1, 2. Mlistu jwalijose akusosekwa kulinjilila kuŵa jwamkomangale mbali japi? Apelece cisyasyo.

JWAMKONGWE jwalunda pakusuma yisogosi kumsika, ngakusagamba kusagula yekulungwa kapena yakutuluka mtengo. Mmalo mwakwe akusasagula yisogosi yejiwu cenene, yakunong’a, yakununjila, soni yakuwoneka cenene. Yisyene, jwalakwe akusasaka yisogosi yekomangale cenene.

² Mundu palijiganyisye ya Yehofa mpaka kwikana pa kubatiswa, akusasosekwa kwendelecela kula mwausimu. Jwalakwe akusasaka kuti aŵe jwakutumicila jwamkomangale jwa Mlungu. Komangala kwatukwambaku kuli kwausimu ngaŵa kwakucilu. Ndumetume Paulo ŵalembile kuti Aklistu ŵa ku Aefeso ŵasosekwaga kula mwausimu. Jwalakwe ŵalimbikasisye kuti ‘ayice ku umpepe m’cikulupi nambosoni pakummanyilila cenene Mwanace jwa Mlungu, aŵe ŵandu ŵacikulile, ŵakwika pa msingu wele Klistu jwayicepo.’—Aef. 4:13.

3. Ana muyaŵelele yindu mumpingo wa Aefeso yikulandana catuli ni mwayiŵelele mumpingo wa Mboni sya Yehofa moŵa agano?

³ Paulo paŵawulembelaga cikalata mpingo wa Aefeso, mpingowo waliji uli upali kala kwa yaka yejinji. Ŵakulijiganya ŵajinji mumpingomo ŵaliji ŵakomangale mwausimu. Nambope ŵane ŵasosekwaga  kulimbicila kuti akule mwausimu. Amu ni mwayiŵelelesoni mumpingo wa Mboni sya Yehofa moŵa agano. Abale ni alongo ŵajinji aŵele ali mkutumicila Mlungu kwandaŵi jelewu soni ali ŵakomangale mwausimu. Nambope pana ŵane ŵakusosekwape kula mwausimu. Mwambone, caka cilicose ŵandu ŵajinji ŵacasambano akusabatiswa, m’yoyo ŵane akusosekwape kulingalinga kuti akomangale mwausimu. Nambi uli wawojo?—Akolo. 2:6, 7.

4, 5. Ana Aklistu ŵakomangale mwausimu akusalekangana m’matala gapi, nambo ana akusalandana pangani japi? (Alole ciwulili cacili kundanda kwa nganiji)

⁴ Pakusuma yisogosi kumsika akusayiwona kuti yisogosiyo yikusaŵa yakulekangana. Nambope, pana yindu yine yayikusalosya kuti yisogosiyi yijiwile. Mwakamulana ni yeleyi, Aklistu ŵakomangale mwausimu mpaka aŵe ŵakulekangana kwakutyocela, umi wawo, kawonece, yaka, soni kamanyilile ka yindu. Mpaka aŵesoni ŵakulekangana umundu kapena ndamo. Nambope, wosope ŵakusakula mwausimu akusaŵa kuti akusya ndamo syawo syampaka syamanyikasye kuti ali ŵakomangale mwausimu. Ligongo cici tukuti m’yoyo?

⁵ Mklistu jwamkomangale mwausimu akusamsyasya Yesu soni “kuya sajo syakwe makusamala mnope.”(1 Pet. 2:21) Yesu ŵagombelecesye ya cindu cakusosekwa mnope. Jwalakwe ŵatite tukusosekwa kumnonyelaga Yehofa ni mtima wetu wosope ni lunda lwetu lyosope soni twanonyeleje ŵacinasi ŵetu mpela mwatukusalinonyelela acimsyewe. (Mat. 22:37-39) Mklistu jwamkomangale mwausimu akusalingalinga kutama mwakamulana ni maloŵega. Yakusatenda pa umi wakwe yikusalosya kuti akusawuwona unasi wakwe ni Yehofa kuŵa wakusosekwa mnope soni akusiŵanonyela mnope ŵandu ŵane.

⁶Tukusamanyilila kuti cinonyelo cili mbali jimo ja cisogosi ca msimu jele Mklistu jwamkomangale mwausimu akusasosekwa kujilosya. (Aga. 5:22, 23) Panasoni mbali sine syakusosekwa mnope mpela kuwusimana mtima, kuligosa, soni kulitimalika. Ndamo syelesi mpaka simkamucisye mundu kuti akatumbila mwacitema soni akajasa mtima pasimene ni yakusawusya. Mundu jwamkomangale mwausimu pakutenda lijiganyo lyapajika akusawungunya Malemba gampaka gamkamucisye kulekanganya yindu yambone ni yakusakala. Kaneko, cikumbumtima cakwe cecijiganye cenene Baibulo cikusamkamucisya kusagula yakutenda mwalunda. Mklistu jwamkomangale mwausimu akusalosya kuti ali jwakulinandiya ligongo akusamanyilila kuti matala soni ndamo sya Yehofa sili syambone mnope kupunda matala ni ndamo syakwe. * Jwalakwe akusakamula nawo mwamtawu masengo gakulalicila soni akusalimbikasya mkamulano mumpingo.

