1, 2. (a) Anto ray labalabay mon nagawa diad Paraiso? (Nengnengen so litratod gapo na artikulo.) (b) Anto ran espiritual ya bendisyon so panliketan tayod balon mundo?

“PETEG A BILAY.” Ipapanonot na saratan ya salita so ilalo tayon bilay ya andi-anggaan diad Paraiso. Diad tua, deneskribe nen apostol Pablo so “bilay ya andi-anggaan” bilang “peteg a bilay.” (Basaen so 1 Timoteo 6:12, 19.) Aalagaren tayo itan ya bilay ya aglan balot mangangga tan napno na liket. Imadyin mo pa labat ya kada agew et ombangon kan mabiskeg so laman mo, anggapoy panaburidoan mo, tan balibali liknaan mo. (Isa. 35:5, 6) Seguradon malikeliket ka ta kaibam iray kapamilyam, kakaarom, pati saramay nabilay lamet! (Juan 5:28, 29; Gawa 24:15) Dakel met so panaon mon manaral nipaakar ed science, musika, architecture, tan arum ni.

² Anggaman labalabay tayo la iratan ya nagawa, say manunan panliketan tayo diad balon mundo et saray espiritual a bendisyon. Talagan makapalikliket ya diad satan ya panaon et apasanto lay ngaran nen Jehova tan amin ya totoo et manpapasakop lad uley to! (Mat. 6:9, 10) Seguradon eksayted tayon  nanengneng so pakasumpal na orihinal ya gagala nen Jehova parad totoo tan ed dalin. Tan mas mainomay tayo lay nawalaan na maapit ya relasyon ed si Jehova, legan ya magmamaliw itayon perpekto, ya anggad perpekto tayo la!—Sal. 73:28; Sant. 4:8.

3. Antoy kaukolan tayon pamparaanan la natan?

³ Seguradon iter nen Jehova iratan ya bendisyon ed sikatayo, ta imbaga nen Jesus: “Diad Dios et posible so amin a bengatla.” (Mat. 19:25, 26) Balet no labay tayoy manbilay diad balon mundo—tan tuloytuloy ya manbilay anggad kayari na Sanlibon Taon ya Uley nen Kristo—kaukolan tayo la natan ya ‘bembenan a malet’ so bilay ya andi-anggaan. Nepeg tayon ipanengneng ed panagbilay tayo ya aalagaren tayoy anggaan na sayan mauges a sistema, tan kaukolan tayo lan gawaen so anggaay nayarian tayo pian makapanparaan tayo la natan parad bilay ed balon mundo. Balet panon tayon gawaen itan anta manbibilay tayod sayan mauges ya mundo?

4. Iyilustra no panon tayon makapanparaan la natan parad bilay ed balon mundo.

⁴ Panon tayon makapanparaan la natan parad bilay ed balon mundo na Dios? No manplaplano kan onla tan manayam ed arum ya bansa, antoy kaukolan mon gawaen? Nayarin aralen moy lenguahe tan tradisyon na saray totoo ditan. Ompan tawayan mo met iray putahe da. Tan nayarin ipasal mo lay sarilim ya singa ka la manaayam ed satan ya bansa, ta ontan met lanlamang so gawaen mo no manaayam ka la ditan. Mipadpara, natan ni labat et sarag tayo lay manparaan parad balon mundo, ya isipen tayon singa wadman tayo la. Aralen tayo ray pigaran paraan pian nagawaan tayo itan.

5, 6. Panon ya makatulong so itulok tayod saray teokratikon uksoyan natan pian nipasal tayo lay sarili tayo parad balon mundo?

⁵ Diad balon mundo, si Jehova labat so pampasakopan na amin ya totoo. Baleg so pidumaan na satan ed sayan mundo ya uuleyan nen Satanas! Dakel ya totoo so makasarili kanian no antoy labay da, sikatoy gawaen da. Balet antoy resulta? Lapud agda labay so ontulok ed Dios, nanresulta itan ed kairapan tan ermen. (Jer. 10:23) Talagan labalabay tayo lan onsabi so panaon sano amin ya totoo et manpapasakop lad maaron pananguley nen Jehova!

⁶ Seguradon maliket tayon unoren iray uksoyan nen Jehova diad balon mundo legan tayon pararakepen iyan dalin, babangatan iray apaoli, tan gagawaen so linawa na Dios. Balet, panon to no iyasain itayod sakey ya kimey ya agtayo tanton labay? Kasin ontulok itayo tan maliket tayon gawaen so anggaay nayarian tayon sumpalen so asainmin tayo? Seguradon amin tayo et onebat na on! Balet kasin natan ni labat et manpapasakop tayo lad saray teokratikon uksoyan? No ontan so gagawaen tayo, manpaparaan tayo la parad bilay ya andi-anggaan diad balon mundo ya uleyan nen Jehova.

7, 8. (a) Akin ya kaukolan tayon aralen so mikoopera ed arum? (b) Anto ran pananguman so asali na arum ya Kristiano? (c) Antoy naseguro tayon magmaliw ya bilay diad balon mundo?

