1. ¿Ima punllacunapita causanajunchi?

CUNAN punllacunapica ninan llaqui punllacunapimi causanajunchi. Bibliapi nishca shinaca, huata 1914mandami ‘tucurimui punllacunapi’ causanajunchi. Chai huatamandami ashtahuan llaquicuna tiashca (2 Tim. 3:1-5). Bibliapica nircapashmi, mundo enteropi llaquicuna ashtahuan mirajpimi gentecunapash “ashtahuan ashtahuan naliman tigranga” nishpa (2 Tim. 3:13).

2. ¿Imatata ashtaca gentecunaca alicachin? (Callari dibujota ricupangui.)

² Ashtaca gentecunaca Internetpi, televisionbi, peliculacunapi, librocunapi, revistacunapica mapa, pinganai ruraicunata, manllanaita macanajushpa huañuchirijta, brujeriacunatami alicachishpa ricun. Huaquingunacarin ninmi: Chai ruraicunaca normalmi, ima nalipash na canllu nishpa. Cutin huaquin llactacunapicarin chai ruraicuna ali can nishpami leycunata llujchishca. Chai ruraicuna gentecunapa ñaupajpi alishnalla ricurijpipash, Taita Diosca na ricunayachinllu (Romanos 1:28-32, liingui).

3. Taita Diosta cazushcamandaca ¿imashinata gentecunaca ñucanchita ricun?

 ³ Ashtaca gentecuna nali ruraicunahuan cushijujpipash, Jesusta punda catijcunaca chai nali ruraicunataca na ruranllu carca. Chaimandami gentecunaca burlarishpa paicunataca ninanda llaquichin carca. Apóstol Pabloca nircami: ‘Nalita ruranata saquishcata ricushpaca manllarishpami cangunataca rimashpa llaquichinajunga’ nishpa (1 Ped. 4:4). Cunanbipash Taita Diosta cazujpimi ashtaca gentecunaca ñucanchitaca na ricunayachin. Shinapash, ñucanchicunaca na manllarinachu canchi. Bibliapi nishca shinaca, Jesusta catijcunaca ‘tucuicunami llaquita apana’ carca (2 Tim. 3:12).

4. ¿Imamandata cai mundopa ruraicunamandaca caruyana capanchi?

⁴ Bibliapi nishca shinaca, Taita Diosta sirvijcunaca cai mundotaca na juyanachu canchi, caruyanami canchi (1 Juan 2:15, 16, liingui). ‘Cai pachata Diablo mandajuimandami’ panda religiongunapi, jatun empresacunapi, politicapi, radio, televisionda ñaupaman pushaj organizaciongunapipash nali ruraicunalla ricurin (2 Cor. 4:4; 1 Juan 5:19). Chaicunapi ama chapuringapaca, chai nali ruraicunamandaca caruyaitapachami caruyana canchi. Bibliapica ninmi: “Nalicunahuan tandanajujpica, canguna ali causajujtapash pandachishpami chingachinga” nishpa (1 Cor. 15:33, MTQI).

5, 6. a) ¿Picunahuanda na amigo tucuna capanchi? b) ¿Imamandata paicunahuanga na amigo tucuna capanchi?

⁵ Ñucanchicuna ali causajushcata ama chingachingapaca, canllamanda gentecunahuan, congregacionbi cashpapash nalita rurashpa causajcunahuan cumba tucushpa purinamandaca cuidarinami canchi. Ashtahuangarin, Taita Diosta sirvijuni nishpapash juchamanda na arripintirijpica, paicunahuanga parlaitallapash na parlanachu canchi (Rom. 16:17, 18).

