1, 2. Met a lamot emén me emén Chón Kraist epwe achocho ngeni? Áweweei.

 IFA usun emén fin pwúpwúlú a kan kút féún irá lón market? Ese mwáál, ese kan chék fili ewe mi mékúkkún are féúmmong seni meinisin. Nge a katoléch ewe féún irá ika ese ngaw, tini ika mi minefé me ika a échún an epwele chék óóchei. A sani ewe féún irá a wesewesen tori ewe úkúkún mwúchún an máár, weween a mmach.

² Mwirin án emén silei usun Jiowa me filatá an epwe papatais, an ririéch ngeni Kot a péppéchékúleló. A achocho ngeni an epwe usun emén Chón Kraist mi ásimaw. Án emén ásimaw ese wewe ngeni an wakkatteló ierin. Nge a weneiti an ásimawóló lón pekin lúkú, weween a péchékkúleló an pacheéch ngeni Jiowa. Ewe aposel Paulus a mochen ekkewe Chón Kraist lón Efisos repwe ásimawóló. A peseer ar repwe tipeeúfengen lón ar lúkú me akkalapaló ar silei usun Jesus pwe repwe ‘eäni tipen mwän lon manauer, pwe repwe tori ükükün ewe unusöchün Kraist.’​—Ef. 4:13.

3. Ifa usun chón ewe mwichefelin Efisos ra léllé ngeni néún Jiowa kewe aramas lón ach ei fansoun?

 ³ A fen wor ewe mwichefelin Efisos fite fite ier lupwen Paulus a mak taropwe ngeniir. Chómmóng chón ena mwichefel iir Chón Kraist mi ásimaw. Nge mi chúen lamot án ekkóch chón ena mwichefel repwe apéchékkúlaló ar ririéch ngeni Jiowa. Pwal ina chék usun ikenái, chómmóng pwiich kewe ra fen angang ngeni Jiowa ren fite fite ier me ra fen ásimawóló. Iwe nge, ekkóch lón ekkewe mwichefel resaamwo kon lien ásimaw. Áwewe chék, iteiten ier fite ngeréú ra kan papatais, ina minne a chúen lamot ar repwe ásimawóló. Nge ifa usun en?​—Kol. 2:6, 7.

4, 5. Ifa usun ekkewe Chón Kraist mi ásimaw ra sókkofesen, nge met iir meinisin ra lélléppék wóón? (Ppii ewe sasing lepoputáán ei lesen.)

⁴ Lupwen ka katol ekkewe féún irá mi mmach lón market, ka tongeni kúna pwe iir meinisin rese wesewesen lélléfengen. Iwe nge, a wor ekkóch mettóch ra lélléppék wóón mi esissillatá pwe ra mmach. Pwal ina chék usun ren ekkewe Chón Kraist mi ásimaw. Rese lélléppék wóón mettóch meinisin. Iir ra feito seni sókkópaten fénú me a sókkofesen nónnómur. Mi sókkofesen ieriir, met ra sani, me met rese sani. Nge, meinisin Chón Kraist mi ásimaw ra eáni ekkóch napanap mi esissillatá pwe iir ra ásimaw. Ikkefa ekkóch ekkena napanap?

⁵ Emén Chón Kraist mi ásimaw a áppirú Jesus me “tapwela mürin lon ipwan.” (1 Pet. 2:21) Jesus a erá pwe a fókkun lamot án emén epwe tongei Jiowa ren unusen letipan, manawan, me ekiekin, me pwal tongei chón órun usun chék pwisin i. (Mat. 22:37-39) Emén Chón Kraist mi ásimaw a achocho le álleasochisi ena pesepes. Napanapen an manaweni manawan a pwáraatá pwe an ririéch ngeni Jiowa me an tong mi alóllóól ngeni aramas ra fókkun lamot me ren lap seni meinisin.

6, 7. (a) Ikkefa pwal ekkóch napanap mi esissillatá emén Chón Kraist mi ásimaw? (b) Met sipwe pwisin eisinikich?

