1, 2. 1) ¿Imatataj mosoj pachapi ruwayta munashanki? (Patapi kaj dibujota qhawariy.) 2) ¿Imastaj mosoj pachapi astawan kusichiwasun?

NOQANCHEJQA “wiñay kawsay[ta]” suyakushanchej. Apóstol Pablotaj “cheqa kaj kawsaymanta” chʼipakunata nerqa (1 Timoteo 6:12, 19 leey). Diospa ashkha kamachisnintaj kay Jallpʼa uj paraisoman tukojtin chaypi wiñaypaj kausakonqanku. Kay Jallpʼapi kausakuyta suyakushanki chayqa maytachá munashanki chay kausay chayamunallantaña. Chantapis sapa paqarin kusisqa, ni imamanta onqospa rijchʼarimunaykipi tʼukuriy (Isa. 35:5, 6). Familiaykiwan, amigosniykiwan, wañuymanta kausarimojkunawan ima kusisqa kanaykipi tʼukurillaytaj (Juan 5:28, 29; Hech. 24:15). Chantapis tiemponchej kanqa tukuy imata yachakunapaj. Sutʼincharinapaj, guitarrata, charangota, quenata, waj imasta ima tocayta yachakusun, wasista chaypi tiyakunanchejpajpis ruwayta yachakusun.

² Tukuy kay imasta suyakuspapis, Jehovata yupaychaspa astawan kusikusunchej. Tukuy runas Diospa sutinta jatunpaj qhawajtinku, Jehovata Kamachejninkuta jina kasukojtinku ima, imaynachus kausay kananpi tʼukurina (Mat. 6:9, 10). Maytachá kusikusunchej Jehovaj munayninman jina mana juchayoj  runaslla kay Jallpʼapi kausakojtinku. Chantapis pisimanta pisi juntʼa runasman tukusunchej Jehovamantaj astawan qayllaykusunchej (Sal. 73:28; Sant. 4:8).

3. ¿Imapajtaj kunan wakichikunanchej tiyan?

³ Jehová tukuy ima nisqanta juntʼananmanta mana iskayrayanchejchu. Imaraykuchus Bibliaqa Diospaj “tukuy ima atiku[sqanta]” niwanchej (Mat. 19:25, 26). Pabloqa wiñay kausayta japʼinanchejpaj mayta kallpachakunanchej kasqanta nerqa. Chayrayku kausakusqanchejwan kay pachaj tukukuynin ima ratollapis chayamunanpi creesqanchejta rikuchinanchej tiyan. Mosoj pachapi kausakuyta munanchej chayqa, kunan wakichikunanchej tiyan chaypi kausakunapaj. Imaynatachus chayta ruwananchejta qhawarina.

4. ¿Imaynatá wakichikusunman mosoj pachapi kausakunapaj? Sutʼinchay.

⁴ ¿Imaynatataj wakichikusunman mosoj pachapi kausakunapaj? Chayta entiendenapaj kaypi tʼukurina. Pillapis waj suyuman tiyakoj ripuyta munan chay, ¿imaynatataj chay suyupi tiyakunanpaj wakichikun? Ichá tukuy imata ruwanman chay suyupiñapis tiyakushanman jina. Ichapis ima qallutachus parlanku chay qalluta yachakuyta qallarinman, chay suyoj costumbresninmantapis astawan yachakunman. Chantapis chay suyumanta mikhunasta ñaupajmantaña llamirinman. Kikillantataj mosoj pachapi kausakunapaj wakin imasta chaypiñapis kashasunman jina ruwasunman. Kunantaj imastachus ruwayta atisqanchejta qhawarina.

5, 6. ¿Imaraykutaj Diospa llajtanta kasukuyta yachakunanchej tiyan?

⁵ Satanasqa munan runas munaynillankuta ruwanankuta, chayrayku ashkha runas yuyanku paykunallamanta imatapis ruwananku kasqanta, nitaj Diosta kasukunankuchu kasqanta. Ajinata yuyasqankuraykutaj mayta ñakʼarinku, nitaj kusisqachu kausakunku (Jer. 10:23). Jehovatajrí may munakuyniyoj kamachej. Mosoj pachapitaj manaña kunan jinachu kausakusunchej imaraykuchus tukuypis Diosta kasukonqanku.

