1, 2. Хер бир месихчиниң нәхили максады бар? Мысал гетириң.

ХОҖАЛЫКЧЫ аял базардан миве сатын алмакчы боланда, улы я-да арзан ир-иймишлери дәл-де, говы бишенлерини ве терҗелерини сайлаяр. Шейле-де ол мивелериң тагамлы, якымлы ыслы ве ёкумлы болмагының аладасыны эдйәр. Шейлеликде, ол бишип етишен гөк-өнүмлери сатын аляр.

² Адам Ехова барада билим аландан соңра сувда чокундырылмак карарына гелйәр ве Худай билен достлугыны хас-да беркитмек ислейәр. Шейле-де ол рухы тайдан етишен, ягны өсен месихчи болмагы максат эдинйәр. Рухы тайдан өсмеклик Ехова билен берк достлашмагы аңладяр. Павлус ресул эфесли месихчилере хат язып, рухы тайдан өсмеги маслахат берди ве «иманда, Худайың Оглуны танамада бирлиге, кәмиллиге, Месихиң долулыгындакы етишенлик дереҗә етмәге» хөвеслендирди (Эфес. 4:11).

3. Эфесли месихчилер билен шу гүнки Ехованың Шаятларының нәхили меңзешлиги бар?

³ Павлус эфеслилере хат язанда, ол шәхерде энчеме йыл бәри месихчилер йыгнагы барды. Шәгиртлериң  көпүси рухы тайдан говы өсенди. Эмма кәбир месихчилер Ехова билен достлугыны хас-да беркитмелидилер. Шу гүнлерем Ехованың Шаятларының арасында шейле ягдайы гөрсе боляр. Көп доган-уялар энчеме йыл бәри Худая гуллук эдип, рухы тайдан берк дурлар, йөне хемме месихчилериң рухы ягдайы меңзеш дәл. Меселем, хер йыл мүңлерче адам сувда чокундырыляр. Диймек, олар рухы тайдан өсмек үчин көп тагалла этмели. Сиз барада нәме дийсе болар? (Кол. 2:6, 7).

4, 5. Рухы тайдан берк месихчилер нәмеде тапавутланярлар ве оларың нәхили меңзешлиги бар? (Макаланың башындакы сурата середиң).

⁴ Сиз базардакы гөк-өнүмлериң бири-биринден тапавутланяндыгыны гөрйәнсиңиз. Йөне бишен гөк-өнүмлериң өзболушлы меңзешлиги боляр. Шонуң ялы, рухы тайдан берк месихчилер бири-биринден миллети, алан тербиеси, яшы, саглык ягдайы, теҗрибеси, хәсиетлери ве медениети билен тапавутланярлар. Эмма рухы тайдан берк месихчилер бирмеңзеш хәсиетлери өсдүрйәрлер. Нәхили хәсиетлери?

⁵ Рухы тайдан өсен месихчилер Исадан гөрелде алярлар ве онуң «ызыны алып гөтерйәрлер» (1 Пет. 2:21). Иса шәгиртлерине нәхили ваҗып зады өвретди? Ол Ехованы бүтин йүрегиң, җаның, дүшүнҗәң билен сөймеги ве гоңшыңы өзүң кимин говы гөрмеги үндеди (Мат. 22:37—39). Рухы тайдан берк месихчилер шу маслахата эермәге җан эдйәрлер. Шейле-де олар Ехова билен достлуклы гатнашыгыны гыммат сайярлар ве адамлары йүрекден сөййәрлер.

6, 7. а) Рухы тайдан беркемек үчин нәхили хәсиетлери өсдүрмели? б) Биз өзүмизе нәхили сораг бермели?

⁶ Рухы тайдан берк месихчи мукаддес рухуң мивеси болан сөйги хәсиети билен тапавутланяр (Гал. 5:22, 23).Шейле-де юмшак болмагы, өзүңе эрк этмеги ве сабырлы болмагы өвренмек хем ваҗып. Шейле хәсиетлер кынчылыкларда гахарланмагың дерегине, өзүңе эрк этмәге ве лапыкеч боланда умытлы болмага көмек эдйәр. Рухы тайдан берк месихчи шахсы окувында ягшы-яманы сайгармага көмек эдйән принциплери чуңңур өвренйәр. Шол себәпли-де, онуң гелйән карарларындан рухы тайдан берк месихчидиги гөрүнйәр. Меселем, ол Худайың Сөзүне гөрә тербиеленен ынсабына гулак асяр. Рухы тайдан берк месихчи өз пикирини гөгертмән, гайтам, хемише Ехованың гөркезмелерине ве када-канунларына кичигөвүнлик билен табын боляр *. Шейле-де ол хош хабары ыхласлы вагыз эдйәр ве доган-уяларың арасында агзыбирлиги саклаяр.

⁷ Ехованың хер бир гуллукчысы нәче йылдан бәри гуллук эдйәндигине гарамаздан, өзүне шейле сорагы берип билер: «Мен Исаның гөрелдесине эермек ве рухы тайдан өсмек үчин ене нәме этмели?»

