1. Watye ka kwo i kare mene kombeddi-ni?

 WATYE ka kwo i kare ma kwo tek adada. Nicakke i 1914, man aye kare ma Baibul lwongo ni “kare me agikki.” Magi aye kare ma “piny bibedo marac,” kare ma dano gudeno iye can malit atika makato kare mo keken ma peya mwaka 1914 oromo. (2 Tem. 3:1-5) Ki tungcel bene, dano kitgi bimedde ki balle abala, pien Baibul owaco ni “jo maraco ki jo ma lugoba gibimedde ki bedo marac makato kare.”—2 Tem. 3:13.

2. Jami macalo mene ma dano mapol gigalo ki wanggi? (Nen cal ma tye i pot karatac 24.)

² Ma lubbe ki galowang, dano mapol gineno nyo gitimo jami ma Baibul wacci gupong ki tim gero, tim tarwang, tim me tyet tyet, nyo jami mukene ma cik pa Lubanga okwerogi. Me labolle, Intanet, yub me telebijon, vidio, bukke, ki dong magajin pol kare giweko tim gero kacel ki tim tarwang ginen calo jami mabeco. Kwo mogo ma onongo pe kiye i kare macon kombeddi dong cik ye i kabedo mukene. Ento meno pe te lokke ni Lubanga ye tim magi maraco-ni.—Kwan Jo Roma 1:28-32.

3. Pol kare kineno jo ma gilubo cik me Ginacoya nining?

 ³ Lulub kor Yecu i cencwari me acel gukwero galowang macilo. Pi tyen lok man ki dok pien gilubo cik pa Lubanga, man oweko lwak onongo giloko marac i komgi dok bene kiunogi. Lakwena Petero ocoyo ni, “Giuro mada pien kombeddi dong pe wuribbe kwedgi i lok man me miti me kom ma pe jukke; meno aye mumiyo ginywarowu.” (1 Pet. 4:4) I kareni bene, jo ma gilubo cik pa Lubanga kinenogi calo jo ma wigi pe niango dano. Medo i kom meno, “jo ma mito lubo kit pa jo ma lworo Lubanga, kun gibedo i Kricito Yecu, gibiunogi.”—2 Tem. 3:12.

4. Ginacoya cikowa pe me timo gin ango ma lubbe ki lobo man?

⁴ Ginacoya miyo tira bot jo ma gimito timo miti pa Lubanga ni meno pe myero gumar loboni kacel ki jami ma tye iye. (Kwan 1 Jon 2:15, 16.) Catan Larac-ci aye “lubanga me lobo man,” ma tye ka doro lobo kun tiyo ki dini, loc me wibye, ki dong cato wil madongo kacel ki odi me poko lok me angeya me bwolo dano. (2 Kor. 4:4; 1 Jon 5:19) Pi meno, wan macalo Lukricitayo omyero wagwokke ki lurem maraco. Lok pa Lubanga cikowa ni: “Pe wuwek gibwolwu: ‘Bedo ki jo maraco balo kit mabeco.’”—1 Kor. 15:33.

5, 6. Jo mene ma myero pe wabed kacel kwedgi, dok pingo?

⁵ Me gwokke wek pe wabal kitwa mabeco, omyero pe wamar bedo cok tutwal ki jo ma gitimo jami maraco. Man kwako jo ma pe gubedo luye ma gitimo jami maraco kacel ki jo ma giwacci giworo Jehovah ento gituro cikke akaka. Ka jo magi ma giwacci gibedo Lukricitayo-ni gitimo bal madongo dok pe gingut, ci omyero pe wamedde ki bedo kacel kwedgi.—Rom. 16:17, 18.

⁶ Ka wabedo kacel ki jo ma pe gilubo cik pa Lubanga, ci watwero cako bedo ki cwiny me timo jami maraco calo gin wek gujolwa i kingi. Me labolle, ka wabedo kacel ki jo ma maro tim tarwang, wan bene wabedo i atematema me donyo i tim tarwang. Meno aye gin mutimme i kom omege ki lumege mogo pien pe gungut. (1 Kor. 5:11-13) Ka pe gungut, kwogi bibedo marac adada kit ma Petero owaco kwede.—Kwan 2 Petero 2:20-22.