⁶ Mosoj pachapi kausakuyta munanchej chayqa, niraj mosoj pachaman yaykushaspa Diospa llajtanpa nisqanta kasukuyta yachakunanchej tiyan. ¿Imaraykú? Imaraykuchus mosoj pachapeqa kay Jallpʼata uj kʼachitu huertaman tukuchinapaj, wañuymanta kausarimojkunaman yachachinapaj ima kamachiykunata japʼisunchej. Jehovaqa ashkha imasta ruwananchejpaj kamachiwasun. Chayrayku tapurikuna: “Diospa llajtan mana gustawanchu chay imasta ruwanayta niwajtin, ¿tukuy sonqochu ruwasaj?”, nispa.

7, 8. 1) ¿Imaraykutaj Diospa llajtanta kasukuyta yachakunanchej tiyan? 2) ¿Imatataj Diospa llajtan wakin hermanosman nerqa? 3) Mosoj pachapi, ¿imaynatá kausakusun?

⁷ Mosoj pachapi kausakunapaj wakichikunapajqa, mana Diospa llajtanta kasukuyllatachu yachakunanchej tiyan. Manaqa imatachus ruwananchejta ruwaspa kusisqa kayta, wajkunata yanapakuyta ima yachakunanchej tiyan. Sutʼincharinapaj, Diospa llajtan waj ruwaypi yanapakunata niwajtinchej, kallpachakunanchej tiyan tukuy sonqo yanapakunapaj, kusisqallapuni kanapaj ima. Kunanmantapacha Diospa llajtanta kasukuyta yachakusun chayqa, paraisopi Dios kamachiwasqanchejta kasukuyta atillasun (Hebreos 13:17 leey). Kunantaj tʼukurina Sumaj Jallpʼaman israelitas chayasqankutawan imachus kasqanpi. Paykunaqa maypichus tiyakunankuta mana ajllakorqankuchu,  manaqa Jehová maynejpichus sapa uj tiyakunankuta nerqa (Núm. 26:52-56; Jos. 14:1-3). Noqanchejpis mosoj pachapi ichá mana ajllakusunchu maypichus tiyakunanchejta. Chaywanpis kunanmantapacha Diospa llajtanta kasukuyta yachakusunchej chayqa, maypi tiyakuspapis Jehovata sirvispa kusisqas kasunchej.

⁸ May sumajpuni kanqa Jehovata sirviy kay Jallpʼata kamachimushajtin. Chayrayku tukuy sonqo llajtan imatachus niwasqanchejta kasukuna. Ichapis llajtanqa wakin kutis niwasun waj lugarespiñataj Diosta sirvinata. Sutʼincharinapaj, Estados Unidos sucursalpi llankʼaj wakin hermanosta manaña Betelpichu llankʼanankuta nerqanku. Qotuchakuykunata waturejkunamanta wakin hermanostapis machitusña kasqankurayku chayri waj imasrayku precursores especiales jina llankʼanankuta nerqanku. Tukuy chay hermanostaj chay mosoj llankʼayninkuwan kusisqa kashanku, Jehovataj paykunata mayta bendecishan. Noqanchejpis kusisqa kayta, Jehová bendecinawanchejta ima munanchej chayqa, Jehovamanta yanapata mañakunanchej tiyan, payta sirvinapaj tukuy imata ruwananchej tiyan, llajtan ima ruwaytapis qowasqanchejwan kusisqa kananchej tiyan (Proverbios 10:22 leey). Mosoj pachapi kashajtinchej mana munasqanchej lugarpipunichu tiyakunanchejta niwajtinchej, ¿imatá ruwasun? Cheqamantapuni, maypi tiyakuspapis, ima llankʼayta ruwaspapis, Jehovaman mayta agradecekusun mosoj pachapi tiyakojta saqewasqanchejmanta (Neh. 8:10).

9, 10. 1) ¿Imaraykutaj mosoj pachapi wakin kutis pacienciawan suyakunanchej kanqa? 2) ¿Imaynatataj pacienciayoj kasqanchejta rikuchisunman?

