1. Биз нәхили дөвүрде яшаярыс?

БИЗ кын гүнлерде яшаярыс. Мукаддес Язгыларда айдылян «соңкы гүнлер» 1914-нҗи йылда башланды. Адамзат тарыхында шейле «кын пурсатлар» хич хачан болмандыр (2 Тим. 3:1—5). Мукаддес Язгыларда: «Кеззап адамлар алдап хем алданып, эрбетликде ене илерләрлер» дийилйәр. Шу гүнлер бу пыгамберлик улы мөчберде ерине етйәр (2 Тим. 3:13).

2. Бу дүнйәниң адамлары нәдип дынч алярлар? (Макаланың башындакы сурата середиң).

² Көп адамлар дынч аланларында зорлук, ахлаксызлык, җадыгөйлик ялы Худайың халамаян затларыны гөрйәрлер, хатда оларың гулы болярлар. Интернетде, телегеплешиклерде, киноларда, чепер эсерлерде, журналларда зорлук ве ахлаксызлык адаты зат ялы эдип гөркезилйәр. Өңки дөвүрлерде шейле затлар айып гөрүлсе-де, инди кәбир ерлерде дөвлет тарапындан хем ругсат эдилйәр. Эмма Аллатагала бу ишлери йигренйәр (Римлилер 1:28—32-нҗи аятлары окаң).

3. Худайың када-канунлары боюнча яшаян адамлара нәхили гараярлар?

 ³ I асырда яшан месихчилер дынч аланларында эрбет затлардан гача дурярдылар. Адамлар оларың ягшы эдим-гылымларыны гөрүп, төхмет атярдылар ве залымлык билен ызарлаярдылар. Павлус ресул шейле дийди: «Олар өзлери билен бирликде шол ченденаша ахлаксызлыгың ызында дәлдигиңизи гең гөрүп, сизе (месихчилере) сөгйәрлер» (1 Пет. 4:4). Шу гүнлер хем Худайың када-канунлары боюнча яшаянлары бу дүнйәниң адамлары гең-таң гөрйәрлер. Мукаддес Язгыларда: «Месих Исада Худайың ёлуна мынасып яшамак ислейәнлериң бары азар чекер» дийилйәр (2 Тим. 3:12).

4. Мукаддес Язгылар бу дүнйә бабатда нәхили дуйдурыш берйәр?

⁴ Мукаддес Язгылар Худайың гөвнүнден турмак ислейән адамлара дүнйәни ве онуң ишлерини сөймели дәлдигини үндейәр (1 Яхя 2:15, 16-нҗы аятлары окаң). «Бу дүнйәниң таңрысы» Шейтан Иблис динлериң, сыясатың, сөвда-сатык ишлериң ве маглумат бериш серишделериң үсти билен адамлара гүйчли тәсир эдйәр (2 Кор. 4:4; 1 Яхя 5:19). Шол себәпли месихчилер кимлер билен гатнашмалыдыгыны билмели. Себәби Худайың Сөзүнде шейле ваҗып дуйдурыш берилйәр: «Алданмаң! Яман яранлар ягшы ахлагы бозяндыр» (1 Кор. 15:33).

5, 6. Биз кимлер билен достлуклы гатнашык сакламалы?

⁵ Биз бу дүнйәниң адамлары билен якын гатнашык сакласак, ягшы хәсиетлеримиз бозулар. Шол себәпли диңе бир эрбет адамлар билен дәл, эйсем, Ехованың када-канунларыны билгешлейин бозян месихчилер билен гатнашмакдан әгә болмалы. Эгер-де месихчилер агыр гүнә эдип, тоба этмеселер, биз олар билен гатнашмалы дәл (Рим. 16:17, 18).

