“Tũud-n-ta-wẽng sãamda minim-sõamyã.”—1 KOR. 15:33.

YƖƖLA: 73, 119

1. Bõe la d tõe n yeel tõnd wakatã wɛɛngẽ?

TÕND wakatã yaa toog wakate. A sɩnga yʋʋmd 1914, tɩ Biiblã boond rẽ tɩ “yaoolem wakate.” Yʋʋm-kãng tɛkã, yɛlã tara kengr dũniyã zugu. (2 Tɩm. 3:1-5) Sẽn paase, d miime tɩ yɛlã na n maneg n zẽname. Bala, Biiblã yeelame tɩ “nin-wẽnsã ne bɛlgdbã na n kell n kẽeda wẽngã pʋgẽ n paasdẽ.”—2 Tɩm. 3:13.

2. Reem bʋs buud n wae rũndã-rũndã? (Ges-y fotã sẽn be yĩngrã.)

² Rũndã-rũndã, neb wʋsg maanda bũmb toor-toor Biiblã sẽn wilg tɩ pa sõma ye. B wae n geta bõn-kãens n noogd b yõor me. Wala makre, nen-kɛglem tʋʋma, yoob yɛl la zĩn-dãmb yɛla. Ẽntɛrnetã pʋgẽ, televiziõ wã, filim-dãmbã la sɛbã pʋsẽ, b wae n maandame tɩ yaa wa yoobã, la nen-kɛglmã pa maneg n yaa wẽng ye. Pĩndã, bũmb kẽer maaneg la nebã ra get tɩ yaa wɩɩbdo. La masã, neb kẽer getame tɩ rẽ pa wẽng ye. Tẽns sãnda taoor dãmb pʋd n kõo sor tɩ sẽn dat-a fãa tõe n maan bõn-kãense. La baa ne rẽ, yel-kãens ket n yaa wẽns Wẽnnaam nifẽ.—Karm-y Rom-dãmb 1:28-32.

3. Wãn to la neb wʋsg get sẽn tũud-b Wẽnnaam noyã?

 ³ Pipi kiris-nebã wakatẽ, nebã ra nong n geta nen-kɛglem tʋʋm la yoob yɛl n noogd b yõore. La a Zeezi karen-biisã sẽn da sakd Wẽnnaamã, b pa maan woto ye. Rẽ kɩtame tɩ neb wʋsg ra yaand-b la b namsd-ba. Tʋm-tʋʋmd a Pɩyɛɛr yeela kiris-nebã woto: “Yãmb sẽn ka leb n naagd neb nins sẽn ka pʋʋsd Wẽnnaamã n maand tʋʋm-dẽgd kãensã, a linga bãmb tɩ b kãnegd yãmba.” (1 Pɩy. 4:4) Rũndã-rũndã me, neb wʋsg geta sẽn tũud-b Wẽnnaam noyã wa neb sẽn pa wõnd b taaba. Sɩd me, Biiblã yeelame tɩ “neb nins fãa sẽn dat n vɩɩmd tẽeb vɩ-sõng Kiris pʋgẽ wã, neb na nams-ba.”—2 Tɩm. 3:12.

“TŨUD-N-TA-WẼNG SÃAMDA MINIM-SÕAMYÔ

4. Bõe yĩng tɩ d pa segd n nong dũni-kãngã?

⁴ D sã n dat n ta Wẽnnaam yam, d pa segd n nong dũniyã la bũmb nins sẽn be a pʋgẽ wã ye. (Karm-y 1 Zã 2:15, 16.) Dũni-kãngã tũudum toor-toorã, a politik siglsã, lɛɛbdbã siglsã la bũmb nins b sẽn tar n yelgd kibayã be a Sʋɩtãan nugẽ. (2 Kor. 4:4; 1 Zã 5:19) D sã n pa rat tɩ dũniyã yam kẽ-do, d segd n gũusa tũud-n-taarã wɛɛngẽ. Wẽnnaam Gomdã yeela woto: “Da belg-y y mens ye: Tũud-n-ta-wẽng sãamda minim-sõamyã.”—1 Kor. 15:33.

5, 6. Nin-bʋs buud la d pa segd n tũ, la bõe yĩnga?