⁷ Likud ed itulok ed saray uksoyan nen Jehova natan, makapanparaan tayo parad bilay ed balon mundo no ipasal tayo met so sarili tayon mankontento tan mikoopera ed arum. No ontulok tayod saray mangidadaulo natan, ya kontento tan maliket tayod saray balon asainmin tayo, seguradon ontan met so gawaen tayo diad balon mundo. (Basaen so Hebreos 13:17.) Diad Insipan a Dalin nensaman, inapag iray dalin  ya tawir na saray Israelita panamegley na pampapalaranan. (Num. 26:52-56; Jos. 14:1, 2) Agtayo ni amta natan no iner so lugar ya iter ed sikatayon panayaman diad balon mundo. Balet no mikoopera tayo, magmaliw itayon kontento tan maliket tayon gawaen so linawa nen Jehova inerman so panayaman tayo diad satan ya panaon.

⁸ Talagan pribilehyo so pambilay ed balon mundo diad uley na Panarian. Kanian nabawbawi tayoy sagpot tayo no natan ni labat et mikokoopera tayo lad organisasyon nen Jehova tan susumpalen tayo ray teokratikon asainmin tayo. Siempre, diad ilalabas na panaon et nayarin manguman so kipapasen tayo. Singa bilang, wala ray membro na pamilyan Bethel diad United States ya niyasain ed duman klase na sigpot panaon ya panaglingkor, tan natan et panliliketan da so dakel ya bendisyon diad panagpulong a kimey. Lapud itatatken tan arum nin rason, wala ray ombiabiahen manangasikaso ya natan et inyasain la bilang espisyal payunir. No mankontento itayo, manpikasi parad tulong na Dios, tan gawaen so anggaay nayarian tayod panaglingkor, magmaliw itayon maliket tan makaawat tayoy dakel a bendisyon anggad diad sayan mairap a kaunoran iran agew. (Basaen so Uliran 10:22.) Diad arapen ey? Nayarin iimadyinen tayo la no iner so panayaman tayo diad balon mundo, balet ompan duman lugar so niiter ed sikatayo. Inerman so iter ya panayaman tayo tan antokaman so niyasain ya gawaen tayo, seguradon napenek tan malikeliket tayod balon mundo.—Neh. 8:10.

9, 10. (a) Anto ran situasyon ya nayarin kaukolan tayoy mananos diad balon mundo? (b) Panon tayon nipanengneng ya maanos itayo?

⁹ Diad balon mundo, nayarin wala ray panaon ya kaukolan tayoy mananos. Singa bilang, ompan nabalitaan tayo ya wala la ray apaolid bilay kanian malikeliket iray kakanayon tan kakaaro da. Sikatayo balet et ompan kaukolan tayo ni manalagar ya paolien iray inaro tayod bilay. No ontan so nagawa, kasin miliket tayod arum tan maanos tayon manalagar? (Roma 12:15) Kanian no natan ni labat et maanos tayo lan aalagaren iray kasumpalan na saray sipan na Dios, ontulong itan pian magmaliw tayo met ya maanos ed arapen.—Ecl. 7:8.

¹⁰ Makapanparaan tayo met parad bilay ed balon mundo no maanos tayo no wala ray pananguman ed pakatalos tayod Biblia. Kasin makuli tayon aralen iratan tan maanos tayon talosan? No ontan so gawaen tayo, mainomay tayo lay mananos diad balon mundo no wala ray ipaamta nen Jehova ya labay ton gawaen tayo.—Uli. 4:18; Juan 16:12.

11. Akin ya kaukolan tayo lan ipasal natan ya perdonaen so arum, tan panon itan ya makatulong ed sikatayo diad balon mundo?

¹¹ Sakey nin makatulong ed sikatayo diad balon mundo et say pamerdona ed arum. Legan na Sanlibon Taon ya Uley nen Kristo, kaukolan nin palabasen so panaon antis ya magmaliw ya perpekto so amin ya totoo. (Gawa 24:15) Kasin diad satan a panaon et mabulos tayon perdonaen so sakey tan sakey? No natan ni labat et ipasal tayo lay mamerdona tan paliisan so pankokolkol, mas mainomay tayo lan gawaen itan diad arapen.—Basaen so Colosas 3:12-14.

12. Ipaliwawa no antoy epekto na panagbilay tayo natan ed ilalo tayod arapen.

¹² Diad balon mundo, agto labay ya ibagan naala tayon naynay no antoy labay tayo. Imbes, kaukolan ya maapresya tan mankontento itayo antokaman so situasyon. Kaukolan tayo sirin ya aralen ya ipanengneng iray kualidad ya ibabangat nen  Jehova ed sikatayo natan. No natan ni labat et ipapanengneng tayo la iratan, papaneknekan tayon tudtua ed sikatayo so “mundo ya onsabi” tan manpaparaan tayo la parad bilay ya andi-angga. (Heb. 2:5; 11:1) Sakey ni, ipapanengneng tayo met ya talagan labalabay tayo lay manbilay ed mundo ya amin ya totoo et ontutulok lad si Jehova.

