1, 2. 1) ¿Kʼusitik chakʼan chapas avaʼi li ta Paraisoe? (Kʼelo li lokʼol ta slikebale.) 2) ¿Kʼusitik ti mas to chijmuyubaj-o yuʼun li ta Paraisoe?

LI JTAKBOL Pabloe laj yal ti akʼo kakʼbetik yipal bu kʼalal xuʼ kuʼuntik sventa jtatik li batsʼi mero kuxlejale (kʼelo 1 Timoteo 6:12, 19). Li kuxlejal taje tstaik ta Paraiso liʼ ta Balumil jutuk mu skotoluk li yajtuneltak Diose. Mi jech apatoj avoʼontone xuʼ van amalaoj xa tajek te chakuxi. ¡Nopo xa noʼox avaʼi ti jun yutsil chavaʼi aba ta jujun sob kʼalal chalike, ti muʼyuk ipote xchiʼuk ti jun xa noʼox avoʼontone! (Isaías 35:5, 6.) Nopo xa noʼox ti lek tajek chavaʼi aba ta skoj ti te oyot xchiʼuk avutsʼ avalal xchiʼuk li avamigotake, jlom ti buchʼutik taje jaʼ li buchʼutik chaʼkuxiik xaʼoxe (Juan 5:28, 29; Echos 24:15). Jech xtok, xokolot xa noʼox sventa xapas li kʼusi oy ta avoʼontone; xuʼ van xachanbe skʼoplal tsʼiʼleletik o yan kʼusitik, xachan stijel jeltos vobetik o spasel ana.

² Pe oy to me yan kʼusitik ti mas to xijmuyubaj yuʼune. ¿Kʼusitik taje? June jaʼ ti skotol xa noʼox krixchanoetik chichʼbeik ta mukʼ li xchʼul bi Jeovae xchiʼuk ti jaʼ xa noʼox stuk ta xchʼunbeik smantal xtoke (Mateo 6:9, 10). Ta xkiltik ti chlik kʼotuk ta pasel li kʼusi laj onoʼox skʼan ta slikebal Jeova ta sventa li  krixchanoetike xchiʼuk ta sventa li Balumile. Jech xtok, kʼunkʼun chijpas ta krixchano ti mu xa kʼusi chopol ta jpastike xchiʼuk mas xa lek ta xkil jbatik xchiʼuk li Diose (Salmo 73:28; Santiago 4:8).

3. ¿Kʼu yuʼun skʼan jchapan xa noʼox jbatik li avie?

³ Lek jchʼunojtik ti jech chakʼ kʼotuk ta pasel skotol li Jeovae. ¿Kʼu yuʼun? Yuʼun xi chal li Vivliae: «Li Diose xuʼ yuʼun spasel skotol» (Mateo 19:25, 26). Li Pabloe laj yal ti skʼan xkakʼtik persa bu kʼalal xuʼ kuʼuntik sventa jtatik li kuxlejal sbatel osile. Jaʼ yuʼun, skʼan xvinaj ta jkuxlejaltik ti lek jchʼunojtik tajek ti kʼusuk noʼox ora chvul ta lokʼel li slajeb kʼusitik chopol liʼ ta Balumile. Jaʼ xa me yorail avi sventa ta jchapan jbatik mi ta jkʼan chijkuxiutik li ta Paraisoe. ¿Kʼuxi van ta jchapan jbatik un? Jkʼeltik batel.

4. Albo junuk skʼelobil ti chakʼ ta ilel kʼuxi xuʼ jchapan jbatik sventa li kuxlejal ta Paraisoe.

⁴ ¿Kʼuxi xuʼ jchapan jbatik avi sventa li kuxlejal ta Paraisoe? Nopo noʼox avaʼi ti oy buchʼu poʼot xa chbat nakluk ta yan lume. ¿Kʼuxi van chchapan sba? Ti kʼusi xuʼ xkoltaate jaʼ ti xchanbe skʼop xchiʼuk ti kʼu yelan xkuxlejalik li krixchanoetik bu chbate. Xuʼ van xlik spas preva li veʼliletik snaʼ slajesike. Pe maʼuk noʼox taje, xuʼ van spas kʼusitik sventa jech xa xkuxlejal chaʼi kʼuchaʼal li ta lum bu chbate. Taje xuʼ jech xlik jchapan jbatik sventa li kuxlejal ta achʼ balumile. Xuʼ oy kʼusitik jpas ta jkuxlejaltik sventa teuk xa chkaʼi jbatik li ta Paraisoe.

