1, 2. Hiouwɔɔ lachi yɛɛ Kilisiɔŋnda kpou nɔ yɛ ma kindi kindiŋ le ndu? Chɔm tamaseliiyo.

TE KALACHUA nɔ taasioo wo kuɛ pɛ maŋgueiyaŋ piondɔɔ o lɔɔ niŋ, o cho ma bɛndaŋ ɔɔ ma kindu baa le waŋ te o hɛli le. Kɛ ma diu nyɛkɛndɛi yaŋ. O yeema maŋgueima yeela nyɛkɛndɛi yaŋ. Ma nɔ chuŋ kɛndɔɔ mi ma kuundiaa wana waŋ. A tonya, maŋgueima kendu nyɛkɛndɛi yaŋ o hɛli ni.

² Te waŋndo tosa pɛ hiouwɔɔ lachioo le yɔŋgɔŋndo o Mɛlɛka lo mbo yiŋ, o nɔ mbo wa hiouwɔɔ lachioo tosaa o Mɛlɛka piɛiyo niŋ. Kpeleŋ ndɔɔ cho le simnɔŋndo kaasoŋnɔɔ o Mɛlɛka piɛiyo niŋ ni. Mi kiilanɔɔ Pɔɔl poonyial Kilisioŋnda Ɛfisɔɔ le sabu nda nɔma simnuŋ ŋkaasoŋ o Mɛlɛka piɛiyo niŋndo. O cho a kaasoŋyɛi ŋdialle okɔɔ le naŋ cho suɛi le. Mɛlɛka cho nda dɛɛniaa le ma “nɔ tiindaŋ pilɔɔ o Mɛlɛka piɛiyo niŋ, nduyɛ, mi ŋ sɔla sina pɛŋgu pilɔɔ a Po Mɛlɛkaa okɔɔ, nduyɛ, mi ŋ simnuŋ lakaasoŋ o tiindaŋ naa ŋ nɔ wo niŋ. O koŋ kɔɔli, ŋ cho fuuluu o iboondu mi ŋ simnuŋ kɛsɛ kɛsɛ maa Kiliti.”—Ɛfi. 4:13.

3. Baa bahawɛi kundaa Ɛfisɔɔ ndoo nɔ wo wanaa Chɛhowaa nɔ hau ni?

³ Kundaa Ɛfisɔɔ ndoo chua niŋ wɔsiŋ bɔɔbɔɔ teleŋ Pɔɔl poonyial  nda yauwo hoo wo. Kilisiɔŋnda a bɔɔbɔɔ o kunda koŋ niŋ ndaa sɔla niŋ kaasoŋyɛi o Mɛlɛka piɛiyo niŋ. Kɛ, apum ndaa nɔ wɔ ma tosa hiouwɔɔ lachioo le simnɔŋndo kaasoŋnda o Mɛlɛka piɛiyo niŋ. Nyɛ pilɔɔ kpe yeemaŋ hau le Seiyaa Chɛhowaa ni. Puaapiliaa a ndepiliaa tau piɛi niŋ Mɛlɛka le lɔɔ levil, nduyɛ a simnuŋ niŋ kaasoŋnda o hei tosaa niŋ. Kɛ o kpeekpei niŋ, o cho kpou le simnuŋndɔ kaasoŋnda o Mɛlɛka piɛiyo niŋ te. Le tamaseliiyo, wɔsi o wɔsi, waŋnda cho yiŋɔɔ o waalaŋ niŋ. Lelaŋ, apum nɔ wɔ ma kindi kindiŋ le kaasoŋyɛi sɔlaa o Mɛlɛka piɛiyo niŋ. Num yɛ?—Kolo. 2:6, 7.

4, 5. O nɛila kuɛɛ choo Kilisiɔŋaa cho kaasoŋnda o Mɛlɛka piɛiyo niŋnda cho yɛ nyɛpilɛ le, kɛ yɛɛ nda kpou nɔ yɛ? (Tofa fotueiyo o peele naŋ kandu leŋ choo.)