7. Angagi ma myero wawek gubed luremwa?

⁷ Kadi bed wamito ni wanyut cwiny me kica bot jo ma pe gilubo cik pa Lubanga, omyero pe wamak lirem macok kwedgi. Bibedo tim me mingo ka Lacaden mo ma wiye nono donyo i winye me nyom gin ki ngat ma pe lubo cik pa Lubanga dok pe odyere bote. Gwoko genne obedo gin ma pire tek kato nongo yweka kacel ki jo ma pe gikwo ma lubbe cik pa Jehovah. Luremwa macok myero obed jo ma gitimo miti pa Lubanga. Yecu owaco ni: “Dano ma tiyo gin ma Lubanga mito, en aye omera, ki lamera, ki maa.”—Mar. 3:35.

8. Bedo ki jo maraco ogudo Luicrael i kare macon nining?

⁸ Jo Icrael gunongo adwogi marac pienni gubedo ka ribbe kacel ki jo maraco. I kare ma Jehovah olarogi ki i opii i lobo Ejipt ci okelgi i Lobo ma Kiciko Pire, en ocikogi ni pe guribbe ki jo ma gibedo kunnu kun wacci: “Pe wuryebbe i nyim lubangagi, pe wuworgi, pe wulub kit ticgi. Ento wubimuko calgi woko  ducu, dok wubingido wir jogigi woko. Wubiworo Rwot Lubangawu.” (Nia 23:24, 25) Ki lok ada, pol pa Luicrael pe gulubo cik pa Lubanga. (Jab. 106:35-39) Pien pe gubedo lugen bot Lubanga, man omiyo Yecu owaco botgi lacen ni: “Nen, dong gitenyo otwu botwu, iye odong nono.” (Mat. 23:38) Jehovah okwero rok me Icrael ento oyero kacokke pa Lukricitayo ma kicako nyen i kare ca.—Tic 2:1-4.

9. Pingo odi poko lok angeya giromo bedo raco?

⁹ Jami ma odi poko lok angeya cwalo woko romo balo watwa ki Jehovah. Jami ma kit magi pe gidongo niyewa i kom Jehovah kacel ki cikkene. Ma ka meno, gicuko cwiny dano me jolo jami maraco ma tye i lobo pa Catan-ni ki dong yubbe. Pi meno, mitte ni wagwokke adada wek pe wayer jami ma weko wabedo ki miti “pa jo ma pe lworo Lubanga.”—Tito 2:12.

10. Ngo ma bitimme i kom jami akwana maraco ki ma wanenogi?

¹⁰ Cokcok-ki, jami akwana maraco ki dok ma wanenogi gibibedo pe matwal. Jami magi weng kibijwerogi ka nongo lobo pa Catan-ni kibityekone woko. Lok pa Lubanga waco ni: “Lobo tum woko ki mitine ducu; ento ngat ma tiyo gin ma Lubanga mito ri nakanaka.” (1 Jon 2:17) I yo acel-li bene, laco jabuli owero ni: “Lutim maraco gibityekogi woko; ento jo ma gigeno Rwot gibicamo lobo. . . . Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.” Pi kare ma rom mene? “Jo ma kitgi atir gibicamo lobo, dok gibibedo iye matwal.”—Jab. 37:9, 11, 29.

11. I yo macalo mene ma Lubanga miniwa kwede cam mamit i yo me cwiny?

¹¹ Ka iporo ki lobo pa Catan-ni, dul pa Jehovah konyowa me kwo i yo ma weko wanongo kwo ma pe tum. I kare ma tye ka lega bot Jehovah, Yecu owaco ni: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” (Jon 17:3) Wonwa me polo tiyo ki dulle me miniwa cam muromo i yo me cwiny wek ojing niyewa. Pud dong tye mot madit ya pien watye ki magajin, brocuwa, bukke, vidio, ki kabedowa me Intanet ma giilo malo woro me ada! Dul pa Lubanga bene oketo yub me cokke ma bedo kare ki kare i kacokke makato 110,000 kulu i twok lobo lung. I cokke magi ki gure me nino acel ki dong gure madito, wanyamo pwony ma gijenge i Baibul wek odong niyewa i kom Lubanga kacel ki cikkene.—Ibru 10:24, 25.

