1, 2. Ni kukura kwa muringo ki oku buri Mukristaayo ashemereire kukorerera? Ha eky’okureeberaho.

OMUKAZI orikumanya kutoorana gye ebijuma omu katare, butoosha tarikuguma naatoorana ebihango byonka nari ebirikuhererukayo kugura esente nkye. Kureka, naatoorana ebijuma ebihiire gye. Naaba naayenda ebijuma ebinuzire, ebiine akahooho, kandi ebirimu ebiriisa. Buzima, naatoorana ebijuma ebikuriire kimwe.

² Omuntu n’obu arikutunguuka akahika aha kwehayo n’okubatizibwa, naaba aine kugumizamu arikukura. Ekigyendererwa kye n’okuba omuheereza wa Ruhanga okuzire. Okukura oku turikugambaho tikw’omubiri kureka n’okw’eby’omwoyo. Entumwa Paulo akahandiikira Abakristaayo omuri Efeso ngu bakaba baine kukura omu by’omwoyo. Akabahiga kuteeraho kuhika ‘aha kugira obumwe bw’okwikiriza, n’okuhika aha kumanya Omwana wa Ruhanga, okuhitsya obu baakubaire abantu bakuru, bakahika aha bukuru obw’orugyero rwa Kristo oruhikire.’—Efe. 4:13.

3. Ni mbeera ki eyaabaire eri omu kibiina kya Efeso erikushushana n’ey’abaheereza ba Yehova hati?

³ Obu Paulo yaahandiikira ekibiina kya Efeso, kikaba kimazire  emyaka mingi kiriho. Baingi omu kibiina ekyo bakaba baahikire aha rurengo rw’ahaiguru omu by’omwoyo. Kwonka, abamwe bakaba baine kugumizamu nibatunguuka. Nikwo n’Abajurizi ba Yehova obunaku obu bari. Ab’eishe-emwe na banyaanyazi-itwe abamwe bamazire emyaka mingi barikuheereza Ruhanga, kandi bakuzire omu by’omwoyo. Kwonka boona buzima nibaba batari ha rurengo rumwe. Nk’eky’okureeberaho, abasya baingi nibabatizibwa buri mwaka, n’ahabw’ekyo nibaba baine kweyongyera kukura. Kandi shi iwe?—Kol. 2:6, 7.   

4, 5. Abakristaayo nibabaasa kutaana bata aha bandi, kwonka niki eki barikushushanisa? (Reeba ekishushani aha kutandika.)

⁴ Waaba nooshwijuma ebijuma ebihiire omu katare, nooreeba ngu ti byona ngu nibishushana. Kwonka, byona nibiba bihiire. Nikyo kimwe, Abakristaayo abakuzire nibabaasa kuba batarikushushanisa eihanga, oruganda, amagara, emyaka, n’okumanya. Kandi nibaba batarikushushanisa entwaza. Kwonka, boona abarikukura omu by’omwoyo, bashemereire kugira emitwarize erikworeka ngu bakuzire. Mu muringo ki?

⁵ Omuheereza wa Yehova okuzire naateeraho kutooreza Yesu, owaatuteereireho eky’okureeberaho ngu tubaase kugyendera omu bigyere bye. (1 Pet. 2:21) Niki eki Yesu yaayorekire ngu nikyo kikuru? Okukunda Yehova n’omutima gwawe gwona n’amagara gaawe goona, n’obwengye bwawe bwona, n’okukunda mutaahi waawe nk’oku orikwekunda. (Mat. 22:37-39) Omukristaayo okuzire naateeraho kukuratira obuhabuzi obwo. Naataho eky’okureeberaho ekirikworeka ngu naayebembeza omukago gwe na Yehova kandi ngu ainiire abandi rukundo y’okwefeerereza.

6, 7. (a) Ni mitwarize ki emwe erikworeka ngu Omukristaayo akuzire omu by’omwoyo? (b) Nituza kwega ki?

