyesa kutegyereza abakundwa baitu kuzooka. Ku kiraabe kityo, nitwija kushemererwa n’abandi kandi tugumisirize? (Rom. 12:15) Okwega kugumisiriza hati obwo tutegyereize okuhikiirira kw’ebiraganiso bya Yehova, nikiija kutuhwera kugumisiriza n’omu bunaku obwo.—Mub. 7:8.

¹⁰ Nitubaasa kwetebeekanisiza okutuura omu nsi ensya turikugumisiriza haabaho enyetegyereza nsya omu mazima. Mbwenu shi nitugumisiriza turikweyegyesa, obwo enyetegyereza y’amazima egyo erikuguma neeshoboororwa mporampora? Ku kiraabe nikwo kiri, titurikwiza kugira oburemeezi bw’okugumisiriza omu nsi ensya, Yehova yaaba naamanyisa abantu ebi arikwenda.—Enf. 4:18; Yoh. 16:12.

11. Yehova naatwegyesa ki aha bikwatiraine n’okukwatanisa, kandi eki nikiija kutugasira kita omu nsi ensya?

¹¹ Omutwarize ogundi ogurikwija kutuhwera omu nsi ensya n’okugira omutima gw’okusaasira. Omu myaka rukumi ey’okutegyeka kwa Kristo, nikiija kutwara obwire abantu kurugwamu okutahikiirira kwona. (Byak. 24:15) Mbwenu shi nitwija kutwarizana omu muringo gwa rukundo obunaku obwo? Twayega kusaasira hati tukeetantara n’okugira oburemeezi omu mikago yaitu, nikiija kutworobera omu nsi ensya.—Shoma Abakolosai 3:12-14.

12. Shoboorora akakwate akari ahagati y’amatsiko gaitu ag’ebiro by’omumaisho n’oku turikutwaza hati.

¹² Omu nsi ensya tikirikumanyisa ngu butoosha nitwija kuba nitutunga ebi turikwenda obu turikubyenda. Omu mwanya gw’ekyo, nikiija kutwetengyesa kusiima n’okutunga okumarwa omu mbeera zoona obwo turikugasirwa omu bushoboorozi bwa Yehova. Nitwija kuba nitworeka emitwarize ei Yehova arikutwegyesa ngu tugire hati. Twateeraho kutwaza nk’oku turikwija  kutwaza omu nsi ensya, nituba nitugira emitwarize ei turikwija kuba twine ebiro byona. Ekyo nikihamya okwikiriza kwaitu kituha n’obuhame bw’okwija kutuura omu “ensi eribaho.” (Heb. 2:5; 11:1) Kandi, nitworeka oku twiniire ekihika embeera ehikiriire erikwija kubaho omu nsi obunaku obwo. Buzima, turiyo nitwetebeekanisiza amagara agatahwaho omu nsi ensya.

13. Ni mirimo ki ei turikwija kwebembeza omu nsi ensya?

¹³ Teekateeka aha muringo gumwe ogu turikubaasa kwetebeekanisiza amagara agaabuzima omu biro by’omumaisho. N’obu turaabe nituraganisibwa eby’okurya bingi n’ebindi ebirikwetengyesa omu nsi ensya, nitwija kutunga okushemererwa kw’amaani ahabw’okugira omukago murungi na Ruhanga. (Mat. 5:3) Emirimo y’eby’omwoyo niyo turikwija kutaho omutima, kandi nitwija kukyoreka ngu nitukunda kuheereza Yehova. (Zab. 37:4) Twayebembeza eby’omwoyo hati, nituba nitwetebeekanisiza amagara agaabuzima omu biro by’omumaisho.—Shoma Matayo 6:19-21.

14. Ni bigyendererwa ki eby’omwoyo ebirikubaasa kuhwera abato kuguma nibateekateeka aha magara agatahwaho?

¹⁴ Nitubaasa kwongyera tuta kukunda obuheereza oburikwera? Omuringo gumwe n’okutaho ebigyendererwa by’omwoyo. Ku oraabe okiri muto kandi orikuteekateeka aha kwongyera aha ku orikuheereza Yehova, noobaasa kushwijuma bimwe aha biri omu bitabo byaitu ebirikugamba aha buheereza bw’obutwire ebw’emiringo etari emwe n’emwe, kandi oteho ekigyendererwa ky’okuza omuri bumwe aharibwo. * Noobaasa kugambaho na bamwe abamazire emyaka mingi omu buheereza obw’obutwire. Waahindura okubuurira omurimo gwawe, nooba nooyetebeekanisiza okugumizamu nooheereza Ruhanga omu nsi ensya, ahu okutendekwa n’okumanya birikwija kuba biri eby’omuhendo.