⁶ Jehová Diosta na sirvijcunahuan amigo tucushpa, yapata paicunahuan yalishpaca, paicunahuan ali cangapallami ñucanchicunapash paicunashna nalita rurai callarishun. Pensarishun. Jehová Diospa mandashcacunata na cazushpa shuj huarmihuan o shuj jarihuan mapa, pinganai cosascunata rurajcunahuan llevarishpaca, ñucanchicunapashmi huainayana juchapi urmaita ushanchi. Shina juchacunapi urmaimandami huaquingunaca congregacionmanda llujchi tucushca (1 Cor. 5:11-13). Na arripintirishpa congregacionman na tigrajpica, 2 Pedro 2:20-22pi shimicunami paicunapica pactaringa (chai textota liingui).

7. ¿Picunata ñucanchipa amigocuna cana can?

⁷ Tucuicunata aliguta tratangapaj munashpapash, Jehová Diosta na sirvijcunahuanga na yapata llevarinachu canchi. Chaimandami congregacionbi solterocunaca, Jehová Diosta na tucui shunguhuan sirvijcunahuanga na puri callarina can. Cai mundopi ali quedanamandalla imatapash ruranapa randica, Jehová Diospa ñaupajpi ali canatami mascana can. Ñucanchipa ali amigocunaca Jehová Diospa mandashcacunatami cazuna can. Jesusca nircami: ‘Taita Dios munashcata pactachijcunallami ñuca huauqui, ñuca pani, ñuca mama can’ nishpa (Mar. 3:35).

8. Israelitacuna nali gentecunahuan llevarimandaca ¿imata tucurca?

⁸ Nalita rurajcunahuan llevarishpaca ñucanchicunapashmi jatun llaquicunapi urmashun. Israelitacunata yaripashun.  Paicunaca nali gentecunahuan llevarimandami llaquipi urmarca. Egiptomanda paicuna llujshishca jipaca Jehová Diosca nircami: ‘Paicunapa dioscunataca na cungurinachu cangui. Sirvitapash na sirvinachu cangui. Paicuna nalicunata ruranajunshnapash na ruranachu cangui. Ashtahuangarin tucuillatami tucuchina cangui. Paicunapa dioscunataca tucuillatami faquina cangui. Cangunata Mandaj Taita Dios ñucatalla sirvinguichi’ nishpa (Éx. 23:24, 25). Jehová Dios shina mandajpipash ashtaca israelitacunaca na cazurcachu (Sal. 106:35-39). Chaimandami ashtaca huatacuna jipaca Jesusca nirca: ‘Ricuichi, cangunapa huasica jichushcami canga’ nishpa (Mat. 23:38). Shinami Jehová Diosca punda Israel llactata saquishpa, mushuj Israel nishca llactata callarichirca (Hech. 2:1-4).

9. ¿Imamandata imata liigrijushpa, imata ricugrijushpapash cuidarina capanchi?

⁹ Imata liijushpa, imata ricujushpapash na cuidadota charishpaca Jehová Diospa ñaupajpica nali ricurishunllu. Cunanbi peliculacuna, pugllaicuna, musicacunaca Diablopa munaitami ricuchin. Chai nali ruraicunaca Jehová Dios imata ruranapi feta charichunga na ayudanllu. Chaimandami samanajushpa imata ruragrijushpapash ali agllana canchi (Tito 2:12).

10. ¿Diablopa nali ruraicunahuanga imashi tucunga?

¹⁰ Diablopa nali ruraicuna tucurijpimi nali peliculacuna, pugllaicuna, musicacunapash ñana tianga. Chaimandami Bibliapica cashna nin: “Cai pachaca, tucui imapash nali munaicunandimi tucurijun. Ashtahuangarin Taita Dios munashcata rurajcunaca, causaitami causanga” nishpa (1 Juan 2:17). Salmo librota escribijpash nircami: “Nalicunaca tucuchi tucungami. Ashtahuangarin Mandaj Diosta shuyajcunami, llactataca japinga” nishpa. Shinallata nircapashmi: “Na jariyajcunami, llactataca japinga. Casilla ali causaihuanmi, ninanda cushijunajunga” nishpa. ¿Mashna tiempotashi shina causaica tianga? Salmos libropi nishca shinaca, alita rurajcunaca cai Alpapica “causaitami causanajunga” (Sal. 37:9, 11, 29).

