1, 2. ¿Imapajtaj tukuypis kallpachakunanchej tiyan? Sutʼinchay.

MERCADOMAN frutata rantikoj rispaqa, valesqachus manachus kasqanta qhawarinchej, ¿icharí? Astawantaj poqosqachus, miskʼichus, mikhunapaj jinañachus manachus kasqanta qhawarillanchejtaj. Chayta ruwanchej sumaj poqosqa fruta may sumaj kasqanta yachasqanchejrayku.

² Jehovamanta yachakuspa, bautizakuspa imaqa, wiñay tukusqa cristianosman tukuyta munanchej. Wiñay tukusqa cristianoman tukunamanta parlaspaqa mana machuyapuymantachu parlashanchej. Astawanqa kʼacha kaykunata rikuchinamanta, Dioswan amigosta ruwakunamanta ima parlashanchej. Apóstol Pabloqa Éfeso llajtamanta cristianosman ujchasqa kajtinku, Jesusmanta yachakullajtinkupuni ima, Cristo jina “wiñay tukusqa” cristianosman tukunankuta nerqa (Efe. 4:13).

3. ¿Imapitaj Efesopi qotuchakuy, kay tiempomanta qotuchakuykunawan kikin?

³ Pablo Efesopi kaj qotuchakuyman qhelqashajtin, chay qotuchakuypi ashkha hermanos Diosta yupaychaypi wiñay tukusqa cristianosña karqanku. Chaywanpis wakenqa  wiñay tukusqa kanankupaj kallpachakunallankupuni karqa. Kunanpis qotuchakuykunapi ashkha cristianos Diosta unaytaña yupaychashanku, wiñay tukusqa cristianosñataj kanku. Chaywanpis wakenqa wiñay tukusqa cristiano kanankupaj kallpachakunallankupuni tiyan. Sapa wata ashkha runas bautizakunku, paykunaqa wiñay tukusqa cristiano kanankupaj kallpachakunallankupuni tiyan. Qanrí, ¿wiñay tukusqa cristiano kanaykipaj kallpachakunallaykipunichu tiyan? (Col. 2:6, 7.)

4, 5. ¿Imapitaj wiñay tukusqa cristianos mana kikinchu kanku, imapitaj kikillan kanku? (3 paginapi dibujota qhawariy.)

⁴ Poqosqa frutasqa mana tukuyninchu kikisitun kanku, manaqa tukuy tamaños tiyan. Chaywanpis mayqenkunachus sumaj poqosqa kasqanku sutʼi rikukun. Jinallataj wiñay tukusqa cristianoswanpis. Paykunaqa tukuy laya suyusmanta, imaymana costumbresniyoj, imaymana edadniyoj, imaymana gustosniyoj ima kanku. Chaywanpis wiñay tukusqa cristianos kasqankoqa kʼacha kaykunata rikuchisqankupi sutʼi rikukun. ¿Mayqenkunataj chay kʼacha kaykuna kanku?

⁵ Wiñay tukusqa cristianosqa, Jesús jina “ruwana[nkupaj]” kallpachakunku (1 Ped. 2:21). Jesusqa Jehovata tukuy sonqonchejwan, tukuy almanchejwan, tukuy yuyayninchejwan munakunata nerqa. Chantapis runa masinchejta noqanchej kikinchejta jina munakunanchejta nillarqataj (Mat. 22:37-39). Wiñay tukusqa cristianosqa kay yuyaychayta kasukunankupaj kallpachakunku. Chantapis imaynatachus kausakusqankuwan Jehová Diospa amigosnin kay, wajkunaman munakuyta rikuchiy ima aswan sumaj kasqanta rikuchinku.

6, 7. 1) Munakuyta rikuchispapis, ¿ima kʼacha kaykunatawan wiñay tukusqa cristianos rikuchinku? 2) ¿Imatataj tapurikunanchej tiyan?