6, 7.(a) Ana ndamo syambone syapi syasikusammanyikasya Mklistu jwamkomangale mwausimu? (b) Ana citutagulilane ciwusyo capi?

⁷ Cinga tuŵele tuli mkumtumicila Yehofa kwandaŵi jelewu wuli nambo jwalijose jwetuwe mpaka aliwusye kuti, ‘Ana pana mbali sine syangusosekwa kongolela kuti namsyasye cenene Yesu, yampaka yingamucisye kwendelecela kula mwausimu?

8. Ana Yesu ŵagamanyililaga catuli Malemba?

⁸ Yesu Klistu ŵagamanyililaga cenene Maloŵe ga Mlungu. Mwati atamose paŵaliji ni yaka 12, ŵatagulilene ngani sya m’Malemba ni aciŵalimu ŵa m’nyumba jakulambilila. “Wosope ŵaŵampikanilaga ŵasimonjile mnope ni umanyilisi  wakwe soni kwanga kwakwe.” (Luk. 2:46, 47) Pandaŵi jine, Yesu ŵagomece acimmagongo ŵakwe pakamulicisya masengo Maloŵe ga Mlungu mwalunda.—Mat. 22:41-46.

9. (a) Ana ŵakusasaka kula mwausimu akusosekwa kutenda yatuli pakulijiganya Baibulo? (b) Ana cakulinga cakulijiganya Baibulo cili catuli?

⁹ Pakujigalila cisyasyo ca Yesuci, Mklistu jwakusaka kula mwausimu akusasacilila kujipikanicisya cenene Baibulo. M’yoyo, ndaŵi ni katema akusalijiganya mwakusokoka Baibulo ali mkumanyilila kuti “cakulya cakutawuna cili ca ŵandu ŵakomangale mwausimu.” (Ahe. 5:14) Mwangakayicila, Mklistu jwamkomangale mwausimu akusasaka “kummanyilila cenene Mwanace jwa Mlungu.” (Aef. 4:13) Ana akusaŵalanga Baibulo lisiku lililyose? Ana akusakuya ndandanda jawo ja lijiganyo lyapajika, soni kutenda yakomboleka kuti apate lipesa lyakutendela kulambila kwa peŵasa cijuma cilicose? Pakulijiganya Maloŵe ga Mlungu, akusosekwa kulolecesya songa sya m’Malemba syampaka syakamucisye kumanyilila cenene nganisyo sya Yehofa soni mwakusapikanila mumtima. Kaneko, akusosekwa kamulicisya masengo songa sya m’Baibulosyo, soni kusagulaga yakutenda mwakamulana ni songasyo. Pakutenda yeleyi, cacim’ŵandicila mnope Yehofa.

10. Ana umanyilisi wa Mklistu jwamkomangale mwausimu ukusakwaya catuli umi wakwe wa lisiku lililyose?

¹⁰ Mklistu jwamkomangale mwausimu akusosekwa kumanyilila kuti pana yejinji yakusosekwa kutenda ngaŵa kwamba kumanyilila yajikusasala Baibulope. Jwalakwe akusosekwasoni kunonyela matala soni malamusi ga Mlungu. Litala limo lyakulosya kuti akusanonyela yindu yeleyi lili kusacilila kutenda lisosa lya Yehofa ngaŵaga lya ŵandu. Konjecesya pelepa, jwalakwe akusaŵa jwamtawu kuti ‘awule’ ndamo soni yitendo yakwe yakala. Mklistujo pakucenga ndamo soni yitendo yakweyo, akusawala  umundu wakulandana ni wa Klistu, waŵawupanganyisye ‘mwakamulana ni lisosa lya Mlungu soni ukusakuya yakusosecela pa cilungamo cisyesyene ni pa kulupicika.’ (Aŵalanje Aefeso 4:22-24.) Ŵandu ŵalembile Baibulo mwakulongolelegwa ni msimu weswela wa Mlungu. M’yoyo, naga Mklistu akusasacilila kumanyilila yejinji, soni akusajinonyela mnope Baibulo nikuti akunda kuti msimu weswela ulongoleleje mtima soni nganisyo syakwe. Yeleyi yikusakamucisya kula mwausimu.

