1. Nemene hneijine hne së hna melën enehila?

EASË enehila a melëne la itre “ijine ka aköte.” Qaane lo 1914, ijine nyiqaane la “ite drai hnapin,” ngazo catre hë la fen. (2 Timoteo 3:1-5) Ketre, atre hnyawa hi së ka hape, tro hmaca kö elanyi a ngazo catr, ke, öni Tusi Hmitrötr, “Ame la nöjei ate thina ka ngazo me itete iaö, tro pala kö angat’ a ngazo.”—2 Timoteo 3:13.

2. Nemene pengöne kuci madrine la hna ajane hnene la itre atr ka ala nyim enehila?

² Ame göi kuci madrin enehila, ala nyimu la itre atr ka goeëne me kuca la itre ewekë ka iakötrë, me kuci magie, me kuci iöni. Hna majemine amamane la iakötrë me kuci ngazo ngöne ëternet, me televizio, me sinema, me itre itus, me itre zonal, matre kösë pëhë engazon. Ketre, ame la itre aqane ujë hna sisine hnene la itre atr ekö, tre kösë ka meköti hë enehila ngöne la itre xa götrane nöj. Ngo, tha kolo kö lai a hape, aqane ujë lai hna kapa hnei Iehova.—E jë la Roma 1:28-32.

3. Nemene la hna mekune hnene la ka ala nymu göi itre ka mele thenge la itre trepene meköti Akötresie?

 ³ Ame ngöne la hneijine ne la itre pane Keresiano, itre atr fe a hane goeëne la itre nyine iamadrinë ka iakötrë, me kuci ngazo. Ngo tha hna tune fe kö hnene la itretre drei Iesu, ke angatre a melëne la itre trepene meköti Iehova. Qa ngöne lai, tha nyipi trotrohni angatre kö hnene la itre atr. Nemene ju hë la ka traqa? Hna hnyimasai angatr me akötrë angatr. (1 Peteru 4:4) Ame enehila, nyimu ka mekune fe ka hape, ka hmo la itre ka mele thenge la itre trepene meköti Akötresie. Ngo, ase hë Tusi Hmitrötr thuemacanyi së ka hape, ‘tro ha axösisine’ fe la itre ka xötrethenge la tulu i Keriso.—2 Timoteo 3:12.

4. Pine nemene matre tha tro kö sa hnine la fene celë?

⁴ Maine aja së troa kuca la aja i Akötresie, thatreine kö tro sa hnine “la fen, memine fe la ite ewekë e celë fen.” (E jë la 1 Ioane 2:15, 16.) Satana, “la haze ne la fen” nge atre musi kow. Angeic a amenune la itre atr jëne la itre hmi, me itre mus, me itre organizasio ka thele mani. (2 Korinito 4:4; 1 Ioane 5:19) Tha ajane kö së troa ajojezi së hnene la fen, matre nyipiewekë tro sa ananyine la itre atr ka xele ma drei Iehova. Tusi Hmitrötr a hmekë së hnyawa me hape: “Itre sinatro ka ngazo la angetre angazone la thiina ka loi.”—1 Korinito 15:33, MN.

5, 6. Drei la itre atr tha nyine tro kö sa nyi sinatrongen, nge pine nemen?

⁵ Maine easa ajane tro pala hi a lolo la aqane imelekeu së me Iehova, tha tro kö sa thele troa nyi sinatrongene la itre ar ka kuca la itre ewekë ka ngazo. Kolo fe lo itre atr ka qaja ka hape, angatre a hane nyihlue i Iehova ngo tha drengethenge Nyidrëti pe. Maine hnei angatr hna kuca la ketre ngazo ka tru, ngo tha ietra pe, tha tro hmaca kö sa nyi sinatronge i angatr.—Roma 16:17, 18.

⁶ Ame la hne së hna majemin, tre, ene la tro sa amadrinëne la itre sinee së. Celë hi matre, e tro sa nyi sinatrongene la itre ka tha drengethenge Akötresie, tro fe hë së lai a pi kuca la itre huliwa i angatr. Haawe, e tro sa nyi sinatrongene la itre ka kuca la itre ewekë ka sis, tro fe hë së lai a hane tui angatr. Celë hi ka traqa kowe la itre xa trejin. Nge ame itre ka tha ietra, tre hna upi angatr trön eë. (1 Korinito 5:11-13) E tha ietra kö angatr, ceitu i angatr memine la itre atr hna qejepengöne hnei Peteru.—E jë la 2 Peteru 2:20-22.

