1. Ita moris iha tempu saida?

ITA moris iha tempu neʼebé nakonu ho “problema barak neʼebé susar atu tahan”. Husi tempu neʼebé “loron ikus sira” hahú iha tinan 1914, situasaun iha mundu sai aat liu ba daudaun. (2 Timóteo 3:1-5) Maibé mundu neʼe sei kontinua atu sai aat liu tanba profesia iha Bíblia hatete katak “ema aat no bosok-teen sira sei laʼo husi aat ba aat liután”.—2 Timóteo 3:13.

2. Ohin loron, ema barak gosta atividade halimar nian hanesan saida? (Haree foto iha leten.)

² Ohin loron, ema barak hili atividade halimar nian neʼebé liga ho matan-dook, violénsia, ka hahalok la morál. Porezemplu, sítiu sira iha internét, programa iha televizaun, filme no livru sira hatudu violénsia no sala-foʼer hanesan hahalok neʼebé diʼak. No hahalok balu neʼebé uluk ema hanoin mak aat duni, agora ema simu deʼit no legaliza ona iha rai balu. Maski nuneʼe, neʼe la dehan katak Jeová simu buat sira-neʼe.—Lee Roma 1:28-32.

3. Ema barak hanoin saida kona-ba ema neʼebé moris tuir Maromak nia matadalan?

 ³ Iha apóstolu sira-nia tempu mós, ema gosta haree violénsia no buat neʼebé la morál. Maibé Jesus nia dixípulu sira la hanesan neʼe tanba sira moris tuir Maromak nia matadalan. Neʼe halo ema seluk sai “bilan” no sira “koʼalia aat” kona-ba ema kristaun sira. (1 Pedro 4:4) Ohin loron mós, ema haree katak ita neʼebé moris tuir Maromak nia matadalan mak oin seluk duni. Tuir loloos, Bíblia fó avizu ba ita katak ema hotu neʼebé banati-tuir Kristu nia ezemplu “sei hetan terus”.—2 Timóteo 3:12.

4. Tanbasá mak ita la bele hadomi mundu neʼe?

⁴ Se ita hakarak halo tuir Maromak, ita la bele “hadomi mundu ka buat sira neʼebé mundu nian”. (Lee 1 João 2:15, 16.) Satanás, “maromak mundu neʼe nian” mak kontrola mundu neʼe. Nia uza relijiaun, governu sira, negósiu sira no telejornál atu lohi ema. (2 Korinto 4:4; 1 João 5:19) Ita lakohi mundu neʼe atu dada ita, tan neʼe ita presiza kuidadu ho ema neʼebé ita ransu. Bíblia fó avizu ba ita: “Keta husik ema seluk lohi imi. Ransu hamutuk ho ema aat sei estraga toman diʼak.”—1 Korinto 15:33.

5, 6. Ita la bele ransu ho sé, no tanbasá?

⁵ Atu mantein relasaun diʼak ho Jeová, ita la bele hili atu ransu ho ema neʼebé iha toman atu halo hahalok aat. Neʼe inklui mós ema neʼebé dehan katak sira adora Jeová maibé hili atu la halo tuir nia. Se ema sira-neʼe mak halo sala todan ruma no la arrepende an, ita tenke hapara kedas ransu ho sira.—Roma 16:17, 18.

⁶ Baibain ema hakarak halo buat neʼebé halo kontente sira-nia kolega, hodi sira-nia kolega simu sira. Tan neʼe mak se ita ransu ho ema neʼebé la halo tuir Maromak, karik ita mós sei halo tuir sira-nia hakarak. Porezemplu, se ita sempre ransu ho ema neʼebé halo hahalok la morál, karik lakleur mós ita sei sai hanesan sira. Neʼe akontese ona ba ita-nia irmaun-irmán balu, no sira neʼebé la arrepende an, kongregasaun hasai sira. (1 Korinto 5:11-13) Se sira la arrepende an, sira-nia moris sei sai hanesan buat neʼebé apóstolu Pedro hakerek iha 2 Pedro 2:20-22. (Lee.)

