1, 2. ¿Taqenis kunatakis chʼamachasiñ muntanjja? Uk mä uñachtʼäwimpi qhanañchtʼam.

KUNAPACHATÏ qhatur fruta alasir sartan ukhajja, jachʼa frutanaka, jiskʼa frutanaka, iraqtʼat frutanak thaqhañat sipansa, suma poqtʼat frutanakwa ajlltanjja. Ukatsti manqʼañjamäki, sumäki ukwa ajlliraktanjja. Cheqas suma poqtʼatäki uka frutaw sumajja.

² Bautisasisajja, janiw ukharuk qheparañ munktanti, jan ukasti Diosar serviñan jukʼampiw jiltañ muntanjja. Mä arunjja, suma chuymanïñataki, Jehová Diosan suma amigopäñatakiw chʼamachasiñ muntanjja. Apóstol Pablojja, Éfeso markankir cristianonakar akham sänwa: ‘Taqenis iyawsäwinjja mayakïñaru puripjjam, ukhamarak Diosan Yoqaparu uñtʼañansa. Ukatsti chʼamani jaqenakar tukupjjam, Cristojj qawqchʼäkitejj ukar puriñkama’ sasa (Efe. 4:13).

3. Éfeso markankir tamampi, jichha tiempon utji uka tamanakampejja, ¿kunansa niya kikpaki?

³ Pablojj Éfeso markan jakasir cristianonakar qellqkäna  ukhajja, uka cristianonakat waljanejj experiencianïpjjänwa, Diosampis sumarak apasipjjäna. Ukampis yaqhepajja, Diosamp sum apasiñatakejj chʼamachasipjjañapaw wakisïna. Jichhürunakanjja, tamanakan niya ukhamarakiwa, jilat kullakanakat waljanejj walja maranakaw Diosar sirvjjapjje. Ukampis yaqhepajja, Diosamp sum apasiñatakejj chʼamachasipjjañapaw wakisi. Jichhak bautisasipki uka jilat kullakanakas ukhamarakiw Jehová Diosamp sum apasiñatakejj chʼamachasipjjañapa. ¿Jumajj Diosamp sumti apasjjta, jan ukajj chʼamachasiñamach wakisi? (Col. 2:6, 7.)

4, 5. 1) ¿Diosamp sum apasiñatak chʼamachasiri cristianonakajj taqenis kikpakïpjjeti? 2) Uka cristianonakajj ¿kunansa niya kikpäpjje? (3 janankir foto uñjjattʼam.)

⁴ Suma poqtʼat frutanakajja, janiw taqenis kikpäkiti. Yaqhep frutanakajj jachʼanakawa yaqhepasti jiskʼakiraki, ukham mayj mayjäpkchisa, suma poqtʼat frutanakajj qhanaw amuyasi. Jehová Diosampi sum apasiñatak chʼamachasiri cristianonakampejj niya ukhamarakiwa, janiw taqenis kikpäpkiti. Yaqhepajj jila maranïpjjewa, yaqhepasti minus maranïpjjarakiwa, yaqhepasti mayja costumbreni, jan ukajj yaqha manqʼanak manqʼasiri ukhamäpjjarakiwa. Ukhamäkchi ukasa, Diosampi sum apasipjjatapajj qhanaw amuyasi. ¿Kunanak lurasas Jehová Diosampi sum apasipjjatap uñachtʼayapjje?

⁵ Diosamp sum apasiñatak chʼamachasiri cristianonakajja, Jesusan ‘kayup arkañatakiw’ chʼamachasipjje (1 Ped. 2:21). Jesusajj sänwa: “[Jehová] Tatit Diosamaruw munäta taqe chuymamampi, taqe almamampi, taqe amuyumampiraki. [...] Jaqe masimarusti juma kipkarjam munarakim” sasa (Mat. 22:37-39). Diosamp sum apasiñatak chʼamachasiri jilat kullakanakajja, Jesusan uka arunakaparjam sarnaqañatakiw chʼamachasipjje. Ukatjja, Jehová Diosan amigopäñasa, jaqe masiparu munasiñas kunja wakiskirisa uksa sarnaqatapampiw uñachtʼayapjjaraki.

6, 7. 1) Diosampi sum apasiñataki chʼamachasir cristianonakajja, ¿kunjam chuymanïpjjesa? 2) ¿Kunsa taqenis jisktʼasiñasa?

