1, 2. ¿Mbaʼépa jahupytyse entéro jaservíva Jehovápe? Emoĩ peteĩ ehémplo.

JAJOGUÁTARAMO peteĩ frúta, ¿mbaʼérehepa ñamaña? Katuete ningo ñaneinteresa pe présio. Péro ndahaʼéi upévante la iñimportantevéva, síno jahecha oimépa ipyahu, isáno ha hiʼaju porã.

² Ñande jajevautisa rire, jasegi ñaaprende Jehovágui, ñañemoag̃uive hese ha ñañehaʼã jahechauka umi kualida kristiána. ¿Maʼerãpa? Ikatu hag̃uáicha oiko ñandehegui kristiáno madúro imbaretéva espirituálmente. Apóstol Pablo heʼi vaʼekue umi kristiáno Efesoguápe oĩ hag̃ua unído ha osegi hag̃ua oaprende Jesúsgui. Péicha oikóta chuguikuéra “peteĩ kuimbaʼe okakuaapámava ha ohupytýva Crístope” (Efes. 4:13).

3. ¿Mbaʼépepa ojojogua kongregasión de Éfeso ha heta kongregasión ñane tiempopegua?

³ Pablo oskrivírõ guare kongregasión de Éfesope, oĩma vaʼekue heta kristiáno ijerovia mbaretéva ha heta áñorema  oservíva Jehovápe. Péro ijapytepekuéra oĩ avei kristiáno tekotevẽva omadurave espirituálmente. Upeichaite avei oiko ñane tiémpope. Heta kongregasiónpe oĩ ermáno ha ermána heta áñorema oservíva Jehovápe. Péro oĩ avei kristiáno tekotevẽva omadurave espirituálmente, umíva apytépe umi ermáno ojevautisa ramóva. ¿Ha nde? ¿Ofaltápa avei remadurave en sentído espirituál? (Col. 2:6, 7.)

4, 5. a) ¿Ojojoguápa umi kristiáno madúro opa mbaʼépe? b) ¿Mbaʼe mbaʼépa ojapo umi kristiáno madúro? (Ehecha pe taʼanga oĩva iñepyrũme.)

⁴ Umi frúta hiʼajúramo jepe ndahaʼéi peteĩchapa. Ikatu oĩ michĩvéva ha oĩ avei tuichavéva. Péro ñamañávo ipíntare térã ikolór rehe, japilla hiʼajúmapa. Umi kristiáno madúro péicha avei. Por ehémplo, ndahaʼéi ojoaveguapa, ndorekói la mísma kultúra, ha naentéroipe ogusta la mísma kósa. Péro umi mbaʼe heʼi ha ojapóvare, ojekuaa hesekuéra imaduroha espirituálmente.

⁵ Por ehémplo, umi kristiáno madúro ‘oguata hekoitépe [Cristo] pyporére’ (1 Ped. 2:21). Jesús heʼi vaʼekue jahayhu vaʼerãha Jehovápe ñande pyʼaite guive, ñane álma rugua guive, ha opa ñane arandukue reheve. Avei heʼi vaʼekue jahayhu vaʼerãha ñande rapichápe ñande jajehayhuháicha (Mat. 22:37-39). Peteĩ kristiáno madúro oñehaʼãmbaite ojapo koʼã mbaʼe. Haʼe ovaloraiterei iñamista Jehovándi ha otrata porã hapichakuérape.

6, 7. a) ¿Mbaʼe kualidápa ohechauka avei umi kristiáno madúro? b) ¿Mbaʼépa tekotevẽ entéro ñañeporandu?

