1. Ustɛm wi de liv insay naw?

WI DE liv na tɛm we tin rili tranga. Frɔm 1914 di Baybul kɔl di tɛm we wi de liv “di las dez.” Di “bad bad tin dɛn [we] go de apin we nɔ go izi fɔ bia,” go wɔs pas ɔl di bad tin dɛn we bin dɔn de apin to mɔtalman bifo 1914. (2 Tim. 3:1-5) Apat frɔm dat, bad bad tin dɛn go kɔntinyu fɔ apin na di wɔl. Di Baybul bin dɔn tɔk se: “Wikɛd pipul dɛn ɛn pipul dɛn we de ful ɔda pipul dɛn go kɔntinyu fɔ du bad tin dɛn mɔ ɛn mɔ.”—2 Tim. 3:13.

2. Wetin bɔku pipul dɛn kin wach ɛn du fɔ ɛnjɔy dɛnsɛf? (Luk di pikchɔ nia dis atikul in taytul.)

² Di Baybul se fɛt-fɛt, mami ɛn dadi biznɛs di we aw Gɔd nɔ want, ɛn juju biznɛs na tin dɛn we bad na Gɔd in yay, bɔt we i kam pan ɛnjɔymɛnt, na dɛn tin dɛn ya bɔku pipul dɛn kin wach ɔ du. Fɔ ɛgzampul, di Intanɛt, tɛlivishɔn program, fim, buk, ɛn magazin dɛn kin tɔk bɔt fɛt-fɛt ɛn mami ɛn dadi biznɛs di we aw Gɔd nɔ want as tin dɛn we fayn. Na sɔm say dɛn na di wɔl, sɔm gɔvmɛnt dɛn dɔn gri fɔ lɛ pipul dɛn du sɔm tin dɛn we dɛn bin de si as bad tin trade. Bɔt dat nɔ min se Gɔd de gri fɔ dɛn kayn bad tin dɛn ya.—Rid Lɛta Fɔ Rom 1:28-32.

3. Aw pipul dɛn we de na di wɔl kin si di wan dɛn we de du wetin Gɔd want?

 ³ Jizɔs in disaypul dɛn we bin de, trade trade nɔ bin de miks pan ɛnjɔymɛnt we nɔ fayn. Bikɔs dɛn nɔ bin de miks pan ɛnjɔymɛnt we nɔ fayn ɛn dɛn bin de du tin di we aw Gɔd want, pipul dɛn bin et dɛn ɛn dɛn bin de du bad tin to dɛn. Di apɔsul Pita bin rayt se: “Dɛn de sɔprayz we una [Kristian dɛn] nɔ de kɔntinyu fɔ liv bad layf wit dɛn igen, so dɛn de tɔk bad tin bɔt una.” (1 Pit. 4:4) Tide sɛf, di pipul dɛn na di wɔl de si di wan dɛn we de du wetin Gɔd want as pipul dɛn we difrɛn. Apat frɔm dat, “ɔl di wan dɛn we want fɔ liv dɛn layf di we aw Gɔd want togɛda wit Krays Jizɔs, pipul dɛn go mek dɛn sɔfa.”—2 Tim. 3:12.

4. Wetin di Baybul se wi nɔ fɔ du we i kam pan di tin dɛn we de apin na di wɔl?

⁴ Di Baybul advays di wan dɛn we want fɔ du wetin Gɔd want nɔ fɔ lɛk dis wɔl ɛn di tin dɛn we dɛn de du insay dis wɔl (Rid Jɔn In Fɔs Lɛta 2:15, 16.) Setan, we na “di gɔd we de na dis wɔl,” na in de kɔntrol di wɔl. I de yuz rilijɔn dɛn, di gɔvmɛnt dɛn, dɛn biznɛs ɔganayzeshɔn dɛn, redio, tɛlivishɔn, wɛbsayt ɛn buk dɛn fɔ ful pipul dɛn. (2 Kɔr. 4:4; 1 Jɔn 5:19) As Kristian dɛn, wi nid fɔ wach di kayn pipul dɛn we wi de spɛn tɛm wit. Gɔd in Wɔd nɔ lay, we i se: “Lɛ natin nɔ ful una. Bad padi dɛn go mek una pwɛl una gud abit dɛn.”—1 Kɔr. 15:33.

