1, 2. Yub ango ma Lakricitayo acel acel tye kwede? Mi labol.

 KA DAKO ot tye ka yero nyig yen i cuk, en pol kare pe yero madongone nyo ma welgi yot. Ma ka meno, en yenyo ma gucek maber adada. En yero ma ngwecgi kur dok komgi yot. Ada, en yero ma gucek maber dok guteggi.

² Ka ngat moni odongo i yo me cwiny nio wa i dyere kun bene nongo batija, en pud medde ki dongo i yo me cwiny. Yubbe tye me doko latic pa Lubanga muteggi. Dongo ma watye ka lok iye-ni pe me kom ento i yo me cwiny. Lakwena Paulo ocoyo ni pire tek ni Lukricitayo me Epeco myero gudong i yo me cwiny. En ocuko cwinygi ni ‘gudok acel i niyegi ki i ngeyo Wod pa Lubanga, nio ka gudoko dano mucwiny, ma gudongo girom ki Kricito, ma en aye jami ducu opong iye.’—Ep. 4:13.

3. Waromo poro kacokke me Epeco ki jo pa Jehovah i kareni nining?

³ Kacokke me Epeco onongo dong orii pi mwaki mapol i kare ma Paulo coyo waragane. Omege ki lumege mapol ma i kacokke meno onongo dong gitye Lukricitayo muteggi i yo  me cwiny. Ento, tye jo mogo ma onongo pud mitte ni kong gumedde ki dongo wek guteggi i yo me cwiny. Man bene rom aroma ki Lucaden pa Jehovah i kareni. Tye omege ki lumege mapol ma gutiyo pi Lubanga pi mwaki malac dok guteggi i yo me cwiny. Ento tye ni pe jo ducu ma i kacokke guteggi i yo me cwiny. Me labolle, dano alip mapol ginongo batija mwaka ki mwaka, pi meno tye mogo ma myero gutute me dongo i yo me cwiny. Ento in kono?—Kol. 2:6, 7.

4, 5. I yo macalo mene ma Lukricitayo ma guteggi i yo me cwiny pe girom, ento ngo ma gin weng gitimo? (Nen cal ma tye i pot karatac 8.)

⁴ Ka itye ka ngiyo nyig yen i cuk, ibinongo ni gin weng pe girom. Kadi bed kumeno, ento tye jami mogo ma nyuto ni gin weng gucek. I yo acel-li, Lukricitayo ma guteggi i yo me cwiny romo bedo ni lobo, tekwaro, yotkom, mwaka, nyo ngecgi mapat pat. Kitgi kacel ki jami ma gimaro bene patpat. Kadi bed kit meno, jo ma gidongo i yo me cwiny gidongo kit mogo ma nyuto ni dong giteggi. Meno timme nining?

⁵ Latic pa Jehovah muteggi i yo me cwiny lubo lanen pa Yecu, ma owekiwa lanen ni ‘walub kore.’ (1 Pet. 2:21) Gin ango ma Yecu owaco ni pire tek adada? En owaco ni wamar Jehovah ki cwinywa ducu, kwowa, tamwa ki dong wamar luwotwa macalo wamarre kenwa. (Mat. 22:37-39) Lakricitayo muteggi i yo me cwiny tute me kwo ma lubbe ki tira meno. En myero onyut ni watte ki Jehovah kacel ki marre pi jo mukene pigi tek bote adada.

6, 7. (a) Kit macalo mene ma ginyuto ni ngat moni tye Lakricitayo muteggi i yo me cwiny? (b) Lapeny mene ma myero wapenye kwede?