⁶ Jahechaháicha, umi kristiáno madúro oporohayhu. Péro ¿mbaʼépa ojapo avei hikuái? (Gál. 5:22, 23.) Umichagua ermáno ningo itrankílo, ipasiénsia ha igustoiterei ñaime hendivekuéra. Avei haʼekuéra oñekontrolakuaa ohasa jave umi situasión ijetuʼúvare. Ha oĩramo odesepsionáva chupekuéra, oaguanta ha ndoperdéi la esperánsa. Ostudia jave la Biblia katu oheka umi konsého oipytyvõtava chupekuéra oikuaa hag̃ua mbaʼépa oĩ porã ha mbaʼépa oĩ vai. Upéi oipuru pe oaprendéva odesidi porã hag̃ua. Haʼekuéra ningo iñumílde ha orrekonose siémpre iporãveha jasegi umi konsého Jehová omeʼẽva ha jarrespeta umi léi haʼe omoĩva. * Avei opredika hikuái kyreʼỹme ha ojapo opa ikatúva oĩ hag̃ua unida kongregasiónpe.

⁷ Ikatu ningo are guivéma jaservi jaikóvo Jehovápe, térã ramónte. Upéicharõ jepe, iporã enterovéva ñañeporandu: “¿Mbaʼépepa tekotevẽ amehora ikatu hag̃uáicha ajoguave Jesúspe?”. Ko artíkulope jahecháta mbohapy mbaʼe ñanepytyvõtava jasegi porãve hag̃ua Cristo ehémplo ha péicha ñamadurave espirituálmente.

8. ¿Mbaʼérepa ikatu jaʼe Jesús oikuaa ha ontende porã hague Ñandejára Ñeʼẽ?

⁸ Jesucristo oikuaa ha ontende porã  Ñandejára Ñeʼẽ. Orekórõ guare 12 áñonte, haʼe opyta vaʼekue pe témplope ha oñemongeta umi mboʼehárandi Ñandejára Ñeʼẽre. “Ha opavave ohendúva chupe ohecharamo mbaʼeichaitépa ombohovaikuaa ha ontende heta mbaʼe.” (Luc. 2:46, 47.) Tiémpo rire, opredikárõ guare oikóvo ohechauka oipurukuaaitereiha la Biblia. Umi ndaijaʼéiva hese jepe ndaikatúi heʼi mbaʼeve (Mat. 22:41-46).

9. a) ¿Mbaʼépa ñanepytyvõta oiko hag̃ua ñandehegui kristiáno madúro? b) ¿Mbaʼépa ñañehaʼã vaʼerã ñantende jastudia jave la Biblia?

⁹ Jaipotáramo oiko ñandehegui kristiáno madúro, jajapo vaʼerã Jesús ojapo haguéicha. Haʼe ningo noñekontentái vaʼekue oikuaáma haguére umi enseñánsa iñimportantevéva oĩva Ñandejára Ñeʼẽme. Ñande avei tekotevẽ “jaikuaa porã” Ñandejára Ñeʼẽ. Ñahesaʼỹijo porã vaʼerã la Biblia, pórke jaikuaa ‘umi okakuaapámava hoʼuha tembiʼu hypyʼũva’ (Efes. 4:13, Heb. 5:14). Upearã ñaprograma vaʼerã mbaʼépa jastudiáta. Por ehémplo, jalee vaʼerã la Biblia káda día, ha káda semána jajapo vaʼerã ñande estúdio personál ha ñande estúdio de família. Jastudia jave la Biblia, ñañehaʼã vaʼerã ñantende mbaʼépa Jehová opensa ha mbaʼépa oñandu, ha upéi jareko enkuénta koʼã mbaʼe jadesidíta jave. Jajapóramo upéicha, ñane amista Jehová ndive imbaretevéta.

10. ¿Mbaʼéichapa umi kristiáno madúro ohechauka omombaʼeha umi konsého Jehová omeʼẽva?