⁹ Mosoj pachapeqa wakin kutis ichapis pacienciawan imatapis suyakunanchej kanqa. Sutʼincharinapaj, ichapis wakinkunata rikusunchej familiaresninku, amigosninku ima wañuymanta kausarimusqankurayku kusisqa kashasqankuta. Chaywanpis noqanchejqa ichapis familiaresninchej, amigosninchej ima kausarimunankuta suyakunanchejraj kanqa. Jina kajtin, ¿kusikojkunawan kusikusunchu? ¿Pacienciawanchu suyakusun familiaresninchej, amigosninchej ima kausarimunankuta? (Rom. 12:15.) Jehová nisqasninta juntʼananta kunan pacienciawan suyakunchej chayqa, mosoj pachapi kikillantataj ruwasun (Ecl. 7:8).

¹⁰ Chantapis mosoj pachapi kausakunapaj wakichikullasunmantaj, Bibliaj wakin yachachiykunasnin waj jinamanta sutʼinchakojtin sumajta ukhunchaspa, mana entiendespataj pacienciakuspa. Pacienciayoj kasqanchejta kunan rikuchisunchej chayqa, mosoj pachapipis Jehová mosoj kamachiykunata qowajtinchej pacienciayoj kasqanchejta rikuchiyta atillasun (Pro. 4:18; Juan 16:12).

11. 1) ¿Imataj yanapallawanchejtaj mosoj pachapi kausakunapaj? 2) Wajkunata perdonayta yachakuy, ¿imaynatá mosoj pachapi yanapawasun?

¹¹ Mosoj pachapi kausakunapaj wakichikullasunmantaj wajkunata perdonayta yachakuspa. Cristo waranqa watasta kamachishajtin pisimanta pisi manaña juchasapaschu kasunchej (Hech. 24:15). ¿Mosoj pachapi pillapis pantajtin perdonayta, munakuyta rikuchiyta ima atillasunchu? Kunanmantapacha wajkunata perdonayta, wajkunawan allinta kausakuyta yachakusunchej chayqa, mosoj pachapipis kikinta ruwayta atillasun (Efesios 4:32 leey).

12. ¿Imaraykutaj kunanmantapacha kʼacha kaykunata rikuchinanchej tiyan?

¹² Jehovaqa kay tiempopi kʼacha kaykunata rikuchiyta yachachishawanchej, mosoj pachapitaj chay kʼacha kaykunallatataj  rikuchinanchej kanqa. ¿Imaraykú? Imaraykuchus mosoj pachapeqa ichapis mana tukuy ima munasqanchejpunichu tiyapuwasun. Ichapis suyakunanchej kanqa wakin imas tiyapunawanchejpaj. Chayrayku imachus kapuwasqanchejwan kusisqa kausakunanchej kanqa, Jehovamanpis tukuy tiempo agradecekunanchej kanqa. Kunanmantapacha chay kʼacha kaykunata rikuchisunchej chayqa, mosoj pachapi kausakunapaj wakichikushasqanchejta, Diosta tukuy kasukojkunawan kausakuyta munasqanchejta ima rikuchisunchej (Heb. 2:5; 11:1).

13. Mosoj pachapi, ¿imataj aswan sumaj kanqa?

¹³ Mosoj pachapeqa kusisqa kausakunapaj tukuy ima necesitasqanchej tiyapuwasun. Jinapis Jehovaj amigosnin kasqanchej astawan kusichiwasun (Mat. 5:3). Jehovata sirviy may sumaj kanqa, chayta ruwaspataj kusikusunchej (Sal. 37:4). Chayrayku mosoj pachapi kausanapaj wakichikuyta munanchej chayqa, kunanmantapacha Jehovata sirviyta may sumajpaj qhawanachej tiyan (Mateo 6:19-21 leey).

14. ¿Imaspitaj waynas chayri sipaskuna tʼukurinkuman?

