1. Mang tayim e gad bay riy e chiney?

 GAD be par u ba ngiyal’ ni kari mo’maw’ e par riy. Be yog e Bible ni fapi duw ni tabab ko 1914 e ka nog e “tin tomren e rran” ngay. Boor ban’en nra i buch u nap’an e tin tomuren e rran ko ngiyal’ ni kari “mo’maw’” e par riy ni kab gel e kireb riy ko pi n’en ni ka i buch ko pi duw u m’on ko re ngiyal’ i n’em. (2 Tim. 3:1-5) Machane, gad manang nra gel e kireb u fayleng i yan, ya ke yiiynag e Bible ni “girdi’ nib kireb nge piin ni yad be dake girdien Kristus e bayi gel farad kireb.”​—2 Tim. 3:13.

2. Uw rogon e pi n’en ni yima chuweg e chalban ngay u fayleng e ngiyal’ ney? (Mu guy e sasing ni bay u tabolngin e re article ney.)

² Boor e girdi’ e ngiyal’ ney ni yad ma chuweg e chalban rorad nga boch ban’en nib sug yaan e cham riy, nge ngongol ndarngal, nge pig, nge ku boch e ngongol ni be yog e Bible nib kireb. Bod ni chiney e ke yoor yaan e cham nge ngongol ndarngal ni yima dag ko Internet, nge pi kachido ni yima pag yaan u TV, nge yu ken e babyor. Tin baaray e ngongol ni u nog nib kireb kafram e yibe pag e girdi’ u boch e nam ni ngar rin’ed e chiney. Machane, gubin e pi ngongol ney ndabun Got.​—Mu beeg e Roma 1:28-32.

3. Uw rogon ni ma sap e girdi’ nu fayleng ngak e piin ni yad ma guy rogon ni ngar folgad ko pi motochiyel nu Bible?

 ³ Pi gachalpen Jesus u nap’an e bin som’on e chibog e da ur chuweged e chalban rorad nga boch ban’en nib alit u p’eowchen Got. Bochan e re n’ey nge ku bochan ni ur guyed rogon ni nga i par e ngongol rorad nib fel’, ma aram fan ni i moningnagrad e girdi’ ma yibe gafgownagrad. I yoloy apostal Peter ni gaar: “Piin ndar nanged Got e kar gingad [ngomed e piin Kristiano] ni fan e dakumur uned ngorad ko ngongol nib kireb ni yad be ngongliy, ma aram fan ni yad be yog e thin nib kireb ngomed.” (1 Pet. 4:4) Ku arrogon e ngiyal’ ney ni piin ni yad ma guy rogon ni ngar folgad ko pi motochiyel rok Got e ma sap e girdi’ nu fayleng ngorad ni yugu yad ba thil u fithik’ e tin ni ka bay e girdi’. Maku reb e, “urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.”​—2 Tim. 3:12.

4. Mang e be fonownagdad e Bible ndab da rin’ed ko re fayleng ney?

⁴ Be fonownag e Bible e piin ni yad baadag ni ngar rin’ed e tin nib m’agan’ Got ngay ndabi t’uf e re fayleng ney rorad nge pi n’en ni bay riy. (Mu beeg e 1 John 2:15, 16.) Pi yurba’ i teliw, nge pi am, nge pi siyobay ko re fayleng ney e urngin ni bay u tan gelngin “fare kan nib kireb nu roy u fayleng,” ni aram Satan ni Moonyan’. (2 Kor. 4:4; 1 John 5:19) Ere, gadad e piin Kristiano e rib t’uf ni ngad kol ayuwgad ko piin ni gad ma chag ngorad. Ya be gaar e Thin rok Got: “Dab mpaged gimed nga ni bannagmed, ya ra yan i bod ni ke lunguy: ‘Nchag ngak e girdi’ nib kireb me kireb pangiy nib fel’.’”​—1 Kor. 15:33.

5, 6. Mini’ e piin nsusun e dab ud chaggad ngorad, ma mang fan?

