1, 2. Wetin na di plan we ɔl Kristian dɛn fɔ gɛt? Gi ɛgzampul.

WE MAREDUMAN we dɔn te na mared-os kin go na makit fɔ go bay frut, i kin pik di frɛsh wan dɛn, i nɔ kin pik di big wan ɔltɛm ɔ di wan dɛn we nɔ dia bɛtɛ. Bifo dat, i kin luk fɔ di wan dɛn we dɔn rɛp. I kin want frut dɛn we gɛt gud test, we gɛt fayn sɛnt, ɛn we gɛt fayn tin dɛn insay we go mek pɔsin in bɔdi fayn. I kin pik frut dɛn we dɔn strɔng ɛn we dɔn du fɔ it.

² Afta pɔsin dɔn lan bɔt Jiova, gi in layf to am ɛn baptayz, i kin kɔntinyu fɔ go bifo pan Gɔd biznɛs. In plan na fɔ bi machɔ Kristian we de sav Gɔd. Di machɔ we wi de tɔk bɔt na ya, nɔto we pɔsin de gro bɔt na we pɔsin de go bifo pan Gɔd biznɛs. Di apɔsul Pɔl bin rayt to di Kristian dɛn na Ɛfisɔs fɔ tɛl dɛn se, dɛn nid fɔ go bifo pan Gɔd biznɛs. I ɛnkɔrej dɛn fɔ du mɔ, i tɛl dɛn se dɛn fɔ “gɛt wanwɔd pan di tin dɛn we [dɛn] biliv ɛn no di tru tin dɛn bɔt Gɔd in Pikin, so dat [dɛn] go bi machɔ man, as [dɛn] de tray fɔ machɔ lɛk aw Krays machɔ.”—Ɛfi. 4:13.

3. Wetin bin de apin na di kɔngrigeshɔn we bin de na Ɛfisɔs? Aw dis sem tin de apin to Jiova in pipul dɛn tide?

³ We Pɔl bin rayt in lɛta, di kɔngrigeshɔn na Ɛfisɔs bin dɔn de  fɔ sɔm tɛm. Bɔku pan di disaypul dɛn bin dɔn rili go bifo pan Gɔd biznɛs. Bɔt sɔm bin stil nid fɔ bi machɔ Kristian. Na di sem tin de apin to Jiova Witnɛs dɛn tide. Bɔku brɔda ɛn sista dɛn, dɔn sav Jiova fɔ lɔng tɛm ɛn dɛn dɔn go bifo pan Gɔd biznɛs. Bɔt nɔto dɛn ɔl dɔn go bifo pan Gɔd biznɛs. Fɔ ɛgzampul, bɔku bɔku nyu wan dɛn de baptayz ɛni ia, ɛn sɔm stil nid fɔ go bifo pan Gɔd biznɛs. We yu, yu tink se yu nid fɔ go bifo pan Gɔd biznɛs?—Kɔl. 2:6, 7.

4, 5. Uskayn we dɛn we machɔ Kristian dɛn difrɛn frɔm dɛnsɛf? Wetin dɛn ɔl gɛt we na di sem? (Luk di pikchɔ nia dis atikul in taytul.)

⁴ We yu tek tɛm wach frut we dɔn rɛp, we dɛn de sɛl na makit, yu go si se dɛn ɔl nɔto di sem. Bɔt dɛn ɔl gɛt sɔntin we de sho se dɛn dɔn rɛp. Semweso, machɔ Kristian dɛn nɔ bi di sem. Dɛn ɔl difrɛn, dɛn kɔmɔt na difrɛn kɔntri, ɛn dɛn mɛn difrɛn we dɛn. Dɛn nɔ gɛt di sem wɛlbɔdi, dɛn nɔ gɛt di sem ej, ɛn dɛn ɔl nɔ no di sem tin. Dɛn ɔl nɔ lɛk di sem tin ɛn dɛn gɛt difrɛn kɔlchɔ. Bɔt stil, dɛn ɔl we de go bifo pan Gɔd biznɛs gɛt kwaliti dɛn we de sho se dɛn na machɔ Kristian dɛn. Wetin mek wi se so?