⁴ Te a mɛɛndaŋ pɛ maŋgueima diuwaŋ o lɔɔ niŋ, ma che maa o cho maŋ kpou le cho nyɛpilɛ le. Kɛ, ma che maa ma diuwaŋ ma cho ni. Lende koni, Kilisiɔŋaa cho kaasoŋnda o Mɛlɛka piɛiyo niŋnda cho ni. A fula o lɛŋnde pilɛ niŋ te, a cho yuŋgu pilɛ le, a nɔ kɛndiaa pilɛ le, a nɔ wɔsiŋ pilɛ le, nduyɛ a nɔ sinapɛŋgu pilɛ le. Vɛlɛ kaala ndalaŋ a naamula ndalaŋ la cho nyɛpilɛ le. Kɛ a koŋ kpou, Kilisiɔŋaa cho hiouwɔɔ lachioo tosaa o Mɛlɛka piɛiyo niŋnda nɔ suiliŋnda chɔm maa kaasoŋnda nda cho o Mɛlɛka piɛiyo niŋ ni. Le yɛɛ naŋ dimi yɛ lende?

⁵ Wana cho kaasoŋnɔɔ o Chɛhowa piɛiyo niŋndo cho yoomu ndɔɔ taŋgullo le tamasi Chiisoo tolɔɔ kɔɔli. Nduyɛ Chiisu chɔm naa nɛiyo le miŋ “tol peluŋ ndɔŋ kɔɔli.” (1 Pitɛ 2:21, NW) Suɛi sɔvɛi kuɛɛ Chiisu ndoo keeku yɛ sondoo lechoo? Ndi wa le Chɛhowa kaalaa a kɔl naa, yoomu naa, a yiyaŋ naa kpou ni. Nduyɛ a chaaŋ naa wanachioo kaalaa mɛɛ naŋ kaala naapila yɛ. (Maa. 22:37-39) Mi Kilisiɔŋnɔ cho kaasoŋnɔɔ o Mɛlɛka piɛiyo niŋndo kindiŋ kpoke le sila koŋ biyɔɔ. Mbo chɔm o yoomu ndɔɔ niŋ maa nyɛ sɔviɔɔ pila chaŋyɛi nduɛi nda Chɛhowa tɛɛŋ cho ni. Nduyɛ mbo wa salaa soliŋndo le kaala o nɔ le acheleŋnda wo.

6, 7. (a) A suiliŋnda kuɛɛ ŋ sina yɛ Kilisiɔŋnɔ simnuŋ kaasoŋnɔɔ o Mɛlɛka piɛiyo niŋndo? (b) Yɛɛ naŋ cho yɛ yaasiaa?

⁶ Ŋ sinapɛŋgu maa kaalaa cho suiliŋ iMɛlɛkayaa opilɛ ni o Kilisiɔŋnɔ cho kaasoŋnɔɔ o Mɛlɛka piɛiyo niŋndo chɔmndo. (Kalee. 5:22, 23) Suiliŋnda kɛndɛlaŋ la cho vɛlɛ sɛɛŋgiaŋndaŋ kiɔɔ, kɔl numndo baa tiuwo, a biuwɔŋndo ni. Mi suiliŋndaŋ ndaŋ la mala Kilisiɔŋnɔɔ te waŋndo pilaŋ ndu pɛ tana, nduyɛ mbo biunuŋ a tiindaŋndo te waŋndo hui ndu pɛ mbo tambu kɔl. O pɛɛku ndɔ ipilayaa niŋ, mbo nuuviaa lɔɔlɔɔ bolii Baabui mala ndu le teŋgeŋndo sinaa suɛi kɛndɛi tɛɛŋ a i wɔɔŋnde wo. Te o wa vɛlɛ pɛ kɛɛsiaa tosaa, mbo chɔm maa kaasoŋnɔɔ o cho o Mɛlɛka piɛiyo niŋ ni. Le tamaseliiyo, mbo yaŋ nilaŋ o kɔl iyama ndɔ Baabuiyo. Mi Kilisiɔŋnɔ cho kaasoŋnɔɔ o Mɛlɛka piɛiyo niŋndo chɔm tuisiŋndo. Nduyɛ mbo sina maa sawala Chɛhowalaŋ a nɛi chɔmaa ndɔɔ bɛnda lɔɔlɔɔ mbo hiau la ndɔlaŋ. * Mbo dimi yooŋgu kɛndɔɔ a dialluŋ fulaa, nduyɛ mbo mala le mi diompilɔɔ wa o kundaa niŋ.

⁷ Mɛɛ mɛɛ naŋ chua wɔsioŋ o Mɛlɛka piɛiyo niŋ, wana o wana nɔ mbo nyunaŋ aa, ‘Baa fondala cheleŋ la cho o yoomu nuu niŋ, naa ya nɔ mi tol peluŋ Chiisoŋ kɔɔli le hiouwɔɔ lachioo tosaa o Mɛlɛka piɛiyo niŋndo?’

