1, 2. Keristani taudia ibounai be idia gaukara goada edena bamona taudia ai idia lao totona? Herevalaia.

SINA ta be maketi ai frut ia ura hoia neganai, dahaka do ia karaia? Ia be frut ena bada o davana maragi gauna sibona ia tahua lasi. To danu, frut mai ena bonana namona bona ena toana be ia namo, bona emu tauanina ia durua gauna do ia ura abia. Bona do ia ura ia mage vadaeni frut.

² Ta ia gwauhamata bona bapatiso murinai, do ia gaukara goada noho ena hetura karana Dirava ida ia goada totona. Iena tahua gauna be Dirava ena hesiai tauna goadana ai do ia lao. Unai be tauanina dalanai ita tubu daekau karana ita herevalaia lasi, to eda hetura karana Dirava ida ia goada ia lao karana ita herevalaia. Aposetolo Paulo ena toretore ai, ia hahedinaraia ia ura Efeso Keristani taudia be lo Keristani taudia ai idia lao. Idia ia hagoadaia, ia gwau: “Abidadama do ia tamona, bona iseda diba maoromaoro Dirava ena Natuna dekenai danu do ia tamona. Bona ela bona tau badana bamona ai ita lao, bona Keriso ena bada hegeregerena ita abia.”—Efe. 4:13.

3. Edena dala ai hari Iehova ena hesiai taudia be Efeso kongrigeisen taudia edia kara bamona idia karaia?

 ³ Aposetolo Paulo be ena revareva ia torea neganai, Efeso kongrigeisen be lagani haida lalonai ia noho vadaeni. Bona momo be lo Keristani taudia ai idia lao vadaeni. To, haida be lo Keristani taudia ai idia do lao lasi dainai, idia gaukara goada be namo. Hari, Iehova ena Witnes taudia danu be unai bamona. Tadikaka taihu momo be lagani daudau lalonai Dirava idia hesiai henia bona lo Keristani taudia ai idia lao vadaeni. To, lagani ta ta ai bapatiso idia abia taudia tausen momo be idia gaukara goada noho lo Keristani taudia ai idia lao totona. Oi danu be unai bamona oi karaia noho, a?—Kol. 2:6, 7.

4, 5. Edena dala ai lo Keristani taudia be ta ta amo idia idau, to dahaka kara idia hahedinaraia? (Laulau ginigunana herevalaia.)

⁴ Maketi ai do oi itaia frut be idauidau, to edia toana amo do oi diba idia mage vadaeni o lasi. Unai hegeregerena, lo Keristani taudia be bese bona mauri dala idauidau amo, edia goada be idauidau, mauri lagani be idauidau, bona edia ekspiriens be idauidau. Danu edia kara o kastom be idauidau. To, edia kara ese do ia hahedinaraia idia be lo Keristani taudia. Edena dala ai?

⁵ Lo Keristani tauna be ena mauri lalonai Iesu do ia badinaia, unai amo iena ‘aena gabudia ai do ia raka namonamo.’ (1 Pet. 2:21) Iesu ia herevalaia mai anina bada gauna be dahaka? Iehova do ita lalokau henia mai iseda kudouna ibounai, mauri ibounai, bona darana ibounai ida. Bona dekena tauna do ita lalokau henia, ita sibona ita lalokau henia hegeregerena. (Mat. 22:37-39) Lo Keristani tauna be do ia gaukara goada unai sisiba ia badinaia totona. Iena mauri dalana amo do ia hahedinaraia, Iehova ia tura henia bona ma haida dekenai sibona ena ura dadaraia lalokauna ia hahedinaraia.

6, 7. (a) Lo Keristani taudia be edena bamona karadia idia hahedinaraia? (b) Dahaka do ita herevalaia?