11. Para siempre causaita charichunga ¿imashinata Jehová Diosca ñucanchita ayudan?

¹¹ Jehová Diospa organizacionga para siempre causaita charingapaj imata ruranatami yachachin. Chaimandami Jesusca shuj mañaipica nirca: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3). Jehová Diosca paipa organizacionda utilizashpami espiritualmente micunata carajunshna ashtaca revistacunata, folletocunata, librocunata, videocunata, Internetpi paginatapash llujchishca. Chai publicaciongunami Jehová Diosta aliguta sirvichun ayudan. Shinallata, Jehová Diospa organizacionga mundo enteropi 110 mil yali congregaciongunapi cada semana imata yachajunatami ricujun. Chai tandanajuicunapi, Jatun Tandanajuicunapipash chai publicaciongunata estudiashpami Biblia imata yachachijushcata ashtahuan intindishpa Jehová Diospi feta charinchi, pai imata ruranapipash confianchi (Heb. 10:24, 25).

12. ¿Imamandata Jesusta catijcunahuanlla cazarana can?

¹² Cazarana munaita charishpaca pihuan  cazaranataca ali alimi ricuna can. Bibliapica ninmi: ‘Na crijcunahuanga na yugurinshna tandanajunachu canguichi. ¿[Alita] ruranahuan nalita ruranahuanga tandanajunllu? Shinallata ¿michapash yana yana tutahuanga tandanajunllu?’ nishpa (2 Cor. 6:14). Testigo de Jehovacunataca, Jesusta catijcunahuanllami cazarana can nishpami Bibliapica mandan. Chaimandami cazaragrijushpaca Jehovata ali sirvij huarmihuan o jarihuan cazarana can (1 Cor. 7:39). Cai consejota cazushpallami ishcandillata Jehová Diosta ali sirvita ushanga.

13. ¿Imatata Jehová Diosca israelitacunataca mandarca?

¹³ Jehová Diosca ñucanchicunapa ima ali cashcataca alimi yachan. Cazarashpa ali causangapaj imata rurana cashcatapash yachanmi. Chaimandami israelitacunataca cashna mandarca: ‘Cangunapa ushicunataca paicunapa churicunahuanga na cazarachinachu canguichi. Paicunapa ushicunatapash na cangunapa churicunahuan cazarachinachu canguichi. Cangunapa churicunataca, Mandaj Diosta catinamanda anchuchijpimi shuj dioscunatara sirvinajunga. Shina rurajpimi Diosca nina japirinshna ninandapacha fiñarishpa cangunataca tucuchinga’ nishpa (Deut. 7:3, 4).

14, 15. Jehová Diospa mandashcata na cazuimandaca ¿imata Salomonhuanga tucurca?

¹⁴ Rey Davidpa churi Salomonga Jehovata na sirvij huarmicunahuan cazaraimandami llaqui aparca. Paipa nali ejemplota ricushpami Jehovata na sirvijhuan cazarana nali cashcata intindinchi (Ecl. 4:13). Salomón rey tucushpaca ali mandangapami Jehovapa ayudata mañarca. Salomón tucuita ali rurajushcataca shuj llactacunapashmi yachaj chayarca. Chaimandami, Seba llactamanda reinaca paipacha Salomonda ricungapaj shamurca. Chai reinaca cashnami nirca: “Can alipacha yachajushca cajta, ninan charij cajta tucuicuna parlanajushcataca, ashtahuan yalitami ricujuni” nishpa (1 Rey. 10:7).