⁵ D sã n pa rat tɩ d minim-sõamyã sãame, d pa na n tũ neb nins sẽn maand wẽngã ye. La pa sẽn pa-b tẽedbã bal ye. Ned sẽn dɩk a meng n kõ a Zeova sã n maand wẽnga, d pa na n bao a zood ye. Ned a woto sã n pa rat n tek yam n kos sugri, d na n tolg n laka d meng ne-a.—Rom. 16:17, 18.

⁶ D sã n tũud neb sẽn kɩɩsd Wẽnnaam noyã, d tõe n wa sak n maana wa bãmba, sẽn na yɩl n ta b yam. Wala makre, d sã n tũud neb sẽn nong yoobo, d tõe n wa yoome. A buud paama neb sẽn dɩk b mens n kõ Wẽnnaam. B sʋkã, kẽer pa tek yam n kos sugri, tɩ b yiis-b tigingã pʋgẽ. (1 Kor. 5:11-13) B sã n kell n pa tek yam, b yellã tõe n maneg n zẽname. Tʋm-tʋʋmd a Pɩyɛɛr goma neb a woto buud yelle.—Karm-y 2 Pɩyɛɛr 2:20-22.

7. Nin-bʋs buud zood la d segd n bao?

⁷ Baa d sẽn dat n maan nebã buud fãa neerã, d pa segd n lebg ned sẽn pa tũud a Zeova noyã zoa ye. Wala makre, a Zeova Kaset soab sẽn pa kẽ kãadem sã n bao ned sẽn pa rɩk a meng n kõ Wẽnnaam rolemdo, wall ned a woto n do-a t’a sake, pa zems ye. Paam n ta a Zeova yam tara yõod n yɩɩd bao n ta neb nins sẽn pa nong-a wã yam. Yaa neb nins sẽn maand Wẽnnaam daabã zood bal la d segd n bao. A Zeezi yeela woto: “Ned ningã fãa sẽn maand-a Wẽnnaam daabo, ada soab n yaa mam ma-bi-raoogo, la m ma-bi-poaka, la m ma.”—Mark 3:35.

8. Israyɛll nebã sẽn pa lak b mens ne tũud-n-ta-wẽnsã baasa wãna?

⁸ Ned sã n tar tũud-n-ta-wẽnse, a na n paama zu-loeese. Bũmb ning sẽn paam Israyɛll nebã wilgda rẽ. A Zeova sẽn wa n yiis-b Ezɩpt n tar-b n debd kãabg tẽngã pʋgẽ wã, a yeel-b lame tɩ b gũus ne buud nins sẽn zoe n be be wã. Ad a sẽn yeel-bã: “Ra wõgemd bãmb wẽnnaam-dãmbã taoor n waoog-b ye. La f ra maan wa bãmb sẽn maandã ye. Lub bãmb tẽn-kugã b sẽn luglã n wã. Bɩ y sak Sẽn-Ka-Saab sẽn yaa yãmb Wẽnnaamã.”  (Yik. 23:24, 25) Israyɛll nebã fãa la bal pa tũ Wẽnnaam sẽn yeelã ye. (Yɩɩn. 106:35-39) B sẽn pa sak Wẽnnaamã yĩnga, kaoosg zugẽ, a Zeezi yeel-b-la woto: “Gese, b na n basa y roogã vɩʋʋg ne-yã.” (Mat. 23:38) Sɩd me, a Zeova wa n daaga Israyɛll buudã n bas tɩ b pa le yaa buud a sẽn so ye. A yãka kiris-nebã tɩ b lebg a bu-paalga.—Tʋʋ. 2:1-4.

GŨUS-Y NE BŨMB NINS Y SẼN KAREMDE, LA Y SẼN GETE

9. Bõe yĩng tɩ d segd n gũus ne bũmb nins b sẽn wilgd televiziõ wã pʋgẽ, sẽn be ẽntɛrnetã pʋgẽ la sɛbã pʋsẽ wã?

⁹ Rũndã-rũndã, bũmb nins b sẽn wilgd televiziõ wã pʋgẽ, sẽn be ẽntɛrnetã pʋgẽ la sɛbã pʋsẽ wã wʋsg tõe n booga kiris-ned tẽebo. B pa maand bõn-kãens n na n sõng nebã tɩ b tẽ a Zeova la a pʋlemsã ye. Bõn-kãensã kɩtdame tɩ nebã teeg a Sʋɩtãan dũniyã. Rẽnd d segd n gũusame n da wa maan bũmb sẽn na n kɩt tɩ “dũniyã ratem wẽnsã” kẽ-d ye.—Tɩt 2:12.