7. Ita hakarak hili sé atu sai ita-nia belun diʼak?

⁷ Ita hakarak hatudu laran-diʼak ba ema hotu, maibé ita la bele sai belun diʼak ho ema neʼebé la halo tuir Maromak. Tan neʼe, sala atu Testemuña ba Jeová ida neʼebé klosan, namora ho ema neʼebé seidauk dedika an no batizmu, no la hatudu laran-metin ba Jeová no la respeitu Maromak nia matadalan. Importante liu mak Jeová simu ita, duké ema neʼebé la hadomi Jeová mak simu ita. Nuneʼe, ita hakarak sai belun diʼak ho sira deʼit neʼebé halo Maromak nia hakarak. Jesus hatete: “Ema naran deʼit neʼebé halo Maromak nia hakarak, nia mak haʼu-nia alin, feton, no inan.”—Marcos 3:35.

8. Saida mak akontese tanba ema Izraél ransu ho ema neʼebé la adora Jeová?

⁸ Husi ema Izraél nia esperiénsia, ita hatene katak ransu ho ema neʼebé la adora Maromak sei hetan konsekuénsia aat. Antes sira tama ba rai neʼebé Maromak promete, nia fó avizu ba sira kona-ba ema neʼebé hela iha fatin neʼe. Nia dehan: “Imi keta hakruʼuk ba sira-nia maromak  sira ka husik ema lohi imi atu serbí sira, no imi keta banati-tuir sira-nia hahalok. Imi tenke harahun maromak sira-neʼe no baku rahun sira-nia fatuk-riin sira neʼebé santu. Imi tenke serbí Jeová imi-nia Maromak.” (Êxodo [Keluaran] 23:24, 25) Maibé ema Izraél barak la rona Maromak nia avizu neʼe. (Salmo [Mazmur] 106:35-39) Tanba sira la hatudu laran-metin, Jeová la simu tan nasaun Izraél, no hili fali kongregasaun kristaun nuʼudar ninia povu espesiál.—Mateus 23:38; Apóstolu 2:1-4.

9. Tanbasá mak ita tenke kuidadu kona-ba programa televizaun, sítiu internét no livru sira?

⁹ Ohin loron, programa televizaun, sítiu internét no livru sira bele estraga ita-nia relasaun ho Jeová. Buat sira-neʼe ema la halo atu hametin ita-nia fiar ba Jeová no ninia promesa sira. Maibé neʼe book ema atu sira tau fiar ba Satanás nia mundu aat neʼe. Tan neʼe, ita tenke kuidadu tebes atu la haree, lee ka rona ba buat naran deʼit neʼebé bele hamosu iha ita-nia laran “hakarak mundu nian”.—Tito 2:12.

10. Saida mak sei akontese ba mundu nia telejornál iha futuru?

¹⁰ Lakleur tan, telejornál husi Satanás nia mundu aat neʼe sei lakon tanba Bíblia hatete: “Mundu neʼe no ninia hakarak liu daudaun, maibé ema neʼebé halo Maromak nia hakarak sei hela ba nafatin.” (1 João 2:17) Ema neʼebé hakerek salmu ida mós dehan: “Ema aat sira sei lakon hotu.” Depois nia hatutan tan: “Maibé ema laran-maus sei simu rai nuʼudar liman-rohan, no sira sei haksolok tebes tanba sira-nia moris nakonu ho dame.” Toʼo bainhira mak sira sei moris ho dame hanesan neʼe? “Ema laran-loos sei simu rai, no sira sei moris ba nafatin iha neʼebá.”—Salmo (Mazmur) 37:9, 11, 29.

