1, 2. (a) Mang boch ban’en ni ga be athapeg ni ngam rin’ u Paradis? (Mu guy e sasing ni bay u tabolngin e re article ney.) (b) Mang e ra yibnag e bin th’abi ga’ e felfelan’ ngodad u lan e bin nib beech e fayleng?

 “BIN RIYUL’ E YAFOS.” Yooren i gadad e ra rung’ag e re thin ney ma ma yib ngan’rad e athap rodad ko yafos ndariy n’umngin nap’an u Paradis u fayleng. Bin riyul’ riy e, yog apostal Paul ni “yafos ndariy n’umngin nap’an” e aram e “bin riyul’ e yafos.” (Mu beeg e 1 Timothy 6:12, 19.) Gad gubin ni gad be athapeg ni nge yag e re yafos ney ngodad ni aram e yafos ndariy n’umngin nap’an nra yibnag e felfelan’ ngodad. Chiney e kab mo’maw’ rogon ni ngad lemnaged rarogodad ko ngiyal’ nem ni gubin e kakadbul ni gad ra od ma gad be thamiy ni be fel’ fithik’ i dowdad i yan, ma gad ba felfelan’, mab fel’ e yafos rodad u wan’dad. (Isa. 35:5, 6) Am lemnag gelngin e felfelan’ ni gad ra tay ni ngad chaggad e piin ni yad ba t’uf rodad nge pi fager rodad u taabang ni kub muun ngay e piin ni kan fasegrad ko yam’! (John 5:28, 29; Acts 24:15) Ku ra taw ko ngiyal’ nem ma ke yib e tayim rodad nrayog ni ngad filed boch ban’en nib beech, ni bod ni ngad filed murung’agen boch ban’en, ara ngad filed rogon i chubeg ba mit e talin e musik, ara ngad filed rogon ni ngad toyed e naun rodad, ara ku boch e salap.

² Yugu aram rogon ni gad be athapeg ni ngad rin’ed e pi n’ey u lan e bin nib beech e fayleng, machane pigpig ni gad ra tay ngak Jehovah e aram e bin th’abi fel’ e tow’ath nra yibnag e felfelan’ ngodad e ngiyal’ nem. Rib gel e felfelan’ ni gad ra tay u nap’an ni gad ra nang ni gubin e girdi’ ni yad be  tayfan fithingan Jehovah nib thothup maku yad be tayfan mat’awun e gagiyeg rok! (Matt. 6:9, 10) Kub gel e felfelan’ ni gad ra tay u nap’an ni gad ra guy ni ke lebug e n’en ni lemnag Jehovah ni fan ko fayleng nge girdi’ aram ko tabolngin. Kum lemnag rogon feni mom ni ngad chugurgad ngak Jehovah u nap’an ni gad be flont i yan ni buchuuw ma buchuuw nge taw ko ngiyal’ ni kar da flontgad nib polo’.​—Ps. 73:28; Jas. 4:8.

3. Mang e susun ni ngad fal’eged rogodad ni fan ngay ni ka chiney?

³ Rayog ni nge yag e pi tow’ath ney ngodad, ya yog Jesus ni “Got e urngin ban’en ma rayog rok.” (Matt. 19:25, 26) Machane, faanra gad baadag ni ngad uned ko par u lan e bin nib beech e fayleng ngki yan i mada’ nga tomuren e Gagiyeg Nra Tay Kristus u Lan Fare Biyu’ i Duw, ma ka chiney e thingar da guyed rogon ni nge ‘yog’ e re athap ney ngodad ni aram e yafos ndariy n’umngin nap’an. Thingar ud pared ni gad be sonnag e ngiyal’ ni yira thang e re m’ag nib kireb ney riy, ma kub t’uf ni ngad rin’ed boch ban’en e chiney ya nge yag nda fal’eged rogodad ni fan ko par u lan e bin nib beech e fayleng. Ere, uw rogon ni ngad rin’ed e re n’ey ni ka gad bay u lan e re m’ag nib kireb ney?