⁵ Machɔ Kristian we de sav Jiova de tray fɔ falamakata Jizɔs. Jizɔs bin dɔn sɛt fayn ɛgzampul fɔ wi “so dat [wi] go fala in fut mak gud gud wan.” (1 Pit. 2:21) Wetin Jizɔs bin se rili impɔtant? I bin se wi fɔ lɛk Jiova wit ɔl wi at, wit ɔl wi sol, wit ɔl wi maynd, ɛn wi fɔ lɛk wi kɔmpin mɔtalman lɛk aw wi lɛk wisɛf. (Mat. 22:37-39) Machɔ Kristian de tray fɔ fala dis advays. Di we aw i de liv in layf, de sho se na in padi biznɛs wit Jiova i put fɔs na in layf, ɛn i de sho se i rili lɛk ɔda pipul dɛn.

6, 7. (a) Wetin na sɔm kwaliti dɛn we go sho se yu na machɔ Kristian? (b) Wetin wi de kam tɔk bɔt?

⁶ Wi ɔndastand se lɔv na jɔs wan pan di kwaliti dɛn we di spirit de gi. Ɛn na dis kwaliti machɔ Kristian fɔ sho. (Gal. 5:22, 23) Ɔda impɔtant kwaliti dɛn de we i fɔ gɛt, i nɔ fɔ de vɛks kwik, i fɔ de kɔntrol insɛf, ɛn i fɔ de peshɛnt wit ɔda pipul dɛn. Dɛn kwaliti ya go ɛp am we i gɛt prɔblɛm dɛn we de mɔna am ɛn dɛn go ɛp am fɔ bia we sɔntin mek in at pwɛl, ɛn i go mek i nɔ giv ɔp. We in wangren de stɔdi, i de kɔntinyu fɔ luk fɔ advays dɛn na di Baybul we go ɛp am fɔ no wetin rayt ɛn wetin rɔng. So we i disayd fɔ du sɔntin, i go sho se in na machɔ Kristian. Fɔ ɛgzampul, i de lisin to in kɔnshɛns we di Baybul dɔn tren. Kristian we machɔ de put insɛf dɔŋ. I biliv se Jiova in we ɛn in advays dɛn bɛtɛ pas in yon ɔltɛm. * I de prich di gud nyus wit zil ɛn i de ɛp fɔ mek wanwɔd de na di kɔngrigeshɔn.

⁷ I nɔ mata aw lɔng wi dɔn de sav Jiova, i go fayn lɛ wi aks wisɛf dis kwɛstyɔn, ‘Tin dɛn de we a stil nid fɔ du fɔ falamakata Jizɔs mɔ, we go mek a kɔntinyu fɔ go bifo pan Gɔd biznɛs?’

8. Wetin wi go se bɔt di we aw Jizɔs bin no ɛn ɔndastand di Skripchɔ dɛn?

⁸ Jizɔs Krays no ɛn ɔndastand Gɔd in Wɔd gud gud wan. Ivin we i bin jɔs ol 12 ia, i bin ebul fɔ tɔk bɔt di tin dɛn we de insay Gɔd in Wɔd wit di ticha dɛn we bin  de na di tɛmpul. “Ɔl di wan dɛn we bin de lisin to am bin de kɔle di we aw i bin ɔndastand ɛn aw i bin de ansa dɛn.” (Lyuk 2:46, 47) Leta we i bin de prich, i bin sabi fɔ yuz Gɔd in Wɔd, ɛn dis bin mek in ɛnimi dɛn nɔ bin de ebul fɔ tɔk.—Mat. 22:41-46.

9. (a) Aw Kristian we want fɔ machɔ de stɔdi di Baybul? (b) Wetin mek wi de stɔdi di Baybul?

