1, 2. Na cava mera saga na lotu vaKarisito kece? Vakatauvatana.

KAYA mada ke lai voli vuanikau ena makete e dua na radinivale. Ena sega ni digia na vuanikau e levu duadua se isau lailai. Ena qara ga na kena e dreu, e kana vinaka, e boi kamica qai bulabula ina yago. Io, ena volia na vuanikau sa matua vinaka.

² Ni sa yaco e dua me yalayala qai papitaiso, ena vinakati me toso tiko ga vakayalo. Ena saga me lotu vaKarisito matua. Qo e sega ni matua vakayago, ia na matua vakayalo. E vola mada ga na yapositolo o Paula ni bibi mera tubu vakayalo na lotu vaKarisito mai Efeso. E uqeti ira mera ‘duavata kece ena vakabauta kei na nodra kila dina na Luve ni Kalou, mera tamatabula, mera yacova taucoko sara na ivakarau ni bula i Karisito.’—Efeso 4:13.

3. Eda rawa ni vakatauvatana vakacava na keda ituvaki kei na ivavakoso e Efeso?

³ Ni vola o Paula na nona ivola, sa tauyavu makawa na ivavakoso o Efeso. Levu na tisaipeli ena ivavakoso qori  era sa matua vakayalo. Ia e tiko eso mera sasaga mera matua. E tautauvata tale ga qori kei keda nikua. Levu na tacida sa dede nodra qaravi Jiova voli mai, era sa lotu vaKarisito matua. Ia e tiko eso era sega ni matua. Kena ivakaraitaki, vica vata na udolu era papitaiso e veiyabaki, ena vinakati vei ira eso qori mera matua vakayalo. Vakacava o iko?—Kolo. 2:6, 7.

4, 5. Era duidui vakacava na lotu vaKarisito matua? Cava era tautauvata kina? (Raica na imatai ni iyaloyalo.)

⁴ Ni o vakaraica tiko na vuanikau ena makete, o na raica nira duidui. Ia e tiko na ka era tautauvata kina e dusia nira sa dreu. E va tale ga qori o ira na lotu vaKarisito matua, era cavutu mai na duidui vanua, duidui isususu, bula vakayago, yabaki ni bula, kei na kila. Ena rairai duidui na nodra itovo se vakarau vakavanua. Ia o ira na matua vakayalo e kilai ena nodra itovo nira matua. Era cakava vakacava qori?

⁵ Na lotu vaKarisito matua ena vakatotomuri Jisu qai “muria voleka na weniyavana.” (1 Pita 2:21) Na cava e vakabibitaka o Jisu? Meda lomani Jiova mai vu ni lomada, noda vinaka taucoko, kei na noda vakasama da qai lomani ira na kainoda me vaka noda lomani keda. (Maciu 22:37-39) Na lotu vaKarisito matua ena saga tiko ga me muria na ivakasala qori. Ena laurai ena nona bula ni bibi duadua vua nona veiwekani kei Jiova, e vakuai koya tale ga ena vukudra na so tale.

6, 7. (a) Na itovo cava era kilai kina na lotu vaKarisito matua? (b) Na cava meda taroga?

⁶ Ena vinakati me tiko vua na lotu vaKarisito matua na loloma, ni qori na itovo e okati ena vua ni yalo tabu. (Kala. 5:22, 23) E bibi tale ga me yalomatua, lewai koya vinaka qai vosovoso. Na itovo qori ena vukei koya me kua ni cudru ni yaco na ituvaki rarawataki, ena vosota ga qai sega ni yalolailai. Ena nona vuli vakataki koya, ena saga me dikeva na ivakavuvuli vakaivolatabu me vakaduiduitaka kina na ka e dodonu mai na ka e cala. Ena laurai nona matua vakayalo ena ka e vakatulewataka. Kena ivakaraitaki, ena muria na nona lewaeloma e vakavulici vakaivolatabu. Ena laurai vua na yalomalumalumu, qori nona vakabauta ni vinaka duadua na sala kei na ivakatagedegede i Jiova. * E gumatua ni vunautaka na itukutuku vinaka qai tokona na duavata ni ivavakoso.

⁷ Se mani vakacava na dede ni noda qaravi Jiova, e bibi meda taroga, ‘Na cava meu cakava meu vakatotomuri Jisu voleka kina? E tiko eso na ka meu vakavinakataka?’

8. E vakaraitaka vakacava o Jisu ni kila vinaka na iVolatabu?

⁸ E kila vinaka o Jisu Karisito na Vosa ni Kalou. Ni se yabaki 12, e veivosakitaka na iVolatabu kei ira  na ivakavuvuli ena valenisoro. “Era druka tu ga na rogoci koya ena ka e kila kei na nona isaunitaro.” (Luke 2:46, 47) Ni cakacaka vakavunau tiko ena dua na gauna, a vagalui ira na dauveitusaqati ni vakamacalataka na Vosa ni Kalou.—Maciu 22:41-46.