4. Mu susunnag rogon nrayog ni ngad fal’eged rogodad ni fan ko par ni gad ra tay u lan e bin nib beech e fayleng.

⁴ Uw rogon ni ngad fal’eged rogodad e chiney ni fan ko par u lan e bin nib beech e fayleng? Susun ni faanra gad be lemnag ni nga darod da pared nga yugu reb e nam, ma uw rogon ni ngad fal’eged rogodad ni fan ko par ni gad ra tay u rom? Sana gad ra tabab i fil e thin ko re nam nem. Mu kud filed murung’agen e yalen ko girdi’ riy. Ngemu’ ma sana ku gad ra gay rogon ni ngad ri’ed lamen e ggan ni yad ma kay. Maku reb e, ku gad ra guy rogon ni ngad thilyeged rogon e par rodad ya nge m’ag nga rogon e par ko girdi’ ko fare nam, ya aram rogon ni gad baadag ni ngad pared u nap’an ni gad ra taw ko fare nam. Ere, ku arrogon e chiney nrayog ni ngad fal’eged rogodad ni fan ko par u lan e bin nib beech e fayleng ni aram e ngad athamgilgad u rogon nrayog rodad ni nge m’ag e par rodad ko par ni gad ra tay e ngiyal’ nem. Ere, chiney e ngad weliyed boch e kanawo’ nrayog ni ngad rin’ed e re n’ey riy.

5, 6. Faanra ud folgad ko pi n’en ni be yarmiy e ulung rok Jehovah ni ngan rin’ e chiney, ma uw rogon nra ayuwegdad ko par ni gad ra tay u lan e bin nib beech e fayleng?

⁵ Gubin e girdi’ ni yad ra un ko par u lan e bin nib beech e fayleng e yad gubin ni yad ra tayfan mat’awun e gagiyeg rok Got. Rib thil e re n’ey nga rogon e lem ni ma tay e girdi’ ko re fayleng rok Satan ney nra be’ ma be lemnag nrayog ni nge rin’ e n’en ni baadag. Boor i yad e ma lemnag nib ga’ fan ni nge be’ me par rok ma de t’uf ni ngan fol rok Got. Machane, mang wenegan ni ke yib riy? Bochan ni boor e girdi’ ndarur folgad ko fonow rok Got ma aram fan ni ke yoor e gafgow nge boch ban’en ni ma buch nri ma kireban’ e girdi’ ngay. (Jer. 10:23) Aram fan nri gad be athapeg ni nge taw ko ngiyal’ nra tay urngin e girdi’ fan mat’awun e gagiyeg rok Jehovah!

⁶ Gad ra felfelan’ ni ngad folgad ko pi yaram nra fal’eg e ulung rok Jehovah rogon ni ngan fol riy u lan e bin nib beech e fayleng ma gad maruwel u taabang ni ngad fal’eged e re fayleng ney nge manigil, maku gad be skulnag e piin ni kan fasegrad ko yam’, maku gad be rin’ e n’en nib m’agan’ Jehovah ngay ni fan ko girdi’. Machane, uw rogon ni faanra ka nog ngodad ni ngad rin’ed ban’en ni gathi ri gad baadag? Gad ra fol ko n’en ni ka nog ngodad ma gad rin’ e re maruwel nem u rogon nrayog rodad mu kud rin’ed ni gad ba felfelan’ ngay, fa? Yooren i gadad e ra gaar, arrogon! Machane, uw rogon e chiney, gad be fol ko pi n’en ni be yarmiy e ulung rok Jehovah ni ngan rin’, fa? Faanra gad be fol, ma aram e gad be fal’eg rogodad ni fan ko par ni gad ra tay u tan e gagiyeg rok Jehovah ndariy n’umngin nap’an.

7, 8. (a) Mang fan nsusun e ngad guyed rogon ni ngaud folgad rok e piin ni yad ma yog e thin rodad? (b) Mang boch ban’en ni ke thil u rogon e par rok boch e Kristiano? (c) Mang e rayog ni nge pagan’dad ngay u rogon e par rodad u lan e bin nib beech e fayleng?