⁶ Jehová Diosampi sum apasiñataki chʼamachasir cristianonakajj munasirïpjjewa (Gál. 5:22, 23). Ukatsti jupanakajj llampʼu chuymani, pacienciani, jañchin munañapar atipjiri ukhamäpjjarakiwa. Ukanakaw jan walinakan jan aynachtʼañatak yanaptʼi. Diosan Arupatsa yatjjatapjjarakiwa, ukanwa kunatejj walïki jan walïkaraki uk sum amuytʼañatak yanaptʼa jikjjatapjje. Diosan Arupat sum yatjjatasasti ukarjamaw kun lurañsa amtapjjaraki. Cheqas wali llampʼu chuymanïpjjewa, Jehová Diosan ewjjanakaparjama, kamachinakaparjama sarnaqañaw jupanakatak wali wakiskirejja. * Janiw ukakïkiti, jupanakajj taqe chuymaw Diosan arunakap yatiyapjje, taman mayachtʼat sarnaqañ utjañapatakis yanaptʼapjjarakiwa.

⁷ Jehová Diosarojj walja maranakasa, jan ukajj jichhakis serviskstanjja, taqeniw akham jisktʼasiñasa: “Kunjamtï Jesusajj Jehová Diosampi sum apaskäna ukham apasiñatakejja, ¿kunansa nayajj chʼamachasiñaja?” sasa. Kunas ukatakejj yanaptʼistaspa uk jichhajj kimsa toqet yatjjatañäni.

8. ¿Kunatsa Jesusajj Bibliat suma yatjjattʼatänwa sasin sistanjja?

⁸ Jesusajj Diosan Arupat suma yatjjattʼatänwa. Amuytʼañataki, 12 maranikïskäna ukhajja, templonwa ley yatichirinakampi Diosan Arupat parläna. Jupar istʼirinakasti wal muspharapjjäna (Luc. 2:46, 47). Mä qawqha maranak qhepatsti, uñisirinakaparojj Diosan Arupat amuytʼayasaw jan aruni jaytäna (Mat. 22:41-46).

9. 1) ¿Kunas Jehová Diosampi sum apasiñatakejj yanaptʼistaspa? 2) ¿Kunsa Bibliat yatjjatkasajj amuyañasa?

⁹ Jehová Diosampi sum apasiñatakejja, Jesusatwa yateqasiñasa, janiw Biblian qallta yatichäwinak yateqasakejj qheparañasäkiti, jan ukasti jukʼampiw Diosan Arupat yatjjatañasa, ¿kunatsa? Waña manqʼajj jachʼa jaqenakatakiwa (Heb. 5:14). Biblian cheqa yatichäwinakap yatiñasajj wali wakiskiriwa (Efe. 4:13). ¿Kunas ukatakejj yanaptʼistaspa? Mä suma programa wakichtʼasiñasawa. Ukatsti ukarjamaw Biblia sapüru liyiñasa, sapakisa familjamasa sapa semanaw Bibliat yatjjatañasa. Bibliat yatjjatkasajja, Jehová Diosajj kunjam chuymanisa, kunjamsa amuyi ukwa amuyañasa. Ukatsti ukarjamaw kun lurañsa amtañasa. Ukhamtï lurañänejja, Jehová Diosampejj wali sumaw apasiñäni.

10. Diosamp sum apasiñataki chʼamachasir cristianonakajja, ¿kunjamsa Diosan ewjjanakapar munasipjjatap uñachtʼayapjje?

¹⁰ Kunjamtï uñjktanjja, Diosamp sum apasiñataki chʼamachasir cristianonakajj Bibliat sum yatjjatañatakiw chʼamachasipjje, ukampis janiw ukakïkiti, jupanakajj Jehová Diosan ewjjanakap wal munasipjje. Ukjja,  Diosan munañap lurañatak chʼamachasisaw uñachtʼayapjje. Ukatakejj sarnaqäwinakapsa, amuyunakapsa, luratanakapsa mayjtʼayapjjewa. Jupanakasti, Jesusat yateqasisaw nayra jakäwinakap jaytapjje, ukatsti suma qʼoma cheqa kankañanwa jakapjjaraki (Efesios 4:22-24 liytʼañataki). Amtañäni, Biblia qellqasiñapatakejja, Diosaw jaqenakarojj qollan ajayupampi yanaptʼäna. Ukhamasti, maynejj Bibliat yatjjatki ukhajja, Diosaw qollan ajayupampejj yatiñanïñatakisa, munasirïñatakisa, Jehová Diosan amigopäñatakis yanaptʼi.

