Ra reb e duw ma bokum milyon ken e Bible nge yu ken e babyor nib puluw e thin riy ko Bible ni kug ngongliyed kug wereged ko girdi’. Gamad ma toy boch e branch ofis romad nge boch e naun ni yima ngongliy boch e babyor riy u ga’ngin yang e fayleng. Bokum biyu’ e ulung ni yad ma mada’ u boch e naun ni kan ngongliy rogon ni gamad ma liyor riy ni ka nog e Kingdom Hall ngay ara Tagil’ e Liyor. Ere, mini’ e ma pi’ puluwon e pi n’ey?

Salpiy ni ayuw ni ma pi’ boch e girdi’ ni lem rorad e aram e n’en ni gamad ma fanay ni nggu rin’ed e re maruwel ney ngay. (2 Korinth 9:7) Nap’an e duw ni 1879, min ngongliy e ken ni migid e re ke babyor ney, min tay e pi thin ni baaray ngay ni be gaar: “Ba mich u wan’mad ni JEHOVAH e ir e be ayuweg fare ‘Zion’s Watch Tower’ [ireray fithingan e re ke babyor ney ni u nog kafram], ma bochan e re n’ey ma aram fan ndariy ba ngiyal’ ni yira wenig ko girdi’ ni nge mang yad e ra ayuweged rogon e maruwel ni yibe tay riy.” Ere, ka aram nap’an i yib ni gamad be fol ko re thin ney.

Salpiy ni ayuw ni ma pi’ e girdi’ e ba ga’ ni yad ma pi’ nge yan ko pi branch ofis romad, ara yad ma yon’ nga lan nochi kahol ni kan tay ko yungi n’en ni Tagil’ e Liyor romad ni yima yon’ e salpiy ni ayuw ngay. Machane, gathi gamad yog ko girdi’ ni ngar pied e salpiy ko teliw romad ni bay urngin, ara ug kunuyed e salpiy ko girdi’, ara u gogned ko girdi’ ni ngar pied puluwon e muulung ni gamad ma tay ni yad ma un ngay ara babyor ni gamad ma pi’ ngorad. Ku danir ma pi’ puluwmad ni nggu machibgad, ara gu filed ban’en ko girdi’ u lan e ulung romad, ara nggu uned i toy e pi naun ni yima fanay ni nge mang tagil’ e liyor romad. Ya bin riyul’ riy e, yog Jesus ni gaar: “Ke yog ngomed nda mpied puluwon, ere mpied ndab ni pi’ puluwon ngomed.” (Matthew 10:8) Gubin e pi tamachib ni yad ma maruwel ko pi branch ofis romad nge tochuch romad ni kub muun ngay e piin ni yad ba muun ko fare ulung ni ka nog fare Ulung ni Ma Pow’iyey ko Pi Mich Rok Jehovah ngay e yad ma maruwel ndariy puluwrad.

Pi salpiy ni ayuw ni ma pi’ e girdi’ e ku aram e pi salpiy ni gamad ma fanay ni nggu ayuweged boch i walagmad ni ke yib boch e gafgow ngorad ni bod rogon e yoko’, nge durru’, ara ku boch ban’en. Pi Kristiano kakrom e ur felfelan’gad ngay ni ngar ayuweged e piin ni kar gafgowgad. (Roma 15:26) Ere, ku arrogon e n’en ni gamad ma rin’. Nap’an nra yib boch ban’en ni yima gafgow riy ni bod rogon e yoko’, ara durru’, ara ku boch ban’en ma gamad ma ayuweg pi walagmad ni kar gafgowgad ni aram e gamad ma ngongliy e naun rorad ni ke kireb nge tagil’ e liyor rorad, maku gamad ma pi’ e ggan, nge mad, nge boch e falay nib t’uf rorad.