1, 2. (a) Iha mundu foun, bensaun saida mak Ita gosta tebes atu hetan? (Haree dezeñu iha leten.) (b) Saida mak sei lori solok neʼebé loloos ba ita iha mundu foun?

“MORIS NEʼEBÉ LOLOOS.” Liafuan neʼe fó-hanoin ita kona-ba moris ba nafatin iha Paraízu. Tan neʼe mak iha eskritura, apóstolu Paulo liga “moris rohan-laek” ho “moris neʼebé loloos”. (Lee 1 Timóteo 6:12, 19.) Ita hein duni ba moris neʼebé la iha rohan, moris neʼebé sei lori solok no kontente ba ita. Karik susar ba ita agora atu bele imajina iha tempu neʼebá, loroloron ita hadeer mai, ita la sente isin moras, no kontente hela deʼit. (Isaías [Yesaya] 35:5, 6) Ita bele tuur halimar ho família, kolega sira, no mós ho ema sira neʼebé foin hetan moris-hiʼas. Neʼe mak moris furak duni! (João 5:28, 29; Apóstolu 24:15) Iha tempu neʼebá, ita bele aprende buat foun barak. Ita bele iha matenek atu inventa sasán foun, aprende oinsá atu toka múzika, kanta, no halo ita rasik nia uma nia dezeñu hodi harii uma, no buat barak tan.

² Maski iha buat diʼak no bensaun barak mak hein hela ita, maibé buat ida neʼebé sei lori solok neʼebé loloos ba ita mak adora Jeová. Hanoin toʼok iha tempu neʼebá, ema hotu respeitu Jeová nia naran, no simu nia nuʼudar Ukun-Naʼin ida deʼit ba kriatura hotu iha lalehan  no rai! (Mateus 6:9, 10) Ita sei haksolok tebes atu bele haree Jeová nia hakarak ba ema no rai sai loos hotu. No hanoin toʼok, nuʼudar ita neineik-neineik sai perfeitu fali, ita bele hakbesik liután ba Jeová!—Salmo (Mazmur) 73:28; Tiago 4:8.

3. Ita tenke prepara agora ba saida?

³ Bensaun sira-neʼe bele sai ita-nian, tanba Jesus dehan: “Ba Maromak buat hotu bele deʼit.” (Mateus 19:25, 26) Maibé se ita hakarak atu hela ba nafatin iha mundu foun, agora mak tempu ba ita atu “kaer metin” ba moris rohan-laek neʼe. Ita tenke prepara an didiʼak iha ita-nia moris loroloron nian, tanba ita hatene katak mundu aat nia rohan bele toʼo mai iha tempu naran deʼit. Entaun, ita bele halo saida agora atu prepara ita-nia an hodi ita bele moris iha mundu foun?

4. Fó toʼok ezemplu ida oinsá mak ita bele prepara ba moris iha mundu foun.

⁴ Oinsá mak ita bele prepara agora atu moris iha Maromak nia mundu foun? Hanoin toʼok se ita hakarak atu muda bá hela iha rai seluk, ita presiza halo saida deʼit? Karik ita komesa ona atu aprende sira-nia lian, kultura, no koko atu han sira-nia hahán hodi ita sai toman ho hahán sira-neʼe. Karik iha moris loroloron, ita mós halo tuir moris hanesan ema iha rai neʼe nian. Hanesan neʼe mós, ohin loron ita tenke hakaʼas an atu moris tuir dalan neʼebé ita atu moris iha mundu foun. Tuirmai, ita sei haree ezemplu balu neʼebé bele ajuda ita atu prepara an.

5, 6. Oinsá mak halo tuir arranju husi Jeová nia organizasaun ohin loron ajuda prepara ita ba moris iha mundu foun?

⁵ Iha mundu foun, Maromak nia Ukun sei sai nabilan tebes tanba ninia Ukun mesak deʼit mak sei ukun mundu tomak. Neʼe la hanesan duni ho ohin loron, tanba ohin loron Satanás nia mundu book ema atu moris tuir sira rasik nia hakarak deʼit. Ema barak hili atu moris livre husi Maromak nia Ukun, maibé rezultadu aat saida mak sira hetan? Terus, susar, no la iha solok. (Jeremias [Yeremia] 10:23) Tan neʼe mak ita hakarak tebes atu haree loron ida, ema iha mundu tomak halo tuir deʼit Jeová, Ukun-Naʼin neʼebé hadomi tebes ita.