11. ¿Kunjam jaqenak taypinsa Jesusajj jakäna?

¹¹ Jesusajj aka Oraqenkkäna ukhajja jan pantjasiri jaqënwa. Ukampis awkipasa, taykapasa, jilanakapasa, kullakanakapasa, mayni jaqenakasa pantjasirïpjjänwa. Awisajja, arkirinakapas jachʼa jachʼaw tukupjjäna, ukatjja jupanakan askipakwa thaqhapjjäna. Amuytʼañataki, Jesusajj jiwayatäñatak janïr katuntatäkäna uka arumajja, discipulonakajj khitis jupanakat jukʼamp jilïrejja ukjjatwa chʼajjwapjjäna (Luc. 22:24). Ukhamäkchïna ukasa, ‘Diosamp sum apasiñatakejj chʼamachasipjjaniwa ukatsti taman mayachtʼatäñapatakis yanaptʼapjjaniwa’ sasaw Jesusajj confiyäna. Ukatwa uka pachpa arumajj Jehová Diosar akham sasin mayisïna: “Mayiraksmawa Awkejja, jupanakajj mayakïpjjañapataki, ukhamarak jiwasampis mayakïpjjañapatakiraki, kunjämtï jumajj nayanktajja, nayajj jumankaraktjja ukhama. [...] Kunjämatejj jumampi nayampejj mayakïtan ukhamaraki” sasa (Juan 17:21, 22).

12, 13. 1) ¿Kunatakis taqenis chʼamachasiñasa? 2) Taman mayachtʼat sarnaqañ utjañapatakejja, ¿kunjamsa mä jilatajj chʼamachasiwayi?

¹² Jehová Diosamp sum apasir cristianonakajja, taman mayachtʼat sarnaqañ utjañapatakiw yanaptʼapjje (Efesios 4:1-6, 15, 16 liytʼañataki). Taman mayachtʼata, sumankañan sarnaqañatakejj taqeniw chʼamachassna. Ukatakejja llampʼu chuymanïñasawa. Amuytʼañataki, mä jilatatï, jan ukajj mä kullakatï pantjasisin chuym ustʼaychistu ukhajja, ¿kunjamsa jikjjatastanjja? ¿Janit mayampis jupampejj parljjtanjja? Jan ukajj ¿jupampi sumankañatakich chʼamachastanjja? Jiwasatï Diosamp sum apasiñatak chʼamachasiskstan ukhajja, jankʼakiw kuna jan walinaksa askichañäni.

¹³ Uwe sat jilatat parltʼañäni. Jupajja, jilat kullakanakan pantjasitanakap uñjasajja wal colerirïna. Ukampis mä urojja, Bibliata Perspicacia librompitwa David chachan sarnaqäwipat yatjjatäna. ¿Kunatsa Davitat yatjjatañ amtpachäna? Uwe jilatajj siwa: “Davitajja, yaqheparojj Diosatakjam jan sarnaqapjjatapwa uñjäna. Sañäni, Saúl reyejj jupar jiwayañwa munäna. Yaqha horasasti, yaqhep israelitanakajj qalamp kʼupjasaw jiwayañ munapjjäna. Warmipas mä urojj jupat jan walinak parläna (1 Sam. 19:9-11; 30:1-6; 2 Sam. 6:14-22). Ukhamanakan uñjaskasasa, Davitajj Jehová Diosar munasiskakïnwa, ukatjja confiyaskakïnwa. Davitajj jaqenakat khuyaptʼayasirïnwa. Davitjam chuymanïñaw nayar faltitäna, jupat yatjjatañajja jilat kullakanakan pantjasitanakap jan uñchʼukiñatakiw yanaptʼawayitu. Janiw nayrjamäjjti, jichhajj taman mayachtʼat sarnaqañ utjañapatakiw chʼamachasta” sasa. Jiwasajj Uwe jilatjamarakiw  taman mayachtʼat sarnaqañ utjañapatakejj chʼamachassna.