11. Maromak fó saida deʼit atu ajuda ita laran-metin nafatin ba nia?

¹¹ Jeová nia organizasaun la hanesan duni ho Satanás nia mundu tanba buat neʼebé ita hetan husi Jeová nia organizasaun, sempre ajuda ita atu hatudu hahalok neʼebé lori ita ba moris rohan-laek. Iha Jesus nia orasaun ba Jeová, nia hatete: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.” (João 17:3) Liuhusi ninia organizasaun, Jeová fó buat hotu neʼebé ita presiza atu koñese nia. Porezemplu, ita iha revista barak, broxura, livru, vídeo no informasaun barak iha ita-nia sítiu neʼebé ajuda ita iha ita-nia adorasaun ba Maromak. Ninia organizasaun mós arranja reuniaun sira iha kongregasaun hamutuk 110.000 liu iha mundu tomak. Buat neʼebé ita aprende husi Bíblia iha reuniaun sira-neʼe no reuniaun boot sira hametin ita-nia fiar ba Jeová no ninia promesa sira.—Ebreu 10:24, 25.

12. Esplika toʼok, kaben deʼit “iha Naʼi” katak sá?

¹² Ema kristaun sira neʼebé hakarak kaben presiza kuidadu tebes kona-ba ema neʼebé sira ransu. Maromak nia Liafuan fó avizu ba ita: “Keta kesi imi-nia an hamutuk ho ema neʼebé laʼós fiar-naʼin. Basá oinsá mak hahalok loos bele liga ho hahalok aat? Ka oinsá mak naroman bele liga ho nakukun?” (2 Korinto 6:14) Bíblia hatete atu kaben deʼit “iha Naʼi”. Neʼe dehan  katak ema neʼebé dedika ona ninia moris ba Jeová, hetan ona batizmu, no moris tuir Jeová nia matadalan sira. (1 Korinto 7:39) Kaben ho ema hanesan neʼe sei ajuda ita atu laran-metin nafatin ba Jeová.

13. Maromak fó mandamentu saida ba ema Izraél kona-ba kaben?

¹³ Jeová hatene buat neʼebé diʼak ba ita. Ninia mandamentu kona-ba kaben neʼe, laʼós buat foun ida. Haree toʼok ninia liafuan ba ema Izraél kona-ba ema neʼebé la serbí nia. Liuhusi Moisés, nia hatete: “Ó labele halo aliansa kaben nian ho sira. Keta fó ó-nia oan-feto ba ninia oan-mane, no keta foti ninia oan-feto ba ó-nia oan-mane. Tanba nia sei halo ó-nia oan-mane atu la tuir haʼu, no sira sei serbí maromak seluk; no Jeová nia laran-nakali sei sai makaʼas hasoru imi, no nia sei halakon lalais ó.”—Deuteronômio (Ulangan) 7:3, 4.

14, 15. Saida mak akontese ba Salomão tanba nia la rona ba Jeová nia mandamentu?

¹⁴ Bainhira Salomão sai ona liurai ba Izraél, nia halo orasaun ba Maromak atu fó matenek ba nia. Maromak fó duni matenek ba nia. Salomão sai naran boot nuʼudar ukun-naʼin neʼebé matenek tebes iha rai neʼebé nia ukun. Liurai-feto husi rai-Sabá hakfodak tebes tanba Salomão nia matenek, nia dehan ba Salomão: “Ita iha matenek no rikusoin barak liu fali buat neʼebé haʼu rona ona.” (1 Reis [Raja-Raja] 10:7) Maibé Salomão nia ezemplu mós hanorin ita saida mak bele akontese se ema ida la rona Maromak nia ukun-fuan hodi kaben ho ema neʼebé la adora Jeová.—Eclesiastes (Pengkhotbah) 4:13.

¹⁵ Maski Jeová fó ona bensaun ba Salomão, maibé Salomão la halo tuir Jeová nia mandamentu neʼebé klaru. Salomão “hadomi feen barak husi rai seluk” neʼebé la adora Jeová no ikusmai, nia iha feen naʼin-700 no feen-kiʼik naʼin-300. Saida mak akontese ba nia tanba nia hola feen sira neʼebé la adora Maromak? Bíblia dehan: “Ninia feen sira book nia laran atu tuir maromak sira seluk, . . . no Salomão komesa halo buat neʼebé aat iha Jeová nia matan.” (1 Reis [Raja-Raja] 11:1-6) Tanba Salomão sempre hamutuk ho ema neʼebé la adora Jeová, neʼe halo nia mós fila kotuk ba Jeová hodi adora fali maromak sira seluk. Se neʼe akontese ba Salomão, neʼe mós bele akontese ba ita hotu. Tan neʼe, keta hanoin atu kaben ho ema neʼebé la hadomi Jeová.