⁶ Kit ma wangeyo kwede, mar obedo but nyig acel ma nyak pi cwiny maleng ma Lakricitayo myero onyut i kwone. (Gal. 5:22, 23) But nyig mukene ma pigi tek ma ginyak pi cwiny maleng aye mwolo, gwokke ken, ki dong diyo cwiny. Giromo konyo Lakricitayo me diyo cwinye labongo keco ka en tye i lyeto ki dok me bedo ki gen ka cwinye otur. I yubbe me kwan pire kene, en yenyo cik ma igi lac me Ginacoya ma romo konye me poko kin gin matir ki ma pe atir. I ngeye ka en moko tam, en moko tam ma nyuto ni etye Lakricitayo muteggi i yo me cwiny. Me labolle, en lubo cik me Baibul ma weko cwinye pe ngolle kop. Lakricitayo muteggi i yo me cwiny nyuto mwolo ka ce en yeni tira ki cik pa Jehovah kare ducu ber loyo timo jami i yo ma mege. * En tito kwena ki mit kom dok tute me kelo ribbe i kacokke.

⁷ Kadi bed ni dong watiyo pi Jehovah pi mwaki mapol, wan ducu ki acel acel waromo penye ni, ‘Tika tye kabedo mogo i kwona ma pud atwero timo iye alokaloka wek alub lanen pa Yecu kun amedde ki dongo i yo me cwiny?’

8. Ngo ma waromo wacone ma lubbe ki ngec kacel ki niango pa Yecu i kom Ginacoya?

⁸ Yecu Kricito onongo ngeyo dok niang Lok pa Lubanga maber adada. Kadi bed wa i kare ma tye mwaka 12, en onongo nyamo lok me Ginacoya ki lupwonye i ot pa Lubanga. “Dano ducu ma yam guwinye guuro niangnge, ki kit ma en dok kwede i peny.” (Luka 2:46,  47) I nino mo acel ma en tye i ticce me pwony, Yecu otwoyo dog lumone kun tiyo ki Lok pa Lubanga i yo me diro.—Mat. 22:41-46.

9. (a) Yub mene me kwano Baibul ma pigi tego bot ngat ma mito dongo i yo me cwiny? (b) Pingo waketo yub me kwano Baibul?

⁹ Ngat mo ma mito doko Lakricitayo muteggi i yo me cwiny myero olub lanen pa Yecu dok otute me bedo ki niango muromo i kom Baibul. En myero okwan lok ma tye iye i yo matut kare ki kare kun niang ni “cam matek tye pi jo muteggi.” (Ibru 5:14) Ada, Lakricitayo muteggi i yo me cwiny myero obed ki ‘ngec matir i kom Wod pa Lubanga.’ (Ep. 4:13) Tika itye ki yub me kwano Baibul nino ducu? Tika itye ki yub me kwan piri keni? Tika itye ki yub me otyeno me woro i cabit ducu? Ka itye ka kwano Lok pa Lubanga, yeny cik ma igi lac me Ginacoya ma bikonyi me niang kit ma Jehovah tamo ki dok winyo kwede. I ngeye, ti ki cik magi ma igi lac-ci ka itye ka moko tam. Meno bikonyi me nyikke cok bot Jehovah.

10. Ngec pa Lakricitayo muteggi i yo me cwiny konye i kwone me nino ducu nining?

¹⁰ Lakricitayo muteggi i yo me cwiny ngeyo ni meno bedo ki ngec keken pe romo. Medo i kom ngecce, en mono maro ki cwinye ducu tira kacel ki cik ma igi lac pa Lubanga? Yo acel ma mar meno nen kwede aye ka en keto jami ma pigi tego bedo mukwongo i kwone ma lubbe ki miti pa Jehovah ma ka cobo mitine nyo miti pa dano. Ki bene, Lakricitayo ma kit meno nongo dong otute matek me ‘weko’ kite kacel ki timme mogo macon. Ka Lakricitayo moni timo alokaloka ma kit meno, en ruko kit manyen pa Kricito ma “giketo  i cal pa Lubanga kikome i ada me kit ma atir ki maleng.” (Kwan Jo Epeco 4: 22-24.) Kicoyo Baibul pi teko pa cwiny maleng. Ka Lakricitayo medde ki dongo ngecce ki marre i kom cik me Baibul, en yabo cwinye kacel ki tamme wek cwiny maleng aye otele. Man biweko en dongo i yo me cwiny.