⁶ Wiñay tukusqa cristianosqa munakuyniyoj kanku (Gál. 5:22, 23). Chantapis kʼachas, pacienciayoj ima kanku, sajra munayninkuwantaj mana atipachikunkuchu. Chʼampaykunapi kaspataj mana usqhayllata phiñakunkuchu, astawanqa imapis mana allin llojsejtin pacienciawan allinchakunanta suyanku. Kay kʼacha kaykunaqa, chʼampaykunapi kajtinku mana phiñakunankupaj yanapan. Bibliata ukhunchashaspataj, imachus allin imatajchus mana allinchu kasqanta yachanankupaj yuyaychaykunata maskʼanku. Yachakusqankuman jinataj ima ruwaytapis ajllanku. Llampʼu sonqos kanku, reparankutaj Jehovaj yuyaychayninman jina, kamachiykunasninman jina kausakuy aswan allin kasqanta. * Chantapis sonqo kʼajaywan sumaj willaykunata willanku, qotuchakuy ujchasqa kananpajtaj mayta kallpachakunku.

⁷ Ashkha watastaña Diosta sirvispapis chayri manapis, tukuyninchej tapurikunanchej tiyan: “¿Imastataj ruwanallaypuni tiyan Jesús jina ruwanaypaj?”, nispa. Kunantaj Jesús jina wiñay tukusqa cristianos kanapaj, kinsa yanapasta qhawarinachej.

8. ¿Imaynatá yachanchej Diospa Palabranta Jesús sumajta rejsisqanta, entiendesqanta ima?

⁸ Jesucristoqa Bibliaj yachachiyninta sumajta rejserqa, entienderqa ima. Sutʼincharinapaj, 12 watitayoj kashaspa templopi  qhepakorqa, yachachejkunawan Diospa Palabranmanta parlananpaj. Tukuy “uyarejkunaqa anchatataj tʼukusharqanku yachayninmanta, kutichisqasninmanta ima” (Luc. 2:46, 47). Aswan qhepamanpis Diospa Reinonmanta willashaspa, enemigosninta Diospa Palabranpa nisqanwan chʼinyachillarqataj (Mat. 22:41-46).

9. 1) Diosta yupaychaypi wiñay tukusqa cristiano kayta munanchej chayqa, ¿imastataj ruwananchej tiyan? 2) ¿Imapajtaj Bibliata ukhunchananchej tiyan?

⁹ Diosta yupaychaypi wiñay tukusqa cristianos kayta munanchej chayqa, Jesús jina ruwananchej tiyan, Bibliaj yachachiynintapis entiendenanchej tiyan. Chaypajtaj Bibliaj ukhu yachachiyninta sumajta ukhunchananchej tiyan, imaraykuchus “khamuna mikh[oyqa] wiñay tukusqa runaspajña” (Heb. 5:14). Chantapis wiñay tukusqa cristianosqa, “Diospa Churinta allinta” rejsiyta munanchej (Efe. 4:13). Chayrayku kaykunata tapurikuna: “¿Sapa pʼunchaychu Bibliata leeni? ¿Sapallaypi Bibliata ukhunchanichu? ¿Sapa semanachu familiapi Diosta yupaychanapaj tantakuyta ruwani?”, nispa. Bibliata ukhunchaspaqa, imatachus Jehová yuyasqanta, sajra imasta rikuspa imaynachus sientekusqanta ima yachakusunchej. Chaytaj ima ruwaytapis allinta ajllanapaj yanapawasunchej. Chantapis Diosman astawan qayllaykuchiwasunchej.

10. ¿Imaynatá wiñay tukusqa cristianos rikuchinku Diospa yuyaychaykunasninta jatunpaj qhawasqankuta?

¹⁰ Imatachus Biblia nisqanta yachaspapis, wiñay tukusqa cristianosqa Jehová Diospa yuyaychaykunasninta jatunpaj qhawanku. ¿Imaynatataj chayta rikuchinku? Jehovaj kamachiykunasninman jina kausakuspa. Chaypajtaj kausayninkuta,  yuyayninkuta, ruwayninkuta ima tijrachinku. Sutʼincharinapaj, wiñay tukusqa cristianosqa, mosoj runa kaywan pʼachawan jina pʼachallikunku “mayqenchus Diosman jina ruwasqa, cheqan kaypi, cheqamanta santo kaypiwan kashan, chaywan” (Efesios 4:22-24 leey). Jehová Diosqa espíritu santonwan yuyaycharqa Biblia qhelqakunanpaj. Chayrayku uj cristiano Bibliata ukhunchan chayqa, Diospa espíritu santon yanapan Bibliamanta astawan yachakunanpaj, astawan munakuyniyoj kananpaj, Diosman astawan qayllaykunanpaj ima.