14. ¿Khitinakarus Jesusajj amigopäñapatak ajllïna?

¹⁴ Jesusajj taqeniruw wali munasiñampi uñjäna. Chachanakasa, warminakasa, jilïrinakasa, wawanakasa, jupampejj wali sumaw jikjjatasipjjerïna. Ukampis janiw taqenin amigopäkänti. Mä kutejja, Jesusajj apostolonakapar akham sänwa: “Jumanakajj nayan amigonakajjäpjjtawa, kuntejj nayajj jumanakar sapksma uk lurapjjäta ukajja” sasa (Juan 15:14). Jesusajja, khitinakatï juparu jan jitheqtas arkapkäna, ukhamarak Jehová Diosar taqe chuyma servipkäna ukanakaruw amigopäñapataki ajllïna. Jiwasajj ukhamarakiw lurañasa, Jehová Diosar munasipki ukanakarukiw amigosäñapatak ajlliñasa. ¿Kunatsa ukajj wali wakiskirejja?

15. Wayn tawaqonakajja, ¿kunatsa Diosamp sum apasiri cristianonakan amigopäpjjañapa?

¹⁵ Frutanakajja, lupimpejj wali sumaw poqorapjje. Kunjamtï lupejj frutanak sum poqorañapatak yanaptʼkejja, ukhamarakiw jilat kullakanakan munasiñapajj Diosamp sum apasiñataki yanaptʼistu. Wayn tawaqo, ¿kunsa jakäwiman luräta uk amtjjtati? Jumatï suma amtar puriñ munsta ukhajja, Diosar walja maranak servipki ukhamarak taman sumankaña utjañapatak yanaptʼapki uka cristianonakan amigopäñamawa. Jupanakajja, kunayman jan walinakanwa uñjasiwayapjje, jupanakaw kunsa jakäwiman lurasma uk sum amtañataki yanaptʼapjjeristam. Jupanakampi chikachasïta ukhajja, suma amtar puriñatakiw yanaptʼapjjätam, ukatsti Jehová Diosatakjam sarnaqañatakis yanaptʼapjjarakïtamwa (Hebreos 5:14 liytʼañataki).

16. ¿Kunjamsa jilïri jilat kullakanakajj mä tawaqo kullakar yanaptʼapjjatayna?

¹⁶ Helga kullakat parltʼañäni, jupasti siwa: ‘Kunapachatï colegiot mistuñampejjäyäta ukhajja, niya taqe yateqer masinakajaw colegiot mistusajj kunsa lurapjjani uka toqet parlapjjerïna. Universidadan yatjjatañwa waljanejj amtapjjäna. Ukampis nayajja, Diosamp sum apasiri cristianonakaruw jisktʼasiyäta. Jupanakajj nayat jilïrinakäpjjänwa. Jupanakaw yanaptʼapjjetäna, precursorjam serviñatakis chʼamañchtʼapjjarakitäna. Ukhamatwa precursorjam phesqa maranak serviwayta. Ukhat jichhakamajj walja maranakas pasawayjjchejja, tawaqökasin Jehová Diosar servitajat walpun kusista’ sasa.

17, 18. Diosamp sum apasiñajja, ¿kunjamsa Jupar jukʼamp serviñatakejj yanaptʼistaspa?

¹⁷ Jesusat yateqasisin sarnaqañäni ukhajja, jupjamarakiw Diosampejj sum apasiñäni. Ukhamarusa, Jehová Diosan suma amigopäñäniwa, ukatsti jukʼampirakiw Jupar serviñ munañäni. Jesusajj arkirinakapar sänwa: “Jumanakan qhanamajj jaqenakatakejj qhantʼarakpan. Ukham suma wali luräwinakam uñjasa jumanakan Dios Awkimaru yupaychapjjañapataki” sasa (Mat. 5:16).

¹⁸ Kunjamtï uñjktanjja, Diosamp sum apasiri cristianonakajj taman wali sumwa yanaptʼapjjaspa. Ukhamarusa uka jilat kullakanakajj suma conciencianïpjjewa. Suma conciencianïñajj ¿kunjamsa suma amtanakar puriñatakejj yanaptʼistu? ¿Kunjamsa mayninakan concienciap respetatas uñachtʼaysna? Uka toqenakatwa jutïr yatichäwin yatjjataskañäni.