8. Исаның Мукаддес Язгылары говы билйәндиги нәмеден гөрүнйәр?

⁸ Иса Месих Худайың Сөзүни өрән  говы билйәрди. Ол 12 яшында ыбадатханада мугаллымлар билен Худайың Сөзи хакда гүррүң эдйәрди. «Исаны диңлейәнлериң бары Онуң пайхасына, берйән җогапларына хайран галярдылар» (Лука 2:46, 47). Ол өзүне гаршы чыкан адамлара Мукаддес Язгылардан аят айданда, хич ким оңа сөз гатып билмейәрди (Мат. 22:41—46).

9. а) Рухы тайдан өсмек ислейән месихчиниң нәхили эндиги болмалы? б) Биз Мукаддес Язгылары нәме үчин өвренмели?

⁹ Исаның гөрелдесине эерип, рухы тайдан беркемәге җан эдйән месихчи Мукаддес Язгыларың эсасы таглыматларыны өвренмек билен чәкленмейәр. Ол «агыр дамагың кемала геленлере» берилйәндигини билйәр ве Мукаддес Язгылары чуңңур өвренйәр (Евр. 5:14). Рухы тайдан өсен месихчи «Худайың Оглуны танамак» ислейәр (Эфес. 4:11). Сиз Мукаддес Язгылары хер гүн окаярсыңызмы? Сиз хер хепде шахсы ве машгала окувыны гечирйәрсиңизми? Сиз Мукаддес Язгылары өвренениңизде, Ехованың гарайшына ве дуйгусына дүшүнмәге көмек эдйән принциплери тапмага чалышың. Эгер сиз шол принциплере гөрә карара гелсеңиз, Ехова билен достлугыңызы беркидип билерсиңиз.

10. Рухы тайдан өсен месихчилер Худайың маслахатына ве када-канунларына нәхили гарамалы?

¹⁰ Рухы тайдан өсен месихчи диңе бир билим алмагың етерлик дәлдигине дүшүнип, Худайың маслахатыны ве када-канунларыны чуңңур сөймеги өвренйәр. Шонда месихчи өзүниң дәл-де, Ехованың ислегине гөрә яшап, өңки гарайшыны ве эдим-гылымыны «эгнинден  чыкармага» тагалла эдйәр. Ол «чын догрулык хем мукаддесликде Худайың меңзешлигинде дөредилен» месихи хәсиетлери өсдүрйәр (Эфеслилер 4:22—24-нҗи аятлары окаң). Билшимиз ялы, Худай Мукаддес Язгылары өз рухы аркалы яздыртды. Шол себәпли месихчи Худайың Сөзүни чуңңур өзлешдирмели ве ондакы када-канунларына болан сөйгүсини артдырмалы. Шонда ол мукаддес рухуң көмеги билен йүрегини ве гарайшыны өзгердип, рухы тайдан беркәп билер.

11. Иса ер йүзүнде яшанда нәхили ягдайлара душ гелди?

¹¹ Иса кәмил болса-да, бикәмил адамларың арасында өнүп-өсди. Оны бикәмил ата-энеси тербиеледи ве ол бикәмил доган-уялары билен яшады. Хатда Исаның иң якын ёлдашлары болан ресуллар хем шөхратпаразлык ве текепбирлик рухуның тәсирине дүшдүлер. Меселем, Исаның өлмезиниң өң янындакы гиҗеси ресуллар өз «араларында хайсысының улы сайылмалыдыгы барада чекишме туруздылар» (Лука 22:24). Эмма Иса ресулларың бикәмиллигине гарамаздан, агзыбир болуп, рухы тайдан беркеҗекдигине умыт эдйәрди. Шол себәпли Иса шол гиҗе ресулларының агзыбир болмагы үчин гөкдәки Атасына шейле дога этди: «Оларың хеммеси бир болсун. Ата, Сениң Менде, Мениңде Сенде болшум ялы, олар-да бизде болсун... бизиң бир болшумыз ялы, олар-да бир болсун» (Яхя 17:21, 22).

12, 13. а) Месихчилер нәхили максат гойярлар? б) Бир доган агзыбирлиги сакламак үчин нәме этди?

¹² Рухы тайдан өсен Ехованың гуллукчысы йыгнагың агзыбирлигине гошант гошяр (Эфеслилер 4:1—6, 15, 16-нҗы аятлары окаң). Худайың халкы бири-бири «билен багланып бирикмеги» ве эгинме-эгин ишлешмеги максат эдинйәр. Худайың Сөзүнде агзыбирлиги сакламак үчин кичигөвүнли болмагың ваҗыпдыгы айдыляр. Рухы тайдан өсен, кичигөвүнли доган-уялар әхли ягдайларда, хатда башгаларың кемчиликлерини гөренлеринде-де, агзыбирлиги сакламага җан эдйәрлер. Сиз доган-уяларың бикәмиллигине нәхили гараярсыңыз? Сизиң гөвнүңизе дегенлеринде нәме эдйәрсиңиз? Сиз олар билен геплешмекден гача дурярсыңызмы? Я-да сиз олар билен достлугыңызы беркитмәге җан эдйәрсиңизми? Элбетде, рухы тайдан берк месихчилер гөчме маныда өз араларында дивар дәл-де, көпри гурярлар, ягны агзалылыгы дөретмегиң дерегине, агзыбирлиги дикелдйәрлер.