⁹ Kristian we want fɔ go bifo pan Gɔd biznɛs fɔ falamakata Jizɔs in ɛgzampul. I nɔ fɔ jɔs satisfay wit di smɔl smɔl tin dɛn we i no bɔt di Baybul. Bɔt i fɔ de rid di Baybul ɔltɛm fɔ no di dip tin dɛn we de na Gɔd in Wɔd. I no se “it we strɔng na fɔ machɔ pipul” dɛn. (Ibru 5:14) Kristian we machɔ want fɔ “no di tru tin dɛn bɔt Gɔd in Pikin.” (Ɛfi. 4:13) So i go fayn lɛ yu aks yusɛf dɛn kwɛstyɔn ya: A kin rid di Baybul ɛvride? A kin mek tɛm fɔ stɔdi mi wangren? A kin du mi famili wɔship ɛni wik? As yu de stɔdi Gɔd in Wɔd, i go fayn fɔ de wach fɔ di Baybul in advays dɛn we go ɛp yu fɔ si klia wan aw Jiova de tink ɛn aw i de fil. Dɔn tray fɔ fala di advays dɛn, ɛn mek lɛ dɛn advays ya ɛp yu we yu de disayd fɔ du sɔntin so dat yu go kam nia Jiova mɔ ɛn mɔ.

10. Aw machɔ Kristian dɛn kin fil bɔt di advays dɛn we de na Gɔd in Wɔd?

¹⁰ Machɔ Kristian ɔndastand se i nɔ fɔ jɔs no di tin dɛn we de na di Baybul nɔmɔ. Apat frɔm di tin dɛn we i sabi, i de tray fɔ no if i rili lɛk wetin i no bɔt Gɔd ɛn di advays dɛn we de na di Baybul. Wan tin we go sho se i gɛt da kayn lɔv de, na we i put Gɔd in biznɛs fɔs na in layf ɛn nɔ put in yon biznɛs fɔs. Apat frɔm dat, Kristian we want fɔ go bifo pan Gɔd biznɛs no se i fɔ “lɛf” ɛni bad abit we i bin gɛt trade. As  i de tray fɔ du dat, i de gɛt Jizɔs in fayn kwaliti dɛn “we Gɔd want.” I go “du wetin rayt” ɛn i nɔ go “kɔmɔt biɛn Gɔd.” (Rid Lɛta Fɔ Ɛfisɔs 4:22-24.) Gɔd bin yuz in oli spirit fɔ ɛp di wan dɛn we rayt di Baybul. So we Kristian de stɔdi di Baybul gud gud wan ɛn lɛk di advays dɛn we de de, i de sho i want fɔ lɛ Gɔd in spirit gayd in at ɛn in maynd. Ɛn dis kin mek i go bifo pan Gɔd biznɛs.

11. Wetin Jizɔs bin kam fɔ no di tɛm we i bin de wit in famili ɛn i disaypul dɛn?

¹¹ Di tɛm we Jizɔs bin de na di wɔl as pafɛkt mɔtalman, i bin de liv wit pipul dɛn we nɔ pafɛkt. In mama ɛn papa we mɛn am nɔ bin pafɛkt, ɛn i bin de na os fɔ lɔng tɛm wit fambul dɛn we nɔ pafɛkt. Di pipul dɛn we bin de insay Jizɔs in tɛm bin de fɛt fɔ de pantap dɛn kɔmpin dɛn. Ivin Jizɔs in apɔsul dɛn bin de biev lɛk dɛn pipul ya. Fɔ ɛgzampul, di nɛt bifo dɛn kil Jizɔs, “dɛn bigin fɔ agyu bad bad wan fɔ no us wan pan dɛn bɛtɛ pas in kɔmpin.” (Lyuk 22:24) Bɔt Jizɔs bin biliv se in disaypul dɛn we nɔ pafɛkt go go bifo pan Gɔd biznɛs ɛn dɛn go gɛt wanwɔd na di kɔngrigeshɔn. Da sem nɛt de, Jizɔs pre fɔ lɛ in apɔsul dɛn gɛt wanwɔd. I pre to in Papa se lɛ dɛn ɔl “bi wan, jɔs lɛk aw yu, we na mi Papa gɛt wanwɔd wit mi ɛn misɛf gɛt wanwɔd wit yu, mek lɛ dɛnsɛf gɛt wanwɔd wit wi, . . . so dat dɛn go bi wan jɔs lɛk aw yu ɛn mi na wan.”—Jɔn 17:21, 22.