11. ¿Imayna chaupipitaj Jesús kay Jallpʼapi kashaspa tiyakorqa?

¹¹ Jesusqa juntʼa runa karqa. Chaywanpis kay Jallpʼapi kashaspa pantaj runaspa chaupinkupi tiyakorqa. Sutʼincharinapaj tatasnin, hermanosnin ima pantaj runas karqanku. Yachachisqasninpis wakin kutis imatapis paykunallapaj munaj kanku, jatunchakoj ima kanku. Jesús wañuchisqa kanan karqa chay chʼisipis, “siminakuyta qallarerqanku mayqenninkuchus aswan kurajpaj qhawasqa kananmanta” (Luc. 22:24). Jinapis, Jesusqa wiñay tukusqa cristianosman tukunankupi, ujchasqas kanankupi ima atienekorqa. Chayrayku chay chʼisillataj Tatanmanta mañakorqa imaynatachus paywan, tatanwan ujchasqa kashanku, ajina ujchasqas yachachisqasnin kanankupaj yanapananta. Mañakuyninpitaj nerqa: “Ujlla kanankupaj noqanchej jina”, nispa (Juan 17:20-22).

12, 13. 1) ¿Imapajtaj tukuypis kallpachakunanchej tiyan? 2) ¿Imaynatataj uj hermano yachakorqa qotuchakuy ujchasqa kananpaj yanapakuyta?

¹² Wiñay tukusqa cristianosqa qotuchakuy ujchasqa kananpaj mayta kallpachakunku (Efesios 4:1-6, 15, 16 leey). Tukuypis Diospa llajtan “sumaj ujchasqa” kananpaj yanapakunanchej tiyan. Chaypajtaj llampʼu sonqos kananchej tiyan. Sutʼincharinapaj, ¿imatataj ruwanchej uj hermano pantajtin chayri sonqonchejta nanachinanpaj jina imatapis ruwajtin? ¿Manañachu chay hermanota parlapanchej? Chayrí, ¿chay hermanowan allinyakuytachu maskʼanchej? Wiñay tukusqa cristianos kanchej chayqa, chay chʼampayta allinchanapaj kallpachakusun, nitaj uj jatun chʼampayman tukuchisunchu.

¹³ Uwe sutiyoj hermanomanta parlarina. Payqa wajkuna pantasqankumanta mayta phiñakuyta yachaj. Uj pʼunchaytaj Davidpa kausayninmanta yachakunanpaj Bibliata ukhuncharqa Perspicacia para comprender las Escrituras nisqa libroj yanapayninwan. ¿Imaraykutaj Davidpa kausayninmanta yachakuyta ajllarqa? Pay nin: “Davidqa israelitas pantasqankurayku mayta ñakʼarerqa. Rey Saulpis wañuchiyta munarqa, wakin israelitastaj rumiswan chʼanqaykuyta munarqanku, warminpis pisipaj qhawarqa (1 Sam. 19:9-11; 30:1-6; 2 Sam. 6:14-22). Ajinapi rikukuspapis Davidqa Jehovata munakullarqapuni, paypitaj atienekullarqapuni. Chantapis Davidqa khuyakuyniyoj karqa, noqataj pay jina khuyakuyniyoj kanaypaj kallpachakunallaypuni karqa. Bibliata ukhunchasqayqa wajkuna pantasqankumanta mana phiñakunaypaj yanapawarqa. Kunanqa niña hermanospa pantasqankuta qhawanichu, astawanpis qotuchakuy ujchasqa kananpaj yanapakuni”, nispa. Qanrí, ¿qotuchakuy ujchasqallapuni kananpaj chay hermano jina yanapakuwajchu?

14. ¿Pikunawantaj Jesús masichakoj?