12. Tit kong tyen lok man ni nyomme “i kin jo pa Rwot keken[-ni.]”

¹² Lukricitayo ma wigi nono ma gimito nyomme myero gugwokke adada ki kodi jo ma gibedo kwedgi. Lok pa Lubanga cikowa ni: “Pe wuribbe kun wubedo kacel ki jo ma pe guye Yecu, pien kitwu patpat. Dong kit ma atir ki tim maraco gitwero bedo lurem nining? Lengo ki colpiny gitwero ribbe gibedo kacel nining?” (2 Kor. 6:14) Baibul miyo tira bot lutic pa Lubanga ma gimito nyomme ni myero gunyomme “i kin jo pa Rwot keken,” meno te lokke ni omyero gunyom ngat ma dong odyere ki bene onongo batija dok kit me kwone rwatte ki pwony me Ginacoya. (1 Kor. 7:39) Ka Lukricitayo ginyomo luye luwotgi ma gudyere bot Jehovah, ci gibedo  ki luot ma bikonyogi me gwoko genni bot Lubanga.

13. Tira ango ma Jehovah omiyo bot Luicrael ma lubbe ki nyom?

¹³ Jehovah ngeyo gin maber pi luticce dok en obedo ka tittiwa tamme teretere madok i kom nyom. Me labolle, nen kong cik ma lubone yot ma en omiyo bot Jo Icrael ma lubbe ki nyomo jo ma pe giwore. En owaco bot Moses ni: “Pe wunyomme kwedgi kun wumiyo anyirawu bot awobegi nyo wunyomo anyiragi ki awobewu. Pien gibiloko cwiny awobewu woko, pe dok gibilubo kora, ento gibiworo Lubanga mogo mukene; ci miyo kiniga mako Rwot i komwu, en bityekowu woko oyot.”—Nwo. 7:3, 4.

14, 15. Adwogi marac ango ma Solomon onongo pienni okwero lubo cik pa Jehovah?

¹⁴ I nge kare manok keken ma Solomon odoko kwede kabaka me Icrael, en olego pi ryeko ci Lubanga omiye ryeko muromo. Pi meno, Kabaka Solomon oywek adada macalo laloc ma pud dong ryek loyo. Ki lok ada, i kare ma kabaka ma dako me lobo Ceba olimo Solomon, en owaco ni: “Yam pe aye lok ma gitero bota, nio ka abino aneno ki wanga. Nen, pe gititta kadi wa nucune kulu, pien ryekoni ki lonyoni kato lok dog ma gitero bota.” (1 Luker 10:7) Ento Solomon odoko lanen me lewic pien okelo cwercwiny pi kwero lubo cik pa Lubanga ma wacci omyero pe ki nyom ngat ma pe obedo laye.—Latit. 4:13.

¹⁵ Kadi bed ni Lubanga otimo jami mapol bote, Solomon ocayo cik ma Jehovah omiyo ni pe myero gunyom mon me lobbe ma gurumo ka ngetgi, jo ma pe Giwore. Solomon “obedo ka maro mon mapol ma anyira rok mapatpat” ma oweko en obedo ki mon 700 ki angeca 300. Adwogine obedo ningo? I kare ma Solomon dong otii, monne ma pe giworo Lubanga-ni “guloko cwinye odok i kom lubanga mogo mukene, . . . Kit meno Solomon otiyo gin ma nen marac i wang Rwot [Jehovah].” (1 Luker 11:1-6) Solomon oweko lurem maraco gubwolle omiyo en ogiko woro Jehovah. Ka gin ma kit man otimme i kom Solomon, ci twero timme bene i kom ngat mo keken. Meno aye gin mumiyo tamwa pe terowa me nyomo ngat mo ma pe maro Jehovah!