⁷ Ra ngad fal’eged rogodad ni fan ko par u lan e bin nib beech e fayleng, ma gathi kemus ni ngad folgad ko yaram u lan e ulung rok Jehovah e ngiyal’ ney, ya ngkud gayed rogon e chiney ni nga i fel’ u wan’dad e pi n’en ni bay rodad ma ngkud maruwelgad u taabang nib taareban’dad. Faanra ud folgad ko piin ni yad ma yog e thin rodad e ngiyal’ ney, ni bod ni nge m’agan’dad ko maruwel ni kan pi’ ngodad ni ngad rin’ed, maku aram rogon ni gad ra rin’ u nap’an ni gad ra yan  nga lan e bin nib beech e fayleng. (Mu beeg e Hebrews 13:17.) Nap’an ni immoy piyu Israel ko fare Nam ni Kan Micheg, ma pi binaw nni pi’ ngorad e ni f’oth u dakenrad nib fel’ rogon. (Num. 26:52-56; Josh. 14:1, 2) Ere, dad nanged ko uw e yira pi’ ngodad ni ngad pared riy u lan e bin nib beech e m’ag. Machane, faan gad ra fil rogon ni ngaud folgad ko pi yaram ni yima fal’eg e chiney, mab mudugil ndemtrug e gin ni yira pi’ ngodad ni ngad pared riy u lan e bin nib beech e fayleng ma ra fel’ u wan’dad maku gad ra felfelan’ ngay.

⁸ Rriyul’ nri gad ba tow’ath ni ngad pigpiggad ngak Got u tan e gagiyeg nra tay Gil’ilungun u lan e bin nib beech e fayleng! Ere, aram fan nri gad ba felfelan’ ngay e chiney ni ngaud folgad ko ulung rok ma gad be rin’ e pi maruwel ni kan pi’ ngodad ni ngad rin’ed ndemtrug ko mang. Machane, rayog ni nge munmun me thil e maruwel ni kan pi’ ngodad ni ngad rin’ed. Bod nu Meriken e bay boch e walag riy ni ur pigpiggad u Bethel kafram ni kar sulod yad be machib e chiney u polo’ e tayim rorad. Ku bay boch e walag ni ur lekaged e ulung kafram ni kan tayrad ni ngar manged special pioneer e chiney ni bochan e kar pilibthirgad ara ku bochan boch e magawon. Ba felfelan’ e pi walag ney ko pi maruwel ney ni kan pi’ ngorad, ma be tow’athnagrad Jehovah ni bochan. Ere, faanra i fel’ u wan’dad e pi n’en ni bay rodad, ma gad meybil ngak Got ni nge ayuwegdad, ma gad rin’ e tin nrayog rodad ni fan ko pigpig ni gad be tay ngak, ma rayog ni ngad pirieged e felfelan’ miki yag boor e tow’ath ngodad ni yugu aram rogon ni gad be par ko tin tomuren e rran. (Mu beeg e Proverbs 10:22.) Ma uw rogon e par rodad boch nga m’on? Rayog ni sana bay bang ni ir e gad be lemnag ni ngad pared riy u nap’an ni gad ra yan nga lan e bin nib beech e fayleng. Machane, rayog ni nga darod e ngaram mi nog ngodad ni nga darod da pared nga yugu bang. Demtrug e gin ni gad ra par riy nge n’en ni gad ra rin’, ma rayog ni nge pagan’dad ni gad ra felfelan’ ko f’oth rodad ni yira pi’, maku ra fel’ u wan’dad.​—Neh. 8:10.

9, 10. (a) Mang fan nra t’uf ni ngad gum’an’niged gadad u nap’an ni gad ra yan nga lan e bin nib beech e fayleng? (b) Uw rogon ni ngaud gum’an’niged gadad e chiney?