⁵ Faanra nge dabi kireb pangidad nib fel’, ma thingar dab da pacheged gadad ngak e piin nib kireb e ngongol rorad. Pi girdi’ ney ni yima yog nib kireb e ngongol rorad e gathi kemus ni yigoo piin ndarur pigpiggad ngak Jehovah, ya kub muun ngay e piin ni yad ma pigpig ngak Jehovah machane darur folgad ko pi motochiyel rok. Faanra un e pi Kristiano ney ko ngongol nib kireb ma dab ra kalgadngan’rad, ma thingar dab kud chaggad ngorad.​—Rom. 16:17, 18.

⁶ Faanra ud chaggad ko piin ndarur folgad ko pi motochiyel rok Got, mab mom nrayog ni ngad uned ko pi n’en ni yad be rin’ ni bochan e gad be guy rogon ni ngad fel’gad u wan’rad. Bod ni faanra da pacheged gadad ngak e piin ni yad ma un ko ngongol ndarngal, ma ra munmun ma gad un ko ngongol ndarngal. Bay boch e Kristiano ni ke buch e re n’ey rorad, maku bay boch i yad ni kan tharbograd ko ulung ni bochan e dar kalgadngan’rad ko kireb rorad. (1 Kor. 5:11-13) Pi girdi’ ney e faanra dab ra kalgadngan’rad, ma yad ra bod e piin ni ke weliy Peter murung’agrad u Bible.​—Mu beeg e 2 Peter 2:20-22.

7. Mini’ e piin nsusun e ngad mel’eged ni ngar manged e pi tafager rodad?

⁷ Yugu aram rogon ni gad ma gol ngak urngin e girdi’ ni ki mada’ ngak e piin ndarur folgad ko pi motochiyel rok Got, machane darud pacheged gadad ngorad ara da guyed rogon ni ngari pach e thin rodad. Ku de fel’ ni nge un reb e Pi Mich Rok Jehovah nib muchugbil ngak reb e pumoon ara reb e ppin nder ma pigpig ngak Jehovah, maku der ma tayfan e pi motochiyel Rok. Kab ga’ fan ni nge par reb e Kristiano nib yul’yul’ ko bin ni nge fel’ u wan’ e piin ndarur folgad ko pi motochiyel rok Jehovah. Susun ni yigoo piin ni yad ma rin’ e tin nib m’agan’ Got ngay e ngaud chaggad ngorad. I yog Jesus ni gaar: “En nra rin’ e tin nib m’agan’ Got ngay e ir e walageg ni pumoon, ma walageg ni ppin, ma chitinag.”​—Mark 3:35.

8. Mang e buch rok piyu Israel ni bochan e ur chaggad ngak boch e girdi’ nib kireb e ngongol rorad?

⁸ Nap’an ni chag piyu Israel ngak boch e girdi’ nib kireb e ngongol rorad, me yib wenegan ngorad nib kireb. Tomuren ni chuwegrad Jehovah ko sib u Egypt, me pow’iyrad i yan ko fare Nam ni Kan Micheg, me yog ngorad boch ban’en nthingar dab ra rin’ed ni gaar: “Dab mu siro’gad ara mmeybilgad  ara mu pigpiggad ngak e pi got rorad. Ma dab mu uned ko pi yalen e teliw rorad. Mu thirifed e pi got rorad u but’ mi gimed t’ar nga but’ e yu raba’ i malang rorad nib tabgul. Faan gimed ra pigpig ngog, i Gag Somol ni Got romed, ma gu ra fal’eg waathmed.” (Exodus 23:24, 25, BT) Yooren e girdi’ nu Israel e dar folgad ko n’en ni yog Got ngorad. (Ps. 106:35-39) Bochan ndar pared ni yad ba yul’yul’ ngak Got, ma aram me non Jesus ko fare nam nu Israel boch nga tomuren ni gaar: “Chiney e bay nn’ag e tabinaw rom.” (Matt. 23:38) Arrogon, i n’ag Jehovah fare nam nu Israel, ma aram me tow’athnag reb e ulung ko Kristiano ni kab beech ni fini sum nga tomuren.​—Acts 2:1-4.

9. Mang fan nrayog ni nge magawonnagdad e pi n’en ni yima pag yaan u TV, nge pi n’en ni yima weliy murung’agen u radio, nge pi n’en ni gad ma beeg?