5, 6. ¿Kʼu yuʼun skʼan xa noʼox jnopes jbatik avi ta xchʼunbel smantal li s-organisasion Jeovae?

⁵ Li balumil avie koʼol xa jech snopben kʼuchaʼal li Satanase. Ep krixchanoetike tsnopik ti mu persauk ta xchʼunbeik li Diose xchiʼuk ti kʼusuk noʼox xuʼ spas ta xkuxlejalike. ¿Kʼusi kʼotem ta pasel ta skoj taje? Ep tajek chil svokol li krixchanoetike xchiʼuk mu junuk yoʼontonik (Jeremías 10:23). Yan li voʼotike jnaʼojtik ti jaʼ jun jkʼanvanej ajvalil li Jeovae. Jaʼ yuʼun ta jchʼunbetik smantal. Li ta Paraisoe mas to toj lek li kuxlejale, yuʼun skotol xa noʼox krixchanoetik ta xchʼunbeik smantal li Diose.

⁶ Sventa jchapan xa noʼox jbatik sventa li kuxlejal ta Paraisoe, skʼan jnopes xa noʼox jbatik avi ta xchʼunbel smantal li s-organisasion Jeovae. ¿Kʼu yuʼun? Yuʼun li ta Paraisoe ta xkichʼtik albel mantal sventa ta jkʼatajestik ta alakʼ sba nichimaltik li Balumile xchiʼuk sventa ta jkoltatik ta yojtikinel Jeova li krixchanoetik ti chchaʼkuxiike. Ta melel, ep tajek abtelal. Jaʼ yuʼun xi skʼan jakʼbe jbatike: «¿Mi ta jchʼun akʼo mi mu kʼupiluk chkaʼi li kʼusi tskʼanbun akʼo jpas li s-organisasion Jeovae xchiʼuk mi ta sjunul koʼonton ta jpas?».

7, 8. 1) ¿Kʼu yuʼun skʼan xa noʼox jnopes jbatik avi sventa oyuk noʼox ta koʼontontik xijkoltavan li ta s-organisasion Jeovae? 2) ¿Kʼusi oy xa albilik li jlom ermanoetike? 3) ¿Kʼu van yelan chkaʼi jbatik li ta Paraisoe?

⁷ Pe sventa jchapan jbatike, skʼan junuk noʼox koʼontontik xchiʼuk li kʼusi chij-akʼbat jpastike xchiʼuk skʼan oyuk ta koʼontontik xijkoltavan. Jech kʼuchaʼal liʼe, kʼalal oy bu achʼ tstakutik batel li s-organisasion Jeovae, chkakʼtik persa spasel xchiʼuk ti jkʼupintik spasele. Mi ta xa noʼox jnopes jbatik avi sventa oyuk noʼox ta koʼontontik xijkoltavan li ta s-organisasion Jeovae, mas xa me kʼun chkaʼitik spasel li ta Paraisoe (kʼelo Evreos 13:17). Jnoptik kʼusi kʼot ta pasel ta stojolal li j-israeletik kʼalal kʼotik li ta balumil ti albatik yuʼun Jeova ti ch-akʼbatike. Muʼyuk la stʼuj stukik bu chbat nakiikuk. Ta jujuntal albatik ti bu la sta yosilike (Números 26: 52-56; Josué 14:1, 2). Ti vaʼ yelan taje xuʼ van jech chkʼot ta pasel li ta Paraiso eke, xuʼ van mu voʼotikuk ta jtʼujtik ti bu chijnakiutike. Pe mi oy onoʼox ta koʼontontik chijkoltavan li ta s-organisasion Jeova avie, jun noʼox me koʼontontik chijtun ta stojolal, mu ventauk bu ta jta kosiltik.