⁶ Kwonka nitumanya ngu rukundo ni gumwe aha mitwarize ei omwoyo gurikwera gurikuhwera Omukristaayo okuzire kugira. (Gal. 5:22, 23) Emitwarize endiijo nk’obuteeka, okwerinda, n’okugumisiriza nayo ni mikuru. Neebaasa kumuhwera kuraba omu mbeera zigumire atagizire kiniga, kandi agumisiririze abamureebize atahwaire matsiko. Omu kweshomesa kwe, naagumizamu naasherura emisingye eri omu Byahandiikirwe erikubaasa kumuhwera kutaanisa ekibi n’ekirungi. N’ahabw’ekyo, ebi arikucwamu nibyoreka ngu akuzire omu by’omwoyo. Nk’eky’okureeberaho, naahurikiza omuntu we ow’omunda otendekirwe gye. Omukristaayo okuzire naayoreka ngu n’omucureezi arikumanya ngu emitindo ya Yehova butoosha neekira eye. * Naabuurira amakuru marungi aine obweziriki kandi naayongyera aha bumwe bw’ekibiina.

⁷ N’obu twakuba tumazire obwire burikwingana ki turikuheereza Yehova, buri omwe ahariitwe naabaasa kwebuuza ati: ‘Haine ahu nyine kwongyera kutooreza Yesu, reero nkagumizamu kukura omu by’omwoyo?’

8. Yesu akaba naayetegyereza Ebyahandiikirwe kirikwingana ki?

⁸ Yesu akaba naayetegyereza gye Ekigambo kya Ruhanga. Nangwa n’obu yaabaire aine emyaka 12, akabaasa kugaaniira aha Byahandiikirwe n’abeegyesa b’omu hekalu. ‘Abaamuhuriire boona, bakatangaarira obwengye bwe n’eby’okugarukamu  bye.’ (Luk. 2:46, 47) Bwanyima, Yesu omu buheereza bwe omu nsi, akahunamisa boona abaabaire nibamuhakanisa arikujuriza Ekigambo kya Ruhanga.—Mat. 22:41-46.

9. (a) Omukristaayo orikwenda kutunguuka aine kugira ntebeekanisa ki ey’okwega Baibuli? (b) Ekigyendererwa ky’okweshomesa Baibuli niki?

⁹ Kuhikaana n’eky’okureeberaho kya Yesu, Omukristaayo orikwenda kukura omu by’omwoyo tarikumarwa n’enyegyesa za Baibuli ezirikutandikirwaho. Butoosha naacondooza aha bintu ebigumire, arikumanya ngu “eby’okurya ebigumire bishemereire abakuru.” (Heb. 5:14) Hatariho kubanganisa, Omukristaayo okuzire naaba naayenda kutunga okumanya okuhikire okurikukwata aha ‘Mwana wa Ruhanga.’ (Efe. 4:13) Oine entebeekanisa y’okushoma Baibuli buri izooba? Noohamira aha ntebeekanisa yaawe ey’okweshomesa, orikuteeraho munonga kugira obwire bw’okuramya kw’eka buri saabiiti? Waaba nooshwijuma Ekigambo kya Ruhanga, yetegyereze emisingye y’Ebyahandiikirwe erikubaasa kukuhwera kureeba gye emiteekateekyere ya Yehova n’oku arikwehurira. Reero oteereho kugyendera aha misingye ya Baibuli egyo, ogyesigye waaba noocwamu, ekiraakuhwere kuguma nooyirira haihi Yehova.

10. Omukristaayo okuzire ashemereire kukora ki kurugiirira aha kumanya oku aine?

¹⁰ Omukristaayo okuzire aine kukora ekirikukira aha kumanya eki Baibuli erikugamba. Ashemereire kuba naakunda emitindo ya Ruhanga n’emisingye ye. Rukundo nk’egyo nereebekyera aha bi arikwebembeza ebirikuhikaana n’ebi Yehova arikukunda omu mwanya gw’emiteekateekyere y’abantu. Kandi, Omukristaayo okuzire naaba arekire emiteekateekyere n’emitwarize eya ira. Ku arikukora empindahinduka egyo, naagira emitwarize nk’eya Kristo  eyaahangirwe “omu nshusha ya Ruhanga omu kuhikiirira n’okwera okw’amazima.” (Shoma Abaefeso 4:22-24.) Ruhanga akahandiikisa Baibuli arikukoresa omwoyo gwe ogurikwera. Omukristaayo yaaba naayongyera aha kumanya kwe n’oku arikukunda emisingye ya Baibuli, ashemereire kwigura omutima gwe n’ebiteekateeko bye kubaasa kuhwerwa omwoyo gurikwera. Ekyo nikimuhwera kutunguuka omu by’omwoyo.