⁹ Nap’an ni gad ra yan nga lan e bin nib beech e fayleng, ma bay yu ngiyal’ nra t’uf ni ngad gum’an’gad. Bod nrayog ni ngad rung’aged murung’agen boch e girdi’ ni kar ra felfelan’gad ni bochan e kan faseg chon e tabinaw rorad nge pi fager rorad ko yam’. Machane, gadad e ka gad be son ni ngan faseg e piin ni yad ba t’uf rodad ni kar m’ad. Faanra aram rogon, ma gur, gad ra gum’an’niged gadad ma gad un ngak e pi girdi’ nem ko felfelan’, fa? (Rom. 12:15) Gad ra fil rogon ni ngad gum’an’niged gadad ngad sonnaged Jehovah ni nge lebguy e pi n’en ni ke micheg ni fan ngodad e ngiyal’ ney, ma ra ayuwegdad ni ngad gum’an’niged gadad e ngiyal’ nem.​—Ekl. 7:8.

¹⁰ Ku reb e kanawo’ ni ngad fal’eged rogodad ni fan ko par u lan e bin nib beech e fayleng e aram e ngaud gum’an’niged gadad u nap’an ni yira thilyeg rogon ni yibe weliy boch ban’en ko machib rodad. Gad ma fil e pi machib ney ni yima tay nga lan e pi babyor rodad, ma gad ma gum’an’niged gadad ni faanra der tamilang boch ban’en riy u wan’dad, fa? Faanra aram rogon, ma ra mom ngodad ni ngad gum’an’niged gadad u nap’an nra yog Jehovah ban’en nib beech ni ngad rin’ed u nap’an ni gad bay u lan e bin nib beech e fayleng.​—Prov. 4:18; John 16:12.

11. Mang fan nsusun e ngad filed rogon ni nga i bagadad me n’ag fan e kireb rok bagadad e chiney? Uw rogon nra ayuwegdad e re n’ey u nap’an ni gad ra yan nga lan e bin nib beech e fayleng?

¹¹ Ku reb e kanawo’ ni ngad fal’eged rogodad ni fan ko par u lan e bin nib beech e fayleng e aram e ngad filed rogon ni nga i bagadad me n’ag fan e kireb rok bagadad. Ra taw nga nap’an e Gagiyeg Nra Tay Kristus u Lan Fare Biyu’ i Duw, mab mudugil nra flont gubin e girdi’ i yan ni buchuuw ma buchuuw. (Acts 24:15) Ere gur, rayog ni nga i bagadad me t’ufeg bagadad me bagadad mi i n’ag fan e kireb rok bagadad, fa? Faan gad ra fil rogon ni nge bagadad mi i n’ag fan e kireb rok bagadad, mu ud guyed rogon ni nga i par thildad nib fel’ e chiney, ma ra taw ko ngiyal’ nem ma ke mom.​—Mu beeg e Kolose 3:12-14.

12. Mu weliy rogon nib peth rogon e par rodad e chiney ko par ni gad ra tay u lan e bin nib beech e fayleng.

¹² Maku reb e, nap’an ni gad ra yan nga lan e bin nib beech e fayleng ma sana gathi gubin ngiyal’ nra i yag ngodad e tin ni gad baadag ko ngiyal’ ni gad baadag ni nge yag ngodad riy. Ya ra t’uf ni ngaud pininged e magar ko pi n’en ni kan pi’ ngodad me fel’ u wan’dad.  Bin riyul’ riy e, pi fel’ngin ni be fil Jehovah ngodad rogon ni ngaud daged e chiney e ka aram e pi fel’ngin nra t’uf ni ngaud daged e ngiyal’ nem. Ere, faan gad ra fil rogon e binem e par ni ka chiney, ma aram e gad be fil rogon ni nge yag boch e fel’ngin ngodad nra t’uf ni nge m’ug ko ngongol rodad u nap’an ni ke yag e yafos ndariy n’umngin nap’an ngodad. Maku reb e, gad be fil rogon ni ngari mich u wan’dad e bin nib beech e “fayleng” ni kan micheg. (Heb. 2:5; 11:1) Maku reb e, faan gad ra rin’ e pi n’ey e chiney ma aram e gad be dag nriyul’ ni gad baadag ni ngad pared u reb e fayleng ni gubin e girdi’ riy ni yad ma fol rok Jehovah.