⁶ Tong, ina chék eú me lein ekkewe chómmóng napanap emén Chón Kraist mi ásimaw a pwáraatá. (Kal. 5:22, 23) A pwal pwáraatá tipetekison, mosonottam, me tipepwora are nemeniéchú pwisin mochenin. Ekkeei napanap ra tongeni álisi i le likiitú fán weires nge esap song, me likiitú ngeni an lichippúng nge esap ápilúkúlúkúngaw. Lón án emén Chón Kraist mi ásimaw pwisin káéén Paipel, i a kúkkútta ekkewe kapasen emmwen lón Paipel epwe álisi le silei minne mi pwúng me mwáál. Mwirin, lupwen a áeá mwelien letipan mi fen káit me ren Paipel, i a tongeni féri kefil mi múrinné. Emén Chón Kraist mi ásimaw a tipetekison, ina popun a lúkú pwe án Jiowa emmwen me allúk ra múrinné fansoun meinisin lap seni pwisin an ekiek. * A pwal afalafala ewe kapas allim fán tinikken me achocho úkúkún an tufich le álisatá ewe tipeeú lón mwichefel.

⁷ Ese lifilifil ifa úkúkún ttamen ach sia fen angang ngeni Jiowa, nge kich meinisin sipwe pwisin eisinikich: ‘Mi wor ekkóch ekkesiwil ua tongeni féri pwe upwe áppirúfichi Jesus? Ifa usun upwe ámúrinnééló napanapei kewe?’

8. Ifa úkúkún án Jesus silei me weweiti ewe Paipel?

⁸ Jesus Kraist a silefichi me weweéchúti ewe Kapasen Kot. Pwal mwo lupwen a chék 12 ierin a néúnéú ewe Paipel atun a fós ngeni ekkewe sense lón ewe imwenfel. “Ir meinisin mi rongorong ngeni ewe ät ra mwar ren an weweöch me an silelap le pölüeni ekewe kapas ais.” (Luk. 2:46, 47) Mwirin, lupwen a afalafal, a lipwákéch le néúnéú án Kot we Kapas le pélúwenéchú met ekkewe chón oputa ra apasa.​—Mat. 22:41-46.

9. (a) Ifa ewe sókkun kókkótun káéén Paipel emén Chón Kraist mi ásimaw a eáni? (b) Pwata sia káé ewe Paipel?

⁹ Emén Chón Kraist mi mochen ásimawóló a áppirú án Jesus leenien áppirú me a mochen weweiti ewe Kapasen Kot úkúkún an tongeni. A kúttafichi iteitan ekkewe pwóróus mi enlet mi alóllóól lón Paipel pokiten a silei pwe “mongo pochokkul a och ngeni aramas asimau.” (Ipru 5:14, Testament Mi Fö) Emén Chón Kraist mi ásimaw a mochen “sileöchü” ekkewe pwóróus mi enlet lón ewe Paipel. (Ef. 4:13) Ina minne, kopwe pwisin eisinuk: ‘Ua kan álleani ewe Paipel iteiten rán? A fen wor ai kókkótun pwisin káé ewe Paipel? Ua kan féri ai famili fel iteiten wiik?’ Lupwen ka káé ewe Paipel, kútta ekkewe kapasen emmwen lón epwe álisuk le silei ekiekin me meefien Jiowa. Mwirin, áeá ekkena kapasen emmwen lupwen ka féri kefil. Ina met epwe álisuk le akkarap ngeni Jiowa.

10. Met meefien emén Chón Kraist mi ásimaw usun án Kot kewe kapasen fén me emmwen?

¹⁰ Mi lamot emén Chón Kraist mi ásimaw esap chék silei met ewe Paipel a  apasa, nge epwe pwal aúcheani án Kot kewe kapasen fén me emmwen. Mwirin a pwáraatá ena ren an mochen féri letipen Jiowa nge esap pwisin letipan. A mwo nge féri ekkesiwil lón manawan, féfférún, me minne a eáni ekiek. Áwewe chék, a áppirú Jesus me ámááraatá ewe napanap mi fé ewe “mi för lon lapalapen Kot o pwäla lon eu manau mi enletin pwüng me pin.” (Álleani Efisos 4:22-24.) A mmen lamot ach sipwe chechchemeni pwe Kot a áeá an we manaman mi fel le emmweni ekkewe soumakken Paipel. Ina minne, lupwen emén Chón Kraist a káé ewe Paipel, án Kot we manaman mi fel a álisi an epwe ásimawóló lón an tong, an sile, me péchékkúleló an ririéch ngeni Jiowa.