16. Bíblia fó konsellu saida ba ema ida neʼebé iha feen ka laʼen neʼebé laʼós fiar-naʼin?

¹⁶ Maibé oinsá se kaben-naʼin ida tama lia-loos maibé ninia feen ka laʼen seidauk? Bíblia hatete: “Imi feen sira, hakruʼuk an ba imi-nia laʼen, atu nuneʼe, se sira la halo tuir Maromak nia liafuan, imi bele lori sira ba fiar laʼós liuhusi imi-nia liafuan maibé liuhusi imi-nia hahalok.” (1 Pedro 3:1) Liafuan sira-neʼe mós aplika ba laʼen sira neʼebé ninia feen la adora Jeová. Bíblia nia konsellu mak klaru no simples: Sai laʼen ka feen neʼebé diʼak no halo tuir Maromak nia matadalan kona-ba moris kaben nian. Ema barak simu lia-loos tanba haree sira-nia feen ka laʼen halo mudansa diʼak barak iha sira-nia hahalok.

17, 18. Saida mak ajuda Noé no ema kristaun sira iha apóstolu sira-nia tempu atu hetan salvasaun?

¹⁷ Ransu hamutuk ho ema neʼebé toman ladiʼak bele book ita atu la halo tuir  Jeová, maibé ransu ho ema diʼak sei ajuda ita atu laran-metin nafatin ba nia. Noé hatudu ezemplu diʼak ba ita. Nia moris iha tempu neʼebé “ema nia hahalok aat sai barak iha rai no ema nia hanoin hotu iha ninia laran sempre aat iha tempu hotu”. (Gênesis [Kejadian] 6:5) Ema nia hahalok mak aat tebes toʼo Jeová deside atu halakon ema aat sira-neʼe. Maibé Noé la hanesan. Bíblia bolu nia “mane neʼebé laran-loos” neʼebé “laʼo ho Maromak neʼebé loos”.—Gênesis (Kejadian) 6:7-9.

¹⁸ Noé la ransu hamutuk ho ema neʼebé la hadomi Jeová. Nia ransu hamutuk ho ninia feen, oan-mane naʼin-tolu no ninia feto-foun sira. Bíblia bolu Noé nuʼudar “haklaken-naʼin kona-ba buat loos”. (2 Pedro 2:5) Nia sai okupadu hodi harii arka no haklaken ba ema seluk. Tanba Noé ho ninia família halo buat neʼebé halo kontente Maromak, sira hetan salvasaun husi Rai-Nabeen. Ita hotu, nuʼudar sira-nia bei-oan, agradese tebes tanba sira rona ba Maromak hodi la ransu ho ema neʼebé la hadomi Maromak. Iha apóstolu sira-nia tempu mós, ema kristaun sira la ransu ho ema neʼebé la adora Jeová. Tanba sira rona ba Jeová, sira la mate bainhira Jeruzalein naksobu iha tinan 70.—Lucas 21:20-22.

19. Saida mak ita presiza halo atu laran-metin nafatin ba Jeová?

¹⁹ Ohin loron, ita hakarak sai hanesan Noé, ninia família no ema kristaun sira iha apóstolu sira-nia tempu hodi sees husi mundu aat neʼe, no la ransu ho ema neʼebé la hadomi Jeová. Ita iha irmaun-irmán rihun ba rihun neʼebé ita bele hili nuʼudar ita-nia belun sira. Sira sei ajuda ita atu ‘kaer metin ba ita-nia fiar’ durante tempu susar sira. (1 Korinto 16:13; Provérbios [Amsal] 13:20) Hanoin toʼok, se ita halo tuir Jeová nia matadalan kona-ba ransu, ita bele moris liu mundu aat neʼe nia rohan no tama ba Jeová nia mundu foun!