11. Kwo ango ma Yecu okato ki iye i kare ma tye ki lupacone ki dong lupwonnyene?

¹¹ I kare ma Yecu tye i lobo, en okwo kacel ki dano ma gitye ki roc kadi bed ni en pe ki roc. Lunyodo ma gitye ki roc aye gupite dok okwo paco pi mwaki mapol kacel ki omegine ki lumegine ma gitye ki roc. Kadi wa lureme macok kwede gunyuto kit mogo calo awaka kacel ki cwiny me paro pigi kengi. Me labolle, i dyewor ma peya kineko Yecu, “pyem . . . ocakke i kin lupwonnye ni anga i kingi ma gitamo ni bedo ladit.” (Luka 22:24) Ento Yecu onongo pe ki akalakala mo keken pien ngeyo ni lulub kore ma gipe ki roc-ci giromo dongo i yo me cwiny dok notegi biweko kacokke cung matek. I dyewor meno, Yecu olego ni lukwenane myero gubed ki cwiny me note i kingi kun penyo Wonne me polo ni: “Gin ducu gubed acel macalo in, Abana, ibedo i an, an bene i in, gin ducu gubed i wan, . . . wek gubed acel macalo wan acel.”—Jon 17:21, 22.

12, 13. (a) Jo Epeco 4:15 nyuto nining ni note pire tek i kacokke? (b) Omego mo acel olwenyo ki gorone nining ma oweko en opwonyo kit me dongo cwiny me note?

¹² Lakricitayo muteggi i yo me cwiny tiyo matek wek note obed tye i kacokke. (Kwan Jo Epeco 4:1-6, 15, 16.) Wan ducu wamito ni jo pa Lubanga gubed ma “guribbe,” ma man te lokke ni gin myero gunote i kingi. Ma lubbe ki Lok pa Jehovah, mitte ni wabed jo mamwol wek note man obed tye. Mwolo konyo omego nyo lamego muteggi i yo me cwiny me gwoko note me kacokke wek obed matek kadi bed jo mukene gitere marac pi roc ma gitye kwede. Pi meno penye kekeni ni: ‘Ngo ma abitimo ka omego nyo lamego mo otimo gin mo marac? Nyo ngo ma abitimo ka ngat mo ocwero cwinya i kacokke? Tika atye ki cwiny me yubo wat nyo kece abikun pe aloko ki ngat meno? Nyo kece abitute ki tekka ducu me yubo wat ma oballe-ni?’ Lakricitayo muteggi i yo me cwiny tute me yubo wat ento pe kwero lok nyo bedo ki ngat ma ocwero cwinye-ni.

¹³ Nen kong labol pa Uwe: I kare mukato angec, en obedo ka weko jami maraco ma luye luwote gitimo cwero cwinye. I ngeye, en otiyo ki Baibul ki buk me Insight on the Scriptures me kwano lok i kom kwo pa Daudi. Pingo en oyero Daudi? Uwe owaco ni: “Daudi oneno kit ma luye luwote gikwo kwede i yo ma pe rwatte ki cik me ginacoya. Me labolle, Kabaka Caulo otemo nekke, jo mogo onongo gimito celle ki got, kadi wa dako pa Daudi bene obedo ki cac i kome. (1 Cam. 19:9-11; 30:1-6; 2 Cam. 6:14-22) Ento Daudi omedde ki maro Jehovah kadi bed jo mukene gutimo jami maraco i kome. Ki bene, Daudi obedo dano ma lakica, ma meno aye cwiny ma amito bedo kwede. Jami ma apwonyogi i kare me kwanna oloko nenona i kom roc pa luye luwota. Pe dong agwoko bal pa luwota i cwinya. Ma ka meno, atute me dongo cwiny me note i kacokke.” Tika in bene itye ki yub me dongo cwiny me note i kacokke?