¹⁴ Jesusqa tukuy runaswan kʼacha karqa. Chayrayku payman qharis, warmis, waynas, sipaskuna, machitus, wawitas ima qayllaykuyta atillaj kanku. Jinapis payqa sumajta ajllakorqa pikunawanchus masichakuyta. Uj kuti apostolesninman nerqa: “Qankunaqa kawsaqesniy kankichej, sichus kamachisqasniyta kasunkichej chayqa”, nispa (Juan 15:14). Jesusqa paypa qhepanta tukuy sonqo rejkunallawan, tatanta tukuy sonqo yupaychajkunallawan masichakoj. Noqanchejpis Jehovata tukuy sonqo yupaychajkunallawan masichakunanchej tiyan. ¿Imaraykú?

15. ¿Imaraykutaj may allin waynas chayri sipaskuna wiñay tukusqa cristianoswan masichakunanku?

¹⁵ Frutasqa ruphaypi kaspa aswan usqhayllata poqonku. Ajinallatataj Diospa llajtanpi munakuy kasqan, wiñay tukusqa cristianosman tukunanchejpaj yanapawasunman. Qan wayna chayri sipas kanki chayqa, ¿imatachus kausayniykipi ruwanaykita yachankiñachu? Kausayniykipi imatapis allinta ajllayta munanki chayqa, qotuchakuy ujchasqallapuni kananpaj yanapakoj hermanoswan, ashkha watastaña Diosta yupaychaypi llankʼaj hermanoswan ima masichakuy. Chay hermanosqa ichá kausayninkupi, Diosta yupaychayninkupi ima chʼampaykunapi rikukorqanku. Paykunawan masichakuytaj allinta kausakunaykipaj, imatapis sumajta ajllanaykipaj, wiñay tukusqa cristiano kanaykipaj ima yanapasonqa (Hebreos 5:14 leey).

16. ¿Imaynatataj hermanos yanaparqanku Helqa sutiyoj hermanata?

¹⁶ Helga sutiyoj hermanaqa yuyarikun colegiota tukuchashajtinña, compañerosnin imatachus qhepaman ruwanankumanta mayta parlasqankuta. Chay compañerosninmanta ashkhastaj sumaj profesionniyoj kanankupaj universidadman yaykuyta munasqankuta nisqanku. Chaywanpis Helgaqa qotuchakuyninmanta wiñay tukusqa hermanospa yuyaychayninkuta maskʼarqa. Chay hermanosmanta wakenqa paymanta kurajkuna karqanku. Helga nin: “Chay hermanosqa mayta yanapawarqanku. Diospajtaj astawan llankʼanaypaj kallpachawarqanku”, nispa. Chay yuyaychasqankuta kasukusqanraykutaj phishqa watasta precursora regular jina llankʼarqa. Chayta ruwasqanmanta ashkha watasña pasajtinpis, sipas kashaspa Diospaj astawan llankʼasqanmanta mana pesachikunchu.

17, 18. Jehovapaj astawan sumajta llankʼayta munanchej chayqa, ¿imatataj ruwananchej tiyan?

¹⁷ Jesús jina ruwasunchej chayqa, wiñay tukusqa cristianosman tukusunchej. Chantapis Jehovaman astawan qayllaykusunchej, astawantaj payta sirviyta munasunchej. Ajinamanta Diospaj aswan sumajta llankʼayta atisunchej. Jesús yachachisqasninman nerqa: “Kʼanchayniykichejqa kʼanchachun runaspa ñawpaqempi, paykuna allin ruwasqasniykichejta rikuspa, janaj pachapi kashaj Tataykichejta jatunchanankupaj”, nispa (Mat. 5:16).

¹⁸ Rikunchej jina, wiñay tukusqa cristianosqa qotuchakuyta mayta yanapayta atinku. Chantapis wiñay tukusqa cristianos kasqankoqa, sonqo yuyayninku llimphu kasqanpi rikukun. ¿Imaynatataj sonqo yuyayninchej imatapis allinta ajllanapaj yanapawanchej? ¿Imaynatataj wajkunaj sonqo yuyayninkuta jatunpaj qhawasqanchejta rikuchinchej? Qhepan yachaqanapi chaymanta astawan yachakusun.