E anoanoaʻi valoaga o loo faamatala auʻiliʻili mai i le Tusi Paia. E leai se tagata e mafai ona ia valoia auʻiliʻili mai le lumanaʻi. O lea, o le faataunuuina o valoaga o loo i le Tusi Paia, ua faamaonia atili mai ai o le Tusi Paia o le Afioga lea a le Atua.—Faitau le Iosua 23:14; 2 Peteru 1:20, 21.

O valoaga o le Tusi Paia ua faataunuuina, o se faavae lelei lea e faatuatua ai i le Atua. (Eperu 11:1) E tatou te mautinoa ai foʻi o le a taunuu folafolaga a le Atua e faatatau i le aumaia o se lumanaʻi matagofie. O lea, o valoaga o le Tusi Paia ua aumaia ai iā i tatou se faamoemoe mautinoa.—Faitau le Salamo 37:29; Roma 15:4.

O nisi valoaga e lapataʻia ai auauna a le Atua ina ia gaoioi. O se faataʻitaʻiga, ina ua vaaia e Kerisiano i le uluaʻi senituri ua faataunuu nisi o valoaga patino, na latou tuua loa Ierusalema. Mulimuli ane, na faaumatia le aai ona o le toʻatele o ona tagata na latou teena Iesu. Peitaʻi, o le taimi lea ua mamao ese Kerisiano i se nofoaga saogalemu.—Faitau le Luka 21:20-22.

O valoaga ua faataunuuina i aso nei, ua iloa mai ai ua toe o se aga aumaia e le Malo o le Atua, le iʻuga o malo faaletagata ma a latou pulega. (Tanielu 2:44; Luka 21:31) O lea, e tāua tele i tagata taʻitoʻatasi ona faanatinati, ma ia gaoioi i le taimi lenei ina ia maua le finagalo malie o Iesu Keriso, o le Tupu ua tofia e le Atua.—Faitau le Luka 21:34-36.