1, 2. ?Afta we wan man i kasem save long Jehova mo i baptaes, hem i mas mekem wanem? Yu talem wan pijatok.

TAEM wan mama i stap lukaot ol frut long maket, ?olsem wanem hem i save se wan frut i gud? Ating hem i no jusum frut we i bigwan mo i jip, be hem i lukaot frut we i jes kamaot long garen, i raep, mo i smel gud. Frut ya i mas rere gud.

² Long sem fasin, God i wantem se yumi olsem frut ya we i rere gud, i min se yumi kam bigman olsem Kraes. Kam bigman i no min se yumi gruap i kam bigman long bodi, be i min se yumi fren gud wetem Jehova. Afta we wan man i kasem save long Jehova mo i baptaes, hem i mas gohed blong fren moa wetem God. Aposol Pol i wantem se ol Kristin long Efesas oli kam bigman olsem Kraes. Hem i leftemap tingting blong olgeta blong oli kam wan nomo long bilif, mo blong oli gohed blong kasem save long Jisas gogo ‘oli kam olsem we oli no moa pikinini, oli bigman finis. Bambae oli kam olsem Kraes nomo, we hem i bigman tru.’—Efesas 4:13.

3. ?Olsem wanem kongregesen blong Efesas i sem mak long ol man blong Jehova tede?

³ Sam yia afta we kongregesen blong Efesas i stanap, Pol i  raetem leta i go long olgeta. Plante long olgeta oli stap long trutok longtaem finis, mo oli bigman olsem Kraes. Be sam long olgeta oli no fren gud yet wetem Jehova. Sem mak tede, plante brata mo sista oli mekem wok blong Jehova longtaem finis, mo oli bigman olsem Kraes. Be samfala no yet. Yu traem tingbaot, i gat plante taosen man we oli baptaes evri yia, be sam long olgeta oli no kam bigman yet. ?Olsem wanem long yu?—Kolosi 2:6, 7.

4, 5. ?Ol Kristin we oli bigman oli defdefren olsem wanem? ?Oli sem mak olsem wanem? (Yu luk pija long stat blong stadi.)

⁴ Taem yu luk ol frut we oli raep long maket, olgeta wanwan oli defdefren. Be i gat sam samting long olgeta we i sem mak. Ol Kristin we oli bigman, olgeta tu oli defdefren. Oli kamaot long ol defdefren kantri mo fasin blong laef. Sam oli olfala mo sam oli yangfala. Oli gat defdefren tingting long samting we oli laekem mo samting we oli no laekem. Be olgeta evriwan oli gat sam fasin we oli soemaot se oli bigman olsem Kraes. ?Wanem ol fasin ya?

⁵ Ol Kristin we oli bigman oli ‘biaen long Jisas’ mo oli folem gud fasin blong hem. (1 Pita 2:21) Jisas i talem se i impoten tumas blong lavem Jehova wetem olgeta hat, laef, mo tingting blong yumi, mo blong lavem ol man raonabaot long yumi olsem we yumi lavem yumi bakegen. (Matiu 22:37-39) Ol Kristin we oli bigman oli traehad blong folem advaes ya. Oli soemaot long laef blong olgeta se samting we i moa impoten, hemia blong fren gud wetem Jehova mo lavem ol narafala.

6, 7. (1) ?Wan Kristin we i bigman i gat wanem narafala fasin bakegen? (2) ?I gud yumi wanwan yumi askem wanem?

⁶ Wan Kristin we i bigman i gat plante narafala fasin tu, i no lav nomo. (Galesia 5: 22, 23) Hem i kwaet man, i bos long tingting blong hem, mo i gat longfala tingting. Ol fasin ya oli mekem se hem i no kam kros taem i fesem hadtaem, mo tingting blong hem i no foldaon taem ol samting oli no kamtru olsem we hem i wantem. Taem hem i stadi hem wan, hem i lukaot ol tingting blong God we oli givhan long hem blong i save wanem i stret mo wanem i no stret. Nao hem i yusum tingting blong hem we i trenem folem Baebol blong mekem ol desisen we oli waes. Wan Kristin we i bigman, hem i gat tingting daon, taswe hem i bilif strong se  ol tok mo ol rod blong Jehova oli gud moa i bitim ol save blong hem wan. * Hem i wok strong blong talemaot gud nius, mo hem i mekem bes blong hem blong givhan long kongregesen blong i joen gud.

⁷ Nating se yumi mekem wok blong Jehova longtaem finis no nogat, i gud yumi wanwan yumi askem se: ‘?I gat sam samting we mi save jenisim blong mi folem fasin blong Jisas moa? ?I gat sam samting we mi save kam gud moa long hem?’

8. ?Wanem i soemaot se Jisas i save gud Baebol, mo i kasem save long ol tok blong God?

