1, 2. Ki meta tur cristian mester tin? Duna un ehempel.

ORA un ama di cas ta bay supermercado pa cumpra fruta, no necesariamente e ta busca esun di mas grandi of mas barata. Mas bien, e fruta mester smaak bon, hole dushi y mester ta saludabel pa e famia. Cu otro palabra, e ta scoge e fruta hecho of maduro.

² Despues cu un persona batisa, e ta sigui progresa cu e meta pa bira un cristian maduro. Apostel Pablo a anima e cristiannan na Efeso pa sigui haci progreso spiritual. El a anima nan pa sigui haci esfuerso pa “alkansá union den fe i den konosementu di Yu di Dios.” Y el a agrega: “E ora ei nos lo ta hende adulto, ku un madures ku ta igual na perfekshon di Kristu mes.”—Efe. 4:13, BPK.

3. Ki similaridad tin entre e rumannan di Efeso di prome siglo y e pueblo di Dios awe?

³ Tempo cu Pablo a skirbi su carta na e rumannan di Efeso, e congregacion tabata existi pa algun aña caba.  Hopi di e rumannan ya caba a alcansa un grado di madurez spiritual. Pero, algun di nan ainda mester a haci progreso. Awe tambe, hopi ruman cu ta sirbiendo Jehova pa varios aña caba a alcansa madurez. Pero otronan ainda mester haci progreso spiritual, manera e miles di rumannan cu ta batisa tur aña. Con ta cu bo crecemento spiritual?—Col. 2:6, 7.

4, 5. Den ki manera cristiannan maduro ta diferencia for di otro, pero kico nan tur tin en comun? (Wak e prome plachi.)

⁴ Ora bo compara varios fruta hecho cu otro, bo ta ripara cu no ta tur ta identico. Toch nan tin algun caracteristica cu ta mustra cu nan ta hecho. Di igual manera, cristiannan maduro tin diferente nacionalidad, background, edad y experencia. Ademas, nan tin diferente personalidad y cultura. Sinembargo, nan tur a desaroya cualidadnan cu ta demostra cu nan ta spiritualmente maduro. Con asina?

⁵ Wel, un cristian maduro ta purba di imita e ehempel di Hesus den su bida. E ta “sigui su pasonan fielmente.” (1 Ped. 2:21) Hesus a indica cu ta hopi importante pa nos stima Jehova cu henter nos curason, alma y mente, y pa stima nos prohimo mescos cu nos mes. (Mat. 22:37-39) Un cristian maduro ta haci esfuerso pa obedece e conseho ey. Pesey, e cos mas importante den su bida ta su relacion cu Jehova y e amor cu e ta mustra na otronan.

6, 7. (a) Kico ta algun cualidad cu ta identifica un cristian maduro? (b) Kico nos mester puntra nos mes?

⁶ Sinembargo, nos tin cu corda cu amor ta djis un di e cualidadnan di e fruta di spirito cu un cristian maduro ta demostra. (Gal. 5:22, 23) Otro cualidadnan manera suavidad, dominio propio y pasenshi tambe ta importante. E cualidadnan aki por yuda un cristian keda calmo den situacionnan dificil, y ta yud’e trata cu decepcion sin perde speransa. Durante su estudio personal e ta busca principionan cu por yud’e entrena su consenshi pa asina e por distingui loke ta bon for di loke ta malo. Di e manera ey e por tuma bon decisionnan cu ta demostra cu e ta un cristian maduro. Ademas, e ta mustra humildad door di reconoce cu Jehova su manera di pensa y haci cosnan semper ta esun mihor. * E ta haci tur su esfuerso pa predica e bon noticia y promove union den congregacion.

⁷ Sin importa cuanto aña nos tin den e berdad, nos tur mester puntra nos mes: Mi tin cu haci cierto cambionan pa asina imita Hesus mas mihor? Tin caminda cu mi por mehora pa mi sigui crece spiritualmente?

8. Con nos sa cu Hesus tabatin un bon comprondemento di e Palabra di Dios?

⁸ Hesus tabatin un bon comprondemento di e Palabra di Dios. Hasta  ora e tabatin solamente 12 aña di edad, e por a papia cu e maestronan den tempel tocante temanan biblico. “Tur esnan cu tabata scuch’e a keda asombra di su comprondemento y di su contestanan.” (Luc. 2:46, 47) Mas despues, den su sirbishi riba Tera, Hesus a haci bon uzo di e Palabra di Dios pa silencia su opositornan.—Mat. 22:41-46.