13. Mang e n’en nra par nib m’on u lan e yafos rodad u nap’an ni gad ra yan nga lan e bin nib beech e fayleng?

¹³ Ku bay taab n’en ni ku ra ayuwegdad ni ngad fal’eged rogodad ni fan ko par u lan e bin nib beech e fayleng. Yugu aram rogon ni ke micheg Got ngodad nra pi’ urngin e tin nib t’uf rodad u lan e bin nib beech e fayleng, machane gad manang ni tha’ u thildad Jehovah e aram e n’en nra gelnag e felfelan’ rodad e ngiyal’ nem. (Matt. 5:3) Nap’an ni gad ra yan e ngaram ma gad ra fanay yooren e tayim rodad ni fan ko pigpig ni gad ra tay ngak Jehovah, maku gad ra felfelan’ ko pigpig ni gad ra tay ngak. (Ps. 37:4) Ere, faanra ud m’oneged e tirok Got ban’en e chiney, ma aram e gad be fal’eg rogodad ni fan ko bin riyul’ e yafos ni ka bay nga m’on.​—Mu beeg e Matthew 6:19-21.

14. Mang boch ban’en nrayog ni nge nameg e piin fel’ yangaren ni fan ko pigpig ni yad be tay ngak Jehovah?

¹⁴ Uw rogon ni nge gel boch e felfelan’ ni gad be tay ko pigpig ni gad be tay ngak Jehovah? Reb e kanawo’ e aram e ngad nameged boch ban’en ni fan ko tirok Got ban’en. Faanra kab fel’ yangarem, ma gur, ga be lemnag reb e maruwel ni ngam rin’ ni fan ngak Jehovah, fa? Mang ndab mu beeg boch e article u lan e pi babyor rodad ni be weliy murung’agen boch e maruwel nrayog ni ngam rin’ ni fan ngak Jehovah u polo’ e tayim rom, ngemu’ mag nameg reb e pi maruwel ney? * Rayog ni ngam non ngak boch e walag ni ke yoor e duw ni kar pigpiggad u polo’ e tayim rorad. Faan ga ra fanay e yafos rom ni ngam pigpig ngak Got, ma aram e ga be fal’eg rogom ni fan ko pigpig ni ga ra tay ngak u lan e bin nib beech e fayleng. Ma gad manang ni aram e gin ni gad ra fanay urngin e salap ni ke yag ngodad riy ni fan ko tirok Got ban’en.

15. Mang boch ban’en nrayog ni ngad nameged ni gad boch e tamachib ni gad be machibnag murung’agen Gil’ilungun Got?

¹⁵ Mang boch ban’en nrayog ni ngad nameged ni fan ko tirok Got ban’en ni gad boch e tamachib ni gad be machibnag murung’agen Gil’ilungun Got? Rayog ni ngad nameged ni nge mon’og e salap rodad ko machib u yugu boch e kanawo’. Fa reb e da athamgilgad ni ngad ga’naged e tamilangan’ rodad u murung’agen e pi kenggin e motochiyel u Bible nge rogon nrayog ni ngad fanayed ko par rodad. Maku reb e, rayog ni  ngad guyed rogon ni ngad mon’oggad u rogon ni gad ma non u fithik’ e girdi’ ni yoor, ara rogon ni gad ma beeg e babyor, ara rogon ni gad ma pi’ e fulweg u nap’an e muulung. Ba mudugil ni ku boor ban’en nrayog ni ngam lemnag. Machane n’en nib ga’ fan e: Faan ga ra nameg boch ban’en ni fan ko tirok Got ban’en, ma rayog ni nge ayuwegem ni ngam pasig ko pigpig ni ga be tay, miki ayuwegem ni ngam fal’eg rogom ni fan ko par u lan e bin nib beech e fayleng.