9. (a) Me vakacava na ivakarau ni nona vuli na lotu vaKarisito matua? (b) Na cava na inaki ni noda vulica na iVolatabu?

⁹ Me salavata kei na masu a vakavulica o Jisu, ke vinakata e dua me matua vakayalo ena sega ni vovodea tu ga nona kila na iVolatabu. Ena wasoma nona vakekeli vakatitobu ena lewe ni iVolatabu, ni kila ni “kakana dina e rauti ira na matua.” (Iper. 5:14) Kena ibalebale, ena saga na lotu vaKarisito matua me “kila dina na Luve ni Kalou.” (Efeso 4:13) Vakacava o dau wilika e veisiga na iVolatabu? E tiko nomu ituvatuva ni vuli vakataki iko? O dau sokalou vakavuvale e veimacawa? Ni o vulica na Vosa ni Kalou, vaqara na ivakavuvuli vakaivolatabu ena vakamatatataka vei iko na rai i Jiova kei na ivakarau ni lomana. Oti mo muria sara na ivakavuvuli vakaivolatabu ni o yavutaka kina nomu vakatulewa. Ni o cakava qori o na volekati Jiova.

10. Me ikuri ni nona kilaka na lotu vaKarisito matua, na cava tale ena cakava?

¹⁰ Na lotu vaKarisito matua e kila ni sega ni bibi ga na kilaka. Me ikuri ni kilaka, vakacava na levu ni nona taleitaka na ka e kila me baleta na Kalou kei na nona ivakavuvuli? Ena kilai qori ena nona vakaliuca ena nona bula na ka e salavata kei  na loma ni Kalou, sega ni lomana. Sa na “biuta tani” tale ga na nona itovo kei na ivalavala makawa. Ena tokara na itovo vaKarisito, “e buli me vaka na loma ni Kalou e vauci kina na yalodina kei na yalododonu.” (Wilika Efeso 4:22-24.) E veidusimaki na yalo tabu ni Kalou ena volai ni iVolatabu. Ni vakatitobutaka e dua na lotu vaKarisito nona kila kei na nona taleitaka na ivakatagedegede vakaivolatabu, sa na dolava tiko na lomana kei na nona vakasama me uqeti ena yalo tabu. Qori ena tubu kina vakayalo.

11. Na cava e vakila o Jisu ni bula vata kei ira na wekana kei ratou na nona tisaipeli?

¹¹ Ena nona bula uasivi e vuravura o Jisu, a maliwai ira na kawatamata sega ni uasivi. Erau susugi koya na nona itubutubu sega ni uasivi, vica tale ga na yabaki nona vakaitikotiko kei ira na wekana era sega ni uasivi. Ratou vakaraitaka mada ga nona imuri voleka na itovo e takalevu tu ena gauna ya, na dokadoka kei na nodratou dau nanumi ratou ga. Kena ivakaraitaki, ena yakavi ni bera nona vakamatei, “eratou veibataka  . . se o cei vei ratou e levu duadua.” (Luke 22:24) Ia e nuidei o Jisu ni ratou na tubu me ratou matua vakayalo nona imuri, ratou na tauyavutaka e dua na ivavakoso e laurai kina na duavata. Ena yakavi tiko ga qori, a masulaka o Jisu me ratou veilomani na yapositolo, me ratou duavata tale ga. E kerei Tamana vakalomalagi: “Mera duavata kece kina, me vaka ga na nomuni duavata kei au kei na noqu duavata kei kemuni Tamaqu, mera duavata tale ga kei kedaru, . . . mera duavata me vaka nodaru duavata.”—Joni 17:21, 22.

12, 13. (a) E vakamacalataki vakacava ena Efeso 4:15, 16 ni bibi meda uqeta na duavata ena ivavakoso? (b) Na cava e cakava e dua na tacida me uqeta na duavata?

¹² Na lotu vaKarisito matua ena uqeta na duavata ena ivavakoso. (Wilika Efeso 4:1-6, 15, 16.) Eda na saga meda “sema vata” na dauveiqaravi ni Kalou da qai duavata. Me rawati qori, e tukuni ena iVolatabu ni vinakati na yalomalumalumu. Ke mani tiko nodra malumalumu na tacida, ena vakaraitaka tiko ga na lotu vaKarisito matua na yalomalumalumu ni uqeta na duavata. Na cava o na cakava ni cala e dua na tacimu ena ivavakoso? Se vakacudrui iko? Vakacava o na galuvi koya? Se o na saga mo drau veiyaloni? Na lotu vaKarisito matua ena saga na veiyaloni, sega ni duiyaloyalo.

