Mu Baibolo muji bungauzhi bwavula bingi. Kafwako muntu nangwa umo wakonsha kwamba bintu bikamweka kulutwe ne. Onkao mambo, kufika kwa bungauzhi kumweshatu patooka kuba’mba Baibolo Mambo a Lesa.—Tangai Yoshua 23:14; 2 Petelo 1:20, 21.

Bungauzhi bwafika bwa mu Baibolo bwitukwasha kuketekela mwi Lesa. (Bahebelu 11:1) Kabiji bwitulengela kuswa kuba’mba milaye ya Lesa yaamba pa bwikalo bwawama bwa kulutwe ikafika. Onkao mambo, bungauzhi buji mu Baibolo bwitulengela kushiinwa’mba bukafika.—Tangai Salamo 37:29; Loma 15:4.

Bungauzhi bumo bujimunako bakalume ba Lesa kuba’mba bafwainwa kunyema. Bena Kilishitu batanshi byo bamwene bungauzhi bumo byo bwafikile, banyemenemo mu Yelusalema. Muzhi byo bamonawine na mambo a kuba’mba bantu bavula bakaine Yesu, bena Kilishitu bajinga kwalepa baikele ku matwi nzoo. —Tangai Luka 21:20-22.

Lelo jino, bungauzhi bwafika bubena kumwesha’mba Bufumu bwa Lesa katatakatu bufumyepo bufumu ne makafulumende a bantu. (Danyela 2:44; Luka 21:31) Onkao mambo, muntu yense wafwainwa kwingijilapo bukiji pa kuba’mba Yesu Kilishitu Mfumu ye batongola kwi Lesa akamubile byawama.—Tangai Luka 21:34-36.