Ko Hai ʻa e Kau Fakamoʻoni ʻa Sihová?
“Kuó u maheni mo Mike ʻi he laui taʻu. Ko e taha ia ʻo e Kau Fakamoʻoni ʻa Sihová. Ka ʻoku ou faʻa fifili ki he lotu ʻokú ne kau ki aí. Ko hai ʻa Sihova? Ko e hā ʻoku ʻikai kātoangaʻi ai ʻe he Kau Fakamoʻoní ʻa e ngaahi ʻaho mālōloó? Naʻe kau ʻa Mike ʻi ha lotu fakaeouau?” —Becky, Kalefōnia, ʻAmelika.
“ʻI he kamata ako Tohi Tapu hoku kaungāʻapí mo e Kau Fakamoʻoni ʻa Sihová, naʻá ku fifili: ‘ʻOku ʻuhinga ki he hā ʻa e hingoa, Kau Fakamoʻoni ʻa Sihova? Ko ha hingoa foʻou ia ke uiʻaki ha siasi!’”—Zenon, Ontario, Kānata.
“Naʻá ku fakakaukau mo hoku uaifí ko e ʻaʻahi mai ʻa e Kau Fakamoʻoni ʻa Sihová ʻo ʻai ke tautea homa lotó ʻi he ʻikai ke ma ʻalu ki ha lotú. Peá ma fakakaukau kapau ʻoku ʻikai maʻu ʻi he ngaahi siasi tukufakaholo tefitó ʻa e meʻa naʻá ma kumi ki aí, pea fēfē ai ʻa e lotu mavahe hangē ko e Kau Fakamoʻoni ʻa Sihová.”—Kent, Uāsingatoni, ʻAmelika.
“Naʻe ʻikai pē ke u ʻiloʻi kinautolu mo ʻenau tuí.” —Cecilie, Esbjerg, Tenimaʻake.
Ngalingali ʻokú ke faʻa sio kiate kinautolu ʻoku nau malanga mei he fale ki he fale pe ʻi ha feituʻu kakai, ʻo tufaki ʻa e ʻū tohi Fakatohitapu pea tuʻuaki mo e ako Tohi Tapu taʻetotongi. Naʻá ke maʻu nai ʻa e makasini ko ení mei ha taha ʻo kinautolu. Ka, te ke fifili nai pe ko hai moʻoni ʻa e Kau Fakamoʻoni ʻa Sihová. Mahalo ʻoku meimei tatau hoʻo fakakaukaú mo e taha ʻo e ngaahi fakamatala ʻi ʻolungá.
Kapau ʻoku ʻi ai haʻo ngaahi fehuʻi pe hohaʻa meimei tatau, te ke maʻu nai mei fē ʻa e talí? ʻE lava fēfē ke ke ʻiloʻi ʻa e meʻa ʻoku tui moʻoni ki ai ʻa e Kau Fakamoʻoni ʻa Sihová, founga hono fakapaʻanga ʻenau ngāue fakafaifekaú mo honau ngaahi fale faiʻanga lotú mo e ʻuhinga ʻoku nau ʻaʻahi atu ai ki ho ʻapí pe fakalea atu ʻi he feituʻu kakaí?
“Kuó u lau ʻa e ngaahi fakamatala lahi fekauʻaki mo e Kau Fakamoʻoni ʻa Sihová ʻi he ʻInitanetí,” ko e lau ia ʻa Cecilie, naʻe lave ki ai ki muʻá. “Kuó u fanongo ki he ngaahi talanoa sasala mo e ngaahi malanga tomuʻa fehiʻa lahi fekauʻaki mo kinautolu. Ko hono olá, naʻá ku maʻu ai ha vakai ʻikai lelei fekauʻaki mo e Kau Fakamoʻoni ʻa Sihová.” Kae kehe, ki mui ai, naʻá ne talanoa hangatonu mo e Kau Fakamoʻoni ʻa Sihová pea maʻu ʻa e tali fakafiemālie ki heʻene ngaahi fehuʻí.
Te ke saiʻia ke maʻu ha tali moʻoni ki hoʻo ngaahi fehuʻi fekauʻaki mo e Kau Fakamoʻoni ʻa Sihová? ʻOku mau fakalototoʻaʻi atu koe ke ke kumi ki he faʻahinga ʻoku nau ʻiloʻi lelei taha iá—ʻa e Kau Fakamoʻoni ʻa Sihová tonu, ʻa ia ʻoku nau pulusi ʻa e makasini ko ení. (Palōveepi 14:15) ʻOku mau ʻamanaki ʻe tokoni atu kiate koe ʻa e ngaahi kupu hoko maí ke ke vakai pe ko hai kimautolu mo e meʻa ʻoku mau tui ki aí pehē foki ke ke ʻiloʻi mo e ngāue ʻoku mau faí.
