Ganup taon hami mancetak marmiliar Bibel jala pasarhon angka buku. Hami pajongjongkon kantor cabang jala mangaradoti kantor percetakan na adong di liat portibi on. Sampulu ribu huria di liat portibi on mambahen parpunguan di inganan na digoari Bale Harajaon. Sian dia do hepeng laho patupahon i?

Hami boi mangulahon on alani silehonlehon. (2 Korint 9:7) Taon 1879, edisi paduahon sian majalah on paboahon, ”Pos do rohanami, urupan ni JAHOWA do hami mambahen majalah Zion’s Watch Tower [goar ni majalah on]. Jala ndang mangidoido hami tu halak asa boi mangulahon i.” Ndang guga rohanami mandalanhon aturan on.

Silehonlehon on, boi ditongoshon tu kantor cabang manang dibahen tu kotak sumbangan na adong di Bale Harajaon. Alai, ndang mangido parsampuluan, durungdurung manang manggadis buku hami. Ndang margaji hami marbarita na uli, mangajar di huria manang pajongjongkon inganan parpunguannami. Songon na didok Jesus, ”Sibasabasa do i tu hamu; antong, basabasahon hamu ma i!” (Mateus 10:8) Sude na karejo di kantor cabang, di kantor pusat dohot Punguan na Mangaradoti Organisasi ni Sitindangi Ni Jahowa, ndang margaji.

Dilehon hami do silehonlehon tu na hona mara. Halak Kristen di abad na parjolo, las do rohana mangurupi halak na hona mara. (Rom 15:26) Las do rohanami mangurupi pajongjongkon jabu ni nasida, inganan parpunguan, paradehon sipanganon, pahean dohot ubat tu nasida.