1. Ita be edena bamona negana ai ita noho?

LAGANI 1914 do lasi neganai dika badadia idia vara lasi. To, hari ita be nega aukadia lalonai ita noho. Unai be lagani 1914 amo ia matamaia, bona Baibel ese inai nega ia gwauraia “nega ena dokona.” Inai “metau dikadia momo” negana ai, dika badadia momo idia vara noho. (2 Tim. 3:1-5, BH) Tanobada be do ia dika ia lao noho, badina Baibel ia peroveta, ia gwau: “Kara dika taudia bona koikoi taudia ese edia kara dika do idia habadaia momokani.”—2 Tim. 3:13.

2. Inai tanobada ena moale karadia ai dahaka idia hahedinaraia? (Laulau ginigunana herevalaia.)

² Baibel ese ia taravatua karadia be taunimanima momo ese edia moale karadia lalonai idia itaia o idia karaia. Unai kara haida be dagedage karadia, matabodaga karadia, babalau karadia, eiava Dirava ia inai henia karadia haida. Nega momo Intanet, TV program, muvi, buka bona magasin ai dagedage bona matabodaga karadia idia hedinarai. Bona tano haida dekenai guna idia dadaraia karadia haida be hari idia abia dae. Unai bamona karadia be Dirava ese ia abia dae lasi.—Roma 1:28-32 duahia.

3. Tanobada taudia be Dirava idia badinaia taudia dekenai dahaka idia laloa?

 ³ Aposetolo taudia edia negai, Keristani taudia ese moale kara mirodia idia dadaraia bona Dirava idia badinaia. Unai dainai, haida ese idia hereva dika bona dagedage henidia. Petero ia gwau: “Umui be idia ida unai kara dikadia umui karaia noho lasi dainai, idia hoa bona umui idia gwauraia dika.” (1 Pet. 4:4) Hari danu, Dirava idia badinaia taudia be inai tanobada taudia amo idia idau. “Oibe, Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.”—2 Tim. 3:12.

4. Inai tanobada ita dadaraia totona, Baibel ena sisiba be dahaka?

⁴ Baibel ia gwau Dirava idia ura hesiai henia taudia be tanobada bona ena kara do idia ura henia lasi. (1 Ioane 2:15, 16 duahia.) Inai tanobada ena tomadiho, politikol, bona bisinesi oreadia—bona edia orea maragidia—be “inai nega oromana ena dirava,” Satani Diabolo ese ia biagua. (2 Kor. 4:4; 1 Ioa. 5:19) Ita be Keristani taudia dainai, iseda hebamo karadia ita naria namonamo. Baibel ia gwau: “Namo lasi ma haida ese umui idia hakaua kerere. Hebamo dikadia ese ta ena kara namodia idia hadikaia diba.”—1 Kor. 15:33.

5, 6. Edena bamona taudia ita bamoa lasi be namo? Bona dahaka dainai?

⁵ Kara namodia ita hahedinaraia noho totona, kara dikadia idia karaia taudia, abidadama lasi taudia unai, ita bamoa lasi be namo. Danu, idia gwau idia be Iehova idia tomadiho henia, to iena taravatu idia utua noho taudia ita bamoa lasi. Bema unai bamona taudia be kara dika badadia idia karaia bona idia helalo-kerehai lasi, namona be idia ita bamoa lasi.—Roma 16:17, 18.

⁶ Bema Dirava ena taravatu idia badinaia lasi taudia ita bamoa, do ita ura idia karaia karadia ita badinaia, badina ita ura idia ese ita idia abia dae. Hegeregere, bema matabodaga karadia idia karaia taudia ida ita hebamo, matabodaga karadia ena hahetoho lalonai ita moru diba. Unai be Keristani taudia haida dekenai ia vara vadaeni, bona idia haida be kongrigeisen amo idia atoa siri badina idia helalo-kerehai lasi. (1 Kor. 5:11-13) Bema idia helalo-kerehai lasi, idia be Petero ese ia gwauraia taudia bamona.—2 Petero 2:20-22 duahia.