⁶ Ita diba lalokau be lauma helaga ena huahua ta, bona unai be lo Keristani tauna ese ia hahedinaraia. (Gal. 5:22, 23) Danu manau, sibona biagua karana, bona boga-auka ia hahedinaraia be namo. Unai kara idauidau ese ia do ia durua metau negadia ai do ia haheauka, bona ena helaro do ia dogoatao noho. Sibona ena stadi ia karaia neganai, hanaihanai Baibel ena hakaua herevadia do ia tahua, unai amo namo bona dika edia idau ia lalopararalaia. Bena iena abia hidi amo do ia hahedinaraia ia be lo Keristani tauna. Hegeregere, Baibel ese ia hadibaia lalomamina ia badinaia. Lo Keristani tauna be manau tauna, badina ia diba Iehova ena hakaua dalana bona taravatu be hanaihanai ia maoro. * Sivarai namona ia harorolaia goadagoada, bona kongrigeisen lalonai lalotamona ia havaraia.

⁷ Herevana ita be lagani daudau lalonai Iehova ita hesiai henia, to sibona ita nanadaia, ‘Lo Keristani tauna ai lau lao totona, dahaka gaudia ma haida do lau karaia Iesu lau tohotohoa totona?’

8. Iesu amo dahaka ita dibaia?

⁸ Iesu Keriso be Dirava ena hereva ia diba namonamo. Ena mauri lagani be 12  neganai, dubu ena hadibaia taudia ida Baibel ia herevalaia. “Idia kamonai henia taudia be iena laloparara karana bona haere dekenai idia hoa.” (Luka 2:46, 47) Gabeai, tanobada ai ena hesiai gaukara lalonai Baibel ena siri maorodia amo ia ida idia hepapahuahu taudia edia hereva ia koua.—Mat. 22:41-46.

9. (a) Ta be lo Keristani tauna ai ia lao totona, dahaka ia karaia be namo? (b) Dahaka dainai Baibel ita stadilaia?

⁹ Iesu ena haheitalai ese ia hahedinaraia, ta be lo Keristani ai ia lao totona Baibel dekenai ena diba ia habadaia be namo. Anina be hanaihanai Baibel ena hereva dobudia ia stadilaia, badina ia diba “aniani korikorina be taunimanima badadia totona.” (Heb. 5:14) Unai ese ia hahedinaraia, lo Keristani tauna ia ura Dirava ena Natuna ena “diba maoromaoro” ia abia. (Efe. 4:13) Dina ta ta Baibel duahiduahi ena sediual oi badinaia, a? Oi gaukara goada wiki ta ta ai sibona emu stadi o ruma bese tomadiho oi karaia totona, a? Dirava ena Hereva oi stadilaia neganai, namona be oi itaia edena dala ai Baibel ena hakaua hereva ese oi ia durua, Iehova ena lalohadai bona hemami oi lalopararalaia totona. Bena abia hidi oi karaia neganai, Baibel ena hakaua herevadia oi badinaia, unai ese oi do ia durua Iehova kahirakahira oi lao totona.

10. Dina ta ta ai, edena dala ai lo Keristani tauna be Baibel ena hereva ese ia durua?

¹⁰ Lo Keristani tauna ia laloparara Baibel amo diba ia abia sibona be hegeregere lasi. To, Iehova ena dala bona hakaua herevadia ia lalokau henia. Unai lalokau ia hahedinaraia dalana ta be ena mauri  lalonai Iehova ena ura do ia badinaia, to taunimanima edia lalohadai lasi. Danu, Keristani tauna be ena kara gunana ‘ia kokia.’ Bena Keristani kara namodia ia badinaia. Unai kara namodia be ‘Dirava ena ura hegeregerena idia vara, idia be maoromaoro momokani bona abidadama dalana idia badinaia.’ (Efeso 4:22-24 duahia.) Baibel be Dirava ena lauma helaga ena siahu amo idia torea. Keristani tauna be Baibel ena hakaua herevadia ia dibaia bona ia lalokau henia neganai, ia hahedinaraia lauma helaga ese ena kudouna bona lalona ai ia gaukara noho. Unai amo lo Keristani tauna ai ia lao.