5, 6. Udat dɛn wi nɔ fɔ mek tayt padi biznɛs wit? Wetin mek wi nɔ fɔ du dat?

⁵ Fɔ mek wi nɔ lɛf fɔ du di gud tin dɛn we wi dɔn yus fɔ du, wi nɔ fɔ mek tayt padi biznɛs wit pɔsin we nɔ de du wetin Jiova want. Nɔto di wan dɛn we nɔ de sav Jiova nɔmɔ wi nɔ fɔ mek tayt padi biznɛs wit, bɔt ivin di wan dɛn we de se dɛn de sav Jiova bɔt dɛn stil de du wetin Jiova nɔ want pan ɔl we dɛn no se dat bad. If dɛn kayn Kristian ya sin siriɔs wan ɛn dɛn nɔ chenj, wi nɔ fɔ kɔntinyu fɔ spɛn tɛm wit dɛn.—Rom 16:17, 18.

⁶ If wi de spɛn tɛm wit di wan dɛn we nɔ de du wetin Gɔd se, wi go bigin fɔ du di bad tin dɛn we dɛn de du so dat dɛn go lɛk wi. Fɔ ɛgzampul, if wi mek tayt padi biznɛs wit pipul dɛn we lɛk fɔ du mami ɛn dadi biznɛs di we aw Gɔd nɔ want, dɛn go tɛmt wi fɔ du mami ɛn dadi biznɛs di we aw Gɔd nɔ want. Dat bin dɔn apin to sɔm Kristian dɛn we bin dɔn gi dɛn layf to Jiova, ɛn bikɔs dɛn nɔ bin chenj, dɛn bin disfɛloship dɛn. (1 Kɔr. 5:11-13) If dɛn nɔ chenj, dɛn go tan lɛk wetin Pita bin tɔk.—Rid Pita In Sɛkɔn Lɛta 2:20-22.

7. Udat dɛn fɔ bi wi tayt padi?

⁷ Pan ɔl we wi fɔ biev fayn to di wan dɛn we nɔ de obe Gɔd in lɔ dɛn, wi nɔ fɔ mek tayt padi biznɛs wit dɛn. So i nɔ rayt fɔ lɛ Jiova Witnɛs we nɔ mared yet kip pɔsin we nɔ gi in layf yet to Jiova ɛn we nɔ de rɛspɛkt di advays dɛn we de na di Baybul. I go bɛtɛ mek Jiova gladi fɔ wi pas fɔ lɛ ɔda pipul dɛn we nɔ lɛk am gladi fɔ wi. Wi tayt padi dɛn fɔ bi di wan dɛn we de du wetin Gɔd want. Jizɔs bin tɔk se: “Ɛnibɔdi we du wetin Gɔd want, na in na mi brɔda, mi sista, ɛn mi mama.”—Mak 3:35.

8. We di Izrɛlayt dɛn bin mek padi biznɛs wit pipul dɛn we nɔ de wɔship Jiova, aw dat bin afɛkt dɛn?

⁸ Di bad tin we kin apin we pɔsin spɛn tɛm wit bad padi, bin apin to di Izrɛlayt dɛn. We Jiova bin pul di Izrɛlayt dɛn pan slev wok na Ijipt, ɛn we i bin de kɛr dɛn go  na di land we i bin dɔn prɔmis dɛn, i bin tɛl dɛn se: “Una nɔ fɔ butu bifo dɛn gɔd dɛn ɔ mek ɛnibɔdi mek una sav dɛn, ɛn una nɔ fɔ du di tin dɛn we dɛn de du. Bifo dat, una fɔ pwɛl dɛn ɛn nyamanyama dɛn oli pila dɛn. Na Jiova we na una Gɔd na in una fɔ sav.” (Ɛks. 23:24, 25) Bɔku pan di Izrɛlayt dɛn nɔ bin du wetin Gɔd tɛl dɛn. (Sam 106:35-39) Bikɔs dɛn nɔ bin fetful to Gɔd, leta, Jizɔs bin tɛl dɛn se: “Luk! Una os dɔn lɛf to una.” (Mat. 23:38) Jiova bin pul in an pan di Izrɛlayt dɛn ɛn put in blɛsin pan di nyu Kristian kɔngrigeshɔn.—Akt 2:1-4.