¹⁴ ¿Imaynatataj Jehovata sirvispa astawan kusikusunman? Imatachus aswan qhepaman ruwananchejpi tʼukurispa. Sutʼincharinapaj, wayna chayri sipas kanki chayqa, imaynatachus aswan qhepaman Diosta sirvinaykipi tʼukuriy. Ichapis chaypajqa Diospaj astawan llankʼanaykipi tʼukuriwaj. Chayta ruwanaykipajtaj publicacionesninchejpi imaynasmantachus Diospaj astawan llankʼayta atisqaykimanta parlaj yachaqanasta tarinki. * Chantapis ashkha watastaña Diospaj astawan llankʼaj hermanoswan parlariwaj. Diosta tukuy kausayniypi sirvinki chayqa, mosoj pachapi kausakunaykipaj ashkha imasta yachakunki.

15. ¿Imastawantaj ruwasunman?

¹⁵ Tukuypis Jehová Diosta aswan sumajmanta yupaychananchejpaj mayta kallpachakusunman. Sutʼincharinapaj, waj jinasmantañataj willayta yachakusunman. Chantapis Bibliaj yuyaychaykunasninta astawan sumajta entiendenapaj kallpachakusunman, imaynatachus chayman jina kausakuytataj yachakusunman. Chantapis kallpachakullasunmantaj sumajta leerinapaj, tantakuykunapi tapuykunaman kutichinapaj, sumajta umallirichinapaj ima. Ajinata ruwasqanchejqa Jehovata sonqo  kʼajaywan sirvinapaj yanapawasunchej, mosoj pachapi kausakunapajtaj wakichiwasunchej.

16. ¿Imaraykutaj Jehovata yupaychay ni imawan kikinchakunchu?

¹⁶ Mosoj pachapi kausakunapaj wakichikuspa, ¿tiemponchejta usuchishasqanchejtachu nisunman? Mana. Jehovata sirviyqa ni imawan kikinchakunchu. Chantapis Jehovata sirvinchej mana wajkuna tanqawasqanchejraykuchu, nitaj kay sajra pacha chinkachisqa kashajtin salvakuyta munasqanchejraykuchu. Jehovaj amigosnin kayqa, astawan sumajta kausakunapaj, kusisqa kanapaj ima yanapawanchej. Jehovataj payman qayllaykunapaj ruwawarqanchej. Chayrayku paypa munakuynin, yuyaychaynin ima ni imawan kikinchakunchu (Salmo 63:1-3 leey). Jehovata tukuy sonqonchejwan yupaychasunchej chayqa, mayta kusikusunchej. Chay cheqa kasqantataj ashkha watastaña Jehovata yupaychaj hermanos kausayninkupi rikunku (Sal. 1:1-3; Isa. 58:13, 14).

17. ¿Mosoj pachapi imachus gustawasqanchejta ruwayta, kusirikuyta ima atisunchu? Sutʼinchay.

¹⁷ Mosoj pachapeqa kusisqa kausakusunchej, gustawasqanchej imastapis ruwasunchej. Imaraykuchus Jehovaqa kusisqas kausakunapaj ruwawarqanchej. Chaypaj payqa tukuy imata qonawanchejta nin (Sal. 145:16; Ecl. 2:24). Chantapis yuyarikunachej Jehovawan amigos kasqanchej aswan sumaj kajtin, aswan kusisqa kayta atisqanchejta. Mosoj pachapeqa imachus gustawasqanchejta ruwaspapis, kusirikuspapis Jehovata yupaychayta ñaupajman churasunchej. Chayrayku kunanmantapacha ajinata kausakuna, Jehovata sirvisqanchejrayku allin imasta japʼisqanchejpitaj tʼukurina (Mat. 6:33).

18. ¿Imaynatataj mosoj pachapi kausakunapaj wakichikushasqanchejta rikuchisunman?

¹⁸ Mosoj pachapi kausayqa may sumajpuni kanqa. Chaypi kausakuyta munasqanchejtataj kunanmantapacha wakichikuspa rikuchina. ¿Imaynatataj wakichikusunman? Jehová Dios yachachiwanchej chay kʼacha kaykunata rikuchispa, sumaj willaykunata sonqo kʼajaywan willamuspa ima. Chantapis Jehovata tukuy kallpanchejwan sirvispa kusikuna. Yachanchejtaj Jehová imatachus nisqanta mosoj pachapi juntʼananta. Chayrayku kunanmantapacha mosoj pachapiñapis kashasunman jina kausakunachej.