Kese nima, tulinga ono Mbimbiliya ononyingi, nomikanda omikuavo. Tutunga ono filiyale, nonondyuo mbokulingila omikanda ouye auho. Omakwi ovityita viomawaneno, veliongiyila monondyuo onongwa mbokufendela, mbutiwa Onondyuo mbo Maliongiyo. Olie ufetela ovipuka ovio aviho?

Ovilinga vietu vikuatesuako no nombongo mbuawa novanthu tyihakuluminyua. (2 Coríntios 9:7) Mo 1879, onthele ya vali yomukanda ou yati: Onthue tutavela okuti, o JEOVA ukahi nokukuatesako okulinga “‘omukanda A Torre de Vigia de Sião.’ [Ongotyo omukanda ou ankho wiihanua]. Moluotyo, tyina atualako okulinga ngotyo, kamatuiti nalumwe ombatelo yovanthu.” Onthue tutualako nonthumbi oyo.

Onombongo mbuawa, mbutumikiswa kono filiyale ine mbupakwa moukasa uvasiwa Monondyuo mbo Maliongiyo. Mahi onthue katuyumbu onombongo ponongalo, ine okukuluminya ovanthu okuava onombongo mbokufetela ovilinga ine omikanda vietu. Onthue katufetwa opo tuivise, nokulongesa mewaneno, ine opo tukuateseko okutunga onondyuo mbokufendela. Jesus wati: “Muetyipewa otyali, nonwe tyavei otyali.” (Mateus 10:8) Aveho vaundapa mono filiyale no mombala, kumwe no Nonkhalamutwe mbo Nombangi mba Jeova, kavafetwa.

Onombongo mbuawa, tupu mbukuatesako poviponga. Ovakristau votete, ankho vena ehambu liokukuatesako vana vatumbukilwa noviponga. (Romanos 15:26) Tupu, nonthue tukuatesako vana vatumbukilwa noviponga, mokupindula-po onondyuo mbavo, no nondyuo mbokufendela, nokuvepa okulia, nomivalo, novihemba.