⁶ Худайың када-канунларына табын болмаян адам билен гатнашык сакласак, бизем олара меңзәп башларыс. Меселем, ахлаксызлык эдйән адам билен якындан достлашсак, бизем ахлаксызлыгың торуна дүшүп билерис. Ехова өзүни багыш эден месихчилериң кәбири ахлаксызлыга баш гошуп, тоба этмән йыгнак гатнашыгындан кесилдилер (1 Кор. 5:11—13). Петрус ресул шейле месихчилериң ягдайының өңкүсинден-де эрбет болҗакдыгыны айтды (2 Петрус 2:20—22-нҗи аятлары окаң).

7. Биз ким билен достлашмалы?

⁷ Биз Худайың када-канунлары боюнча яшамаян адамлар билен мәхирли болсак-да, олар билен якын гатнашык саклап, достлашмалы дәл. Шол себәпли дурмуш гурмадык месихчилер Ехова хормат гоймаян ве онуң ёкары ахлак кадаларына эермейән адамлар билен душушмаярлар. Месихчилер бу дүнйәдәки адамларың арасында абрай газанмагы дәл-де, айыпсыз галмагы хас ваҗып хасаплаярлар. Биз диңе Аллатагаланың ислегини берҗай эдйән адамлар билен гатнашмалы. Иса: «Худайың ислегини ким берҗай этсе, шол Мениң доганым, уям ве эҗемдир» дийди (Мар. 3:35).

8. Ысрайыллыларың эрбет адамлар билен гатнашмагының нетиҗеси нәхили болды?

⁸ Ысрайыллылар эрбет адамлар билен гатнашып, өз-өзлерине зыян  етирдилер. Ехова олары Мүсүр гулчулыгындан азат эдип, Вада эдилен дияра алып барярка, ерли яшайҗылар бабатда олара шейле дийди: «Сиз оларың худайларына тагзым этмәң ве олара гуллук этмәң. Оларың дини адатларына уймаң, гайтам, оларың бутларыны дөвүп, дикме дашларыны күл-пейкун эдиң. Сиз Өз Худайыңыз Реббе гуллук эдиң» (Мүс. чык. 23:24, 25). Гынансак-да, ысрайыллыларың көпүси Ехованың гөркезмесине эермедилер (Зеб. 106:35—39). Шол себәпли Иса ысрайыллылара: «Ине, өйүңиз сизе хараба болуп галяр» дийди (Мат. 23:38). Ехова халкындан йүз өврүп, месихчилер йыгнагына пата берди (Рес. иш. 2:1—4).

9. Дүнйәниң хөдүрлейән затлары нәме үчин ховплы?

⁹ Бу дүнйәниң хөдүрлейән затлары месихчилере рухы тайдан ховп салып билер. Олар Ехова ве онуң вадаларына болан иманыңы говшадяр. Себәби олар Шейтаның залым дүнйәсини ве онуң максатларыны голдаяр. Шол себәпли биз «хөвеслери» оярян затлары окамакдан, гөрмекден ве диңлемекден әгә болмалы (Титус 2:12).

10. Бу дүнйәниң эрбет затларына нәме болар?

¹⁰ Тизден Шейтаның дүнйәси билен билеликде эрбет китаплардыр кинолар ёк эдилер. Мукаддес Язгыларда: «Дүнйә ве онуң хөвеслери гечип гидер, ким Худайың ислегини ерине етирсе, бакы галар» дийилйәр (1 Яхя 2:17). Мезмурчы болса: «Яман иш эдйәнлер кесилип ташланар, Реббе умыт баглаянлар болса ери мирас алар... мылакатлылар ери мирас алар, бол парахатлыкда хезил эдер» диййәр. Бу нәче вагт довам эдер? Мезмурчы сөзүни довам эдип: «Догры адамлар ери мирас алып, онда эбеди яшарлар» диййәр (Зеб. 37:9, 11, 29).

11. Худай халкыны нәдип рухы иймит билен үпҗүн эдйәр?