¹⁵ Salomonga Jehová Dios ninanda bendiciajpipash paipa mandashcacunata na cazushpami ‘shuj llactamanda huarmicunahuan’ cazararca. Paica 700 mandaj huarmicunata, 300 caishuj huarmicunatami charirca. Shinaca, Jehovata na cazuimandaca ¿imata tucurca? Salomón ña rucuyashpaca Jehovata na sirvij huarmicunahuan cazaraimandami yanga dioscunata adorai callarirca. Shinami ‘Salomonga Mandaj Diospa ñaupajpi nalita rurarca’ (1 Rey. 11:1-6). Imashinami ricunchi, Jehová Diosta na sirvij huarmicunami Salomondaca Jehová Diosmanda caruyachirca. Chaimandami Jehová Diosta na sirvijcunahuan cazaranata pensajushpaca Salomonhuan ima tucushcata yaipi charina can.

16. Jehovata nara rijsishpallata ña cazarashcacunamanga ¿imatata Bibliapica mandan?

¹⁶ Jehovata nara rijsishpallata ña cazarashca cashpaca ¿imatata rurana can? Bibliapica ninmi: ‘Huarmicunapash cangunapa cusataca cazunami canguichi. Shina cazujujta ricushpami Diospa Shimita na crij cusapash canguna na villajpillata crij tucunga’ nishpa (1 Ped. 3:1). Cai textopi consejoca na huarmicunapalla canllu, cusacunapapashmi can. Shinaca ali cusa, ali huarmi cangapaca Jehová Diospa tucui mandashcacunata pactachishpa causangapami esforzarina can. Shina aliguta causajujta ricushpami na crij cusa o huarmipash tal vez Jehová Diosta sirvi callaringa.

17, 18. a) ¿Imamandata Noeca Jatun Manllanai Tamiamanda salvarirca? b) Jesusta punda catijcunaca ¿imamandata Jerusalenda llaquichijpica salvarirca?

¹⁷ Imashinami yachajushcanchi, nali amigocunaca Jehová Diosmanda caruyachinmi. Cutin ali amigocunaca Jehová Diosta ali sirvichunmi ayudan. Noé runaguta yaripashun. Paica nalicunata ruraj gentecunapa chaupipimi causarca. Bibliapica ninmi: ‘Cai pachapi causaj runacunaca jatun nalicunatami ruranajurca’ nishpa (Gén. 6:5). Chaimandami Jehová Diosca chai tucuilla nali gentecunata tucuchingapaj Jatun Manllanai Tamiata cachamugrijurca. Shinapash Noeca ‘[alita] ruraj, ima pandatapash na ruraj runami carca. Noé runaca Taita Dioshuanga aligutami purijurca’ (Gén. 6:7-9).

¹⁸ Noeca Jehová Diosta na sirvij gentecunahuanga na amigo tucurcachu. Paipa huarmihuan, churicunahuan, jachungunahuanmi Jehová Dios mandashca shina arcata rurashpa, villachishpa ocupado causanajurca. Chaimandami Noeca Jatun Tamia shamujpica paipa familiandi salvarirca (2 Ped. 2:5). Noepash paipa familiapash ali amigocunahuan llevarishpa, Jehová Diosta ali sirvimandami ñucanchicunapash cunanbica causanchi. Chaimandami paicunataca ninanda agradicina canchi. Jesusta punda catijcunapash Jehová Diosta na sirvij gentecunahuan na llevarimandami, Jerusalén llactata huata 70pi llaquichijpica salvarirca (Luc. 21:20-22).

19. Shinlli feta charingapaca ¿imatata rurana capanchi?

¹⁹ Ñaupa punllacunapi Jehová Diosta ali sirvijcunapa ejemplota catishpa, cai mundopa ruraicunamanda caruyashunchi. Shinallata Jehová Diosta ali sirvishpa, Diospa mandashcacunata cazuj huauquipanicunahuan amigo tucushunchi. Shina rurashpallami manllanai llaqui punllacunapi causajushpapash shinlli feta charishun (1 Cor. 16:13; Prov. 13:20). Shinaca, tucuri punlla chayamujpipash para siempre cushilla causangapaca, cunanbillata ali amigocunata agllashunchi.