⁶ Iha mundu foun ita hakarak atu halo tuir Jeová nia arranju sira hodi halo furak mundu tomak, no hanorin ema neʼebé hetan moris-hiʼas. Maibé, oinsá se ita simu knaar ida neʼebé ita la gosta atu halo iha tempu neʼebá? Ita sei hakaʼas an atu hakarak halo tuir ka lae? Ita hotu sei hatán, hakarak! Se nuneʼe, oinsá ho ohin loron, ita hakarak halo tuir Jeová nia organizasaun ka lae? Se ita halo tuir, neʼe hatudu katak ita prepara an hela ba moris rohan-laek atu husik Jeová ukun ita iha futuru.

7, 8. (a) Tanbasá mak ita tenke rona ba sira neʼebé dirije ita? (b) Ema kristaun balu iha mudansa saida iha sira-nia moris? (c) Ita bele fiar saida kona-ba moris iha mundu foun?

⁷ Atu prepara an ba moris iha mundu foun, importante atu halo tuir arranju husi Jeová nia organizasaun ohin loron, maibé halo tuir deʼit seidauk toʼo, ita mós tenke prontu atu simu ho laran no rona malu. Se ita ohin loron mak rona ba ema sira neʼebé dirije ita no simu ho laran knaar neʼebé mak sira fó ba ita, iha mundu foun ita mós sei hatudu toman diʼak sira-neʼe. (Lee Ebreu 13:17.) Iha tempu Izraél antigu, bainhira sira tama ona ba rai promete nian, sira simu rai neʼebé fahe diʼak tiha ona ba ema ida-idak. (Números [Bilangan] 26:52-56; Josué [Yosua] 14:1, 2) Ohin loron ita seidauk hatene iha mundu foun ita ida-idak sei fahe ba atu hela iha neʼebé. Maibé, rona tuir bele ajuda ita simu ho laran, no neʼe sei lori solok ba ita, tanba atu hela iha neʼebé mós ita kontente atu halo deʼit Jeová nia hakarak.

⁸ Serbí Maromak no halaʼo knaar sira iha mundu foun mak moris neʼebé espesiál tebes. Tan neʼe mak ita hakarak halo tuir Jeová nia organizasaun ohin loron no kaer didiʼak knaar  saida deʼit mak ita simu ohin loron. Dala ruma ita-nia situasaun bele troka. Porezemplu, iha Betel Estadus Unidus irmaun-irmán balu simu knaar foun atu la serbí tan iha Betel, maibé bá fali atu haklaken ba tempu-tomak. No tanba idade no razaun seluk, sira neʼebé iha knaar atu vizita kongregasaun, agora simu fali knaar hodi sai pioneiru tempu-tomak. Irmaun-irmán sira-neʼe agora haksolok tebes ho sira-nia knaar foun neʼe, no Jeová mós fó bensaun barak ba sira. Tan neʼe mak, se ita halo orasaun atu husu Jeová nia ajuda, hakaʼas an hodi serbí nia, no haburas hahalok simu ho laran, neʼe sei lori solok ba ita no Jeová sei fó bensaun barak ba ita. (Lee Provérbios [Amsal] 10:22. *) Oinsá ho moris iha mundu foun? Karik ita hanoin diʼak tiha ona katak ita gosta atu hela iha neʼebé, maibé oinsá se Jeová nia organizasaun husu ita atu muda fali ba fatin seluk? Ita bele fiar katak iha tempu neʼebá, atu hela iha neʼebé no halo knaar saida deʼit mós sei fó solok neʼebé kleʼan ba ita, no ita sei hatoʼo agradese ba buat hotu neʼebé ita simu iha tempu neʼebá.—Neemias 8:10.

9, 10. (a) Iha mundu foun, ita presiza pasiénsia ba saida deʼit? (b) Oinsá mak ita hatudu pasiénsia ohin loron?

⁹ Iha mundu foun, karik dala ruma ita presiza hatudu pasiénsia nafatin. Porezemplu, karik ita haree ema seluk kontente tebes tanba sira-nia família ka belun ida foin hetan moris-hiʼas. Maibé ita presiza hein atu haree ita rasik nia família ka kolega hetan moris-hiʼas. Se neʼe mak akontese, ita sei haksolok ho ema sira-neʼe hodi hein ho pasiénsia ka lae? (Roma 12:15) Se ita aprende agora oinsá atu hein ho pasiénsia ba Jeová nia promesa sira, neʼe sei ajuda ita atu iha pasiénsia iha futuru.—Eclesiastes (Pengkhotbah) 7:8.