15. Ababuurizi b’Obukama bashemereire kutaho bigyendererwa ki eby’omwoyo?

¹⁵ Nk’ababuurizi b’Obukama, ni bigyendererwa ki eby’omwoyo ebi turikubaasa kutaho? Nitubaasa kutaho ekigyendererwa ky’okwega akakoryo kasya k’okubuurira. Nari nitubaasa kuteeraho kwongyera kwetegyereza gye emisingye ya Baibuli n’oku twine kugigyenderaho. Kandi shi okwongyera kuba abagambi barungi n’okushoma gye omu maisho g’abantu baingi nari okugarukamu gye omu nteerane? Hatariho kubanganisa noobaasa kuteekateeka aha migisha endiijo. Enshonga nkuru n’egi: Okutaho  ebigyendererwa by’omwoyo nikiija kukuhwera kugira omujinya gw’okuheereza n’okwetebeekanisiza okutuura omu nsi ensya.

16. Ahabw’enki okuheereza Yehova nikyo kirikukirayo oburungi?

¹⁶ Mbwenu shi okumara obwire turikwetebeekanisiza ensi ensya nikimanyisa okweyangisa embeera nungi obunaku obu? Ngaaha buzima! Okuheereza Yehova nikyo kirikukirayo kureeta okumarwa. Tikirikumanyisa ngu tuheereze twine obujune kugira ngu tubaase kuraba omu kubonabona kwingi. Tukahangwa turikubaasa kugira okushemererwa kwingi. Okukundwa Yehova n’okutunga obuhabuzi bwe nibikira ekindi kyona. (Shoma Zaaburi 63:1-3.) Kwonka, titwine kutegyereza ensi ensya kubaasa kutunga emigisha y’eby’omwoyo erikuruga omu kuheereza Yehova n’omutima gwaitu gwona, beitu na hati eriho! Buzima, bamwe ahariitwe batwire nibatunga emigisha egi kumara emyaka mingi, kandi nitukimanya ngu kurugiirira aha bibaireho, tihariho ekirikureeta okushemererwa ekirikukira eki.—Zab. 1:1-3; Isa. 58:13, 14.

17. Ebyetengo byaitu n’eby’okweshemeza nibiija kuba biine mwanya ki omu Paradiso?

¹⁷ Ebyetengo byaitu n’eby’okweshemeza nibiija kuba biine omwanya gwabyo omu nsi ensya. Niyo nshonga ahabw’enki Yehova yaatuhangire twine ebyetengo n’okugira okushemererwa okwabuzima. (Mub. 2:24) Omu muringo ogu n’endiijo, Yehova butoosha naija kuba naahazya “ekintu kyona ekihuriire ebi kirikwetenga.” (Zab. 145:16) Okuhuumuraho n’okweshemeza biine omwanya gwabyo, kwonka okushemererwa okurikurugamu nikweyongyera twayebembeza omukago gwaitu na Yehova. Nikwo kirikwija kuba omu Paradiso ey’omu nsi. Ka nikiba kiri eky’obwengye kuta ebyetengo byaitu omu mwanya gwabyo oguhikire turikwebembeza okusherura Obukama n’okuta omutima aha migisha y’eby’omwoyo ei abaheereza ba Yehova baine hati!—Mat. 6:33.

18. Nitubaasa kworeka tuta ngu nitwetebeekanisiza amagara agatahwaho omu Paradiso?

¹⁸ Omu Paradiso erikwija, nitwija kutunga okushemererwa oku tutakatungaga. Twine kworeka ngu twiniire amagara agaabuzima ekihika ky’amaani turikwetebeekanisa hati. Ka tuteereho kugira emitwarize nk’eya Ruhanga kandi tutungye okushemererwa kwingi ahabw’okwejumba omu murimo gw’okubuurira Obukama twine omujinya. Okuta omutima aha by’omwoyo ka kibe nikyo kyatureetera okushemererwa kwingi. Kandi ka tugume nitwetebeekanisiza okutuura omu nsi ensya, twine okwikiriza kuhami omu biraganiso bya Yehova!