11. Ana Yesu paŵaliji pacilambo capasi ŵasimene ni yatuli?

¹¹ Yesu paŵaliji pacilambo capasi mpela mundu jwamlama, ŵatamaga ni ŵandu ŵangali umlama. Acinangolo ŵaŵamlelite jwalakwe ŵaliji ŵangali umlama, soni kwa yaka yejinji atemiji ni ŵacinasi ŵangali umlama. Atamosesoni ŵakumkuya ŵakwe ŵasyesyenewo ŵalosyaga mtima wakupoka soni wakulinonyela. Mwambone, cilo cakuti Yesu cawulajigwe malaŵi gakwe, ŵakulijiganya ŵakwe “ŵatandite kangana mnope ya juŵawonekaga kuŵa jwamkulungwa pasikati pawo.” (Luk. 22:24) Nambope, Yesu ŵakwete cikulupi cakuti ŵakumkuya ŵakwe ŵangali umlamawo mpaka akombole kula mwausimu soni kuwutendekasya mpingo kuŵa wakamulana. M’yoyo cilo cicoco, Yesu ŵapopelele ŵakulijiganya ŵakwe kuti aŵe ŵakamulana. Jwalakwe ŵatite: “Nguŵenda kuti wosopeŵa aŵe ŵampepe mpela wawo Atati ni une mwatuŵelele ŵakamulana kuti nombenawo aŵe ŵakamulana ni m’weji, . . . kuti aŵe ŵampepe mpela mwatuŵelelesoni m’weji ŵampepe.”—Yoh. 17:21, 22

12, 13. (a) Ana lilemba lya Aefeso 4:15, 16 likusagombelecesya catuli kusosekwa kwa kutenda yindu yakulimbikasya mkamulano mumpingo? (b) Ana m’bale jwine ŵalijiganyisye catuli kutenda yindu yakulimbikasya mkamulano?

¹² Jwakutumicila jwa Yehofa jwamkomangale mwausimu akusalimbikasya mkamulano mumpingo. (Aŵalanje Aefeso 4:1-6, 15, 16.) Cakulinga cetu cili cakuti Aklistu wosope aŵe ‘ŵataŵigwe pampepe’ soni kuti jwalijose mumpingo akamulaneje ni mjakwe. Mwakamulana ni Maloŵe ga Yehofa, kuti tupakombole kuŵa ŵakamulana tukusosekwa kuŵa ŵakulinandiya. M’bale kapena mlongo jwamkomangale mwausimu akusasosekwa kuŵa jwakulinandiya kuti akamulaneje ni ŵane atamose ali amlemwecesye. Ana mpaka atende yatuli naga m’bale kapena mlongo jwa mumpingo mwawo atesile cakulemweceka? Nambi wuli naga ali ŵalemwecesye wawojo? Ana mpaka atende yindu yampaka yatendekasye kulekangana ni juŵalemwecesyejo? Kapena ana mpaka atende yindu yakuti akamulanesoni ni Mklistu mjawojo? Mklistu jwamkomangale mwausimu akusalinjilila kutenda yindu yakuti akamulanesoni ni mjakwejo ngaŵa yakwalekanganya.

¹³ Kwende tulole cisyasyo ca m’bale jwine lina lyakwe Uwe. Munyumamu jwalakwe ŵatengwice mnope ni yakulemwa ya ŵakulupilila acimjakwe. Nambo jwalakwe ŵaganisisye yakulijiganya ya umi wa Daudi kupitila m’Baibulo soni m’buku ja Insight on the Scriptures. Ligongo cici ŵasagwile yakulijiganya ngani ja Daudi? Uwe ŵatite, “Ŵakulupilila acimjakwe ŵa Daudi ŵamtendelaga yindu yakusakala. Mwambone, Mwenye Sauli ŵasakaga kum’wulaga, ŵandu ŵanesoni ŵasakaga kumsoma maganga, atamose ŵamkwakwe ŵasyesyenewo ŵam’ŵecetele yacipongwe. (1 Sam 19:9-11; 30:1-6; 2 Sam 6:14-22) Nambo Daudi nganakunda kuti yitendo ya ŵandu ŵane yimlekasye kumnonyela Yehofa. Daudi ŵatendelagasoni ŵane canasa, unesoni ngusosekwa kola mtima welewu. Yanalijiganyisyeyi yingamucisye kulola mwakuŵajilwa yakulemweceka ya ŵakulupilila acimjangu. Apano ngangusaganicisyasoni yakulemweceka ya ŵane. Mmalo mwakwe ngulinjilila kutenda yindu  yakulimbikasya mkamulano mumpingo.” Ana wawojosoni akwete cakulinga cakuti atendeje yindu yakulimbikasya mkamulano mumpingo?