7. Edena bamona turadia do ita bamoa lasi?

⁷ Ena be ita ura Dirava ena taravatu idia badinaia lasi taudia dekenai kara namodia ita hahedinaraia, to namo lasi idia ita bamoa o edia turadia ai ita lao. Danu headava lasi Iehova ena Witnes tauna ta be Dirava ena taravatu ia badinaia lasi mero o kekeni ia tura henia be kerere. Iehova ena taravatu idia badinaia lasi taudia edia kara ita dadaraia be namo. Namona be Iehova ena taravatu ita badinaia bona ena ura idia karaia taudia ita bamoa. Iesu ia gwau: “Dirava ena ura ia karaia tauna be egu tadikaka, egu taihuna bona egu sinana.”—Mar. 3:35.

8. Hebamo dikadia dainai Israela taudia dekenai dahaka ia vara?

⁸ Hebamo dikadia ese Israela taudia dekenai dika bada ia havaraia. Iehova ese Aigupito ena igui amo ia ruhaia bona Gwauhamata Tanona dekenai idia ia hakaua lao. Israela taudia be unai tano dekenai idia ginidae neganai, Iehova ese idia ia hamaoroa, ia gwau: “Unai neganai idia edia dirava dekenai do umui tomadiho lasi, bona edia hesiai gaukara do umui karaia lasi, bona edia kara do umui karaia lasi, to idia do umui halusia momokani, bona edia kaivakuku ibounai do umui makohia ore. Lau Lohiabada,  emui Dirava, do umui tomadiho henia.” (Eso. 23:24, 25) To, idia momo be Dirava ena sisiba idia badinaia lasi. (Sal. 106:35-39) Unai dainai Iesu ia gwau: “Emui dubu helaga be do ia noho kava.” (Mat. 23:38) Iehova ese Israela taudia ia dadaraia, bena Keristani kongrigeisen matamata dekenai ena hahenamo ia henia.—Kara 2:1-4.

9. Dahaka dainai TV program, Intanet, bona buka idauidau ai idia noho gaudia ese dika ia havaraia diba?

⁹ TV program, web sait, bona buka ese idia hahedinaraia gaudia momo be dika, badina Keristani taudia edia hetura karana Dirava ida ia hadikaia diba. Unai gaudia ese Iehova bona ena gwauhamata dekenai iseda abidadama ia hagoadaia lasi. To, Satani ena lalohadai bona iena ura dikadia sibona ia hahedinaraia. Unai dainai do ita naria namonamo, unai amo ita abia hidi gaudia ese iseda lalona ai “tanobada ena ura idauidau” do ia havaraia lasi.—Tito 2:12.

10. Satani ena tanobada ese ia halasia gaudia dekenai dahaka do ia vara?

¹⁰ Kahirakahira, Satani ena tanobada ese ia halasia gaudia be Dirava ese do ia hadikaia ore. Baibel ia gwau: “Tanobada bona ena ura be do ia ore, to Dirava ena ura ia karaia tauna be do ia noho hanaihanai.” (1 Ioa. 2:17) Unai hegeregerena, salamo torea tauna ia gwau: “Kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho. Manau taudia ese noho gabuna tano do idia abia, do idia helai namonamo, mai moale bona mai maino danu.” Bona ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”—Sal. 37:9, 11, 29.