8. Yɛɛ ŋ cho yɛ dimi a kɔl kalu Baabui Chiisoo okɔɔ nduyɛ a mɛɛ ndoo bii ndu bila yɛ?

⁸ Chiisu Kiliti nɔ sinapɛŋgoo tau a Diom Mɛlɛkaa okɔɔ. Nduyɛ teleŋ o wa bɛɛ  wɔsilaŋ 12, mbo nɔla le suukaŋndo o sɔɔŋ Mɛlɛkaŋ choo a wanaa pɛɛkaa o maando niŋ. “Mi kɔndɔfillo bii wana o wana tuei muli kɔl kalu o muli nyuuniaalaŋ ndo.” (Luku 2:46, 47) Okoŋ kɔɔli, teleŋ o wa yooŋgu kɛndɔɔ dimioo o chieeŋndo choo wo, mbo tuisi yaamɔɔwaa nduaa siɔmbulaŋ a sɔɔŋ o wa nda chɔmndo o Diom Mɛlɛkaa niŋndoŋ.—Maa. 22:41-46.

9. (a) Pɛɛku Baabui suu kuɛɛ bɛnda yɛ le wana yeema mbo tosa hiouwɔɔ lachioo o Mɛlɛka piɛiyo niŋndo? (b) Le sabu yɛɛ pɛɛku Baabuiyo cho yɛ?

⁹ A mɛɛ Chiisu kɛsul naa tamaseliiyo yɛ, Kilisiɔŋnɔ yeema mbo tosa hiouwɔɔ lachioo o Mɛlɛka piɛiyo niŋndo nɔ ko mbo hini kɔl a kɔlkalu pɔmbɔ o sɔla a Baabuiyo okɔɔ wo le. Kɛ o nɔ mbo pɛɛku sɔɔŋ cho leniŋdoŋ nyɛkɛndɛi, mbo sina maa “wana cho niŋ kaasoŋnɔ wo, ndu dia nyɛ diaa yɔŋaa hoo ni.” (Hibu. 5:14) Ŋ che kpendekele maa, Kilisiɔŋnɔ cho kaasoŋnɔɔ o Mɛlɛka piɛiyo niŋndo yeema mbo sɔla sinapɛŋgoo a Po Mɛlɛka okɔɔ. (Ɛfi. 4:13) A nɔ pa kɛɛsiaa le diomndaŋ veeloo o Baabuiyo niŋ lepaa o lepaa? A cho pa kɛɛsiaa tolɔɔ kɔɔli le pɛɛku num ipilayaa, nduyɛ ma wa kindiŋndo o nɛi o nɛi niŋ le teleŋndo nɔɔ o lɔɔ o lɔɔ bɛŋgu le pɛɛku leyuŋgoo tosaa? Te a wa pɛ Diom Mɛlɛkaa yaasiaa, wa yekeŋ le sɔɔŋ Baabui mala numndoŋ chɔɔ walaŋ a mɛɛ yiyaŋ Chɛhowaa cho yɛ. Nduyɛ, kindiŋ ma tol sawala Baabuiyo kɔɔli, ma tiindaŋ o laŋ choo te a wa pɛ kɛɛsiaalaŋ tosaa. Nduyɛ sɔɔŋguu Chɛhowa ikɛi kpɛɛluŋ.