⁸ Jaʼ jun matanal chkaʼitik chijtun-o ta stojolal Dios li ta Paraisoe xchiʼuk ti jaʼ tspasutik-o ta mantale. Jaʼ yuʼun ta slekil xa noʼox koʼontontik chijkoltavan avi li ta s-organisasion Jeovae. Pe xuʼ van chkichʼtik albel ti jot-o xa bu chbat tunkutike. Jech kʼuchaʼal jlom ermanoetik ti chtunik ta Betel ta Estados Unidose, oy x-albatik ti akʼo xlokʼik sventa chbat tunikuk ta yan partee. Jlom jkʼelvanejetik ta sirkuitoe oy x-albatik ti akʼo xbat tunikuk kʼuchaʼal prekursor espesial ta skoj li sjabilalike o yan kʼusitik. Skotol li ermanoetik taje tskʼupinik tajek li kʼusitik tspasike xchiʼuk yakal ch-akʼbatik tajek bendision yuʼun li Jeovae. ¿Kʼusi skʼan jpastik mi ta jkʼan jun noʼox koʼontontik ek xchiʼuk mi ta jkʼantik chakʼbutik sbendision li Jeovae? Skʼan jkʼanbetik koltael li Jeovae, tunkutik ta stojolal ti bu kʼalal xuʼ kuʼuntike xchiʼuk skʼan junuk noʼox koʼontontik xchiʼuk li kʼusi chij-akʼbat spasele (kʼelo Proverbios 10:22). Kaltik noʼox ti oy ta koʼontontik bu ta jkʼan chijnaki kʼalal te xaʼox oyutik li ta Paraisoe, ¿kʼusi van ta jpastik mi laj yalbutik s-organisasion Dios ti jot-o bu chbat naklikutike? Ta melel mu ventauk bu ta xijnaki o kʼusi abtelal xkichʼtik akʼbel, yuʼun jaʼ noʼox ta jtojbetik ta vokol Jeova ti chakʼ xijnaki li ta Paraisoe (Nehemías 8:10).

9, 10. 1) ¿Kʼu van yuʼun skʼan xkakʼtik ta ilel smalael kuʼuntik li ta Paraisoe? 2) ¿Kʼuxi xuʼ xkakʼtik ta ilel ti oy smalael kuʼuntik li avie?

⁹ Xuʼ van skʼan xkakʼtik ta ilel smalael kuʼuntik kʼalal te xaʼox oyutik li ta Paraisoe. Xuʼ van chkiltik ti jun xa noʼox yoʼontonik yantik kʼalal chchaʼkuxiik tal li yutsʼ yalalik xchiʼuk yamigotakike. Pe xuʼ van skʼan oyuk smalael kuʼuntik sventa xchaʼkuxiik tal li kutsʼ kalaltike. Mi jech kʼot ta pasel ta jtojolaltike, ¿mi ta van xijmuyubaj ta skoj li yantike xchiʼuk chkakʼtik ta ilel li smalael kuʼuntike? (Romanos 12:15.) Mi oy smalael kuʼuntik avi ta sventa li kʼusitik yaloj tspas Jeovae, ta melel oy me smalael kuʼuntik li ta jelavel eke (Eclesiastés 7:8).

¹⁰ Jech xtok, kʼalal oy chjel ti kʼu yelan chkaʼitik junuk chanubtasel li ta jvuntike xuʼ chkakʼtik ta ilel ti oy smalael kuʼuntike, mi jech la jpastike, jaʼ me jech ta jchapan jbatik sventa li kuxlejal ta Paraisoe. ¿Mi ta jsabetik lek smelolal kʼalal oy kʼusi chjele? Kʼalal oy kʼusi mu xkaʼibetik lek smelolal ta anile, ¿mi oy smalael kuʼuntik? Mi oy smalael kuʼuntik li avie, mas xa me kʼun chkaʼitik sventa oyuk smalael kuʼuntik xtok kʼalal chakʼbutik achʼ mantaletik ta Paraiso li Jeovae (Proverbios 4:18; Juan 16:12).

11. ¿Kʼu yuʼun skʼan jchantik yakʼel perton li avie?