14. Ana acimjakwe ŵa Yesu ŵaliji ŵatuli?

¹⁴ Yesu ŵaliji jwagopoka ni ŵandu wosope cinga acalume, acakongwe, ŵacinyamata, ŵacikulile, soni atamose ŵanace. Nambo ŵasamalaga mnope pakusagula ŵandu ŵakunguluka nawo. Jwalakwe ŵasalile ŵandumetume ŵakwe ŵakulupicika kuti, “Cajendelecele kuŵa acimjangu naga akutenda yingwalamulayi.” (Yoh. 15:14) Yesu ŵasagwile acimjakwe pasikati pa ŵandu ŵaŵamkuyaga mwakulupicika soni ŵaŵatumicilaga Yehofa ni mtima wosope. Ana wawojo akusasagulasoni ŵandu ŵakunguluka nawo pasikati pa ŵandu ŵakusatumicila Yehofa mwakulupicika? Ligongo cici kutenda yeleyi kuli kwakusosekwa?

15. Ana kunguluka ni Aklistu ŵakomangale mwausimu mpaka kwakamucisye catuli ŵacinyamata?

¹⁵ Yisogosi yejinji yikusajiwula cenene ni citukuta ca lyuŵa. M’yoyosoni cinonyelo cacikusasimanikwa pasikati pa abale ŵetu mpaka cakamucisye kula mwausimu. Naga ali jwacinyamata jwakusaka kusagula yacacitenda paumi wawo, akusosekwa kunguluka ni ŵakulupilila acimjawo ŵaŵele ali mkutumicila Yehofa kwandaŵi jelewu, soni ŵakusalimbikasya mkamulano mumpingo. Komboleka kuti jemanjaji aŵele ali mkusimana ni yakusawusya paumi wawo soni aŵele ali mkupilila yakusawusya yine yasimeneje nayo ligongo lyakutumicila Yehofa. Kunguluka ni ŵandu mpela ŵeleŵa mpaka kwakamucisye kusagula yakutenda mwalunda, soni kula mwausimu.—Aŵalanje Ahebeli 5:14.

16. Ana acakulungwa ŵane ŵamkamucisye catuli mlongo jwine mumpingo?

¹⁶ Mlongo jwine lina lyakwe Helga, akukumbucila kuti caka ciŵamalisyaga sukulu, acimjakwe ŵam’kalasi ŵanonyelaga kutagulilana yakulinga yawo yamsogolo pa ngani ja majiganyo. Ŵane mwa jemanjajo ŵasakaga kwawula ku yunifesite ni cakulinga cakuti capate masengo gapenani. Nambo mlongo Helga ŵaŵecetene ni acimjakwe ŵakomangale mwausimu ŵa mumpingo mwakwe. Jwalakwe ŵatite: “Ŵane mwa jemanjajo ŵaliji acakulungwa kupunda uneji, mwati ŵangamucisye mnope. Ŵalimbikasisye kuti ndande undumetume wa ndaŵi syosope. Kaneko, nakombwele kutenda undumetume wa upayiniya kwa yaka msano. Sambano papitile yaka, nambo ndili jwakusangalala ligongo naŵisile nganisyo syangu syosope pakumtumicila Yehofa ndili jwacinyamata. Mwati apano ngangusadandaula ata panandi.”

17, 18. Ana komangala mwausimu mpaka kutukamucisye catuli kwanilisya yakulinga yetu?

¹⁷ Kuganicisya mnope ya cisyasyo ca Yesu, kucitukamucisya kula mwausimu. Kucitukamucisyasoni kum’ŵandicila mnope Yehofa, soni tucisacililaga mnope kumtumicila ni mtima wosope. Mundu akusamtumicila cenene Yehofa pakomangele mwausimu. Yesu ŵalimbikasisye ŵakumkuya ŵakwe kuti, “Mlosyeje lilanguka lyenu pameso pa ŵandu, kuti ŵanduwo alole masengo genu gambone soni kuti acimbicisye Atati ŵenu ŵakwinani.”—Mat. 5:16.

¹⁸ Tulijiganyisye kuti Mklistu jwamkomangale mwausimu mpaka aŵe jwakamucisya mnope mumpingo. Mklistu akusawoneka kuti ali jwamkomangale mwausimu pakusagula yakutenda pakamulicisya masengo cikumbumtima cakwe ciŵampele Mlungu. Ana cikumbumtima cetu mpaka citukamucisye catuli kusagula yakutenda mwalunda? Soni ana mpaka tulosye catuli kuti tukusacimbicisya cikumbumtima ca ŵakulambila acimjetu? Tucitagulilana yiwusyo yeleyi mungani jakuyicisya.