¹³ Kena ivakaraitaki o Uwe. E dau vakararawataki koya na nodra malumalumu na mataveitacini. Sa qai nanuma me vakayagataka na iVolatabu kei na Insight on the Scriptures me vulica kina na bula i Tevita. Cava me cakava kina qori? E tukuna o Uwe: “A raica o Tevita na ka ca era cakava na tacina vakayalo. Kena ivakaraitaki, a saga o Tui Saula me vakamatei koya, era via vakaviriki koya eso, a vakalialiai koya mada ga na watina. (1 Sam. 19:9-11; 30:1-6; 2 Sam. 6:14-22) Ia a sega ni vakalaiva na ituvaki qori o Tevita me luluqa kina nona lomani Jiova. E turaga dau yalololoma  o Tevita, qori na ka e vinakati meu bucina. Na ka au vulica e veisautaka na noqu rai me baleta na nodra malumalumu na taciqu. Sa sega niu katona tale tiko na nodra cala. Au saga na duavata ena ivavakoso.” Vakacava e nomu isausau tale ga mo uqeta na duavata ena ivavakoso?

14. O cei e digitaka o Jisu me nona itokani?

¹⁴ E kauaitaki ira na tamata kece o Jisu Karisito. Era taleitaka mera veimaliwai kei koya o ira na tagane, yalewa, qase, kei na gone. E digia vinaka o Jisu na nona itokani voleka. E tukuna vei ira na nona yapositolo yalodina: “Dou noqu itokani ga ke dou cakava na ka au vakarota vei kemudou.” (Joni 15:14) O Jisu e digitaki ira na yalodina ni muri koya ra qai qaravi Jiova mai vu ni lomadra. Vakacava o na digitaka na itokani era lomani Jiova dina? Cava e bibi kina qori?

15. Ena yaga vakacava vei ira na itabagone nodra vakailala kei ira na lotu vaKarisito matua?

¹⁵ Levu na vuanikau era dreu ni cilavi ira na katakata ni siga. Na noda veilomani vakamataveitacini e vaka na katakata ni siga ni vukei keda meda matua vakayalo. Ke o itabagone, de dua o vakasamataka tiko na ka mo cakava. Ena ka vakayalomatua mo vakailala kei ira na tacimu vakayalo sa dede nodra qaravi Jiova, ra qai uqeta na duavata ena ivavakoso! Sa vica vata na yabaki nodra sotava voli mai eso na ituvaki dredre, se ituvaki e vakadredretaka nodra qaravi Jiova. Era na vukei iko mo digia na bula vinaka duadua. Ni o vakailala kei ira, era na vukei iko mo vakatulewa vakayalomatua, o na matua tale ga vakayalo.—Wilika Iperiu 5:14.

16. E yaga vakacava vua e dua na itabagone nodra veivuke na lotu vaKarisito matua?

¹⁶ A nanuma lesu o Helga na iotioti ni yabaki ni nona vuli. Era veitalanoataka tiko na gonevuli na ka era na cakava ni oti nodra vuli. Levu era via vuli ena univesiti, nira na rawata kina e dua na cakacaka vinaka. E veivosakitaka sara o Helga kei ira na itokani matua ena ivavakoso na kena ituvaki. E kaya: “Levu era qase vei au, era vukei au sara vakalevu. Era uqeti au meu digia na cakacaka vakaitalatala vakatabakidua. Au mani painia me lima na yabaki. Sa oti qo e vica na yabaki, au marautaka niu vakayagataka noqu bula vakaitabagone meu qaravi Jiova. Au sega vakadua ni veivutunitaka.”

17, 18. E yaga vakacava ena noda qaravi Jiova na matua vakayalo?

¹⁷ Eda na matua vakayalo nida vakatotomuri Jisu. Eda na veivolekati kei Jiova, eda na via qaravi koya ena kena levu eda rawata. Ni dua e matua vakayalo, ena qaravi Jiova vinaka. E uqeti ira na nona imuri o Jisu: “Me serau tale ga na nomuni rarama e matadra na tamata, mera raica na nomuni cakacaka vinaka, mera vakalagilagia kina na Tamamuni mai lomalagi.”—Maciu 5:16.

¹⁸ Eda sa vulica mai ni yaga vakalevu ena ivavakoso o ira na lotu vaKarisito matua. Ena laurai tale ga nona matua vakayalo e dua ena sala e vakayagataka kina nona lewaeloma soli vakalou. E vukei keda vakacava na noda lewaeloma meda vakatulewa vakayalomatua? Eda na doka vakacava na nodra lewaeloma na tacida vakayalo? Qori ena veivosakitaki ena ulutaga tarava.