Hiniwan jaa u ta mbei milionmilion Bëibel, nöö u ta paati milionmilion buku di ta taki soni u Bëibel tu. U ta mbei bëikantoo a hii së u goonliba. Dusudusu kemeente ta ko makandi u dini Gadu a dee hanse kamian fuu di u ta kai Könuköndë zali. Ambë ta paka da hii dee soni aki?

Sëmbë ta da möni u heepi u ku du di wooko di u ta du (2 Kolenti 9:7). A di jaa 1879, de bi sikifi a di u tu Hei Wakitimawosu taa: „U ta biibi taa JEHOVAH hën ta heepi u mbei di buku Zion’s Watch Tower’ [sö de bi ta kai di Hei Wakitimawosu a di ten dë], nöö fëën mbei wa ta pidi sëmbë möni, söseei wa ta tei möni a sëmbë u mbei di buku aki.” A di ten aki, u ta hoi useei a di soni aki jeti.

Sëmbë ta manda möni go a dee bëikantoo fuu nasö de ta buta möni a dee möni këdë dee dë a hiniwan u dee Könuköndë zali fuu. Ma wa ta hakisi sëmbë u de da u di u teni pisi u di möni di de ta wooko, wa ta pii möni a sëmbë. Söseei wa ta hakisi möni da di wooko di u ta du, nöö wa ta sei dee buku dee u ta da sëmbë a di peleikiwooko tu. De an ta paka u u du di peleikiwooko, u lei sëmbë soni a di kemeente, nasö u heepi u mbei dee kamian ka u nango dini Gadu. Jesosi bi taki taa: „Na bai un bai ën e, nöö wan musu mbei sëmbë paka unu fëën tu” (Mateosi 10:8). Hii dee sëmbë dee ta wooko a dee bëikantoo, dee sëmbë dee ta wooko a di hedikantoo, te kisi dee baaa dee u di Tii kulupu u Jehovah Kotoigi, an ta feni möni da di wooko de ta du.

Dee möni dee sëmbë ta da, de u ta tei u heepi sëmbë te wan gaan wata ko booko di köndë u de nasö woto fuka ko miti de. Dee Keesitu sëmbë u awooten bi lo’ u da dee penama soni (Loomë 15:26). A di wan seei fasi u ta heepi dee sëmbë dee miti gaan fuka. U ta heepi de u toona mbei dee wosu u de baka, u ta toona mbei dee kamian ka de nango dini Gadu baka, söseei u ta tja soni u njan, soni u bisi, ku deesi go da de.