¹¹ Kʼalal chkakʼbetik perton li yantike jaʼ me jech ta jchapan jbatik sventa li kuxlejal ta Paraisoe. Li ta Jmil Jabil ch-ajvalilaj li Kristoe, jkotoltik kʼunkʼun chijpas ta krixchanoetik ti muʼyuk xa jchopoliltike xchiʼuk jech chkʼot ta pasel ta stojolal li buchʼutik chchaʼkuxiike (Echos 24:15). ¿Mi ta van xkakʼbetik perton xchiʼuk ta jkʼuxubintik kʼalal oy kʼusi chopol tspasik ta jtojolaltik li yantike? Mi la jchantik yakʼel perton li avi noʼoxe, mas xa me kʼun chkaʼitik ti lek xkil jbatik xchiʼuk yantik li ta Paraisoe (kʼelo Kolosenses 3:12-14).

12. ¿Kʼu yuʼun skʼan xkakʼtik ta ilel jtalelaltik jech kʼuchaʼal chal Jeova ti akʼo jpastik li avie?

¹² Kʼalal te xaʼox oyutik li ta Paraisoe  skʼan xkakʼtik ta ilel jtalelaltik jech kʼuchaʼal chal Jeova ti akʼo jpastik li avie. ¿Kʼu yuʼun? Yuʼun li ta Paraisoe xuʼ van mu jtatik skotol li kʼusitik tskʼan koʼontontike. O moʼoj xtoke, xuʼ van persa ta jmalatik sventa jtatik li kʼusitik ta jkʼantike. Skʼan jchantik ti junuk noʼox koʼontontik yuʼun li kʼusitik ta jtatike xchiʼuk ti jtojtik noʼox ta vokole. Mi jech jtalelaltik avi kʼuchaʼal taje, yakal me chkakʼtik ta ilel ti ta jchapan xa jbatik sventa xijnaki li ta Paraisoe xchiʼuk ti ta jkʼan xijnaki ta jun balumil ti jkotoltik xa noʼox oy ta koʼontontik ta jchʼunbetik smantal li Jeovae (Evreos 2:5; 11:1).

13. ¿Kʼusi ti mas tsots skʼoplal chkaʼitik kʼalal te xaʼox oyutik li ta Paraisoe?

¹³ Li ta Paraisoe ta xa noʼox jtatik skotol li kʼusitik chtun kuʼuntik sventa jun noʼox koʼontontike. Pe li kʼusi mas chijmuyubaj-o yuʼune jaʼ ti lek tajek xkil jbatik xchiʼuk li Jeovae (Mateo 5:3). Jaʼ xa noʼox mas tsots skʼoplal chkaʼitik ti chijtun ta stojolal Jeovae, xchiʼuk xijmuyubaj xa noʼox tajek yuʼun (Salmo 37:4). Jaʼ yuʼun, mi ta jkʼan ta jchapan jbatik sventa li kuxlejal ta Paraisoe, skʼan jaʼuk mas tsots skʼoplal xkiltik avi ti chijtun ta stojolal Jeovae (kʼelo Mateo 6:19-21).

14. ¿Kʼuxi xuʼ skʼupinik mas yabtel Jeova li kerem tsebetike?

¹⁴ ¿Kʼuxi xuʼ jkʼupintik mas li yabtel Jeovae? Jaʼo kʼalal mas chijtun ta stojolale. Jaʼ yuʼun, mi kerem tsebot toe nopo kʼuxi xuʼ xatunes akuxlejal sventa chapasbe li yabtel Diose. Xuʼ van xatun ta tsʼakal ora. Li ta jvuntike xuʼ xatabe jeltos skʼelobiltak ti kʼusitik xuʼ xapase. * Jech xtok, xuʼ xachiʼin ta loʼil ermanoetik ti jal xa tunemik ta tsʼakal orae. Mi ta noʼox xatunes akuxlejal sventa li yabtel Jeovae, ep kʼusitik chachan ti chchapanot sventa li kuxlejal ta Paraisoe.

15. ¿Kʼusitik yan xuʼ jpastik sventa xlekub batel ti kʼu yelan chijtun ta stojolal Diose?

¹⁵ Jkotoltik ep kʼusitik xuʼ jpastik sventa mas to chlekub batel ti kʼu yelan chijtun ta stojolal Diose. Ta skoj ti ep xa kʼutik yelan achʼ xuʼ jcholtik mantale, xuʼ jech xlik jpastik. Jech xtok, xuʼ jkʼeltik kʼuxi xuʼ mas xkakʼ ta jkuxlejaltik li tojobtaseletik ta Vivliae. Xuʼ jlekubtastik ti kʼu yelan ta jkʼeltik vune, ti kʼu yelan chkakʼ jloʼiltik ta tsobajele xchiʼuk ti kʼu yelan ta xketʼes jpartetike. Jvules ta joltik, ti mi mas lijtun  ta stojolal Diose, mas me xijmuyubaj xchiʼuk mas chchapanutik sventa li kuxlejal ta Paraisoe.