10. Bõe n na n paam seb-yoodã la a filim-yoodã?

¹⁰ Ka la bilfu, seb-yoodã la filim-yoodã pa na n le zĩnd ye. B na n naaga a Sʋɩtãan dũniyã n sãame. Ad Biiblã sẽn yeele: “Dũni loogdame la a ratem wẽngã me loogdame. La ned ning sẽn maand Wẽnnaam daab paada wakat sẽn kõn sa.” (1 Zã 2:17) Yɩɩn-gʋlsdã me yeela woto: “B na n menesa tʋʋm-wẽns maandbã, la sẽn tẽed-b Sẽn-Ka-Saabã n na n soog tẽngã. Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.” B na n zĩnda tẽngã zug wakat fãa yĩnga. Bala, Biiblã paasame: “Nin-tɩrs na n sooga tẽngã, la b na n paa beenẽ wakat sẽn kõn sa.”—Yɩɩn. 37:9, 11, 29.

11. Bõe la Wẽnnaam maand n sõngd a nin-buiidã?

¹¹ A Zeova siglgã yẽ pa wa a Sʋɩtãan dũniyã ye. A sõngda tõnd n dat tɩ d wa paam vɩɩm sẽn pa sate. Daar a ye, a Zeezi pʋʋsa a Zeova n yeel woto: “Vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirisi, yãmb sẽn tʋm a soabã.” (Zã 17:3) Tõnd saasẽ Ba wã tũnugda ne a siglgã n kõt-d bũmb toor-toor sẽn sõngd tõnd tɩ d bãngd-a n paasdẽ. D sẽn tõe n paam sɛba, video-rãmb la sit wɛɛb sẽn tar sagls sẽn kengd d tẽebã pa noom-d sɩda? Sẽn paase, dũniyã gill zugu, a siglgã getame tɩ b maand tigiss semen fãa tigims tus koabg la piig la zak pʋsẽ. Sõss nins d sẽn kelgd tigissẽ wã la tigis-kãsemsã sasa wã kɩtdame tɩ d maneg n tẽed Wẽnnaam, la d kɩs sɩd t’a na n pidsa a pʋlemsã.—Ebre. 10:24, 25.

KIRIS-NED SEGD N KẼE KÃADEM NE “NED SẼN TŨUD ZU-SOABÃ BALA”

12. Biiblã sẽn yeel tɩ kiris-ned sã n dat n kẽ kãadem, a segd n baoo “ned sẽn tũud Zu-soabã bala” võor yaa bõe?

¹² Yaa kiris-neb nins sẽn dat n kẽ kãadmã n segd n maan gũusg tũud-n-taarã wɛɛngẽ n yɩɩda. Wẽnnaam Gomdã yeela woto: “Bɩ y da paam lagem-n-taar ne neb nins sẽn ka Kiris tẽedbã ye. Bala, bõe lagem-n-taar n be tɩrlem ne wẽng sʋka? Wall bõe lagem-n-taar n be vẽenem ne lik sʋka?” (2 Kor. 6:14) Biiblã yeelame me tɩ ned sẽn tũud Wẽnnaam sã n dat n kẽ kãadem, a segd n baoo “ned sẽn tũud Zu-soabã bala,” rat n yeel tɩ ned sẽn dɩk a meng n kõ Wẽnnaam n deeg lisg n tũud a noyã. (1 Kor. 7:39, Wẽnnaam Sebre, 1983) Y sã n kẽ kãadem ne ned a woto, y paama ned sẽn na n  sõng-y tɩ y kell n sak a Zeova ne y sũur fãa.