7. Drei la nyine tro sa nyisineen?

⁷ Maine nyipici laka, aja së troa loi koi nöjei atr, ngo ame pe tha tro kö sa nyisineene la itre atr ka tha drengethenge Akötresie. Tha loi kö e troa iatre memine la atr ka tha bapataiso kö. Ka sisitria catre kö la troa kepe së hnei Akötresie hune la troa kepe së hnene la itre atr, ka tha hni  kö koi Nyidrë. Loi e tro sa nyisineene hmekuje hi la itre atr ka kuca la aja i Akötresie. Öni Iesu: “Ame la ate kuca la aja i Akötesie, celë hi tejine me ini, me xang, me thineng.”—Mareko 3:35.

8. Nemene la pune kowe la angetre Isaraela pine la hna nyi sinatrongene la itre ka xel ma drei Iehova?

⁸ Ka hetre ethanyine la tro sa nyi sinatrongene la itre atr ka xel ma drei Iehova. Tro sa ce wange la ka traqa kowe la angetre Isaraela ekö. Qëmekene tro angatr a traqa kowe la Nöje Hna Thingehnaean, ase hë Iehova hmekë angatr göne lo itre ka mele hë e cili. Öni Nyidrë: “The tro kö eö a thiliju kowe la ite haze i angat, me nyi hlue i nyuden, me kuca thenge la ite huliwa i nyuden ; ngo loi pe tro eö a auligötra [maine thë] nyudeni me lepe anyilanyilane la ite hnashaate i nyuden. Nge tro nyipunie a nyi hlue i Iehova Akötesi nyipunie.” (Esodo 23:24, 25) Ngo, ala nyimu la angetre Isaraela ka tha trongëne la itre hna amekötine hnei Akötresie, me mele thoi koi Nyidrë. (Salamo 106:35-39) Ame hë la pun, hnei Iehova hna nuetrije la nöje Isaraela, me iën pena la ekalesia i Keresiano nyine nöje i Nyidrë.—Mataio 23:38; Ite Huliwa 2:1-4.

9. Pine nemene matre loi e tro sa hmekëne la itre jëne ithuemacany ne la fene celë?

⁹ Nyimu ewekë ne la fen, tune la ipos, me itele, me itus, me itre xa jëne ithuemacanyi ju kö ka hetre ethanyine kowe la aqane imelekeu së me Iehova. Tha hna kuca kö la itre ewekë cili göi troa acatrene la lapaunene la itre Keresiano, me kowe la itre hnei Nyidrëti hna thingehnaean. Itre eje pe a upe catrëne la itre atr troa mejiune kowe la fene i Satana. Celë hi matre, nyipiewekë tro sa thupën wanga goeëne jë së, maine e, maine drenge pena la itre ewekë ka troa huli së kowe “la thina ka tha ijiji Akötesie.”—Tito 2:12.

10. Nemene la pune kowe la itre jëne ithuemacany ne la fene celë?

¹⁰ Easenyi hë matre apatrene pi la fene i Satana me itre jëne ithuemacany angeic. Öni Tusi Hmitrötr: “Kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.” (1 Ioane 2:17) Ketre tune mina fe, hnene la atre cinyihane la salamo hna nyimane ka hape: “Tro ha thupa tiji angete kuca la ngazo.” Öni angeic hmaca jë: “Tro la ange ka menyike a hetenyi la nöje nge tro angat’a madine la tingetinge atraqat.” Uti hë eu? “Tro ha la ange ka meköti a hetenyi la nöj, me lapa palua kö ngön’ ej.”—Salamo 37:9, 11, 29.