9. Wetin mek bɔku pan di tin dɛn we de na tɛlivishɔn, redio, ɛn wɛbsayt dɛn rili bad?

⁹ Bɔku pan di tin dɛn we kin de na redio, tɛlivishɔn, buk dɛn, ɛn wɛbsayt dɛn nɔ rili fayn fɔ Kristian. Dɛn tin dɛn ya nɔ de ɛp wi fɔ gɛt mɔ fet pan Jiova ɛn di tin dɛn we i dɔn prɔmis. Bifo dat, i de ɛnkɔrej pipul dɛn fɔ abop pan di wikɛd wɔl we Setan de rul. So wi fɔ rili tek tɛm so dat wi nɔ go wach ɔ lisin to sɔntin we go mek wi want fɔ du “ di bad tin dɛn na dis wɔl.”—Tay. 2:12.

10. Wetin go apin to di bad tin dɛn we pipul dɛn de rid ɛn wach?

¹⁰ I nɔ go te igen, di bad tin dɛn we pipul dɛn kin rid ɛn wach nɔ go de igen. Ɔl dɛn tin ya nɔ go de igen we Jiova dɔnawe wit dis wɔl we Setan de rul. Gɔd in Wɔd se: “Di wɔl go dɔn jisnɔ ɛn di tin dɛn we de insay de dɛnsɛf go dɔn jisnɔ, bɔt di wan we de du wetin Gɔd want go de sote go.” (1 Jɔn 2:17) Semweso, wan pan di man dɛn we bin rayt di Sam buk bin se: “Di wan dɛn we de du wetin bad nɔ go de igen, bɔt di wan dɛn we abop pan Jiova go gɛt di wɔl. . . . Di wan dɛn we ɔmbul go gɛt di wɔl, ɛn dɛn go gladi ɛn ɛnjɔy pis.” Fɔ aw lɔng? “Di wan dɛn we de du wetin rayt go gɛt di wɔl, ɛn dɛn go de de sote go.”—Sam 37:9, 11, 29.

11. Aw Gɔd de ɛp wi fɔ mek wi gɛt tayt padi biznɛs wit am?

¹¹ Di tin dɛn we Jiova in ɔganayzeshɔn de mek de ɛp pipul dɛn fɔ liv di kayn we we go mek dɛn gɛt layf we go de sote go ɛn dat difrɛn frɔm di tin dɛn we pipul dɛn na di wɔl de mek. We Jizɔs bin de pre to Jiova, i bin tɔk se: “Fɔ gɛt di layf we go de sote go, dɛn fɔ no yu, di wangren tru Gɔd, ɛn di wan we yu sɛn, Jizɔs Krays.” (Jɔn 17:3) Wi Papa we de na ɛvin, de yuz in ɔganayzeshɔn fɔ gi wi tin dɛn we go ɛp wi mek wi gɛt tayt padi biznɛs wit am. Na big big blɛsin wi gɛt fɔ gɛt magazin dɛn, buk dɛn, fim dɛn, ɛn Wɛbsayt we de ɛp wi fɔ wɔship Jiova di rayt we! I dɔn pas 110,000 kɔngrigeshɔn dɛn na di wɔl we Jiova in ɔganayzeshɔn dɔn arenj fɔ mek wi ol wi mitin dɛn ɛni wik. We wi kin gɛt mitin, asɛmbli, ɛn kɔnvɛnshɔn dɛn, wi kin tɔk bɔt tin dɛn na di Baybul we de ɛp wi fɔ gɛt mɔ fet pan Gɔd ɛn di tin dɛn we i dɔn prɔmis.—Ibru 10:24, 25.

12. Ɛksplen wetin i min fɔ mared to pɔsin “we biliv di Masta.”

¹² I rili impɔtant fɔ lɛ Kristian dɛn we nɔ mared yet bɔt we want fɔ mared, wach di kayn padi dɛn we dɛn gɛt. Gɔd in Wɔd tɔk klia wan se: “Una nɔ jɔyn wit pipul dɛn we nɔ biliv Gɔd. Us biznɛs, tin we nɔ rayt gɛt wit tin we rayt? Ɔ wetin layt gɛt fɔ du wit daknɛs?” (2 Kɔr. 6:14) Di Baybul advays Gɔd in savant dɛn we de luk fɔ pɔsin fɔ mared, fɔ mared to pɔsin “we biliv di Masta,” dat min se i fɔ mared to pɔsin we  dɔn gi in layf to Jiova, we dɔn baptayz, ɛn we de liv in layf di we aw Jiova want. (1 Kɔr. 7:39) We wi mared to pɔsin we de wɔship Jiova, wi go gɛt padi we dɔn gi in layf to Jiova ɛn we go ɛp wi fɔ kɔntinyu fɔ sav Jiova sote go.