11. Dirava ese iena orea amo ia halasia gaudia amo edena dala ai ena taunimanima ia durua?

¹¹ To, inai nega dokona ai Iehova ena orea ese ia halasia gaudia be ita ia durua, eda kara ita hanamoa bona mauri hanaihanai lao henia dalana ai ita ia hakaua noho totona. Iesu ese Iehova ia guriguri henia neganai, ia gwau: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.” (Ioa. 17:3) Iseda guba Tamana be iena orea amo hagoadaia hereva namodia momo ia halasia noho. Tomadiho momokani ia durua totona, magasin, buklet, buka, vidio, bona iseda Web sait idia halasia, unai be moale gauna! Dirava ena orea ese tanobada ibounai ai idia noho kongrigeisen 110,000 mai kahana totona, hanaihanai hebou gaudia ia hegaegaelaia. Unai bamona hebou maragidia bona badadia ai, ita ese Baibel pablikeisen ita herevalaia o stadilaia, eda abidadama Dirava bona iena gwauhamata dekenai ita hagoadaia totona.—Heb. 10:24, 25.

12. Baibel ena sisiba, “Lohiabada sibona lalonai” oi headava ena anina be dahaka?

¹² Bema singul Keristani taudia idia ura headava, namona be edia hebamo karana do idia naria namonamo. Baibel ia gwau: “Abidadama lasi taudia ida do umui hakapua tamona lasi. Badina edena bamona kara maoromaoro bona kara dika idia turana diba? Eiava edena bamona diari bona dibura idia noho hebou diba?” (2 Kor. 6:14) Headava idia lalohadailaia Keristani taudia dekenai Baibel ena sisiba be “Lohiabada sibona lalonai” do idia headava. Anina be, ia gwauhamata bona bapatiso vadaeni, bona Iehova ena hakaua herevadia ia badinaia tauna sibona do idia adavaia. (1 Kor. 7:39) Abidadama tamona tauna oi adavaia neganai,  umui ruaosi be Iehova umui lalokau henia bona ia do umui badinaia.

13. Headava karana dekenai, Dirava be Israela taudia dekenai dahaka sisiba ia henia?

¹³ Iehova ia diba dahaka be namo ia idia hesiai henia taudia totona, bona hanaihanai headava taudia totona iena lalohadai ia gwauraia. Hegeregere, Iehova ese Mose amo Israela taudia dekenai ia henia hahegani mani ita laloa. Israela bese badinai idia noho bese taudia—Iehova idia hesiai henia lasi taudia unai—ia herevalaia neganai, ia gwau: “Unai bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona. Badina unai bamona neganai, idia ese emui natudia Lohiabada dekena amo do idia hakaua siri, idau dirava tomadiho henia totona. Unai bamona ia vara neganai, Lohiabada ese umui do ia hadikaia ore haraga.”—Deu. 7:3, 4.

14, 15. Solomona be Iehova ena sisiba ia dadaraia dainai, dahaka ia vara?

¹⁴ Davida ena natuna Solomona ia lohia matamaia neganai, aonega totona ia noinoi, bona Dirava ese aonega bada ia henia. Unai dainai King Solomona be aonega tauna ai ia lao bona ladana bada ia abia. Momokani, Sieba tano ena kwini be Solomona ia vadivadi henia neganai, ia gwau: “To unai sivarai lau hamomokania lasi ia mai bona lau mai, lau sibona lauegu matana dekenai lau itaia. Bona momokani lau idia hamaoroa gauna, be kahana sibona! Oiemu aonega bona oiemu kohu momo ese lau kamonai sivarai idia hereaia momokani.” (1 Kin. 10:7) To gabeai, Solomona be haheitalai dikana ia hahedinaraia, badina Dirava ena sisiba ia dadaraia bona idau bese hahine ia adavaia.—Had. 4:13.

¹⁵ Ena be Dirava ese dala idauidau ai Solomona ia durua, to ia be Dirava ena sisiba ia dadaraia bona idau bese hahine, Dirava idia tomadiho henia lasi hahinedia ia adavaia. Solomona “ese idau bese hahine momo herea ia ura henia,” bona idia ibounai be 700 bona hesiai hahinedia ibounai 300. Unai dainai dahaka ia vara? Solomona ia buruka neganai, ia adavaia idau bese hahinedia ese “iena lalona idia veria, dirava idaudia dekenai, . . . Unai dainai, Solomona be Lohiabada ena vairanai ia kara dika.” (1 Kin. 11:1-6) Solomona ena hebamo dikana dainai, ena aonega ia gaukaralaia namonamo lasi bona tomadiho momokani ia rakatania. Unai dainai, bema ta ia ura Iehova ia lalokau henia lasi tauna ta ia adavaia, Solomona ena sivarai ia laloa be namo!