⁸ Jisas Kraes i save gud ol tok blong God mo i kasem save long olgeta. Taem hem i gat 12 yia nomo, hem i talem ol tok blong Baebol long ol tija long haos blong God. Baebol i talem se: “Olgeta evriwan we oli harem hem oli sapraes tumas long save blong hem, mo long ol ansa blong hem.” (Luk 2:46, 47) Taem hem i stap prij, hem i save gud olsem wanem blong yusum Tok blong God blong satem maot blong ol enemi blong hem.—Matiu 22:41-46.

9. (1) ?Kristin we i bigman finis i folem wanem program blong stadi Baebol? (2) ?From wanem yumi stadi Baebol?

 ⁹ Man we i wantem kam bigman olsem Kraes, i folem fasin blong Kraes mo i traehad blong kasem save moa long ol tok blong Baebol. Hem i stadi long tok blong God oltaem blong faenemaot ol dip trutok, from we hem i save se “strong kakae i blong olgeta we oli kam bigman finis.” (Hibrus 5:14) Wan Kristin we i bigman, i wantem “savegud” Baebol. (Efesas 4:13) Taswe i gud yu askem se: ‘?Mi mi stap ridim Baebol evri dei? ?Mi mi stap folem wan program blong stadi mi wan? ?Mi mi mekem famle wosip evri wik?’ Taem yumi stadi Baebol, yumi traem faenem ol tok we i soemaot tingting mo filing blong Jehova. Nao yumi save folem ol tok ya, taem yumi mekem wan desisen. Long rod ya, bambae yumi kam klosap moa long Jehova.

10. ?Wan Kristin we i bigman, i gat wanem tingting long ol advaes mo ol tok blong God?

¹⁰ I no naf blong save nomo ol tok blong Baebol. Wan Kristin we i bigman i laekem tumas ol tok mo ol advaes blong God. Hem i soemaot se hem i laekem tumas ol tok ya, taem hem i folem tingting blong Jehova, be i no prapa tingting blong hem. Mo hem i jenisim fasin blong laef blong hem, wetem ol tingting mo ol aksen blong hem. Hem i folem fasin blong Jisas mo i putum niufala fasin blong laef, we ‘i folem trutok, mo i stret gud, i tabu, i blong God nomo.’ (Ridim Efesas 4:22-24.) Yumi no mas fogetem se God i yusum tabu spirit blong lidim ol man we oli raetem Baebol. Taswe, taem wan Kristin i stadi Baebol, tabu spirit bambae i givhan long hem blong i kasem save moa, i lavem moa ol man, mo i fren moa wetem Jehova.

11. ?Ol man we oli stap raonabaot long Jisas long wol, oli olsem wanem?

¹¹ Jisas i stret gud, be ol man we oli stap raonabaot long hem long wol, oli sinman. Papa mo mama blong hem wetem ol brata mo sista blong hem, olgeta evriwan oli sinman. Ol gudfala man we oli folem Jisas, olgeta tu oli gat sam slak fasin, olsem flas tingting mo oli tingbaot olgeta fastaem. Yu traem tingbaot, long naet bifo we Jisas i ded, ol disaepol oli rao “se hu nao i hae moa long olgeta.” (Luk 22:24) Nating se i olsem, Jisas i save se i no longtaem bambae oli kam bigman, nao bambae oli joen gud long wan kongregesen nomo. Long naet ya, Jisas i prea from olgeta se bambae oli joen gud. Hem i askem long Papa blong hem long heven blong i givhan long olgeta blong oli kam wan nomo, i se: “Papa. Laef blong yu i joen gud long laef blong mi, mo laef blong mi i joen gud long laef blong yu.” Mo hem i wantem we ol disaepol blong hem ‘oli save stap wan nomo, olsem we hem mo Papa blong hem tufala i wan nomo.’—Jon 17:21, 22.

12, 13. (1) Yumi ol Kristin, ?yumi wantem gat wanem fasin? (2) ?Wan brata i mekem wanem blong kongregesen i joen gud?

¹² Wan Kristin we i bigman finis, i givhan blong mekem kongregesen i joen gud. (Ridim Efesas 4:1-6, 15, 16.) Yumi ol Kristin, yumi wantem “kam wan bodi nomo,” i min se yumi wantem joen gud mo wok wanples. Blong kam olsem, yumi mas mekem tingting blong yumi i stap daon. Nao taem yumi harem nogud long  slak fasin blong narafala, bambae yumi wok had blong mekem se kongregesen i gohed blong joen gud. Taswe, i gud yu askem se: ‘?Mi mi mekem wanem taem wan brata no sista i mestem? ?Mi mi harem olsem wanem taem narafala i spolem mi? ?Mi mi no moa wantem toktok long hem, no bambae mi traehad blong joen gud bakegen wetem hem?’ Kristin we i bigman finis i traehad blong winim problem, be i no mekem problem i kam bigwan moa.