⁹ Yooren e pi n’en ni yima dag yaan u TV, nge pi n’en ni yima weliy murung’agen u radio, nge pi n’en ni gad ma beeg e ngiyal’ ney e rayog ni nge magawonnag e piin Kristiano ko tirok Got ban’en. Pi n’ey e gathi kan ngongliy rogon ni nge ayuweg be’ ni nge gel e michan’ rok ngak Jehovah nge pi n’en ni ke micheg. Ya ma m’ug riy rarogon e re fayleng rok Satan ney nge pi n’en ni be nameg. Ere, ba t’uf ni ngad kol ayuwgad ya nge dab da mel’eged boch ban’en nrayog ni nge k’aringdad ni ngad adaged “urngin ban’en u fayleng.”​—Titus 2:12.

10. Mang e ra buch ko pi n’en ni yima beeg nge pi n’en ni yima yaliy ko re fayleng ney?

¹⁰ Dabki n’uw nap’an ma yira chuweg urngin ban’en ni yima yaliy ma yima beeg nrayog ni nge kirebnagey. Gubin e pi n’ey ni yira chuweg u nap’an ni yira thang e re fayleng rok Satan ney. Thin rok Got e be gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) Ki tang fare psalmist ni gaar: “Piin nib pagan’rad ngak Somol e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam. Machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.” Ni uw n’umngin nap’an? “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Ps. 37:9, 11, 29.

11. Uw rogon ni ma pi’ Got boch ban’en ni fan ko tirok ban’en ni nge ayuweg e girdi’ rok?

¹¹ Pi n’en ni ma ngongliy e ulung rok Jehovah ni fan ko girdi’ e ngiyal’ ney ko tin tomuren e rran e ba thil ko pi n’en ni ma ngongliy e re fayleng ney, ni bochan ni pi n’en ni ma ngongliy e ulung rok Jehovah e ma ayuweg e girdi’ ni ngaur daged e ngongol nra ayuwegrad ni nge yag e yafas ndariy n’umngin nap’an ngorad. Nap’an ni be meybil Jesus ngak Jehovah, me yog ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Boor ban’en ni be pi’ e Chitamangidad ni bay u tharmiy u daken e ulung rok u fayleng nrayog ni nge ayuwegdad ko tirok ban’en. Ere, ri gad ba tow’ath ni kan ngongliy rogon boch e magazine, nge brochure, nge yu ken e babyor, nge boch e video, nge boch ban’en ko Internet ni fan ko bin riyul’ e liyor! Ku bay e pi muulung ni kan yarmiy rogon ni ma tay e pi ulung rok Got u fayleng ni ke pag 110,000 urngin u gubin. Nap’an e pi muulung nem, nge pi assembly, nge convention ni yima tay ma gad ma fil boch e thin nu Bible nrayog ni nge ayuwegdad ni nge gel e michan’ rodad ngak Got nge pi n’en ni ke micheg.​—Heb. 10:24, 25.

12. Mu weliy fan fare fonow u Bible ni be yog ni ngan mabgol “nrogon e mabgol ni ma tay e piin ni girdien Kristus.”

¹² Pi Kristiano ni yad ba muchugbil ni yad baadag ni ngar uned ko mabgol e thingar ra kol ayuwgad ko piin ni yad ma chagil ngorad. Be fonownagdad e Thin rok Got ni be gaar: “Dab mu guyed rogon ni ngam pachgad ngak e piin nde mich Got u wun’rad  nguum maruwelgad u taabang nib taareb lanin’med, ya dabiyog. Ra diin me taareban’ e tin nib mat’aw nge tin nib kireb? Ra diin me par e tamilang nge talumor u taabang?” (2 Kor. 6:14) Be fonownag e Bible e pi tapigpig rok Got ni yad be gay be’ ni ngar leayed ni ngar mabgolgad “nrogon e mabgol ni ma tay e piin ni girdien Kristus,” ara ngar leayed reb e tapigpig rok Jehovah ni ke taufe mab puluw e ngongol rok ko pi motochiyel u Bible. (1 Kor. 7:39) Faanra leay reb e Kristiano be’ ni taareb e michan’ rorow mab yul’yul’ ngak Jehovah, ma facha’ ni ke leay e rayog ni nge ayuweg ni nge par nib yul’yul’ ngak Got.