¹³ Гелиң, Уве доган билен болан вака середелиң. Ол өң имандашларының кемчиликлерини гөренде, рухдан дүшйәрди. Шонда ол Худайың Сөзүнден ве «Мукаддес Язгылара дүшүнмек» атлы китап аркалы Давудың башдан гечирен вакаларыны окаяр. Ол нәме үчин Давут патыша барада гызыкланяр? Уве шейле гүррүң берйәр: «Давут Худайың кәбир гуллукчыларының кануна гөрә яшамаяндыгыны гөрйәрди. Меселем, Шавул патыша Давудың җанына каст этмек иследи, кәбирлери Давуды дашлап өлдүрҗек болдулар, хатда аялы-да онуң үстүнден гүлди (1 Шам. 19:9—11; 30:1—6; 2 Шам. 6:14—22). Эмма Давут Ехова болан сөйгүсиниң совамагына хич бир зада ёл бермеди. Менем Давут ялы рехимдар  болмага чалышярын ве имандашларымың кемчиликлерине догры гарайышда болмагы өвренмек үчин шахсы окувы гечирйәрин. Мен инди өйке-кине этмән, агзыбирлиги сакламак үчин тагалла эдйәрин». Сизем агзыбир яшамага җан эдйәрсиңизми?

14. Иса нәхили адамлар билен достлашярды?

¹⁴ Иса Месих адамлар билен говы гатнашык саклаярды. Шол себәпли эркек адамлар, аяллар, гаррылар, яшлар, хатда чагаларам Исаның янында өзлерини аркайын дуйярдылар. Эмма Иса достларыны өрән үнсли сайлаярды. Ол вепалы шәгиртлерине: «Мениң өзүңизе буйранымы берҗай этсеңиз, Маңа достсуңыз» дийди (Яхя 15:14). Иса Ехова вепалы гуллук эдйән ве өз ызына эерйән адамлар билен достлашярды. Сизем Ехова ак йүрекден гуллук эдйәнлер билен достлашярсыңызмы? Бу нәме үчин ваҗып?

15. Яшлар нәме үчин рухы тайдан өсен месихчилер билен достлашмалы?

¹⁵ Гөк-өнүмлериң говы бишмеги үчин Гүнүң шөхлесиниң герек болшы ялы, доган-уяларың билдирйән сөйгүси хем рухы тайдан өсмәге көмек эдйәр. Яшлар, сиз дурмуша гадам басып, йөреҗек ёлуңызы сайламалы болярсыңыз. Сиз теҗрибели ве йыгнагың агзыбирлигине гошант гошян доган-уялар билен достлашсаңыз говы болар. Себәби олар Худая вепалы галмак үчин энчеме кынчылыклара дөз гелип, дурмушың аҗысыны хем сүйҗүсини дадандырлар. Шонуң үчин олар дурмушда иң говы ёлы сайламага ярдам берип билерлер. Шейле доган-уялар билен достлашсаң, олар пайхаслы карара гелмәге ве рухы тайдан өсмәге көмек эдип билерлер (Еврейлер 5:14-и окаң).

16. Доган-уялар яш уя нәдип көмек этдилер?

¹⁶ Гелиң, инди Хелга уя билен болан вака середелиң. Ол сынпдашларының соңкы окув йылында ёкары билим алып, газанчлы иш тапмагы максат эдинендиклерини ятлаяр. Хелга уя месихчи достларының берен көмеги барада шейле гүррүң берйәр: «Достларымың көпүси менден хас улудылар ве маңа говы маслахат бердилер. Олар мени долы вагтлы гуллук этмәге хөвеслендирдилер ве мен бәш йыллап пионер болуп гуллук этдим. Хәзир мен яшлык йылларымы Ехова багыш эдендигиме өрән бегенйәрин. Мен гелен карарыма хич хили өкүнмейәрин».

17, 18. Биз нәдип Ехова хас ыхласлы гуллук эдип билерис?

¹⁷ Биз Исаның гөрелдесине эермәге җан этсек, рухы тайдан берк боларыс ве Ехова якынлашып, Оңа хас көп гуллук эдип билерис. Эгер месихчи рухы тайдан өссе, ол Ехова иң говы задыны берип билер. Иса ресулларына: «Сизиң ышыгыңыз адамларың өңүнде шейле парласын велин, олар говы ишлериңизи гөрүп, гөкдәки Атаңызы шөхратландырсынлар» дийди (Мат. 5:16).

¹⁸ Рухы тайдан берк месихчиниң ынсабы догры ишлери этмәге ве йыгнагың агзыбирлигине гошант гошмага хөвеслендирйәр. Бизиң ынсабымыз пайхаслы карара гелмәге нәдип көмек эдйәр? Биз имандашларымызың гелйән карарларына нәхили гараярыс? Бу сорагларың җогабына индики макалада билерис.