13. Kãadmã kõom wɛɛngẽ, no-bʋg la Wẽnnaam kõ Israyɛll nebã?

¹³ A Zeova mii bũmb ning sẽn na n naf neb nins sẽn tũud-a wã. A sɩng n yeta a nin-buiidã tɩ b ra kẽ kãadem ne sẽn pa tũud-b yẽ wã ye. Wala makre, a kɩtame t’a Moyiiz yeel Israyɛll nebã tɩ b pa segd n kẽ kãadem ne bu-zẽmsã neb ye. A yeela woto: “Ra maan yi-kãadem ne bu-bãmb ye. Da rɩk f bi-pugl n kõ bãmb tɩ b maan b pag ye. La ra peeg bãmb bi-pugl n kõ f kamb tɩ b maan b pag ye. Bala, b na n kɩtame tɩ yãmb kambã bas maam n tɩ tũ wẽnnaam-dãmb a taaba. La Sẽn-Ka-Saab sũur na n puuga ne yãmb tɩ b sãam yamb tao-tao.”—Tõo. 7:3, 4.

14, 15. A Salomo sẽn kɩɩs Wẽnnaam noyã, baasa wãna?

¹⁴ Rĩm a Davɩɩd biig a Salomo naamã sɩngr poor bilfu, a kosa Wẽnnaam yam, tɩ Wẽnnaam deeg a kosgã. Rẽ kɩtame t’a Salomo yɩ rĩm sẽn tall yam wʋsgo, n zã a tẽngã sõma, hal t’a yʋʋrã yi. Sɩd me, Seba rĩm-poakã sẽn wa n na n ges-a wã, a yeel-a-la woto: “Sã n ka mam sẽn wa tɩ m ninã yãndã, mam dag n ka sak n deeg tɩ yaa sɩd ye. Mam sẽn dag n wʋmdã ka ta mam sẽn yã wã pʋɩ-sʋk meng ye. Yãmb yamã ne y arzegsã yɩɩda mam sẽn dag n wʋm tɩ b gomd to-to wã.” (1 Rĩm. 10:7) La a Salomo pa tũ noy nins Wẽnnaam sẽn kõ kãadmã wɛɛngẽ wã ye. A kibarã sẽn baas to-to wã wilgdame tɩ wẽn-tũud sã n kẽ kãadem ne ned sẽn pa tũud Wẽnnaam, tõe n waa ne yelle.—Koɛ. 4:13.

¹⁵ Baa a Zeova sẽn ning a Salomo bark wʋsgã, a kɩɩsa a noyã, n kẽ kãadem ne “bu-zẽms kom-pugli wʋsg” sẽn pa tũud a Zeova. A pagbã yɩɩ na-bi-pogs kobs-yopoe, la pʋg-rɩkds kobs-tã. A Salomo yellã baasa wãna? A sẽn wa n kʋʋle, a pagbã sẽn da pa tũud a Zeova wã “tõog n wẽnemda a yamã t’a tũ wẽn-naandse.” Rẽ kɩtame t’a ‘maan sẽn yaa wẽng Sẽn-Ka-Saab nifẽ.’ (1 Rĩm. 11:1-6) A Salomo pagbã tõogame t’a bas a Zeova tũubu. Yel-kãngã sẽn paam a Salomo wã, a buud tõe n paama ned buud fãa. Woto wã, y pa tagsd tɩ d segd n gũusame n da wa kẽ kãadem ne ned sẽn pa nong a Zeova sɩda?

16. Sagl-bʋg la Biiblã kõt ned sẽn lebg a Zeova Kaset soaba, t’a pagã wall a sɩdã pa tũud a Zeova?

¹⁶ La ned sẽn kẽ kãadem sã n lebg a Zeova Kaset soab t’a pagã bɩ a sɩdã pa sak n na n tũ a Zeova yẽ? Biiblã yeela woto: “Woto me, pagba, bɩ yãmb ned kam fãa sak a sɩda, tɩ baa bãmb neb kẽer sẽn ka sakd Wẽnnaam koɛɛgã, bɩ b sẽn yãt b pagbã yel-manesmã sẽn yaa sõama wã, la sẽn waoogd bãmbã, kɩt tɩ b sak Wẽnnaam, tɩ ka tũ ne goam ye.” (1 Pɩy. 3:1, 2) Yaa sɩd tɩ yaa kiris-nin-pogsã la b kõ sagl-kãngã, la rap nins sẽn lebg a Zeova Kaset rãmb tɩ b pagbã pa sak n na n tũ a Zeova wã me tõe n tũu saglgã tɩ naf-ba. Biiblã sẽn yeel tɩ b maan bũmb ningã yaa vẽenega. Y segd n yɩɩ pʋg-sõng wall sɩd-sõngo, la y tũ sagls nins Wẽnnaam sẽn kõ kãadmã wɛɛngẽ wã. Y sã n maan woto, y pagã wall y sɩdã na n yãame tɩ y toeemame, tɩ rẽ tõe n kɩt t’a sak n tũ a Zeova. A buud zĩnda zags wʋsg pʋsẽ.