¹⁰ Pasiénsia atu komprende ba lia-loos husi Bíblia mós bele ajuda ita hodi prepara an ba moris iha mundu foun. Ita estuda ho badinas nafatin no hein ho pasiénsia ba esplikasaun foun husi Bíblia ka lae? Se ita mak pasiénsia agora, iha mundu foun mós ita sei hatudu pasiénsia bainhira Jeová fó sai neineik-neineik ninia hakarak mai ita.—Provérbios (Amsal) 4:18; João 16:12.

11. Agora daudaun, tanbasá mak Jeová hanorin ita kona-ba ita-nia relasaun ho ema seluk, no oinsá mak neʼe sei ajuda ita iha mundu foun?

¹¹ Dalan seluk neʼebé ita bele prepara an agora atu moris iha mundu foun mak aprende oinsá atu fó perdua ba malu. Durante Kristu nia Ukun ba Tinan Rihun Ida nia laran, karik presiza tempu uitoan ba ema laran-loos no ema neʼebé seidauk hatene Jeová atu halakon hotu sira-nia hahalok uluk nian. (Apóstolu 24:15) Iha tempu sira-neʼe ita bele hatudu domin no fó perdua ba malu ka lae? Se ita aprende agora oinsá atu perdua malu ho laran no hadiʼa relasaun ho ema seluk, neʼe sei fasil liu ba ita atu halo tuir iha mundu foun.—Lee Koloso 3:12-14.

12. Tanbasá mak ohin loron ita hakarak moris hanesan ita moris iha mundu foun?

¹² Karik moris iha mundu foun la dehan katak ita hakarak saida deʼit bele hetan kedas. Neʼe dehan katak iha tempu neʼebá ita presiza kontente ho situasaun saida deʼit mak ita iha. Tan neʼe mak Jeová hanorin hela ita atu hatudu hahalok sira neʼebé ita sei presiza iha mundu foun. Se ohin loron mak ita iha toman atu moris iha dalan neʼebé ita atu moris iha mundu foun, neʼe sei ajuda ita prepara an ba atu hatudu hahalok diʼak sira bainhira ita hetan ona moris rohan-laek. Neʼe mós sei ajuda ita atu hametin ita-nia fiar katak mundu foun neʼe iha tebes duni. (Ebreu 2:5; 11:1) Se ita halo tuir, neʼe hatudu katak ita rasik hakarak duni atu moris iha mundu foun, mundu neʼebé ema hotu halo tuir Jeová.

13. Iha mundu foun, atividade saida mak importante liu hotu?

¹³ Mai ita haree tan dalan ida atu prepara an ba moris neʼebé loloos iha futuru. Iha mundu foun buat hotu iha, hahán no presiza loroloron nian kompletu. Maibé buat neʼebé sei lori solok boot liu mak ita-nia relasaun diʼak ho Jeová. (Mateus 5:3) Atividade importante liu hotu iha tempu neʼebá mak atividade espirituál nian, tanba ita-nia hakarak mak atu serbí Jeová. (Salmo [Mazmur] 37:4) Se ohin loron mak ita tau uluk Jeová iha ita-nia moris, neʼe sei prepara ita ba moris neʼebé loloos iha futuru.—Lee Mateus 6:19-21.

14. Planu espirituál saida deʼit mak bele ajuda joven atu prepara an ba moris rohan-laek nian?

¹⁴ Oinsá mak ita bele kontente liu atu serbí Jeová ohin loron? Dalan ida mak halo planu espirituál nian. Se ita sei joven hela no hanoin hela atu uza tempu diʼak liután atu serbí Jeová, tanbasá la lee toʼok ita-nia livru sira neʼebé koʼalia kona-ba dalan oioin atu serbí ba tempu tomak, no hili ida atu sai planu espirituál nian ba ita? * (Haree nota iha kraik.) Karik bele koʼalia hamutuk ho sira neʼebé serbí Jeová tinan barak ona ba tempu-tomak. Se haklaken mak sai ita-nia toman moris nian ohin loron, iha mundu foun ita mós sei iha toman atu serbí Jeová, no toman neʼebé ita iha agora sei sai esperiénsia folin boot ida ba ita iha tempu neʼebá.

