Sejse xiuitl kichiuaj uan kimoyauaj tlauel miak Biblias uan amatlajkuiloli. Ipan nochi Tlaltipaktli kipiaj uan kichiuaj kali kampa kichijchiuaj amatlajkuiloli. Nochi monechikouaj ipan Kali kampa mosentiliaj Jehová iTlajtoltemakauaj, ni kali yejyektsitsij uan amo tlauel uejueyij. ¿Kenijkatsa kiixtlauaj nochi tlen kichiuaj?

Nochi kiixtlauaj ika tomij tlen maseualmej temakaj ika nochi ininyolo (2 Cor. 9:7). Ipan xiuitl 1879, kema kichijkej ika ompa ni pilamochtsi tlen motokaxtiyaya Zion’s Watch Tower, kiijtok: “[Ni pilamochtsi] tiuelij tijchiuaj pampa tijneltokaj JEHOVÁ techpaleuia, uan pampa ya nochipa techpaleuijtos, amo kema titetlajtlanijtinemisej tomij yon amo titetlajtlanijtinemisej ma techpaleuikaj”. Uan ipan ni tonali nojua kiampa moiljuiaj.

Nopa tomij uelis kititlanisej kampa kichiuaj amatlajkuiloli o uelis kitlalisej ipan pilkuakajontsitsij tlen kitlalijtokej ipan kali kampa mosentiliaj. Amo tlajtlanij diezmo, amo tlainamaj kema tlamachtiaj yon kinamakaj nopa amatlajkuiloli. Amo kintlaxtlauiaj kema tlajtolmoyauaj, tlamachtiaj yon kema kichiuaj se kali kampa mosentiliaj, pampa Jesús kiijtok: “Axkema xitlainamakaj kema intepaleuisej” (Mat. 10:8). Amo kintlaxtlauiaj katli tekitij ipan ueyi kali Betel ne Estados Unidos, katli tekitij kampa kichiuaj amatlajkuiloli yon Katli kinyakanaj Jehová itlajtoltemakauaj.

Nopa tomij nojkia kitekiuiaj ika kinpaleuiaj sekinok, kej nopa achtoui Cristo itokilijkauaj kinpaleuiyayaj katli tlaijiyouiyayaj (Rom. 15:26). Nama, nojkia kinpaleuiaj katli kintlasojsoljuilia se chikauak ajakatl. Kinkualchijchiuiliaj ininchaj, kinmakaj tlakualistli, yoyomitl uan tlen ika mopajtisej uan kikualchijchiuaj kali kampa mosentiliaj.