12, 13. (a) Aw Lɛta Fɔ Ɛfiisɔs 4:15, 16 ɛp wi fɔ no se wi fɔ tray fɔ mek wanwɔd de na di kɔngrigeshɔn? (b) Wetin bin ɛp wan brɔda fɔ chenj di we aw i bin de tink ɛn lan fɔ wok fɔ lɛ wanwɔd de na di kɔngrigeshɔn?

¹² Machɔ Kristian we de sav Jiova de du ɔl wetin i ebul fɔ mek wanwɔd de na di kɔngrigeshɔn. (Rid Lɛta Fɔ Ɛfisɔs 4:1-6, 15, 16.) Di men tin we wi want na fɔ lɛ Gɔd in pipul dɛn “jɔyn togɛda” ɛn mek ɔlman wok togɛda wit wanwɔd. Gɔd in Wɔd se, fɔ lɛ wi gɛt dis wanwɔd, wi nid fɔ put wisɛf dɔŋ. Machɔ brɔda ɔ sista de put insɛf dɔŋ fɔ wok fɔ lɛ wanwɔd de, ivin we ɔda pipul dɛn we nɔ pafɛkt du am sɔntin. Wetin yu kin du we brɔda ɔ sista we nɔ pafɛkt mek mistek na di kɔngrigeshɔn? Aw yu kin fil we sɔmbɔdi na di kɔngrigeshɔn du yu sɔntin? Yu kin lɛf fɔ tɔk to da pɔsin de? Ɔ yu kin tray fɔ mek pis wit am? Fɔ tru, Kristian we machɔ kin want fɔ mek pis, i kin tray fɔ mek pis, ɛn i nɔ kin kip malis.

¹³ Lɛ wi tɔk bɔt wan brɔda we nem Uwi in ɛgzampul, trade dis brɔda bin de vɛks we ɔda brɔda ɔ sista mek mistek. So dis brɔda disayd fɔ yuz di Baybul ɛn Insight on the Scriptures fɔ stɔdi bɔt Devid in stori. Wetin mek i disayd fɔ stɔdi bɔt Devid? Uwi tɔk se: “Di Izrɛlayt dɛn bin du bɔku bad bad tin dɛn to Devid. Fɔ ɛgzampul, Kiŋ Sɔl bin tray fɔ kil am, sɔm pan di pipul dɛn bin want fɔ ston am, ɛn ivin Devid in wɛf bin de provok am. (1 Sam. 19:9-11; 30:1-6; 2 Sam. 6:14-22). Bɔt pan ɔl di bad tin dɛn we dɛn bi du to am, Devid nɔ bin ɛva alaw dɛn bad tin ya fɔ stɔp am fɔ sav Jiova. Apat frɔm dat, Devid bin gɛt sɔri at ɛn dis na sɔntin we misɛf nid fɔ gɛt.” We Uwi bin de stɔdi di Baybul i lan se i fɔ chenj di we aw i bin de si di mistek dɛn we in brɔda ɛn sista dɛn bin de mek. Ɛn i fɔ lɛf fɔ de mɛmba di mistek dɛn we dɛn de mek ɛn tray fɔ lɛ wanwɔd de na di kɔngrigeshɔn. Yusɛf kin tray fɔ mek wanwɔd de na di kɔngrigeshɔn?

14. Uskayn pipul dɛn Jizɔs bin pik fɔ bi in tayt padi dɛn?

¹⁴ Jizɔs Krays bin lɛk ɔlman. Ɔlkayn pipul dɛn bin want fɔ kam nia am, man dɛn, uman dɛn, yɔŋ wan dɛn, dɛn wan dɛn we dɔn ol, ɛn ivin pikin dɛn. Bɔt Jizɔs bin de tek tɛm fɔ pik udat fɔ bi in tayt padi. I tɛl in apɔsul dɛn we fetful se: “Una na mi padi dɛn if una du wetin a de tɛl una.” (Jɔn 15:14) So wi dɔn si se na di wan dɛn we de fala am ɔltɛm ɛn we bin de sav Jiova wit ɔl dɛn at na dɛn Jizɔs bin de pik fɔ bi in tayt padi. Yu kin pik yu padi dɛn frɔm di wan dɛn we de sav Jiova wit ɔl dɛn at? Wetin mek dis impɔtant?