13. Wetin Jiova bin tɛl di Izrɛlayt dɛn bɔt mared?

¹³ Jiova no wetin gud fɔ in savant dɛn, ɛn di advays dɛn we i de gi wi bɔt mared nɔ de chenj. Fɔ ɛgzampul, tink bɔt wetin Jiova bin tɛl di Izrɛlayt dɛn bɔt pipul dɛn we nɔ de wɔship am. I bin tɛl Mozis fɔ tɛl di Izrɛlayt dɛn se: “Una nɔ fɔ mared to dɛn. Una nɔ gi una gyal pikin dɛn to dɛn bɔy pikin dɛn ɔ tek dɛn gyal pikin dɛn fɔ una bɔy pikin dɛn. Bikɔs dɛn go mek una bɔy pikin dɛn lɛf fɔ fala mi ɛn go sav ɔda gɔd dɛn; dɔn Jiova go vɛks pan una bad bad wan ɛn i go kil una wantɛm wantɛm.”—Dyut. 7:3, 4.

14, 15. We Sɔlɔmɔn nɔ bin fala Jiova in advays, aw dat bin afɛkt am?

¹⁴ Di tɛm we Devid in pikin Sɔlɔmɔn bin jɔs bigin fɔ rul, i bin pre to Gɔd fɔ mek in gi am sɛns, ɛn Gɔd bin mek i rili gɛt sɛns. Bɔku pipul dɛn bin kam sabi Sɔlɔmɔn as Kiŋ we gɛt sɛns ɛn bɔku mɔni. Infakt, we di kwin na Shiba bin kam fɛn Sɔlɔmɔn, i bin tɔk se: “A nɔ bin biliv di tin dɛn we dɛn tɛl mi pas we a dɔn kam si wit mi yon yay. Ɛn na smɔl tin nɔmɔ dɛn tɛl mi. Yu gɛt bɔku sɛns ɛn jɛntri pas wetin a bin yɛri.” (1 Kiŋ 10:7) Bɔt Sɔlɔmɔn in ɛgzampul bin sho di bad tin we kin apin we pɔsin nɔ fala Gɔd in advays ɛn mared to pɔsin we nɔ de sav am.—Ɛkli. 4:13.

¹⁵ Pan ɔl di tin dɛn we Gɔd bin du fɔ Sɔlɔmɔn, i nɔ bin fala Gɔd in advays. I bin mared uman dɛn we nɔ de wɔship Jiova. Sɔlɔmɔn “bin lɛk bɔku uman dɛn we nɔto Izrɛlayt” ɛn leta i bin gɛt 700 wɛf dɛn ɛn 300 galfrɛn dɛn. Wetin bin apin we i du dis? We Sɔlɔmɔn dɔn ol, in wɛf dɛn we nɔ bin de sav Jiova “tɔn in at fɔ mek i bigin wɔship ɔda gɔd dɛn, . . . ɛn Sɔlɔmɔn bin du wetin bad na Jiova in yay” (1 Kiŋ 11:1-6) Di kayn uman dɛn we i bin mared, bin mek i lɛf fɔ wɔship Jiova di rayt we. Dis na wɔnin fɔ Kristian dɛn we go want fɔ mared to pɔsin we nɔ lɛk Jiova!

16. Us advays de na di Baybul fɔ di wan dɛn we dɔn mared to pɔsin we nɔ de sav Jiova bifo dɛn bigin fɔ sav Jiova?

¹⁶ Wetin pɔsin go du if i bin dɔn mared to pɔsin we nɔ de sav Jiova bifo i bigin fɔ sav Jiova? Di Baybul se: “Una dɛn mareduman dɛn, una fɔ put unasɛf ɔnda una man dɛn, so dat if ɛni wan pan dɛn nɔ de du wetin Gɔd in wɔd se, dɛn go chenj bikɔs dɛn wɛf dɛn de biev fayn. Dɛn wɛf dɛn nɔ go nid fɔ tɔk natin sɛf.” (1 Pit. 3:1) Wetin di Baybul tɔk na ya na fɔ Kristian uman dɛn we dɔn mared, bɔt dis advays de bak fɔ man dɛn we bin dɔn mared to pɔsin we nɔ de sav Jiova bifo dɛn bigin fɔ sav Jiova. Di Baybul in advays klia. Yu fɔ bi gud maredman ɔ gud mareduman, ɛn fala di advays dɛn we Gɔd dɔn gi bɔt mared. Bɔku maredman ɔ mareduman we nɔ bin de sav Jiova dɔn kam fɔ sav am bikɔs dɛn man ɔ wɛf dɔn chenj afta dɛn lan wetin Jiova want.