14. Jo macalo mene ma Yecu oyerogi me bedo lureme?

¹⁴ Yecu Kricito onongo maro kwo kacel ki dano ducu. Dano me mwaki mapat pat onongo giwinyo agonya ka gitye ka ngete—co, mon, jo matino, jo muteggi, kadi wa lutino matino. Ento, ka odok i lok me mako lirem macok, Yecu onongo yero ki diro. En owaco bot lukwenane ma lugen ni: “Wun lurema ka wutiyo gin ducu ma acikowu.” (Jon 15:14) Yecu oyero lureme magi ki i kin jo ma lugen ma gulubo kore dok gutiyo pi Jehovah ki cwinygi ducu. Tika in bene iyero luremi macok ki i kin jo ma gitiyo pi Jehovah ki cwinygi ducu? Pingo man pire tek?

15. Adwogi maber ango ma jo matino ginongo ka gimako lirem ki Lukricitayo muteggi i yo me cwiny?

¹⁵ Nyig yadi mapol gicek i kare ma nongo ceng ryeny. I yo acel-li, mar ma omege ki lumege gitye kwede twero konyowa me doko Lukricitayo muteggi. Oromo bedo ni itye dano ma pud tidi ma tye ka moko tamme i kom gin ma myero etim ki kwone. Pud dong bibedo me ryeko ka ibedo kacel ki luye luwoti ma gutiyo pi Jehovah pi kare malac dok gutute me dongo cwiny me note i kacokke! Pi mwaki mapol mukato, oromo bedo ni gukato ki i pekki mapol i kwogi dok gukanyo ariya mapat pat i ticgi pi Lubanga. Jo ma kit magi giromo konyi me yero yo me kwo ma pud dong ber loyo. Ka ibedo kwedgi, gin giromo konyi moko tam me ryeko ki dok me doko Lakricitayo muteggi i yo me cwiny.—Kwan Jo Ibru 5:14.

16. Jo muteggi me kacokke gukonyo laminwa mo matidi nining?

¹⁶ Me labolle, Helga wiye po ni i kare ma etye i mwaka me agikkine i cukul, pol pa lutino luwote ma gikwano kwedgi i ot kwan acel gubedo ka lok i kom yubgi pi anyim. Polgi onongo gimito donyo i univaciti wek ominigi kero me nongo dog tic maber ma keligi cente oduk. Helga onyako tam man ki lureme ma i kacokke. En owaco ni: “Polgi onongo dong gitye jo muteggi dok gukonya adada. Gin gucuko cwinya me donyo i tic pi kare malac. Pi meno, man omiya kare me tic macalo painia pi mwaka abic kulu. Kombeddi-ni, cwinya yom adada ka atamo pi mwaki mapol ma atiyo kwede ki kare me buluna i tic pi Jehovah. Pe tye tyen lok mo ma weko atwero koko ange.”

17, 18. Bedo ma wateggi i yo me cwiny konyowa nining me tic pi Jehovah?

¹⁷ Ka walubo lanen pa Yecu, ci wabidongo wadoko Lukricitayo ma guteggi i yo me cwiny. Wabinyikke cok bot Jehovah dok bene mitiwa me tic pire bidongo doko matek. Ngat moni romo tic pi Jehovah i yo maber adada ka ce en odoko Lakricitayo muteggi i yo me cwiny. Yecu ocuko cwiny lulub kore ni: “Wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo.”—Mat. 5:16.

¹⁸ Kit ma waneno kwede, Lakricitayo muteggi i yo me cwiny romo kelo adwogi maber i kacokke. Dok teggi i yo me cwiny-nyi nen i kit ma Lakricitayo moni tiyo kwede ki cwiny ma ngolle kop. Cwiny ma ngoliwa kop-pi romo konyowa me moko tam me ryeko nining? Dok waromo woro tam ma luye luwotwa gumoko ma lubbe ki cwiny ma ngoligi kop-pi nining? Wabinyamo lapeny magi i pwony ma lubo man.