¹⁰ Peteĩ kristiáno madúro ndahaʼéi  oikuaánteva mbaʼépa heʼi la Biblia, síno omombaʼe umi konsého Jehová omeʼẽva. ¿Mbaʼéichapa ohechauka ojapoha upéva? Oñehaʼãvo omotenonde Ñandejára oipotáva, tekotevẽtarõ jepe okambia oiko lája ha opensa lája. Avei osegi Jesús ehémplo, ‘ha oñemonde pe teko pyahúgui ojejapo vaʼekue Ñandejára oipotaháicha ha oñemopyendáva tekojoja ha jerovia teetépe’ (elee Efesios 4:22-24). Ñanemanduʼákena Ñandejára ogia hague ijespíritu sánto rupive umi kuimbaʼépe oskrivi hag̃ua la Biblia. Upévare peteĩ kristiáno ostudia jave la Biblia, pe espíritu sánto oipytyvõ chupe ikatu hag̃uáicha iñaranduve, oporohayhuve ha oñemoag̃uive Jehováre.

11. ¿Mbaʼeichagua persóna apytépepa oiko vaʼekue Jesús oĩrõ guare ko yvy ape ári?

¹¹ Jesús oikórõ guare ko yvy ape ári, haʼe vaʼekue peteĩ kuimbaʼe perfékto. Péro isy ha itúva, iñermanokuéra ha entéro umi ótra persóna iñimperfékto. Hiʼarive sapyʼánte idisipulokuéra oñembotuicha ha opensa ijehénte. Por ehémplo, pe pyhare haʼe omano mboyve, haʼekuéra oñepyrũ ojodiskuti oiporavoségui mávapa iñimportanteve ijapytepekuéra (Luc. 22:24). Upéicharõ jepe, Jesús okonfia ág̃ante haʼekuéra omadurataha ha oformataha peteĩ kongregasión oĩva peteĩ ñeʼẽme. Upévare, upe pyharépe oñemboʼe idisipulokuérare, ikatu hag̃uáicha oĩ unído haʼe ha Itúva oĩháicha unído. Heʼi voi Jehovápe: “[Toiko] chuguikuéra peteĩnte, ñande peteĩnteháicha avei” (Juan 17:21, 22).

12, 13. a) ¿Mbaʼépa ñañehaʼã vaʼerã jajapo enterovéva? b) ¿Mbaʼépa ojapo peteĩ ermáno oĩve hag̃ua unida kongregasiónpe?

¹² Umi kristiáno madúro ojapo opa ikatúva oĩ hag̃ua unida kongregasiónpe (elee Efesios 4:1-6, 15, 16). Enterovéva ñañehaʼã vaʼerã ñambaʼapo peteĩ ñeʼẽme ñane ermanokuérandi. Péro upearã tekotevẽ ñaneumílde. Por ehémplo, ¿mbaʼépa jajapo peteĩ ermáno ofalláramo térã ñaneofendéramo? ¿Nañañeʼẽvéimapa chupe, térãpa ñañehaʼãmbaite ñaĩ porã jey hag̃ua hendive? Ñañehaʼãramo ñasolusiona umi provléma tuichave mboyve, jahechaukáta ñanemaduroha espirituálmente.

¹³ Ñapensamína ko ehémplore. Peteĩ ermáno hérava Uwe ipochými vaʼekue umi ermáno ofalla jave. Péro peteĩ díape odesidi ostudia David rembiasakue, ha upearã oipuru la Biblia ha lívro Perspicacia para comprender las Escrituras. ¿Mbaʼérepa oiporavo David rembiasakue? Pórke David iprovléma vaʼekue avei unos kuánto Jehová siérvondi. Por ehémplo, rréi Saúl ojukase vaʼekue chupe. Ha ótra okasiónpe avei unos kuánto isrraelíta ojukase chupe. Ótra vuéltape katu, hembireko jepe oñembohory hese (1 Sam. 19:9-11; 30:1-6; 2 Sam. 6:14-22). Upéicharõ jepe, David osegi ohayhu Jehovápe ha ojerovia hese. Avei haʼe ombyasykuaaiterei hapichakuérape. Uwe ostudia rire David ehémplo, ohechakuaa tekotevẽha okambia opensa lája, oiko rangue ohechaiterei defékto umi ermánore. Avei oñemeʼẽ enkuénta operdonakuaave vaʼerãha hapichakuérape, ha ojapo vaʼerãha ikatúva guive oĩ hag̃ua  unida kongregasiónpe. ¡Ajépa iporãitéta entéro jasegíramo ko ermáno ehémplo!