11. Nemene la aqane xatua së hnei Akötresie matre tro sa mele nyipici koi Nyidrë?

¹¹ Isapengöne catre la organizasio i Iehova memine la fene i Satana. Eje a xatua së troa mele hnëkë kowe la mele ka tha ase palua kö. Öni Iesu ngöne la nyidrëti a thithi koi Iehova: “Dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin [maine hna up].” (Ioane 17:3) Iehova a hamë së la nöjei ewekë ka ijije jëne la organizasio i Nyidrë göi tro sa atrepengöi Nyidrëti hnyawa. Hetrenyi së la itre zonale me itre boroshür, me itre itus, me itre video, me itre ithuemacany hnine la sit së ka xatua së matre tro sa nyihlue i Iehova  pala hi. Hnene fe la organizasio i Nyidrë hna hmekëne matre tro pala hi a kuca la itre icasikeu ngöne la 110 000 lao ekalesia e cailo fen. Ame la hne së hna inine qa hnine la Tusi Hmitrötr ngöne la itre hna icasikeu cili, me ngöne la itre asabele së, tre kola acatrene la lapaune së koi Iehova me kowe la itre hnei Nyidrëti hna thingehnaean.—Heberu 10:24, 25.

12. Qejepengöne jë la wathebo i Akötresie, ene la troa faipoipo “göi Joxu hmekuje hi.”

¹² Nyipiewekë kowe la Keresiano ka pi faipoipo troa iëne hnyawa la atr hnei angeic hna ajane troa föen. Wesi Ula i Akötresie a hmekë së me hape: “The isile menune keu nyipunieti kö me angete tha lapaune kö ; ke tune ka la thina ka meköti troa ce memine la thina ka tha meköti kö ? nge kete tune ka la lai troa ce memine la melöhlem ?” (2 Korinito 6:14) Tusi Hmitrötr a upe la itre hlue i Iehova troa faipoipo “göi Joxu hmekuje hi,” kola hape, troa faipoipo hmekuje hi memine la atre nue hë la mele koi Iehova, me xomi bapataiso, nge ka mele thenge la itre trepene meköti Nyidrë. (1 Korinito 7:39) E aqane ujë i epuni hi lai, tro lai a xatua epuni troa mele nyipici koi Akötresie.

13. Nemene la hna amekötine hnei Akötresie kowe la angetre Isaraela?

¹³ Atre hnyawa hi Iehova la ewekë ka sisitria koi së, nge tha ka hnyipixe kö koi së la wathebo i Nyidrë, ene la troa faipoipo “göi Joxu hmekuje hi.” Pane mekune jë la hnei Iehova hna amekötine kowe la angetre Isaraela göne la itre atr ka tha nyihlue i Nyidrë. Öni Nyidrë jëne Mose: “The tro kö eö a ihamë föeë me angat, the tro kö eö a hamëne la nekö i ’ö jajinyi kowe la nekö i angeice trahmany, nge the tro kö eö a xome la nekö i angeice jajinyi thatraqane la nekö i ’ö trahmany. Ke tro angat’ a aukene la nekö i ’ö qa theng, mate nyi hluene la ite haze ; ame hna troa palulu la elëhni Iehova koi nyipunie, nge tro nyidëti a canga apatenyi ’ö.”—Deuteronomi 7:3, 4.

14, 15. Nemene la ewekë ka traqa koi Solomona pine la hnei nyidrëti hna wange sixane la wathebo i Iehova?

¹⁴ Tha hmitre ju kö thupene la hna acili Solomona troa joxu i angetre Isaraela, nge nyidrëti fe hi lai a sipo Iehova la inamacan, ame hnei Iehova hna kapa la thithi nyidrë. Qa ngöne lai, hnei Solomona hna hlemu ceitu me ketre joxu ka inamacan, nge kola mele tingetinge me madrine la nöj. Hna hane fe haine hnene la joxu föe ne Sheba la inamacane i Solomona, matre öni eahlo koi nyidrë: “Sisitia la inamacane memine la loi hune la maca hnenge hna deng.” (1 Ite Joxu 10:7) Ngo, kolo fe a amamane koi së hnene la tulu i Solomona la ewekë ka traqa, e traqa ju wange sixane la wathebo i Akötresie, ene la troa faipoipo memine la ketre atr ka tha nyihlue i Iehova.—Atre Cainöj 4:13.

 ¹⁵ Maine nyipici laka, hnei Iehova hna amanathithi Solomona, ngo ame pe, tha hnei Solomona kö hna trongëne la ketre wathebo ka mama cile hnyawa. “Hnei Solomona joxu hna ajane la ite föe tenyiwa ka ala nyimu” ka tha nyihlue i Iehova, matre 700 lao föi nyidrë, nge 300 lao föe ka ce lapa me nyidrë. Nemene hë la pune lai? Ame hë la Solomona a qatr, “hnei ite fö’ i nyidëti hna aukene la hni nyidë troa xöte thenge la ite haze menu, . . . Nge Solomona a kuca la ngazo xajawa i Iehova.” (1 Ite Joxu 11:1-6) Hnene la itre atr hnei nyidrëti hna ce mel memin, itre ka xele ma drei Iehova hna ananyi nyidrëti qaathei Iehova. E hna traqa tune koi Solomona, ke ijije fe hi troa traqa koi së. Celë hi kepine matre loi e tro sa lepetrije the së la mekune troa hane faipoipo memine la ketre atr ka tha hni kö koi Iehova!