13. Mang motochiyel u murung’agen e mabgol e pi’ Got ngak piyu Israel?

¹³ Manang Jehovah e n’en nib fel’ ni fan ko pi tapigpig rok, ma dawori thil e lem rok u murung’agen e mabgol. Mu tay fanam i yan ko fare motochiyel ni pi’ ngak piyu Israel u daken Moses nrib tamilang. I weliy Jehovah ngak piyu Israel murung’agen e pi nam nib liyegrad ndarur pigpiggad ngak ni gaar: “Dab mu mabgolgad ngorad; dab mpied pi fakmed ngak pi fakrad ngar mabgolgad, ya yad ra pingeg pi fakmed nge dab kur folgad rok Somol mi yad ta’ fan yugu boch e kan mi yad meybil ngorad, ma aram e ra damumuw Somol ngomed nge thang owchemed nib machreg.”​—Deut. 7:3, 4.

14, 15. Mang wenegan ni yib ngak Solomon ni bochan e de fol ko motochiyel rok Jehovah?

¹⁴ Nap’an ni tabab Solomon ni fak David ko gagiyeg, me meybil ngak Got ni nge pi’ e gonop ngak, ma aram me pi’ Got ngak. Ere, yan i par Solomon ni Pilung ni ir be’ nib gilbuguwan mab fel’ rogon e gagiyeg ni be tay. Bin riyul’ riy e, nap’an ni yan fare pin ni pilung nu Sheba ni nge guy Solomon, me yog ni gaar: “De riyul’ u wun’ug, ma fin chiney ni ku gub e ke riyul’ u wun’ug. Machane tin ni gu rung’ag e de gaman e baley riy; gonop rom nge rogon feni fel’ rogom e ka ba ga’ ko tin nnog ngog.” (1 Ki. 10:7) Machane, rib gel e kireban’ riy ni bochan e de fol Solomon ko motochiyel rok Got me leay be’ ni gathi tapigpig rok Got.​—Ekl. 4:13.

¹⁵ Yugu aram rogon urngin ban’en ni rin’ Got ni fan ngak, ma de fol ko motochiyel ni pi’ Jehovah ni be yog ndab ni leay e pi ppin ko pi nam nib liyeg piyu Israel ndarur pigpiggad ngak. I adag “boor e ppin u boch e nam,” me munmun me yan i par ni ke gaman 700 e ppin ni leengin nge ku boch e ppin ni yad 300 u gubin. Mang wenegan ni yib ngak? Nap’an ni pilibthir Solomon, me waliy fapi ppin nge “un i tayfan yugu boch e got. Ma daki yul’yul’ ngak Somol ni Got rok.” (1 Ki. 11:1-6, BT) Bochan nda i gonopiy Solomon e piin ni i chag ngorad ma aram fan ni dakiyog ni nge par nib gonop ma aram me palog ko bin riyul’ e liyor. Ere, re n’ey e be puguran ban’en ngak e piin Kristiano ni yad be lemnag ni ngar leayed be’ nde t’uf Jehovah rok!

16. Mang fonow u Bible e thingari fol reb e tapigpig rok Got riy nder ma un e en mabgol rok ko tin riyul’?

¹⁶ Machane, uw rogon ni faanra mang be’ reb e tapigpig rok Got ma en mabgol rok e danga’? Be gaar e Bible: “Ma ku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan bbugithin ni nga mogned ngorad.” (1 Pet. 3:1) Ni yoloy e pi thin ney ni fan ngak e piin leengiy ni Kristiano, machane ku bay rogon e pi thin ney ngak reb e pumoon ni ke mang tapigpig rok Jehovah ma en mabgol rok e danga’. Ba tamilang e fonow nu Bible, ya be tamilangnag ni piin ni yad ba mabgol e: Thingar ra guyed rogon ni ngar pared nib fel’ e ngongol rorad, ma yad be fol ko pi motochiyel rok Got ni fan ko piin mabgol. Boor e walag nder ma un e en mabgol rorad ko tin riyul’ ni ke yag ni ngar ayuweged e en mabgol rorad ni ngar adaged e tin riyul’ ni bochan e ngongol rorad nib fel’.