¹³ Yu traem tingbaot wan brata we nem blong hem Uwe. Fastaem hem i harem nogud long ol slak fasin blong ol brata mo sista. Be afta, hem i stadi long laef blong Deved long Baebol mo long buk ya Insight on the Scriptures. ?From wanem hem i jusum Deved? From we Deved tu i harem nogud long samting we sam man blong God oli mekem long hem. King Sol i traem blong kilim Deved i ded, sam narafala oli wantem stonem hem, mo woman blong hem tu i laf long hem. (1 Samuel 19:9-11; 30:1-6; 2 Samuel 6:14-22) Nating se i olsem, Deved i lavem Jehova mo i trastem hem. Mo tu, Deved i sore long ol man. Uwe i luksave se hem i mas kam olsem Deved. Taem hem i stadi Baebol, hem i kasem save se hem i mas jenisim tingting blong hem long ol slak fasin blong ol brata mo sista. Hem i mas fogetem ol mastik blong olgeta, mo i mas givhan blong mekem kongregesen i joen gud. ?Yu tu yu wantem mekem olsem?

14. ?Jisas i jusum hu blong oli kam fren blong hem?

¹⁴ Jisas Kraes i fren gud wetem ol man. Ol man mo woman, ol yangfala mo olfala, mo ol pikinini tu oli no fraet blong toktok wetem Jisas. Be hem i jusum gud ol fren we hem i joen wetem olgeta. Hem i talem long ol aposol blong hem se: “Sipos yufala i stap mekem ol samting we mi mi talem long yufala, yufala i fren blong mi.” (Jon 15:14) Jisas i jusum ol man we oli stap tru long hem, oli lavem Jehova, mo oli mekem wok blong Jehova, blong oli kam fren blong hem. ?Olsem wanem? ?Yu yu jusum olgeta we oli lavem Jehova wetem fulhat blong olgeta, blong oli kam fren blong yu? ?From wanem samting ya i impoten?

15. ?From wanem i gud ol yangfala oli jusum ol fren we oli bigman olsem Kraes?

¹⁵ Plante frut oli nidim san blong oli raep gud. Long sem fasin, yumi nidim lav blong ol brata mo sista. Samting ya bambae i givhan long yumi blong yumi kam bigman olsem Kraes. ?Olsem wanem? ?Yu yu wan yangfala we yu stap traem blong jusum samting we bambae yu mekem long laef blong yu? Sipos yes, i gud yu jusum ol fren we oli mekem wok blong Jehova longtaem lelebet, mo we oli mekem kongregesen i joen gud. Ating oli kasem plante trabol long laef blong olgeta, mo oli winim sam hadtaem long wok blong Jehova. Ol brata mo sista olsem, oli save  givhan long yu blong yu jusum rod we i beswan. Sipos yu joen oltaem wetem olgeta, bambae oli givhan long yu blong yu mekem ol gudfala desisen, mo bambae yu kam bigman olsem Kraes.—Ridim Hibrus 5:14.

16. ?Ol fren blong Helga we oli olfala moa long hem, oli givhan long hem olsem wanem?

¹⁶ Helga i tingbaot las yia blong hem long skul. Olgeta long klas blong hem oli stap tokbaot samting we oli wantem mekem long fiuja. Plante oli wantem go long yunivesiti blong oli save kasem wan gudfala wok. Be Helga i storian wetem ol fren blong hem long kongregesen, we oli bigman olsem Kraes. Hem i talem se: “Plante long olgeta we oli olfala moa long mi oli givhan bigwan. Oli pulum mi blong mi joen long wok blong fultaem paenia, mo mi mekem wok ya blong 5 yia. Naoia, mi mi no sore se mi bin yusum yangtaem blong mi long wok blong Jehova, mi mi glad tumas.”

17, 18. ?Wetaem yumi save mekem bes blong yumi long wok blong Jehova?

¹⁷ Sipos yumi folem fasin blong Jisas, sloslo bambae yumi kam bigman olsem hem. Bambae yumi kam klosap moa long Jehova mo bambae yumi wantem mekem bes blong yumi long wok blong hem. Taem yumi kasem mak ya we yumi bigman olsem Kraes, hemia nao taem we yumi save mekem bes blong yumi. Jisas i talem long ol man blong hem se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.”—Matiu 5:16.

¹⁸ Yumi tokbaot finis olsem wanem wan Kristin we i bigman i save givhan long kongregesen. Mo tu, wan Kristin i soemaot se hem i bigman taem hem i naf blong haremsave samting we i stret mo samting we i no stret. ?Olsem wanem fasin ya i save givhan long yumi blong yumi mekem ol gudfala desisen? ?Olsem wanem yumi save respektem raet blong narafala blong haremsave samting we i stret mo samting we i no stret? Long nekis stadi, bambae yumi tokbaot ansa blong tufala kwestin ya.