9. (a) Ki bon custumber di estudio ta importante si bo kier alcansa madurez? (b) Cu ki meta bo mester studia Bijbel?

⁹ Si un cristian kier alcansa madurez, e tin cu imita Hesus su ehempel. Lo e no keda satisfecho cu un conocemento superficial. Mas bien, e lo tin e bon custumber di profundisa su mes den e Palabra di Dios pasobra e ta compronde cu “cuminda solido” ta pa hende maduro. (Heb. 5:14) Un cristian maduro lo kier haya un “conocemento exacto di e Yiu di Dios.” (Efe. 4:13) Lo ta bon pa puntra nos mes: Mi tin e custumber di lesa Bijbel tur dia? Mi ta haci estudio personal riba un base regular? Mi ta saca tempo pa adoracion como famia tur siman? Ora bo studia e Palabra di Dios, haci esaki cu e meta pa busca principionan di Bijbel cu por yuda bo haya sa con Jehova ta pensa y sinti. Despues, uza e principionan aki ora bo ta tuma decisionnan. Esaki lo yuda bo hala mas cerca di Jehova.

10. Con un cristian maduro ta mustra cu e ta stima e conseho- y principionan di Dios?

¹⁰ Un cristian maduro sa cu e tin cu haci mas cu djis tin conocemento; e mester stima e consehonan y  principionan di Dios. Con e por mustra esey? Door di haci loke Dios kier en bes di sigui tras di su mes deseonan. E mester cambia su manera di pensa, biba y actua. Di e manera ey, e ta imita e ehempel di Hesus y bisti e personalidad nobo cu ta “crea segun e boluntad di Dios den berdadero husticia y lealtad.” (Lesa Efesionan 4:22-24.) Jehova a laga hende skirbi Bijbel bou di guia di spirito santo. Pesey, ora un cristian ta profundisa su mes den e Palabra di Dios, spirito santo lo yud’e haya mas conocemento y mas amor pa e leynan di Dios. Esaki lo yud’e madura.

11. Kico Hesus a experencia ora e tabata riba Tera?

¹¹ Tempo cu Hesus tabata riba Tera como un homber perfecto, e tabata rondona pa hende imperfecto. Tanto su mayornan como su rumannan tabata imperfecto. Hasta su discipelnan a ser afecta pa e orguyo y egoismo cu tabatin rond di nan. Por ehempel, riba e anochi prome cu Hesus su morto, a lanta “un discusion fuerte entre nan tocante cua di nan tabata esun di mas grandi.” (Luc. 22:24) A pesar di esey, Hesus tabatin confianza cu su discipelnan lo a crece spiritualmente y forma un congregacion uni. E mesun anochi ey, Hesus a haci oracion pa su apostelnan por ta mas uni. El a pidi su Tata: “Pa nan tur por ta un, mescos cu abo, Tata, ta den union cu mi y ami ta den union cu bo, pa nan tambe por ta den union cu nos, ... ya nan por ta un mescos cu nos ta un.”—Juan 17:21, 22.

12, 13. (a) Con Efesionan 4:15 y 16 ta enfatisa e necesidad di promove union den congregacion? (b) Kico a yuda un ruman promove union den congregacion?

¹² Un cristian maduro ta promove union den congregacion. (Lesa Efesionan 4:1-6, 15, 16.) Como cristian, nos mester tin e meta pa ta “harmoniosamente uni” cu nos rumannan y pa coopera bon cu otro. Kico Bijbel ta bisa cu nos tin cu haci pa nos por keda uni cu otro? Wel, nos mester ta humilde. Esey lo yuda nos mantene union a pesar di e imperfeccion di nos rumannan. Pesey, puntra bo mes: Con lo mi reacciona ora un ruman comete un eror? Of ora un ruman ofende mi? Lo mi keda sin papia cu ne? Of lo mi purba di drecha e relacion? Un cristian maduro lo haci tur loke e por pa soluciona e problema.