10. Vɛɛ kɔlkaloo mala yɛ Kilisiɔŋnɔ cho kaasoŋnɔɔ o Mɛlɛka piɛiyo niŋndo lɔɔlɔɔ o yoomu ndɔɔ niŋ?

¹⁰ Kilisiɔŋnɔ cho kaasoŋnɔɔ o Mɛlɛka piɛiyo niŋndo nɔ sinapɛŋgoo maa o cho ko kɔlkaloo le yeemaŋ te. Le handɔɔ o nyɛ o sina wo choo, vɛɛ kpɛ o kaala yɛ sawala Chɛhowalaŋ, a kaala ndɔlaŋ? Nyɛ chɔm maa ŋ nɔ kaala suu waa naa wo  cho kpeleŋndaŋ kɛɛsioo o yoomu naa niŋ ni, la chɛlaŋ a hɛnaŋ Chɛhowaa wo, o cho yiyaŋnda wanachioo le. Kilisiɔŋnɔɔ hoo kiisaŋ vɛlɛ le mbo “mal” kaa ndɔ paandoo le. Te Kilisiɔŋnɔɔ tosa pɛ siŋgaŋ waa lende, o wounuŋ wana chieeyɛi sɛnɛi Kilitiei i “Mɛlɛka toosiaa hei le waa maa ndu pila ve. O koŋ, mi la wa o nɛi tonyaa choo, koŋ cho ni, mi la simnuŋ wanaa cho sakpo, nduyɛ, mi la wa a yɔŋgaŋ o Mɛlɛka lo.” (Nuawɔ Ɛfisiaŋnda 4:22-24.) Nynina diandaa Mɛlɛkaa mala wanaa poonyiaa Baabuiyo wa ni. Te Kilisiɔŋnɔɔ wa pɛ kɔlkalu yiŋgoloŋndo sɔlaa, nduyɛ mbo nɔ kaalaa le sawala Baabuiyo, mɛɛ o kumbi kɔl ndɔɔ a yiyaŋ ndɔɔ le mi nyina diandaa chɔm ndu nɛiyo. Koŋ mala le hiouwɔɔ lachioo tosaa o Mɛlɛka piɛiyo niŋ ni.

11. Yɛɛ ndoo yɔŋnuŋ yɛ Chiisu teleŋ o wa a yuŋgu ndɔɔ vɛlɛ a buɛiyaa nduaa wo?

¹¹ Chiisu cho wana haki le. Nduyɛ o wa latulu a waŋchieeyaa lahakiaa teleŋ o wa o chieeŋndo choo wo. Wanaa lahakiaa finya ndɔ a kala ndɔ manda ndu wo wa ni. Nduyɛ, o wa a wanayaŋ ndɔŋ lahakioŋ latulu le wɔsioŋ chalaŋ. Buɛiyaa nduaa wa ndu ikɛi ya bɛɛ ndaa nɔ kɔl landɛi nyɛ nuuviaa chieeŋ nda wa niŋndo. Le tamaseliiyo, tuupa ma dii Chiisu ichɔl koŋ, “mi buɛiyaa nduaa kandu sɛɛŋgiaŋndo nda pila tɛɛŋ le wana wa wana bɛndoo nda tɛɛŋndo.” (Luku 22:24) Kɛ Chiisu ndoo nɔ laalaŋndo maa buɛiyaa nduaa lahakiaa cho hiouwɔɔ lachioo tosa o Mɛlɛka piɛiyo niŋ, nduyɛ ma kila kunda nɔ diompilɔɔ wo. Ichɔl koŋ vɛlɛ, mi Chiisu piɛi o Finya ndɔ lo o choo choo niŋ le mi kaalaa a diompilɔɔ wa kiilaa ndua tɛɛŋ. Mbo piɛi aa, “I cho num piɛi maa tosa mi nda kpou, ma wa diomndo o pilɛ. Finya nuu, tosa a sabu ma wa a mɔɔsaŋ a naa, mɛɛ ya I cho o mɔɔsaŋ a num, mi num bɛɛ ma wa o mɔɔsaŋ a ya yɛ. . . . Ma wa o diom pilɔɔ niŋ, mɛɛ naa ŋ cho o diom pilɔɔ niŋ naa num yɛ.”—Chɔŋ 17:21, 22.

12, 13. (a) Vɛɛ Ɛfisiaŋnda 4:15, 16 chɔm yɛ maa diompilɔɔ yeemaŋ o kundaa niŋ? (b) Vɛɛ puaapilɛnɔ pilɛ tiu yɛ dialuŋ vilɛi ndoo nɔ woŋ ba, nduyɛ vɛɛ o pɛɛku yɛ le kaa diompilɔɔ nɔɔ?

¹² Mi Kilisiɔŋnɔ cho kaasoŋnɔɔ o Chɛhowa piɛiyo niŋndo hivi diompilɔɔ lachi o kundaa niŋ. (Nuawɔ Ɛfisiaŋnda 4:1-6, 15, 16.) Yiyaŋ naa cho ni maa mi wanaa Mɛlɛkaa wa a mɔɔsaa o diompilɔɔ niŋ. A mɛɛ Diom Mɛlɛkaa chɔm yɛ, mɛɛ miŋ tuisiŋ le diompilɛ waa naa sɔlaa. Puaapilɛnɔ ɔɔ ndepilɛnɔ cho kaasoŋnɔɔ o Mɛlɛka piɛiyo niŋndo nɔ mbo wa wana tuisiaŋ le mbo hiŋ a diompilɔɔ o kundaa niŋ, o yɔŋ bɛɛ mi acheleŋnda wa biondɔŋndo a ndu. Yɛɛ ŋ cho yɛ tosa te puaapilɛnɔɔ ɔɔ ndepilɛnɔɔ benduŋ pɛ a num o kundaa niŋ? Ɔɔ te o wa yɛ mi waŋndo pilaŋ num tana o kundaa niŋ? Baa kaa numndo i cho ni le luɛiyɔɔ o kpuŋndo niŋ a wana koŋ, a suu lɛ o ndu lo le? Ɔɔ a cho kindiŋ le diompilɔɔ tosaa? Kilisiɔŋnɔ cho kaasoŋnɔɔ o Mɛlɛka piɛiyo niŋndo yeema mbo tosa diompilɔɔ, kɛ o cho piɔuwaŋndo le.