17, 18. Mang e rin’ me yag ni nge magey Noah nge pi Kristiano ko bin som’on e chibog ni yad ba fas?

¹⁷ Gad manang ni faanra ud chaggad ngak e piin nib kireb e ngongol rorad ma ra kireb e ngongol rodad, machane faan gad ra chagil ngak e piin nib fel’ e ngongol rorad ma ra yib angin ngodad nib fel’.  Am lemnag e n’en ni rin’ Noah. I par u ba ngiyal’ ni kari gel e kireb ko ngongol ko girdi’, machane de lemnag ni nge pacheg ir ko pi girdi’ nem. I guy Jehovah ni “kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb.” (Gen. 6:5) Ere, dugliy ni nge pag e ran nge tharey e fayleng nge thang e pi girdi’ nem ni yad ba kireb. Machane, “Noah e be’ nib moon nib fel’ ni ke mus ni ir e immoy ni kab fel’ u wan’ Got e ngiyal’ nem; i par ni ba’ Got rok.”​—Gen. 6:7-10.

¹⁸ Da i pacheg Noah ir ngak e piin nda ur folgad rok Got. Ra fanayed chon e tabinaw rok e tayim rorad ni ngar rin’ed e maruwel ni ke pi’ Got ngorad ni kub muun ngay fare arke nra toyed, maku be yan ni be “machibnag e tin nib mat’aw.” (2 Pet. 2:5) Machib ni i tay Noah, nge fare arke ni toy, nge pi n’en ni ur rin’ed chon e tabinaw rok u taabang e aram e n’en ni ayuweg ni nge par ni be tiyan’ ko tin nib m’agan’ Got ngay. Ma angin ni yib riy ngak e aram e yag ni ngar mageygad chon e tabinaw rok ni yad ba fas u nap’an ni yib fare Ran nge Tharey e Fayleng. Thingar da felfelan’gad ni par Noah, nge leengin, nge fapi pagel ni fak, nge pi leengirad ni yad ba yul’yul’ ngak Jehovah ni bochan e gad gubin e piin ni gad bay e ngiyal’ ney e kad bad rorad. Ku arrogon e pi Kristiano ni yad ba yul’yul’ u nap’an e bin som’on e chibog nda ur chaggad ngak e piin nib kireb e ngongol rorad. Ma bochan e re n’em ma aram me yag ni ngar mageygad ni yad ba fas u nap’an nni gothey yu Jerusalem nge gagiyeg rok piyu Jew u nap’an e duw ni 70 C.E.​—Luke 21:20-22.

19. Ra ngad pared ni gad ba fel’ u wan’ Got, ma mang e thingar da rin’ed?

¹⁹ Gadad e pi tapigpig rok Jehovah e ba t’uf ni ngad folwokgad rok Noah, nge chon e tabinaw rok, nge fapi Kristiano nra pared ni yad ba yul’yul’ u nap’an e bin som’on e chibog. Thingar da pared ni gad ba palog u ngongolen e re fayleng ney, mu ud chaggad ngak pi walagdad ni ke pag bokum e milyon urngirad u gubin. Ya faan gad ra par ni gad ba chugur ngak e piin ni yad be pag e gonop rok Got ni nge pow’iyrad ma rayog ni ngar ayuweged gadad ni ngad ‘pired ni gad mmudugil u fithik’ e michan’ rodad ngak Kristus’ e ngiyal’ ney ni kari mo’maw’ e par. (1 Kor. 16:13; Prov. 13:20) A kum lemnag e athap rodad! Faanra ud gonopiyed e piin ni gad ma chag ngorad e ngiyal’ ney ko tin tomuren e rran, ma aram e rayog ni ngad pared ni gad ba yul’yul’ nge mada’ ko ngiyal’ ni yira thang e re m’ag nib kireb ney riy, ma gad thap nga lan e bin nib beech e fayleng rok Jehovah ni kari chugur.