11. Iesu be iena famili bona ena hahediba taudia dekenai dahaka ia diba?

¹¹ Iesu be tau goevadaena bona tanobada ai ia be kara dika taudia huanai ia noho. Iesu be goevadae lasi ruma besena lalonai ia tubu daekau. Ia murinai idia raka taudia danu be hekokoroku bona sibona laloa bada lalohadaina idia hahedinaraia. Hegeregere, Iesu idia do hamasea lasi hanuaboina ai, iena hahediba taudia “huanai hepapahuahu badana ia vara, daika be bada.” (Luka 22:24) To Iesu ia diba ena goevadae lasi hahediba taudia be tomadiho karadia do idia goadalaia, bona idia ese kongrigeisen do idia hatamonaia. Unai dainai Iesu ese unai hanuaboi ai, iena aposetolo taudia huanai lalotamona ia noho totona, iena guba Tamana ia noia, ia gwau: “Idia ibounai be do idia tamona, bona oi, Tamana, be lau ida oi hakapua, lau be oi ida lau hakapua hegeregerena. Vadaeni idia be ita ida do idia hakapua, . . . unai amo idia be do idia tamona, ita ruaosi ita tamona bamona.”—Ioa. 17:21, 22.

12, 13. (a) Edena dala ai Efeso 4:15, 16 ia hahedinaraia kongrigeisen lalonai lalotamona ia noho be namo? (b) Edena dala ai tadikaka ta be ena manoka gauna ia hanaia, bona lalotamona ia noho totona dahaka ia karaia?

¹² Lo Keristani tauna be kongrigeisen lalonai lalotamona ia havaraia. (Efeso 4:1-6, 15, 16 duahia.) Iseda tahua gauna be Dirava ena taunimanima be do idia tamona bona do idia gaukara hebou. Iehova ena Hereva hegeregerena, lalotamona ia noho totona, ita manau be namo. Lo Keristani tadikaka o taihu be mai manau ida do ia ura ma haida ida lalotamona dekenai do idia gaukara, herevana haida ese idia kara namo henia lasi. Kongrigeisen tadikaka o taihu ta be kerere ta ia karaia neganai, dahaka do oi karaia? Eiava bema ta be emu lalona ia hahisia, dahaka do oi karaia? Do oi ura lasi ia oi hereva henia, a? Eiava lalotamona ia noho totona, dala oi tahua maino umui karaia totona, a? Oibe, lo Keristani tauna ia ura lalotamona do ia noho.

¹³ Uwe ena ekspiriens mani ita laloa. Guna ia be tadikaka haida ese idia karaia kerere ta dainai ia badu. To gabeai Baibel bona Insight on the Scriptures amo Davida ena sivarai ia stadilaia. Dahaka dainai? Uwe ia gwau: “Davida be ena tomadiho taudia haida edia kara kereredia ia itaia. Hegeregere, King Saulo ia ura Davida ia alaia, haida idia ura nadi amo ia idia hodoa, bona iena adavana ese ia kirikirilaia. (1 Sam. 19:9-11; 30:1-6; 2 Sam. 6:14-22) Herevana unai bamona idia karaia Davida dekenai, to ia be Iehova ia lalokau henia. Danu, Davida be hebogahisi ia hahedinaraia, lau danu be unai bamona kara lau hahedinaraia be namo. Egu stadi karana ese lau ia durua tadikaka dekenai lalohadai maorona lau abia totona. Hari edia kerere lau laloa momo lasi. To, lau gaukara goada  kongrigeisen lalonai lalotamona ia noho totona.” Oi danu, oi ura kongrigeisen lalonai lalotamona ia noho, a?

