Sa tibuok Bibliya, mabasa ang daghang detalyadong mga tagna. Walay tawo nga detalyadong makatagna sa umaabot. Busa, ang pagkatuman sa mga tagna sa Bibliya maoy pamatuod nga ang Bibliya Pulong sa Diyos.—Basaha ang Josue 23:14; 2 Pedro 1:20, 21.

Ang mga tagna sa Bibliya nga nangatuman na maoy kasaligang basehanan sa atong pagtuo sa Diyos. (Hebreohanon 11:1) Gipasaligan sab ta niini nga matuman ang mga saad sa Diyos bahin sa maayong kaugmaon. Busa, ang mga tagna sa Bibliya naghatag natog seguradong paglaom.—Basaha ang Salmo 37:29; Roma 15:4.

Ang ubang mga tagna nagpasidaan sa mga alagad sa Diyos nga molihok. Pananglitan, dihang nakita sa mga Kristohanon kaniadto nga nangatuman ang espesipikong mga tagna, namiya sila sa Jerusalem. Sa ulahi, dihang gilaglag ang siyudad kay kadaghanan didto nagsalikway kang Jesus, ang mga Kristohanon nakabiya na ngadto sa luwas nga dapit.—Basaha ang Lucas 21:20-22.

Karon, gipakita sa natuman nga mga tagna nga hapit nang taposon sa Gingharian sa Diyos ang mga gingharian ug gobyerno sa tawo. (Daniel 2:44; Lucas 21:31) Busa, kinahanglang ang matag usa molihok na karon aron uyonan ta sa Hari nga si Jesu-Kristo, kinsa gitudlo sa Diyos.—Basaha ang Lucas 21:34-36.