11. Lupwen Jesus a nóm wóón fénúfan, met a kúna lón manawan?

¹¹ Jesus emén mwán mi unuséch. Iwe nge, lupwen a nóm wóón fénúfan a nóm lein aramas rese unuséch. Seman kewe me inan, pwiin kewe me fefinan, iir meinisin rese unuséch. Pwal mwo nge néún Jesus kewe chón káé, ekkewe i a kon chiechiéch ngeniir, fán ekkóch ra pwáraatá pwe ra lamalamtekia me ekieki chék pwisin iir. Áwewe chék, lón ewe pwinin me mwen án Jesus máló, néún kewe chón káé ra áninifengen ika “iö leir aramas repwe ekieki pwe a lap seniir meinisin.” (Luk. 22:24) Inaamwo ika ra kan mwáálliló lón ar ekiek nge Jesus a silei pwe ekiseló repwe ásimawóló me fératá eú mwichefel mi tipeeúfengen. Lón pwal chék ena pwinin Jesus a iótek fán ásengesiir pwe repwe tipeeúfengen. A tingorei Seman we lón láng pwe iir meinisin repwe eú chék, me apasa: “Usun chök en ka nonom loi, nge ngang üa nonom lomw.” A pwal erá: “Pwe repwe eu chök usun kich sa eu.”​—Joh. 17:21, 22.

12, 13. (a) Met kich Chón Kraist sia achocho ngeni? (b) Ifa usun emén pwiich a káé an epwe álisatá tipeeúin ewe mwichefel?

¹² Emén Chón Kraist mi ásimaw a álisatá tipeeúin ewe mwichefel. (Álleani Efisos 4:1-6, 15, 16.) Kich Chón Kraist, sia achocho pwe kich ‘meinisin sipwe masfengen,’ weween ousipwe angangfengen fán tipeeú. Ren an epwe wor ena sókkun tipeeúfengen, mi lamot emén Chón Kraist epwe tipetekison. Epwe chék achocho le álisatá péchékkúlen ewe tipeeú lón mwichefel inaamwo ika a nóm lein ekkewe aramas rese unuséch mi tongeni eletipengawa i. Ina minne, pwisin eisinuk: ‘Met ua kan féri lupwen emén chienei Chón Kraist a mwáálliló? Met meefiei lupwen emén a ámeteki letipei? Ua kan aménúngaw seni me use chúen fós ngeni? Are ua achocho pwe aupwe kinamwefengen sefál?’ Emén Chón Kraist mi ásimaw a mochen pwákini osukosuk nge esap fen chón awora osukosuk.

¹³ Nengeni pwóróusen emén pwiich itan Uwe. Me lóóm, a kan song ren mwáállin pwiin kewe chón lúkú. Iwe, a filatá an epwe néúnéú ewe Paipel me ewe puk Insight on the Scriptures le káé pwóróusen manawen Tafit. Pwata a filatá Tafit? Pokiten Tafit a pwal kúna osukosuk seni ekkóch néún Kot aramas. Áwewe chék, King Saul a sótun nieló Tafit, ekkóch ekkewe aramas ra mochen monei faú ngeni, me pwal mwo pwisin pwúlúwan we a takiri i. (1 Sam. 19:9-11; 30:1-6; 2 Sam. 6:14-22) Nge Tafit a chúen tongei me lúkúlúk wóón Jiowa inaamwo ika a ina usun féfférún aramas ngeni. Tafit a pwal pwáraatá úméúméch. Uwe a meefi pwe a pwal lamot an epwe usun chék Tafit. Seni an káé ewe Paipel,  a kúna lamoten an epwe féri ekkesiwil ren met a kan eáni memmeef usun mwáállin pwiin kewe Chón Kraist. A lamot epwe achocho le ménúkaaló mwáállir kewe me álisatá tipeeúin ewe mwichefel. Ina met ka pwal achocho ngeni?