¹¹ Бу дүнйәниң хөдүрлейән затларындан тапавутлыкда, шу соңкы гүнлерде Ехованың гурамасының берйән гөркезмеси эбеди яшайша ёл ачяр. Иса: «Эбеди яшайыш Сени, ялңыз хак Худайы ве Сениң иберениң Иса Месихи танамакдыр» диййәр (Яхя 17:3). Гөкдәки Атамыз гурамасы аркалы журналлар, брошюралар, китаплар, видеолар ве веб-сахыпалар ялы бол рухы иймит билен үпҗүн эдйәр. Мундан башга-да бүтин дүнйәде 110 мүңден говрак йыгнакларда ызыгидерли душушыклар гечирилйәр. Биз бу душушыклардыр конгреслерде Мукаддес Язгылара эсасланан көп затлары өвренйәрис. Олар бизиң Худая ве онуң вадаларына болан иманымызы беркидйәр. Гөр, нәхили берекет! (Евр. 10:24, 25).

12. Диңе Ребде дурмуш гурмагың нәмә аңладяндыгыны дүшүндириң.

¹² Дурмуш гурмак ислейән месихчилер кимлер билен гатнашяндыгына хас-да үнсли болмалы. Мукаддес Язгыларда шейле дийилйәр: «Имансызлар билен бир боюнтырыга гирмәң. Чүнки догрулыгың шер иш билен нәме шәриклиги бар? Я-да нуруң түмлүк билен нәме ёлдашлыгы бар?» (2 Кор. 6:14) Мукаддес Язгыларда өзүне тай гөзлейән месихчилере диңе Ребде — Ехова өзүни багыш эдип, сувда чокундырылан ве Онуң ислегине гөрә яшаян адам билен дурмуш гурмак маслахат берилйәр (1 Кор.  7:39). Ребде дурмуш гурян доган-уялар айыпсыз галмага көмек эдйән ве Ехова вепалы янёлдаш сайлаярлар.

13. Худай ысрайыл халкына машгала гурмак бабатда нәхили табшырык берди?

¹³ Ехова гуллукчыларына диңе говы затлары өвредйәр; онуң ника болан гарайшы хич хачан өзгермейәр. Бу Онуң Муса аркалы ысрайыллылара берен гөркезмесинден айдың гөрүнйәр. Ол Ехова гуллук этмейән ерли яшайҗылар бабатда ысрайыллылара шейле табшырык берди: «Олар билен гарындашлык ачмаң. Олар билен гыз алшып-беришмәң. Чүнки олар чагаларыңызы башга худайлара гуллук этдирдип, Реббиң ызына эермекден йүз өвүрдерлер. Шонда Реббиң гахары сизе гаршы туташып, Ол сизи деррев ёк эдип ташлар» (Кан. таг. 7:3, 4).

14, 15. Сүлейман Ехованың гөркезмесинден йүз өврүп нәме газанды?

¹⁴ Давудың оглы Сүлейман догры хөкүмдарлык эдер ялы, Алладан акылдарлык дилейәр. Шейдип, ол бай юрдуң акылдарлыкда деңи-тайы болмадык патышасы боляр. Шеба меликеси Сүлейман патышаны гөрмәге геленде, гең галып: «Өз гөзлерим билен гөрйәнчәм, айдыланлара ынанмадым. Маңа онуң ярысыны хем айтмандырлар. Сениң пәхим-пайхасың, ровачлыгың мениң эшидишимден хас артык экен» диййәр (1 Пат. 10:7). Эмма Сүлейман ялан таңрылара сежде эдйән гелин-гызлара өйленип, Худайың табшырыгыны бозяр ве эрбет гөрелде галдыряр (Ваг. 4:13).

¹⁵ Худай Сүлеймана көп ягшылык этсе-де, ол Ехова гуллук этмейән «кесеки аяллара ашык болуп», Онуң табшырыгыны инкәр эдйәр. Сүлейманың 700 аялы билен 300 гырнагы барды. Мунуң нетиҗеси нәхили болды? Сүлейман гарран чагында аяллары онуң «йүрегини кесеки худайлара тарап өвүрдилер... Сүлейман Реббиң назарында йигренҗи ишлери этди» (1 Пат. 11:1—6). Сүлейманың яман яранлар билен гатнашмагы Худайың берен акылдарлыгыны пуҗа чыкарды ве хакыкы сеждеден йүз дөндүртди. Бу Ехованы сөймейән адам билен дурмуш гурмакчы болян месихчилере нәхили говы сапак!