¹³ Tafawɔ tamaselii Uvɛ wo. O paandoo niŋ, mi ndoo dɔunuŋ tumbe le sɔɔŋ chaaŋaa nduaa laalaŋnda tosal ndu woŋ. Kɛ, mbo kɛɛsiaa le Baabuiyo a “Insight on the Scriptures” (Étude perspicace des Écritures) soliŋndo kpeku le pɛɛkoo a Deeve okɔɔ. Le yɛɛ? Mi Uvɛ tɛɛsiaa aa, “Mi Deeve cha kaa wɔɔŋ chaaŋaa nduaa laalaŋnda tosal ndu wo. Le tamaseliiyo, mi Masaa Sɔɔl kindiŋ le ndu diyɔɔ, mi waŋnda apum kindiŋ le ndu vii viiyo a poutaŋ, nduyɛ mi laandɔ bɛɛ cha ndu nyɛ fondoo fuu. (1 Saam. 19:9-11; 30:1-6; 2 Saam. 6:14-22) Kɛ Deeve chɛl pesiŋ mi kaa acheleŋnda tɛɛmbuu kaala ndoo nɔ le Chɛhowa wo le. Deeve ndoo nɔ vɛlɛ kɔl inyɛiyo, o yaa nɔ kuee mi nɔ wo. Nyɛ  ya pɛɛku wo mala ya mi siŋga yiyaŋ nuu le biondɔŋnda chaaŋaa niaa laalaŋnda tosalla laŋ. I chɔm lɛ biondɔŋnda ndalaŋ o lepula le. Kɛ, mi kindiŋ le mi diompilɔɔ wa o kundaa niŋ.” Baa yiyaŋ pilɔɔ kpe num bɛɛ nɔ le mi diompilɔɔ wa o kundaa niŋ ni?

14. Chaŋyaŋ suu kuɛɛ Chiisu ndoo hɛli yɛ?

¹⁴ Chiisu ndoo nɔ chaŋyɛi a wana o wana. Wana o wana ndoo yeema le ndu waa ikɛi, puaa, waŋlaanduaa, feleŋguaa, yuuwa, a chuaambuaa. Kɛ Chiisu wa yekeŋ le chaŋyaŋ kpɛɛluŋndoŋ hɛlioo. Mbo dimul kiilaa nduaa dɔu tiindaŋndo o ndu niŋnda aa, “Te la tosa nyɛ ya I dumul nya wo pɛ, mɛɛ ndiaamɔɔwaa niaa nya cho ni.” (Chɔŋ 15:14) Baa num bɛɛ cho pa chaŋyaŋ kpɛɛluŋndoŋ hɛlioo wanaa cho Chɛhowa piɛiyo a kɔllo kpou wa tɛɛŋ? Le yɛɛ hei bɛnda yɛ?

15. Te feleŋguaa tosa chaŋyɛi pɛ a Kilisiɔŋaa cho kaasoŋnda o Mɛlɛka piɛiyo niŋnda, tɔnɔ yɛɛ nda sɔla yɛ?

¹⁵ Paaleŋ le tosa ni mi komɔɔ suu o suu diu nyɛkɛndɛi. Lende koni puaapiliaa naa mala naa le hiouwɔɔ lachi a kaasoŋyɛi sɔlaa o Mɛlɛka piɛiyo niŋ ni. Kɛlɛŋgaa maa feleŋgɔnɔ, a cho kindiŋndo le ma kɛɛsiaa nyɛ ŋ nɔ ma tosa o yoomu numndo niŋndo. I wa bɔɔ suɛi taasi le ma tosa chaŋyɛi a chaaŋaa numaa laalaŋaa nɔ niŋ sinapɛŋgoo tau o Chɛhowa piɛiyo niŋnda, nduyɛ ma wa malaa le diompilɔɔ waa o kundaa niŋnda! Kɛlɛŋgaa o wɔsiŋ hiouwoŋ niŋ, a sɔla niŋ simultaŋ o yoomu ndaa niŋ, a o Mɛlɛka piɛiyo niŋ. Wanaa suu waa ndoo mala num le nɛi sɔviɔɔ tolɔɔ kɔɔli o yoomu numndo niŋ. Chaŋyɛi tuu kpɛiye tosaa a puaapiliaa a ndepiliaa suu waa naa mala num le kɛɛsiaalaŋ tosaa a taasi, nduyɛ ma sɔla kaasoŋyɛi o Mɛlɛka piɛiyo niŋ.—Nuawɔ Hibuluiya 5:14.