17, 18. Wetin bin ɛp Noa fɔ sev we da Ebi Ren bin kam? Wetin bin ɛp fɔstɛm Kristian dɛn fɔ sev we di Roman dɛn kam pwɛl Jerusɛlɛm?

¹⁷ Na tru se bad padi dɛn kin pwɛl di fayn we aw wi dɔn yus fɔ biev, bɔt gud padi dɛn kin mek wi du wetin rayt. Tink bɔt Noa, we bin de di tɛm we di wɔl bin rili bad. I nɔ bin mek tayt padi biznɛs wit di pipul dɛn  we bin de du bad bad tin dɛn. Da tɛm de,“Jiova si se di bad tin dɛn we mɔtalman bin de du na di wɔl bin rili bɔku ɛn na bad tin nɔmɔ dɛn bin de tink bɔt na dɛn at ɔltɛm.” (Jɛn. 6:5) Gɔd bin mek Ebi Ren kam ɛn dɔnawe wit ɔl di wan dɛn we bin de du wetin bad. Bɔt, “Noa na bin man we de du wetin rayt. I nɔ bin de du di bad tin dɛn we ɔda pipul dɛn bin de du. Noa waka wit di tru Gɔd.”—Jɛn. 6:7-9.

¹⁸ Noa nɔ bin de tray fɔ mek tayt padi biznɛs wit pipul dɛn we nɔ de du wetin Gɔd want. In ɛn di ɔda sɛvin pipul dɛn na in famili bin bizi de du di wok we Gɔd gi dɛn fɔ du, dat na fɔ bil di ak. Apat frɔm dat, Noa “bin de prich bɔt wetin rayt.” (2 Pit. 2:5) Di prich we Noa bin de prich, di ak we i bin de bil, ɛn di spɛn we i bin de spɛn tɛm wit in famili bin ɛp am fɔ kɔntinyu fɔ du gud tin dɛn we bin mek Gɔd gladi fɔ am. Bikɔs Noa bin du dis, in ɛn in famili bin sev we da Ebi Ren bin kam. Wi fɔ tɛl dɛn tɛnki bikɔs we ɔl kɔmɔt frɔm pipul dɛn we bin de sav Jiova. Dat na Noa, in wɛf, in bɔy pikin dɛn, ɛn dɛn wɛf dɛn. Semweso, fɔstɛm Kristian dɛn we bin fetful to Jiova nɔ bin mek padi biznɛs wit pipul dɛn we nɔ bin de obe Gɔd ɛn dat bin mek dɛn sev we di Roman dɛn pwɛl Jerusɛlɛm insay di ia 70.—Lyuk 21:20-22.

19. Wetin wi fɔ du fɔ lɛ Gɔd gladi fɔ wi?

¹⁹ As pipul dɛn we de wɔship Jiova, wi fɔ falamakata Noa, ɛn in famili, ɛn dɛn fɔstɛm Kristian dɛn we bin de obe Jiova. Wi nɔ fɔ miks pan di bad tin dɛn we de apin arawnd wi ɛn wi fɔ tray fɔ spɛn tɛm wit sɔm pan wi brɔda ɛn sista dɛn we fetful. We wi de nia di wan dɛn we de fala di advays dɛn we Gɔd de gi, i go ɛp wi fɔ “tinap tranga wan fɔ wetin [wi] biliv” insay dis tranga tɛm we wi de so. (1 Kɔr. 16:13; Prɔv. 13:20) Jɔs tink bɔt di wɔndaful tin dɛn we gɛt fɔ apin! If wi wach di kayn padi dɛn we wi de spɛn tɛm wit insay dis las dez, wi go sev di tɛm we Jiova go dɔnawe wit dis wɔl, ɛn wi go go insay di nyu wɔl we nɔ de fa igen.