14. ¿Mbaʼeichagua persónapepa Jesús oiporavo iñamigorã?

¹⁴ Jesucristo ningo iñamávle vaʼekue enterovéndi. Upévare umi kuimbaʼe, kuña, mitã ha ijedáva oñeñandu porã hendive. Péro upéva ndeʼiséi oimeraẽvareínte haʼe hague iñamígo. Peteĩ vuéltape heʼi vaʼekue ijapostolkuérape: “Peẽ hína che amígo, pejapóramo che haʼéva” (Juan 15:14). Jesús oiporavo iñamigorã sólamente umi ohayhúvape chupe ha Jehovápe. Ñande avei tekotevẽ jaiporavo ñane amigorã umi ohayhúvape Jehovápe. ¿Mbaʼérepa?

15. ¿Mbaʼérepa umi imitãva iporã oñeamiga umi ermáno ijerovia mbaretévare?

¹⁵ Umi frúta ningo hiʼaju porãve ojopéramo hese kuarahy. Péicha avei, oĩramo mborayhu kongregasiónpe, umi ermáno omadurave espirituálmente. Oiméramo nde peteĩ mitãrusu térã mitãkuña, ¿reikuaámapa mbaʼépa rejapóta ne renonderãme? Redesidi porãséramo, reñeamiga vaʼerã umi ermáno oservímavare Jehovápe heta áñore ha oipytyvõ meméva oĩ hag̃ua unida kongregasiónpe. Haʼekuéra ningo ombohováima heta provléma ha oreko experiénsia nepytyvõ porã hag̃ua. Ehasána tiémpo hendivekuéra. Péicha redesidi porãta ha oikóta ndehegui peteĩ kristiáno madúro (elee Hebreos 5:14).

16. ¿Mbaʼéichapa umi ermáno madúro oipytyvõ peteĩ ermána imitãvape?

¹⁶ Peteĩ ermána hérava Helga imanduʼa oĩrõ guare último áño koléhiope tekotevẽ hague odesidi mbaʼépa ojapóta. Ikompañerokuéra omombeʼujoa ohotaha universidápe oreko hag̃ua peteĩ profesión porã. Péro Helga ojerure konsého umi kristiáno madúro ikongregasionguápe. La majoría koʼã ermáno ijedave chugui. Helga omombeʼu haʼekuéra oipytyvõiterei ha omokyreʼỹ hague chupe oservi hag̃ua Jehovápe de tiémpo kompléto. Haʼe osegi rupi koʼã konsého, oservi kuri de prekursóra cinco áñore. Upéva ojapóma heta tiémpo, péro Helga ni michĩmi nombyasýi oipuru haguére ihuventu oservi hag̃ua Jehovápe.

17, 18. ¿Mbaʼépa jajapo vaʼerã ñandedeprovechove hag̃ua Jehovápe?

¹⁷ Jasegíramo Jesús ehémplo, oikóta ñandehegui kristiáno madúro espirituálmente. Hiʼarive ñañemoag̃uivéta Jehováre, ñanekyreʼỹvéta jaservi hag̃ua chupe ha ñandedeprovechovéta. Jesús heʼi vaʼekue isegidorkuérape: “Pehesape vaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape” (Mat. 5:16).

¹⁸ Jahechaháicha, umi kristiáno madúro tuichaiterei oipytyvõ kongregasiónpe. Avei haʼekuéra oipuru porã ikonsiénsia. ¿Mbaʼéichapa ñane konsiénsia ikatu ñanepytyvõ jadesidi porã hag̃ua? ¿Mbaʼéichapa jahechauka jarrespetaha ñande rapichakuéra konsiénsia? Koʼã mbaʼe jahecháta pe artíkulo oúvape.