16. Tira mene me Ginacoya ma konyo latic pa Lubanga ma onyomme ki ngat ma pe obedo laye?

¹⁶ Ka dano mo odoko lawor Lubanga ento onyomme ki ngat ma pe obedo laye kono? Baibul wacci: “Wun mon wumine me bedo i te loc pa cogwu, wek ka ce co mogo i kingi pe gilubo lok pa Lubanga, ci gitwero lokke pi kit pa mongi, kadi bed gin ki komgi pe giloko lok mo ki doggi.” (1 Pet. 3:1) Lok man kicoyo bot mon ma gitye Lukricitayo ento lok acel-li bene konyo laco ma odoko lawor Jehovah kun onyomme ki dako ma pe laye. Baibul miniwa tira ni: Bed luot maber dok lub cik ma Lubanga omiyo me doro jo munyomme. Luot mapol ma pe gubedo luye gujolo lok me ada pienni guneno coggi nyo mongi guloko kwogi i nge keto i tic gin ma Lubanga mito.

17, 18. Pingo Nua ki Lukricitayo ma gukwo i cencwari me acel gubwot i kare ma kijwero jo maraco?

¹⁷ Kadi bed ni meno jo maraco balo kit mabeco ento lirem mabeco bene kelo adwogi mabeco. Nen kong labol pa Nua, ma okwo i kin jo maraco ento  omoko tamme pe me mako lirem macok kwedgi. I kare meno, “Rwot [Jehovah] oneno ni bal pa dano odoko dit woko i wi lobo, dok tam ducu ma cwinygi lwodo kare ducu kemo bal keken.” (Acak. 6:5) Lubanga omoko tamme me jwero jo meno ma kitgi raco-ni woko kacel ki jo ma cwakogi i pii aluka. Ento, “Nua yam obedo dano ma kite atir, ma pe ki bal mo i kin yalwakke; Nua obedo ka wot kacel ki Lubanga.”—Acak. 6:7-9.

¹⁸ Ki lok ada, Nua onongo pe mito mako lirem ki jo ma pe woro Jehovah. En kacel ki jo abiro me ode gilungo wigi i tic ma Lubanga ominigi, ma man onongo kwako yubo yeya. Ki tungcel bene Nua obedo “latit lok me kit ma atir.” (2 Pet. 2:5) Gin ma okonyo Nua me lungo wiye i timo jami mabeco ma yomo cwiny Lubanga aye tito kwena, yubo yeya ki dong bedo kacel ki jo me ode. Macalo adwogine, Nua kacel ki jo me ode gubwot ki i Pii Aluka. Omyero wabed ki pwoc madit i komgi pien wan ducu ma wakwo i kareni wabedo likwayo pa jo ma gutiyo pi Jehovah—Nua, dako pa Nua, lutino awobene, ki dong mongi. I yo acel-li, Lukricitayo ma gukwo i cencwari me acel pe guribbe ki jo ma pe gimaro Jehovah. Gin gulubo cikke dok gubwot i kare ma kijwero Jerucalem i 70 K.M.—Luka 21:20-22.

19. Ngo ma myero watim wek wabed ki wat maber ki Lubanga?

¹⁹ Wan macalo jo ma giworo Jehovah, myero walub lanen pa Nua ki luode, ki dong Lukricitayo me cencwari me acel ma gubedo lugen. Myero wapokke woko ki i kom jo maraco ma pe giworo Jehovah ki dok bene wanote ki omege ki lumege makato milion ma gin lugen. Bedo kacel ki jo ma gilubo tira pa Lubanga bikonyowa me ‘cung matek liking i niyewa’ i kare man ma kwo tek tutwal-li. (1 Kor. 16:13; Car. 13:20) Tam kong i kom mot mabeco ma tye piwa i anyim! Wek wabed ki kare me kwo i lobo manyen pa Lubanga, mitte ni myero wagwokke ki lurem maraco i kare man me agikki-ni.