16. Bema ta ena adavana be murimuri tauna o hahine, Baibel ena sisiba be dahaka?

¹⁶ Bema ta be ia stadi bona Iehova tomadiho henia tauna ai ia lao, to ena adavana be murimuri tauna, unai be edena bamona? Baibel ia gwau: “Hahine taudia e, emui adavadia henunai do umui noho. Bona bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba.” (1 Pet. 3:1) Petero be Keristani hahine taudia ia hereva henia. To, unai sisiba be tatau ese idia badinaia diba danu, bema unai tauna be Iehova tomadiho henia tauna ai ia lao, to ena adavana be murimuri hahinena. Baibel ia hahedinaraia namona be emu adavana ena tura namona ai oi lao, bona Dirava ena taravatu headava totona oi badinaia. Abidadama lasi taudia momo be hereva momokani idia abia dae, badina edia tau o hahine be Dirava ena hereva ia badinaia.

17, 18. Dahaka dainai Noa bona Keristani taudia ginigunadia idia roho mauri?

¹⁷ Ena be hebamo dikadia ese kara namodia ia hadikaia, to hebamo namodia ese  namo ia havaraia. Mani Noa oi laloa, ia be kara dika taudia huanai ia noho, to ia ura lasi idia ia tura henia. Unai nega ai, “Lohiabada ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.” (Gen. 6:5) Unai dainai Dirava ese unai negai idia noho kara dika taudia be abata amo ia hamasedia. To, “Noa be kara maoromaoro tauna. Ena uru huanai kara namo ia hahedinaraia. Ia be Dirava ia bamoa.”—Gen. 6:7-9, BHḡ.

¹⁸ Noa be Dirava idia badinaia lasi taudia ia bamoa lasi. Ia bona ena ruma bese taudia 7 be Dirava ese ia henia gaukara idia karaia, bona lagatoi idia karaia. Danu, Noa be “kara maoromaoro ia harorolaia tauna.” (2 Petero 2:5) Noa be ia haroro, lagatoi ia karaia, bona ena ruma bese ia bamoa dainai, ia be Dirava ia hamoalea karadia ia badinaia. Unai dainai Noa bona ena ruma bese be abata amo idia roho mauri. Ita moale, badina Noa, ena adavana, ena natudia bona edia adavadia be Iehova idia hesiai henia dainai, hari ita mauri noho diba. Unai hegeregerena, Keristani taudia ginigunadia be Dirava idia badinaia bona Dirava diba lasi taudia idia dadaraia, bona lagani 70 C.E. ai Ierusalema idia hadikaia neganai, idia roho mauri.—Luka 21:20-22.

19. Dirava ena lalonamo ita abia totona, dahaka ita karaia be namo?

¹⁹ Ita be Iehova ita tomadiho henia dainai, namona be Noa bona ena ruma bese, bona Keristani taudia ginigunadia ita tohotohoa. Inai tanobada dikana ena kara idauidau ita dadaraia, bona iseda tadikaka taihu milioni momo ida eda hetura karana ita hagoadaia be namo. Dirava amo ia mai aonega ese ia hakaua taudia ita bamoa neganai, unai ese ita do ia durua inai nega dikadia ai ‘iseda abidadama dekenai ita gini goada.’ (1 Kor. 16:13; Aon. 13:20) Bona inai hahenamo oi laloa! Bema inai nega dokona ai, iseda hebamo karana ita naria namonamo, inai tanobada dikana amo do ita roho mauri bona Iehova ena kara maoromaoro tanobada matamatana ai do ita noho!