14. Iesu ese daidia be ena turadia ai ia halaoa?

¹⁴ Iesu Keriso be taunimanima idauidau ia tura henia. Hegeregere tatau, hahine, burukadia bona natudia be ia dekenai idia gari lasi. Iesu be ena tura korikoridia ia abia hidi namonamo. Iesu be iena aposetolo taudia dekenai ia gwau: “Bema umui dekenai lau gwauraia taravatu umui badinaia, umui be egu turadia.” (Ioa. 15:14) Iesu ena turadia be ia murinai idia raka taudia bona mai lalona ibounai ida Iehova idia hesiai henia taudia. Oi danu be Iehova idia hesiai henia taudia oi tura henia, a? Dahaka dainai unai be mai anina bada?

15. Lo Keristani taudia bamoa karana ese edena dala ai matamata taudia ia durua?

¹⁵ Iseda tadikaka edia kara namodia ese ita idia durua diba lo Keristani taudia ai ita lao totona. Reana oi be mero o kekeni matamata ta, bona oi ura mauri lalonai abia hidi ta oi karaia. Lagani momo lalonai Iehova idia hesiai henia bona kongrigeisen ai lalotamona idia havaraia tadikaka taihu oi bamoa, unai be aonega karana. Idia danu be reana edia mauri lalonai hekwakwanai haida idia davaria bona Dirava hesiai henia gaukara lalonai hahetoho idia haheaukalaia. Unai bamona taudia ese oi idia durua diba, abia hidi maorodia oi karaia totona. Unai bamona tadikaka taihu bamoa karana ese oi ia durua diba, lo Keristani tauna ai oi lao totona.—Heberu 5:14 duahia.

16. Kongrigeisen tadikaka taihu badadia ese edena dala ai taihu matamata ta idia durua?

¹⁶ Helga ia laloatao, ena sikuli ena lagani ginigabena ai, ena klas ai idia noho stiuden taudia be ta ta ida edia tahua gaudia idia herevalaia. Haida be idia ura iunivesiti dekenai do idia lao, idia laloa unai abia hidi ese gabeai edia mauri ai idia do ia durua. To Helga be ena kongrigeisen turadia dekenai ena tahua gaudia ia herevalaia. Ia gwau: “Idia momo edia mauri lagani be bada. Bona idia ese lau idia durua bada. Lau idia hagoadaia ful-taim hesiai gaukara lau karaia totona. Unai dainai, lagani faiv lalonai painia gaukara lau karaia. Hari lagani haida idia hanaia vadaeni, bona lau moale badina egu matamata negana lau gaukaralaia Iehova lau hesiai henia totona. Unai lau karaia dainai lau lalohisihisi lasi.”

17, 18. Edena dala ai lo Keristani ai ita lao karana ese ita ia durua?

¹⁷ Iseda mauri lalonai Iesu ena haheitalai ita tohotoho neganai, unai ese ita do ia durua lo Keristani taudia ai ita lao totona. Iehova kahirakahira do ita lao, bona ia hesiai henia urana do ita habadaia. Ta be lo Keristani ai ia lao neganai, do ia ura bada Iehova ena hesiai gaukara ia karaia. Iesu be ena murinai idia raka taudia ia hagoadaia, ia gwau: “Emui diari umui hahedinaraia, vadaeni emui kara namodia do idia itaia bena emui Tamana guba ai ia noho do idia hanamoa.”—Mat. 5:16.

¹⁸ Kongrigeisen lalonai lalotamona ia noho totona, lo Keristani tauna ai ita lao be gau badana. Badina ta be Dirava ese ia henia lalomamina ia badinaia neganai, ia hahedinaraia ia be lo Keristani tauna. Edena dala ai iseda lalomamina ese ita ia durua abia hidi maorodia ita karaia totona? Edena dala ai iseda tadikaka edia lalomamina hegeregerena idia karaia abia hidi ita matauraia diba? Unai henanadai toi be gabeai stadi lalonai do ita herevalaia.