BAO-Y NEB NINS SẼN TŨUD A ZEOVA WÃ ZOODO

17, 18. Bõe n kɩt t’a Nowe põs sa-kãsengã sasa, la bõe n kɩt tɩ pipi kiris-nebã põs Zeruzalɛm sãoongã?

¹⁷ Tũud-n-ta-wẽns sã n tõe n kɩtame tɩ  ned kɩɩs a Zeova, tũud-n-ta-sõma tõe n sõnga ned t’a kell n sak a Zeova ne a sũur fãa. D gom a Nowe yelle. A wakatẽ wã tɩ nebã ra maanda wẽng wʋsgo, la a pa rɩk b togs-n-taar ye. Biiblã goma a Nowe wakatã yelle, n yeel woto: “Sẽn-Ka-Saab gesame tɩ ninsaalbã wẽngã lebga wʋsg dũniyã zugu, daar fãa, ninsaal tagsda wẽng maaneg yell bala.” (Sɩng. 6:5) Rẽ n kɩt tɩ Wẽnnaam yãk yam n na n sãam dũniyã. La a mikame t’a “Nowe zamaanã neb fãa sʋka, yẽnda rag n yaa nin-tɩrga, n yaa burkĩna. A Nowe rag n tũuda Wẽnnaam.”—Sɩng. 6:7-9.

¹⁸ Yaa vẽeneg t’a Nowe pa bao wẽn-kɩɩsdbã zood ye. Yẽ ne a zakã rãmb sẽn da yaa neb a yopoe wã wɩsga b meng n tʋm tʋʋmd ning Wẽnnaam sẽn kõ-bã. Sẽn paase, a Nowe ra yaa “tɩrlmã koe-moaanda.” (2 Pɩy. 2:5) A Nowe, a pagã, a kamb a tãabã n paas b pagbã ra nong n bee ne taaba. B ra maanda sẽn noom Wẽnnaam. Yaa rẽ la b sẽn põs sa-kãsengã sasa wã. Ninsaalbã fãa sẽn be rũndã-rũndã wã yaa bãmb yagense. Rẽnd d sũur segd n yɩɩ noog ne a Nowe la a zakã rãmb sẽn sak a Zeova n pa bao nin-wẽnsã zoodã. Pipi kiris-nebã me saka a Zeova, n pa yõg zood ne neb nins sẽn pa nong a Zeova wã ye. B sakrã kɩtame tɩ b põs Zeruzalɛm sãoongã sẽn yɩ yʋʋmd 70 soabã pʋgẽ wã.—Luk 21:20-22.

19. Bõe la d tõe n maan tɩ sõng-d tɩ d kell n sak a Zeova?

¹⁹ Tõnd sẽn yaa a Zeova Kaset rãmbã, d segd n dɩka a Nowe ne a zakã rãmba, la pipi kiris-nebã togs-n-taare. D pa segd n bao neb nins sẽn pa nong a Zeova wã zood ye. D tara tẽed-n-taas milyõ-rãmb sẽn nong a Zeova. D segd n baoo zo-rãmb nin-kãens sʋka. Rũndã-rũndã sẽn yaa toog wakatã, d sã n maan woto, b na n sõnga tõnd tɩ d ‘yals kãenkãe tẽebã pʋgẽ.’ (1 Kor. 16:13; Yel. 13:20) Dũni-kãngã sãoongã poore, d sã n wa mik tɩ d põsame n vɩ Wẽnnaam dũni-paalgã pʋgẽ, d sũur kõn yɩ noog sɩda? Bɩ d gũus tũud-n-taarã wɛɛngẽ, n da bao neb nins sẽn pa nong a Zeova wã zood ye.