14. Ifa usun Jesus a filatá chiechian kewe?

¹⁴ Jesus Kraist a chiechiéch ngeni aramas. Mwán, fefin, kúkkún, chinnap, pwal mwo nge semirit ra meefi kinamwe le nóm ren Jesus. Nge Jesus a filiéchú ié kewe epwe kon chiechiéch ngeni. A ereni néún kewe aposel: “Ämi chiechiei kana, are oupwe apwönüetä mine üa allük ngenikemi.” (Joh. 15:14) Jesus a filatá chiechian kewe me lein ekkewe chón tapweló mwirin mi tuppwél, chókkewe mi tongei Jiowa me angang ngeni I. Ka filatá pwe chiechiom ekkewe mi tongei Jiowa seni unusen letiper? Pwata a lamot ena?

15. Ifa usun ekkewe sáráfé ra tongeni feiéch seni ar chiechiéch ngeni ekkewe Chón Kraist mi ásimaw?

¹⁵ Lap ngeni féún irá ra kan mmachéchúló ren pwichipwichin ewe akkar. Pwal ina chék usun, ewe tong seni pwiich kewe a tongeni álisuk le wiliti emén Chón Kraist mi ásimaw. En emén sáráfé mi ekkekieki ika met kopwe féri lón manawom? Ika ina, kopwe tipachem ika ka filatá le chiechi ngeni chókkewe ra fen angang ngeni Jiowa ren fansoun langattam me ra álisatá tipeeúfengen lón ewe mwichefel. Eli ra fen kúna osukosuk lón manawer me ra fen likiitú fán weires lón ar angang ngeni Jiowa. Ra tongeni álisuk óm kopwe filatá le eáni ewe sókkun manaw mi múrinné seni meinisin. Lupwen ka chiechiéch ngeniir, ra tongeni álisuk óm kopwe féri kefil mi múrinné me ásimawóló usun emén Chón Kraist.​—Álleani Ipru 5:14.

16. Ifa usun ekkewe mi mwukóló lón ewe mwichefel ra álisi emén pwiich nengngin lesáráféén?

¹⁶ Helga a chechchemeni pwe lupwen epwele sochungio lap ngeni chienan kewe chón sukul ra fós usun met ra mochen achocho ngeni lón manawer. Chómmóng leir ra mochen fiti college pwe repwe tongeni eáni eú sókkun angang mi múrinné. Iwe nge, Helga a fós ngeni chiechian kewe mi ásimaw lón mwichefel. Neminna a erá: “Chómmóng leir, mi watte ieriir seniei, me ra fókkun álisiei. Ra peseiei ai upwe fiti ewe angangen afalafal full-time. Iwe, ua fiti ewe angangen pioneer lón úkúkún nimu ier. Iei, mwirin fitu ier, ua pwapwa pwe ua akkomwa ai angang ngeni Jiowa atun lesáráfééi. Use fókkun niamamesini minne ua féri.”

17, 18. Ifa usun sipwe fang ngeni Jiowa minne mi múrinné seni meinisin?

¹⁷ Lupwen sia áppirú Jesus, sipwe usun emén Chón Kraist mi ásimawóló. Sipwe arap ngeni Jiowa me epwe lapóló ach mochen angang ngeni. Lupwen emén a fen ásimaw, i a tongeni fang ngeni Jiowa minne mi múrinné seni meinisin. Jesus a pesei néún kewe chón káé: “Ämi saram epwe tittin mwen ekewe aramas, pwe repwe küna ämi föför mürina o mwareiti Sememi lon läng.”​—Mat. 5:16.

¹⁸ Sia fen káé ifa usun emén Chón Kraist mi ásimaw a fókkun tongeni álisi ewe mwichefel. Emén Chón Kraist a pwal pwáraatá pwe i mi ásimaw ren napanapen an áeá mwelien letipan. Ifa usun mwelien letipach a tongeni álisikich le féri ekkewe kefil mi múrinné? Me ifa usun sia tongeni súféliti mwelien letipen ekkewe ekkóch? Ekkena kapas eis repwe pélú me lón en lesen mwirin ei.