16. Vɛɛ bɛnduaa kɔlkaluaa o kundaa niŋ ndaa mala yɛ ndepilɛnɔ feleŋgɔnɔɔ?

¹⁶ Le tamaseliiyo, mi Hɛlka loonuŋ maa, o wɔsi ndɔ mɛɛlaa o sukuu, mi sukuuwaa nda wa o toŋgo pilɔɔ niŋnda wa suukaŋndo a kpeleŋnda nda kɛsilaŋ okɔɔ. A bɔɔbɔɔ wa dɛnɛ sinaa bɛndoo kiltaŋ kɔɔli le halikpeŋ ma sɔla yoomu sɔviɔɔ. Mi Hɛlka duau baltaŋ a chaaŋaa nduaa o kundaa niŋ a hei okɔɔ. Mbo dimi aa, “A bɔɔbɔɔ ndaa chuu ya okɔɔ, nduyɛ ma mala ya tau. Ma dɛɛniaa ya le kɔɔfale lɔɔlɔɔ leŋ tosaa. Okoŋ kɔɔli, mi tosa kɔɔfaleŋ le wɔsilaŋ la ŋuɛɛnu. Nduyɛ I cho a kɔlkɛndɛ suŋsuŋ le mɛɛ ya soliŋ feleŋgɔyɛi nii kpeku o wali Chɛhowaa niŋ yɛ. I tembu kɔl le mɛɛ ya tosa lende yɛ le.”

17, 18. Vɛɛ kaasoŋyɛi o Mɛlɛka piɛiyo niŋ mala yɛ naa le sabu naa peeloo o yoomoo niŋ?

¹⁷ Kindiŋndo le tamasi Chiisu kɛsul naa wo tolɔɔ kɔɔli o yoomu naa niŋ mala naa le hiouwɔɔ lachi leKilisiɔŋndo tosaa. Ŋ cho Chɛhowa sɔɔŋguu ikɛi kpɛɛluŋ, nduyɛ miŋ hiou lachi a yeemɛi nɔɔ le ndu piɛiyo a yoomuma naŋ fau. Buɛi Mɛlɛkaa nɔla mbo ke Chɛhowa nyɛ bɛnda wo te o tosa pɛ hiouwɔɔ lachioo mbo simnuŋ Kilisiɔŋnɔ nɔ kaasoŋyɛi o ndu piɛiyo niŋndo. Mi Chiisu dɛɛniaa buɛiyaa nduaa aa, “Mɛɛ lende koni, nyɛ wawoŋ nyaa nɔ le diondɔɔ ni. Koŋ tosa ni, te waŋnda che pɛ sɔɔŋ kɛndɛŋ nya tosa woŋ, a saŋgala Mɛlɛka Finya nya o cho o fondaŋ ndɔɔ wo.”—Maa. 5:16.

¹⁸ A mɛɛ naŋ che yɛ, Kilisiɔŋnɔ cho kaasoŋnɔɔ o Mɛlɛka piɛiyo niŋndo nɔla mbo hiŋ a kaa kɛndɔɔ o kundaa niŋ. Nduyɛ kaasoŋyɛi hei nɔla mii wa kpendekele a mɛɛ Kilisiɔŋnɔɔ soliŋ kɔl iyama ndɔ iMɛlɛkayaa kpeku yɛ. Vɛɛ kɔl iyama naa mala yɛ naa le kɛɛsiaalaŋ tosaa a taasi? Nduyɛ vɛɛ naŋ chɔm yɛ bɛɛleŋ le kɛɛsiaala chaaŋaa naa laalaŋnda tosa a kɔlta iyamala ndalaŋ ndo? Ŋ cho sɔɔŋ muŋ yaasiaa o buŋgɛi cho lachi ve niŋ.