11. Yesu akaraba mu mbeera ki obu yaabaire naakoragana n’abanyabuzaare n’abeegi be?

¹¹ Obu Yesu yaabaire ari omu nsi, akaba ayetooroirwe abantu abatahikiriire. Akoororwa abazaire abatahikiriire, kandi kumara emyaka akaba naatuura n’abanyabuzaare abatahikiriire. Nangwa n’abakuratsi be abu yaabaire naakunda munonga bakaba baine emiteekateekyere etahikire. Nk’eky’okureeberaho, omu mwabazyo Yesu atakaitsirwe, abeegi be “bakagira empaka, ngu n’oha omuribo orikuteekateekwaho kuba mukuru.” (Luk. 22:24) Kwonka Yesu akaba naamanya ngu abakuratsi be abatahikiriire nibabaasa kukura omu by’omwoyo, kandi barugwemu ekibiina ekirimu obumwe. Omu mwabazyo nigwo gumwe, Yesu akashaba ngu entumwa ze bagire obumwe, arikushaba Ishe ow’omu iguru ati: “Boona babe bamwe, nkaiwe Taata oku ori omuriinye, naanye omuriiwe, nabo babe omuriitwe, . . . ngu babe bamwe nkaitwe oku turi bamwe.”—Yoh. 17:21, 22.

12, 13. (a) Abaefeso 4:15, 16 nihooreka hata ekyetengo ky’okureetaho obumwe omu kibiina? (b) Ow’eishe-emwe omwe akasingura ata obweremwa bwe reero akatandika kureetaho obumwe?

¹² Omuheereza wa Yehova okuzire naareetaho obumwe omu kibiina. (Shoma Abaefeso 4:1-6, 15, 16.) Ekigyendererwa kyaitu n’okureeba abaheereza ba Ruhanga ‘bahamiibwe hamwe’ kandi boona bakwataniise hamwe. Kurugiirira aha Kigambo kya Ruhanga, kubaasa kugira obumwe obu, twine kuba abacureezi. Ow’eishe-emwe nari munyaanyazi-itwe okuzire naareetaho obumwe ahabw’okuba omucureezi, n’obu yaakuba naareeba okutahikiirira kw’abandi. Nootwaza ota waareeba obweremwa bw’ow’eishe-emwe nari munyaanyazi-itwe omu kibiina? Nari omuntu yaakutwariza kubi omu kibiina? Mbwenu shi oine omuze gw’okwombeka ekisiika orikwanga kugamba n’abantu nk’abo abarikuba bakukozire kubi? Nari noyombeka orutindo rw’okugaruraho obusingye n’omuntu ogwo? Omukristaayo okuzire naateeraho kwombeka orutindo omu mwanya gw’okwombeka ekisiika.

¹³ Teekateeka ahari Uwe. Enyima akaba aikiriza okutahikiirira kw’abandi kumugwisa kubi. Bwanyima akacwamu kukoresa Baibuli n’ekitabo Insight on the Scriptures kwega ebirikukwata ahari Daudi. Ahabw’enki yaacwiremu kwega ebirikukwata ahari Daudi? Uwe naashoboorora ati: “Daudi akareeba emitwarize mibi y’abaheereza ba Ruhanga bagyenzi be. Nk’eky’okureeberaho, Omugabe Saulo akateeraho kumwita, abantu abamwe bakaba nibenda kumuteera amabaare, nangwa n’omukazi we akamujuma. (1 Sam. 19:9-11; 30:1-6; 2 Sam. 6:14-22) Kwonka Daudi taraikiriize emitwarize y’abandi kutuubya rukundo ye ei yaabaire ainiire Yehova. Kandi, Daudi akaba aine omutima gw’esaasi, ekintu eki naabaire nyine kuteeraho kugira. Ebi naayegire omu kwega okwo bikampwera kuhindura aha ku naabaire nintwara okutahikiirira kw’abaikiriza bagyenzi bangye. Hati tindikuguma ninyijuka enshobe z’abandi. Omu mwanya gw’ekyo, ninteeraho kwongyera aha bumwe bw’ekibiina.” Mbwenu shi naiwe oine ekigyendererwa ky’okwongyera kureetaho obumwe omu kibiina?