16. Mang fan ni pigpig ni gad be tay ngak Jehovah e aram e bin th’abi fel’ kanawoen e yafos?

¹⁶ Faan gad ra fanay e tayim rodad e chiney ni ngad fal’eged rogodad ni fan ko par u lan e bin nib beech e fayleng, ma aram e be yip’ fan ni bay boch ban’en nib fel’ ko re fayleng ney nder yag ngodad, fa? Danga’, ya pigpig ni gad be tay ngak Jehovah e aram e bin th’abi fel’ kanawoen e yafos. Darud pigpiggad ngak ni bochan e yibe towasariydad ni ngad rin’ed ara bochan ni dubdad ni ngad m’ad u nap’an fare gafgow nib ga’. Kan sunmiydad ni ngad pigpiggad ngak Got, ma kemus rogon nrayog ni ngad pirieged e bin riyul’ e felfelan’. Kab fel’ ni ngad paged Jehovah ni nge pow’iydad mu ud pared ni gad ba t’uf rok ko bin ni ngad pared ni gad ba palog rok. (Mu beeg e Psalm 63:1-3.) Riyul’ nde t’uf ni ngad songad ni nga fin darod nga lan e bin nib beech e fayleng ma gad felfelan’ ko pi tow’ath ni ma yag ngodad ko pigpig ni gad ma tay ngak Jehovah, ya rayog ni nge yag ngodad e chiney! Arrogon, bay boch i gadad ni ke yoor e duw ni ke pigpig ngak Got, ma rayog ni nga rogned ni ireray e bin th’abi fel’ kanawoen e yafos.​—Ps. 1:1-3; Isa. 58:13, 14.

17. Nap’an ni gad ra yan nga Paradis, maku gad ra rin’ boch ban’en ni ngad felfelan’gad ngay, fa?

¹⁷ Nap’an ni gad ra yan nga Paradis, maku gad ra rin’ boch ban’en ni ngad felfelan’gad ngay. Am lemnag, faanra de lemnag Jehovah ni ngaud felfelan’gad, me ere mang fan ni ke sunmiydad ni gad baadag ni ngaud rin’ed boch ban’en ni ngad felfelan’gad ngay? (Ekl. 2:24) Ere, aram fan nra pi’ Jehovah e tin ni gad baadag ‘nge yan i aw ni ke fel’ u wun’dad ni gad gubin e tin ni ke yog ngodad.’ (Ps. 145:16) Ba t’uf rodad ni ngaud rin’ed boch ban’en ni ngad felfelan’gad ngay, ma kub t’uf ni ngaud toffangad, machane rayog ni ngar da felfelan’gad ko pi n’ey ni faanra m’on u wan’dad e tha’ u thildad Jehovah. Maku aram rogon u nap’an ni gad ra yan nga Paradis. Ere, aram fan ni gad ba gonop ni faan gad ra m’oneg e tin nib m’agan’ Got ngay nge pi tow’ath ni be yag riy ngodad me tomur e tirodad ban’en!​—Matt. 6:33.

18. Uw rogon ni nge m’ug ni gad be fal’eg rogodad ni fan ko yafos ndariy n’umngin nap’an u Paradis?

¹⁸ Dariy ban’en nrayog ni ngan taarebrogonnag nga gelngin e felfelan’ ni gad ra tay u nap’an ni gad ra yan nga Paradis. Ere, manga yugu da athamgilgad ni ka chiney ngad fal’eged rogodad ni fan ko bin riyul’ e yafos. Ma gad guy rogon ni nga i m’ug pi fel’ngin Jehovah rodad ma gad machibnag fare thin nib fel’ u fithik’ e pasig. Maku reb e, ngad felfelan’gad ni gad be m’oneg e pigpig ni gad be tay ngak Jehovah u wan’dad. Ma gad par ni gad be sonnag e bin nib beech e fayleng, mab pagan’dad nra lebguy Jehovah urngin ban’en ni ke micheg!