16. Месихчи болманка машгала гуранлара нәхили маслахат берилйәр?

¹⁶ Худайың гуллукчысы болманка машгала гуранлар нәме этмели? Мукаддес Язгыларда шейле дийилйәр: «Эй хатынлар, сиз-де... өз әриңизе табын болуң. Шейдип, эгер кәбирлери Худайың сөзүне боюн болмаян болса... өз хатынының яшайшы аркалы гүррүңсиз... газанылсын» (1 Пет. 3:1, 2). Элбетде, бу аялы Ехова гуллук этмейән машгалабашылара-да дегишлидир. Мукаддес Язгылар говы янёлдаш болмалыдыгыны ве Ехованың ника бабатда берйән маслахатлары боюнча яшамалыдыгыны өвредйәр. Кәбир адамлар месихчи янёлдашының ягшы хәсиетлерини гөрүп, хак Худая сежде эдип башлаярлар.

17, 18. Нух пыгамбер ве I асырдакы месихчилер нәме үчин халас болдулар?

¹⁷ Яман яранлар ягшы хәсиетлери бозяр, йөне говы достлар рухы тайдан өсмәге көмек эдйәр. Гелиң, залым адамларың арасында яшан, эмма олар билен якын гатнашык сакламадык Нух пыгамбер барада гүррүң эделиң. Шол дөвүрде «бүтин дүнйәдәки  адамзадың бетпәллигиниң җуда чөкдердигини, оларың калбындакы ой-пикирлериниң ве ниетлериниң хемише писликден долудыгыны Реб гөрйәрди» (Гел. чык. 6:5). Худай залым адамлары ёк этмек үчин тупан турузды. Эмма «Нух өз дөвүрдешлериниң арасында догручыл хем таква адамды. Ол Худайың хузурында гезди» (Гел. чык. 6:7—9).

¹⁸ Нух пыгамбер Худая иман этмейән адамлар билен достлашмады. Нух ве онуң машгаласының еди агзасы Худайың табшырышы ялы гәми гурмак билен мешгул болдулар. Шейле-де Нух «догрулык вагызчысы» хөкмүнде хем таналярды (2 Пет. 2:5). Ол машгаласы билен агзыбир яшап, гәми гурмак ве вагыз этмек билен гүмра болуп, Аллатагаланың гөвнүнден турярды. Шейлеликде, Нух ве онуң машгаласы тупандан халас болдулар. Биз Нуха, аялына, огулларына ве гелинлерине Ехова вепалы галандыклары үчин миннетдар болмалы. Себәби биз оларың несиллеридирис. I асырдакы месихчилер хем Худая иман этмейән адамлар билен якын гатнашык сакламадылар. Шол себәпли олар б. э. 70-нҗи йылында Иерусалим ве Яхуда вейран эдиленде халас болдулар (Лука 21:20—22).

19. Биз Худайың мерхеметини газанмак үчин нәме этмели?

¹⁹ Гелиң, бизем Нух, онуң машгала агзалары ве I асырдакы месихчилерден гөрелде алып, Ехова вепалы гуллук эделиң. Биз залым дүнйәниң адамлары билен якын гатнашык сакламан, гайтам, Худая вепалы миллионларча доган-уялар билен достлашмага җан этмели. Худайың берйән акылдарлыгына эерйәнлер билен достлашсак, бу бизе кын гүнлерде «иманда берк дурмага» көмек эдер (1 Кор. 16:13; Сүл. тым. 13:20). Бизиң хер биримиз шу соңкы гүнлерде кимлер билен гатнашяндыгымыза үнсли болсак, залым дүнйәден халас боларыс ве Ехованың тизден гелҗек тәзе дүнйәсинде месген тутарыс. Гөр, нәхили берекет!