14. Ni bantu ba muringo ki abu Yesu yaatooraine kuba banywani be?

¹⁴ Yesu Kristo akaba naakunda abantu boona. Abantu b’emiringo yoona bakaba nibakunda kuba haihi nawe, otwariiremu abashaija, abakazi, eminyeeto, abakuru, n’abaana bato. Kwonka omu kutoorana abanywani ab’ahamara, akaba naayegyendesereza. Akagambira entumwa ze abeesigwa ati: “Muri banywani bangye, ku muraabe nimukora ebi ndikubaragiira.” (Yoh. 15:14) Yesu akaba naatoorana abanywani omuri abo abaabaire nibamukuratira kandi barikuheereza Yehova n’omutima gwabo gwona. Mbwenu shi naiwe nootoorana abanywani omuri abo abarikuheereza Yehova batarikwesaasira? Ahabw’enki eki ni kikuru?

15. Eminyeeto nibabaasa kugasirwa bata baanywana Abakristaayo abakuzire?

¹⁵ Ebijuma by’emiringo mingi nibisya gye byaba biri omu mushana. Nikyo kimwe, rukundo y’ab’eishe-emwe neebaasa kutuhwera kutunguuka omu by’omwoyo. Obundi noobaasa kuba okiri omunyeeto orikwenda kucwamu eki oraije kukora. Ka nikiba kiri eky’obwengye kunywana ab’eishe-emwe bagyenzi baawe abatwire nibaheereza Yehova, kandi barikuteeraho kureetaho obumwe omu kibiina! Kumara emyaka, nibabaasa kuba batwire nibatunga emirabanamu n’oburemeezi omu kuheereza Ruhanga. Abari nk’abo nibabaasa kukuhwera kugira ebigyendererwa birungi. Okugaaniira n’ab’eishe-emwe na banyaanyazi-itwe nk’abo omu muringo gwa rukundo, nikibaasa kukuhwera kucwamu gye n’okutunguuka.—Shoma Abaheburaayo 5:14.

16. Abakuzire omu myaka bakahwera bata munyaanyazi-itwe omuto?

¹⁶ Nk’eky’okureeberaho, Helga naijuka ngu omu mwaka gw’okuhendera emishomo ye, abeegi bagyenzi be bakaba nibagyeragyeranisa ebigyendererwa byabo. Baingi omuribo bakaba nibenda kuza aha yunivasite kubaasa kutunga emirimo mirungi. Helga enshonga egi akagigaaniiraho na banywani be omu kibiina. Naashoboorora ati: “Baingi aharibo bakaba nibankira obukuru, kandi bakampwera munonga. Bakampiga kuza omu buheereza obw’obutwire. Bwanyima, nkabaasa kumara emyaka etaano ndikuheereza nka payoniya. Hati bwanyima y’emyaka mingi, nshemereirwe ahabw’okugira ngu obunyeeto bwangye nkabumarira aha kuheereza Yehova. Tindikwefuuza ahabw’okugira ngu nkacwamu ntyo.”

17, 18. Okutunguuka omu by’omwoyo nikubaasa kutuhwera kuta kuhikiiriza ekigyendererwa kyaitu?

¹⁷ Twateeraho kuteekateeka aha ky’okureeberaho kya Yesu, nikiija kutuhwera kuba Abakristaayo abakuzire. Nitwija kwirira haihi na Yehova, twongyere n’okugira ekyetengo ky’okumuheereza nk’oku kirikubaasika. Omuheereza wa Yehova naabaasa kuha Yehova ekirikukirayo oburungi yaaba akuzire omu by’omwoyo. Yesu akahiga abakuratsi be ati: “Omushana gwanyu gube nikwo gwajwa gutyo omu maisho g’abantu, bareebe emicwe yaanyu emirungi, babone kuhimbisa Shoimwe ori omu iguru.”—Mat. 5:16.

¹⁸ Nk’oku twaba twareebire, Omukristaayo okuzire naabaasa kureetera abandi omu kibiina kukora ebirungi. Kandi okutunguuka nk’okwo, nikubaasa kureebwa kurugiirira aha ku Omukristaayo arikukoresa omuntu we ow’omunda. Omuntu waitu ow’omunda naabaasa kutuhwera ata kucwamu gye? Kandi nitubaasa kworeka tuta ngu nituha ekitiinisa ebi ab’eishe-emwe abandi barikucwamu barikwihirira aha muntu waabo ow’omunda? Nituza kushwijuma enshonga ezi omu kicweka ekirikukurataho.