16. Nemene la hna qaja hnei Tusi Hmitrötr göne la atr ka faipoipo hë qëmekene troa nyihlue i Iehova?

¹⁶ Tune kaa ju hë e ka faipoipo hë la ketre atr qëmekene troa nyihlue i Iehova? Öni Tusi Hmitrötr: “Loi e tune fe nyipunie ite fö, denge thenge ju la ite fö’ i nyipunie ; thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat.” (1 Peteru 3:1) Eje hi laka, thatraqane fe la itre trahmany la hna ithanata celë. Haawe, loi e tro nyipunie a ketre trahmanyi maine föe ka lolo, nge ka trongëne la itre trepene meköti Akötresie göi faipoipo. Ame hë la kola öhne hnei föi epuni la elolone la aqane saze i epun, tro hë angeice lai a  hane pi nyihlue i Iehova. Celë hi hna melëne hnene la itre trefëne ka ala nyim.

17, 18. Hnei nemene matre mele pe kö Noa qa ngöne lo Iwë Atraqatr, memine fe lo itre pane Keresiano lo kola lepe apatrenyi Ierusalema?

¹⁷ Tro la itre ka xele ma drei Iehova a huli së troa hane tha drei Nyidrë, ngo ame la itre ka hni koi Iehova, tre tro angatre lai a xatua së troa mele nyipici koi Nyidrë. Noa la ketre tulu ka lolo koi së. Hnei angeic hna mele ngöne la hneijine kola, “atraqate la ngazo i ate e celë fen,” nge “ngazo o drai pala hi la nöjei mekun’ asë e kuhu hni nyën.” (Genese 6:5) Ngazo catre la thiina ne la itre atr matre traqa pi koi Iehova la mekune troa lepe apatrene la fene ka ngazo cili. Ngo isapengöi Noa catre me angatr. Öni Tusi Hmitrötr ka hape, “ate thina ka meköti Noa” nge ka “ce trotro me Akötesie.”—Genese 6:7-9.

¹⁸ Tha hnei Noa kö me hnepe lapa i angeic hna nyi sinatrongene la itre atr ka tha hni kö koi Iehova. Tha mano kö angatr cane la aka, nge öni Tusi Hmitrötr e qeje Noa ka hape, ketre “ate cainöjëne la thina ka meköt.” (2 Peteru 2:5) Hnei angatre pala hi hna kuca la itre ewekë ka amadrinë Akötresie, matre mele pe kö angatre qa ngöne la Iwë Atraqatr. Easë asë hi la itre matra i angatr enehila, matre tru la madrine së koi Noa me hnepe lapa i angeic laka, hnei angatre hna drengethenge Iehova, nge tha hnei angatre kö hna nyi sinatrongene la itre atr ka xele ma drei Iehova. Hna hane ujë tune fe hnene lo itre pane Keresiano ekö. Hnei angatre hna drengethenge Iehova, matre mele pe kö angatr la kola lepe apatrenyi Ierusalema lo macatre 70 thupe i Iesu.—Luka 21:20-22.

19. Nemene la ka troa xatua së troa mele nyipici koi Iehova?

¹⁹ Tui Noa, me hnepe lapa i angeic, me itre pane Keresiano ekö, tha tro kö sa nyi sinatrongene la itre atr ka tha hni kö koi Iehova. Itre milio la etrune la itre trejin nyine tro sa nyisineen. Tro angatre lai a xatua së troa ‘cile hut ngöne la lapaun’ ngöne la itre ijine jole celë. (1 Korinito 16:13; Ite Edomë 13:20) Pane mekune jë la etrune la madrine së elanyi e tro sa mele pe e apatrene pi la fene ka ngazo celë, me mele ngöne la fene ka hnyipixe i Iehova! Haawe, mele koi së la troa ananyine la itre atr ka tha hni kö koi Iehova enehila!