¹³ Laga nos wak un ehempel di un ruman homber cu yama Uwe. Den pasado, e tabatin e tendencia di laga e imperfeccion di otronan molesti’e. Na dado momento el a dicidi di uza Bijbel y e buki Perspicacia pa analisa e bida di David. Dicon el a scoge David? Uwe a splica: “David a mira e mal comportacion di otro sirbidornan di Dios. Por ehempel, Rey Saul a purba di mat’e, otronan a purba di piedr’e y hasta su mes esposa a haci bofon di dje. (1 Sam. 19:9-11; 30:1-6; 2 Sam. 6:14-22) A pesar di tur esey, David no a laga e mal conducta di otronan afecta su relacion cu Jehova. Ademas, David tabata misericordioso,  esey ta algo cu mi mester a traha riba dje. Loke mi a siña a yuda mi cambia e manera cu mi ta mira e imperfeccion di mi rumannan. Mi no ta keda corda mas riba e foutnan cu hende ta haci. Mas bien, mi ta haci esfuerso pa promove union den congregacion.” Abo tambe ta haci esfuerso pa logra esey?

14. Ken Hesus a scoge como su amigonan?

¹⁴ Hesus tabata amabel cu tur hende. Tanto homber, muher, hoben, hende grandi y hasta mucha tabata sinti nan mes confortabel cu Hesus. Pero e no a scoge cualkier hende como su amigo. El a bisa su apostelnan: “Boso ta mi amigonan si boso ta haci loke mi ta manda boso.” (Juan 15:14) Hesus a scoge amigonan cu tabata siguie fielmente y sirbi Jehova cu henter nan curason. Bo ta imita Hesus door di scoge amigonan cu ta sirbi Jehova cu henter nan curason? Dicon esey ta importante?

15. Con hobennan por beneficia di amistad cu cristiannan maduro?

¹⁵ Mayoria di fruta ta hecha mihor ora nan haya calor di solo. Di igual manera, e calor di nos hermandad, es decir, e amor cu nan ta demostra, por yuda bo alcansa madurez. Kisas bo ta un hoben cu ta pensando riba kico lo bo haci cu bo bida. Si ta asina, lo ta sabi di bo parti pa asocia cu rumannan cu tin hopi aña ta sirbi Jehova y cu ta promove union den congregacion. A traves di añanan, kisas nan a enfrenta contratiempo y hasta por a haya nan mes cu desafionan. Rumannan asina por yuda bo scoge e mihor manera di biba. Bo amistad cu nan por yuda bo tambe pa tuma bon decisionnan y alcansa madurez.—Lesa Hebreonan 5:14.

16. Con rumannan cu mas experencia a yuda Helga?

¹⁶ Un ruman muher cu yama Helga ta corda cu durante su ultimo aña di scol su compañeronan di klas tabata papia tocante nan plannan pa futuro. Hopi di nan kier a bay universidad pa despues nan por haya un bon trabou. El a papia di e asunto cu algun di su amigonan den congregacion. El a bisa: “Hopi di mi amigonan tabata mas grandi cu mi, y nan a yuda mi masha hopi mes. Nan a anima mi pa bay den e trabou di tempo completo, y mi a traha cinco aña como pionero regular. Awor, mi ta contento cu mi por a dedica gran parti di mi hubentud na sirbi Jehova. Mi ta completamente satisfecho cu mi decision.”

17, 18. Con nos por sirbi Jehova lo mihor posibel?

¹⁷ Si nos sigui imita e ehempel di Hesus, esey lo yuda nos bira un cristian maduro. Asina nos lo hala mas cerca Jehova, y nos deseo pa sirbie lo aumenta. Pesey, ta te ora un sirbidor di Dios alcansa madurez, e por sirbi Jehova lo mihor posibel. Hesus a anima su discipelnan: “Laga boso luz briya dilanti di hende, pa asina nan por mira boso obranan excelente y duna gloria na boso Tata cu ta den cielo.”—Mat. 5:16.

¹⁸ Manera nos a mira, un cristian maduro por tin un bon influencia riba e congregacion. Su madurez ta bisto den varios manera. Un di nan ta den e manera cu e ta uza su consenshi. Pues, con nos consenshi por yuda nos tuma bon decision? Y con nos por respeta e consenshi di otronan? Nos lo haya contesta pa e preguntanan aki den e siguiente articulo.