15. Haklaken-naʼin bele halo planu espirituál saida deʼit?

¹⁵ Nuʼudar haklaken-naʼin, ita bele halo planu espirituál saida deʼit ba ita-nia an? Karik ita bele hadiʼa diʼak liután oinsá ita bele haklaken iha dalan oioin. Ka ita bele hakaʼas an atu komprende liután Bíblia nia prinsípiu sira no oinsá mak ita bele uza prinsípiu sira-neʼe iha ita-nia moris. Karik mós bele hanoin kona-ba lee, hatoʼo diskursu, no fó komentáriu iha reuniaun sira iha dalan neʼebé diʼak liután. Ka ita rasik bele hanoin kona-ba buat seluk tan, maibé pontu importante mak neʼe: Halo planu espirituál bele ajuda ita atu halaʼo atividade espirituál ho badinas liután, no buat sira-neʼe sei ajuda ita prepara an atu moris iha mundu foun.

16. Tanbasá serbí Jeová mak dalan moris neʼebé diʼak liu hotu?

¹⁶ Bainhira ita uza ita-nia tempu atu prepara an ba moris iha Maromak nia mundu foun, neʼe dehan katak agora ita lakon ona oportunidade atu goza moris ohin loron nian ka lae? Lae duni! Serbí Jeová mak moris neʼebé furak liu buat hotu. Ita lakohi serbí Jeová tanba ema seluk mak obriga ita ka tan deʼit ita hakarak moris liu tempu terus boot nian. Ita serbí nia tanba ita hatene katak relasaun diʼak ho nia mak moris neʼebé diʼak liu hotu no lori solok boot mai ita. Jeová kria duni ita atu iha moris hanesan neʼe. Tan neʼe mak iha ita-nia moris, husik Jeová dirije ita mak moris neʼebé diʼak liu buat hotu. (Lee Salmo [Mazmur] 63:1-3. *) Tuir loloos ita la presiza atu hein toʼo mundu foun mak foin simu bensaun sira husi Jeová, agora mós ita bele hetan bensaun oioin liuhusi ita-nia serbisu ba nia. Irmaun-irmán barak mak haksolok hela ho bensaun sira-neʼe ba tempu kleur ona, no sira-nia ezemplu hatudu mai ita katak la iha dalan seluk atu moris mak diʼak liu fali serbí Jeová.—Salmo (Mazmur) 1:1-3; Isaías (Yesaya) 58:13, 14.

17. Iha mundu foun, saida mak importante liu fali atu halo buat neʼebé ita gosta ka atividade halimar nian?

¹⁷ Iha Maromak nia mundu foun, ita bele halo buat neʼebé ita gosta ka atividade halimar nian. Ita hatene ida-neʼe tanba Jeová kria ita ema ho hakarak neʼebé atu bele goza moris no goza tempu halimar nian. (Eclesiastes [Pengkhotbah] 2:24) No Jeová mós promete katak nia sei “halo kontente buat hotu neʼebé moris nia hakarak”. (Salmo [Mazmur] 145:16) Moris presiza duni atividade halimar nian no deskansa, maibé atividade sira-neʼe sei fó solok liután se buat neʼebé ita tau uluk mak ita-nia adorasaun ba Jeová. Toʼo mundu foun mós ita presiza halo nafatin hanesan neʼe. Tan neʼe mak ita tenke aprende oinsá atu goza tempu atu halo buat neʼebé ita rasik gosta maibé la haluha atu tau uluk Maromak nia Ukun iha moris, no atu kontinua tau atensaun ba bensaun espirituál sira neʼebé Jeová fó daudauk mai ita ohin loron!—Mateus 6:33.

18. Oinsá mak ita hatudu katak ita prepara an hela atu moris iha mundu foun?

¹⁸ Iha mundu foun ita sei hetan solok neʼebé ita nunka hetan iha moris agora nian. Tan neʼe mak mai ita hakaʼas an atu prepara an agora kedas ba moris neʼebé loloos. Mai ita haburas hahalok sira neʼebé Jeová gosta no badinas liután atu halaʼo serbisu haklaken ho haksolok, knaar neʼebé Jeová fó ita atu halo. Mai ita buka nafatin atu halo atividade espirituál nian ho laran no ho kontente. Ita fiar metin katak iha mundu foun Maromak sei kumpre buat hotu neʼebé nia promete ona. Tan neʼe, mai ita moris tuir dalan neʼebé ita atu moris iha mundu foun!