15. Aw yɔŋ wan dɛn go bɛnifit we dɛn de kip kɔmpin wit machɔ Kristian dɛn?

¹⁵ Bɔku frut dɛn kin rɛp we dɛn de ɔnda san. Semweso, di lɔv we wi brɔda ɛn sista dɛn de sho kin ɛp yu fɔ go bifo pan Gɔd biznɛs. Sɔntɛm yu na yɔŋ pɔsin we de tray fɔ disayd wetin yu want fɔ du wit yu layf. I go rili mek sɛns fɔ spɛn tɛm wit brɔda ɛn sista dɛn we dɔn de sav Jiova fɔ lɔng tɛm ɛn we dɔn ɛp fɔ mek wanwɔd de na di kɔngrigeshɔn! Di tɛm we dɛn de sav Jiova, i go mɔs bi se dɛn go dɔn gɛt sɔm prɔblɛm dɛn we dɔn mit dɛn na layf ɛn dɛn go mɔs dɔn bia dɛn prɔblɛm dɛn de we dɛn de sav Jiova. Dɛn kayn brɔda ɛn sista ya go ɛp yu fɔ yuz yu layf di bɛst we. We yu de kip kɔmpin wit dɛn kayn brɔda ɛn sista dɛn ya, i go ɛp yu fɔ disayd fɔ du di rayt tin ɛn i go ɛp yu fɔ go bifo pan Gɔd biznɛs.—Rid Di Ibru Pipul Dɛn 5:14.

16. Aw sɔm machɔ Kristian dɛn we de na di kɔngrigeshɔn bin ɛp wan yɔŋ sista?

¹⁶ Lɛ wi tɔk bɔt wan sista we nem Ɛlga. Dis sista bin mɛmba di tɛm we i bin de du in las ia na sɛkɔndari skul, in kɔmpin studɛnt dɛn bin de tɔk bɔt di tin dɛn we dɛn plan fɔ du afta dɛn dɔn skul. Bɔku pan in kɔmpin dɛn bin want fɔ go na yunivasiti, bikɔs dɛn op se na dis go mek dɛn bi wetin dɛn want fɔ bi na layf. Ɛlga bin tɔk bɔt dis to in padi dɛn na di kɔngrigeshɔn. Ɛlga bin tɔk se: “Bɔku pan mi padi dɛn bin ol pas mi ɛn dɛn bin rili ɛp mi. Dɛn bin ɛnkɔrej mi fɔ yuz ɔl mi tɛm fɔ sav Jiova. A bin ebul fɔ payɔnia fɔ fayv ia. Naw, bɔku tɛm dɔn pas, ɛn a gladi we a bin yuz mi layf di tɛm we a bin yɔŋ fɔ sav Jiova. A nɔ gɛt no rizin fɔ rigrɛt fɔ wetin a bin du.”

17, 18. We wi bi machɔ Kristian aw dat go ɛp wi fɔ sav Jiova di bɛst we?

¹⁷ We wi de tray fɔ fala di ɛgzampul dɛn we Jizɔs sɛt, i go ɛp wi fɔ go bifo pan Gɔd biznɛs. I go mek wi kam nia Jiova mɔ ɛn mɔ ɛn i go mek wi want fɔ sav am di bɛst we we wi ebul. Pɔsin we de sav Jiova kin gi am in bɛst we i rili dɔn go bifo pan Gɔd biznɛs. Jizɔs bin ɛnkɔrej in disaypul dɛn se una fɔ mek “una layt shayn bifo ɔlman, so dat dɛn go si una fayn wok ɛn gi glori to una Papa we de na ɛvin.”—Mat. 5:16.

¹⁸ As wi dɔn si, machɔ Kristian dɛn kin rili ɛp di kɔngrigeshɔn. Ɛn yu go ebul fɔ no if pɔsin na machɔ Kristian bay di we aw i de yuz in kɔnshɛns we Gɔd gi am. Aw wi kɔnshɛns kin ɛp wi fɔ disayd fɔ du di rayt tin? Ɛn we wi brɔda ɛn sista dɛn disayd fɔ du sɔntin, aw wi kin rɛspɛkt dat? Wi go tɔk bɔt dɛn kwɛstyɔn ya insay di nɛks atikul.