16. ¿Kʼu yuʼun xuʼ xkaltik ti mas to oy sbalil jkuxlejaltik kʼalal chijtun ta stojolal li Jeovae?

¹⁶ Mi lik jchʼakbetik yorail sventa ta jchapan jbatik sventa li kuxlejal ta Paraisoe, ¿mi oy van kʼusi chkiktatik skʼupinel li avie? Muʼyuk. Ti chijtun ta stojolal Jeovae jaʼ ti kʼusi mas lek xuʼ jpas ta jkuxlejaltik avie, jaʼ sventa ti la spasutike. Maʼuk chijtun ta stojolal ta skoj ti oy buchʼu tsujutike o sventa noʼox kuxul xijkom li ta slajeb kʼusitik chopol liʼ ta Balumile. Ti jech chijtun ta stojolal Diose xchiʼuk ti chkamigoin jbatik xchiʼuke, mas chlekub li jkuxlejaltike xchiʼuk mas jun koʼontontik. Mu kʼusi xkoʼolaj-o li kʼanelal xchiʼuk li beiltasel chakʼbutik ta ilele (kʼelo Salmo 63:1-3). Mi ta sjunul koʼontontik ta xkichʼtik ta mukʼ li Jeovae mas xa noʼox me jun koʼontontik. Li buchʼutik jal xa tajek tunemik talel ta stojolal li Jeovae yakʼojik lek venta ti mas to oy sbalil jkuxlejaltik kʼalal jech ta jpastike (Salmo 1:1-3; Isaías 58:13, 14).

17. Albo smelolal mi xuʼ jchʼay koʼontontik xchiʼuk jkuxtik li ta Paraisoe.

¹⁷ ¿Mi xuʼ van jchʼay koʼontontik xchiʼuk jkuxtik li ta Paraisoe? Tana. Yuʼun kʼalal la spasutik li Jeovae, la spasutik sventa oyuk ta koʼontontik skʼupinel li kuxlejale. Jamal yalojbutik ti chakʼbutik li kʼusitik tskʼan koʼontontike (Salmo 145:16; Eclesiastés 2:24). Pe jvules me ta joltik ti kʼalal mas lek xkil jbatik xchiʼuk li Jeovae, mas ta jkʼupintik ti ta jchʼay koʼontontike xchiʼuk ti ta jkuxtike. Jaʼ yuʼun, li ta Paraisoe ta jkux koʼontontik xchiʼuk ta jchʼay koʼontontik, pe li kʼusi mas tsots skʼoplale jaʼ ti ta jpasbetik yabtel li Jeovae. Jech oxal, jechuk xa noʼox xkil ta jkuxlejaltik taje xchiʼuk jaʼ kakʼ ta koʼontontik li bendisionetik ta jtatik ta skoj ti jech chijtun ta stojolale (Mateo 6:33).

18. ¿Kʼuxi chkakʼtik ta ilel ti yakal xa ta jchapan jbatik sventa li kuxlejal ta Paraisoe?

¹⁸ Li avie mu xa noʼox xnop kuʼuntik kʼu to yutsil li kuxlejal ta Paraisoe. Jaʼ yuʼun kakʼtik ta ilel ti ta xa noʼox jchapan jbatik sventa xuʼ jkʼupintike. ¿Kʼuxi ta jpastik taje? Jaʼ ti xkakʼtik ta ilel jtalelaltik jech kʼuchaʼal chal Jeova ti akʼo jpastike xchiʼuk ti ta sjunul koʼontontik ta jcholtik mantale. Jkʼupintik ti ta sjunul koʼontontik chijtun ta stojolal Jeovae. Skotol li kʼusi yaloj tspas ta Paraiso li Jeovae, xuʼ jchʼuntik ti tspas ta melele. Jaʼ yuʼun, akʼo vinajuk ta jkuxlejaltik avi ti te xa nakalutik yaʼeluke.