13. Anton kimey so iprayuridad tayo diad balon mundo?

¹³ Imanoen pay sakey nin makatulong pian makapanparaan parad peteg a bilay diad arapen. Anggano impormisa ed sikatayo ya dakel so naakan tan niiter so amin ya pankaukolan tayo diad balon mundo, say manunan panliketan tayo et saray espiritual ya bengatla. (Mat. 5:3) Saray espiritual ya kimey so iprayuridad tayo, tan panliketan tayon maong so panlingkor ed si Jehova. (Sal. 37:4) Kanian no iyuuna tayo ray espiritual ya bengatla natan, manpaparaan tayo la parad peteg a bilay diad arapen.—Basaen so Mateo 6:19-21.

14. Anto ray espiritual ya kalat ya makatulong ed saray kalangweran pian makapanpokus ed arapen?

¹⁴ Antoy gawaen tayo pian mas maliket tayod panaglingkor ed si Jehova? Say sakey a paraan et say pandampot na espiritual iran kalat. No sakey kan kalangweran tan labay mon usaren so bilay mo ed panlingkor ed si Jehova, maabig no rebyuen mo ray artikulod publikasyon tayo nipaakar ed nanduruman klase na sigpot panaon ya panaglingkor, insan manggawa kay kalat mo. * Nayarin mitongtong kad saray abayag lad sigpot panaon ya panaglingkor. No uusaren moy bilay mo ed panlingkor ed si Jehova, ipaparaan mo lay sarilim ed tuloytuloy ya panlingkor mod sikato diad balon mundo, ya ditan et nausar mo nin siansia so teokratikon panangipasal ya naaawat mo natan.

15. Anton espiritual iran kalat so sarag ya dampoten na saray manangiyabawag na Panarian?

¹⁵ Bilang manangiyabawag na Panarian, anton espiritual iran kalat so sarag tayon gawaen? Sarag tayon paaligwasen so abilidad tayod ministeryo. Odino nayarin paaralemen tayoy pakatalos tayod saray prinsipyo ed Biblia tan no panon iratan ya iyaplika. Sarag tayo met ya paaligwasen so panagbasa, panagpaliwawa, odino panagkomento tayod saray aral. Seguradon dakel ni nanonotan mo. Balet nia so punto: No mandampot ka na saray espiritual a kalat, mas maliket kan manlingkor ed si Jehova,  tan ontulong itan pian makapanparaan ka parad bilay ed balon mundo.

16. Akin ya say panlingkor ed si Jehova so sankaabigan lan pangusaran tayoy bilay tayo?

¹⁶ Labay to kasin ibaga ya no manpaparaan tayo parad balon mundo na Dios et singa walay kulang ed bilay tayo natan? Andi! Say panlingkor ed si Jehova so sankaabigan lan pangusaran tayoy bilay tayo. Manlilingkor tayod sikato aliwa labat a pian makaliktar tayod baleg a kairapan. Imbes, manlilingkor tayod si Jehova ta atan so gagala na bilay tayo, tan atan so paraan pian magmaliw tayon maliket. Say panangigiya tan panangaro nen Jehova so sankaabigan lan bengatla ya niwalad sikatayo. (Basaen so Salmo 63:1-3.) Siempre, natan ni labat et panliliketan tayo la ray espiritual ya bendisyon anggano anggapo ni balon mundo. Naaawat tayo la iratan natan lapud interon puson panlilingkor tayod si Jehova! On, nayarin say arum ed sikatayo et pigaran dekada da lan panliliketan iratan ya bendisyon, tan naeeksperiensya tayon mismo ya magmaliw tayo labat ya maliket no usaren tayoy bilay tayod panlingkor ed si Jehova.—Sal. 1:1-3; Isa. 58:13, 14.

17. Panon kaimportante so panagrelaks diad Paraiso?

¹⁷ Diad balon mundo, panliketan tayo lan gawaen iray labalabay tayo tan walay panaon tayon manrelaks. Agta pinalsa itayo nen Jehova ya panliketan iray sagpot tayo tan peneken iray dugan pilalek tayo? (Ecl. 2:24) Kanian seguradon ‘peneken nen Jehova iray pilalek na amin ya mabilay.’ (Sal. 145:16) Kaukolan tayo met so manrelaks, balet mas panliketan tayo itan no iyuna tayoy Jehova ed bilay tayo. Ontan met so gawaen tayod Paraiso. Agta maabig no ipasal tayo la natan ya iyuna so Panarian tan manpokus ed espiritual iran bendisyon nen say panrelaks?—Mat. 6:33.

18. Panon tayon nipanengneng ya akaparaan tayo lad bilay ya andi-anggaan diad Paraiso?

¹⁸ Diad Paraiso, seguradon malikeliket so bilay tayo. Komon ta ipanengneng tayon labalabay tayo lan naawat so peteg a bilay diad pamparaan tayo la natan. Ipanengneng tayo sirin iray kualidad ya ibabangat nen Jehova ed sikatayo tan maseseg ya ipulong so Panarian. Komon ta panliketan tayoy panlingkor ed si Jehova. Matalek itayon gawaen nen Jehova so amin ya insipan to, kanian ipanengneng tayod bilay tayo natan ya akaparaan tayo lad bilay ed balon mundo!