1. 1) ¿Kunas Pedror Galilea qotan pasäna? (Aka janankir dibujo uñjjattʼam.) 2) ¿Kunatsa Pedrojj umar chhaqaranttäna?

MÄ ARUMAJJA, Pedrompi mayni discipulonakampejj Galilea qotankasipkänwa, thayajj walpun thaytʼäna. Jupanakajj botetwa qota khurkatar makatasipkäna, ukhamaruw Jesusar qota patanjam jutaskir uñjapjjäna. Pedrosti Jesusarojj sänwa: “Tata, jumästa ukajja: Uma patanjam jutam sitaya” sasa. Jesusasti juparojj sänwa: “Jutaskakimaya” sasa. Pedrosti botet saraqasinjja, jupan ukaruw uma patanjam saräna. Ukham sarkasinsti thayajj wal thaytʼasinkatapwa amuyasïna, ajjsarañatsti umaruw chhaqaranttäna. Ukatwa Pedrojj akham artʼasïna: “¡Tata, waysuta!” sasa. Ukspachaw Jesusajj amparapat katusin Pedror waysüna, ukatsti sarakïnwa: “¡Pisi iyawsañan jaqe!” sasa (Mat. 14:24-32).

2. ¿Kuna toqetsa aka yatichäwin yatjjataskañäni?

² Kunatï Pedrorojj paskäna ukat kunsa yateqsna ukwa aka yatichäwin kimsa toqet yatjjataskañäni: 1) Qalltanjja, kunjamsa Pedrojj Diosar taqe chuyma iyawsäna. 2) Kunatsa qhepat Diosar iyawsäwipajj aynachtʼäna. 3) Kunas wasitampi iyawsäwinïñatakejj  yanaptʼäna. Ukanakat yatjjatañajja, ‘iyawsäwisan chʼamani saytʼatäñatakiw’ yanaptʼistani (1 Cor. 16:13).

3. 1) ¿Kunatsa Pedrojj botet mistusin uma patanjam saräna? 2) ¿Kunsa cristianonakajj niya ukhamarak lurawaytanjja?

³ Kunapachatï Jesusajj “jutaskakimaya” sasin Pedror siskäna ukhajja, Pedrojj botet mistusin uma patanjamwa saräna. Cheqansa Pedrojj iyawsäwinïnwa, ‘kunjamtï Diosajj Jesusar yanaptʼkejja, ukhamarakiw nayarojj yanaptʼitani’ sasaw taqe chuyma confiyäna, ukatwa uma patanjam saräna. Cristianonakajj niya ukhamarak lurawaytanjja. Jesusaw Biblia toqejj jupan arkiripäñasatak invittʼistu, ukatwa Jehová Diosar katuyasisajj bautisastanjja. ‘Jehová Diosampi Jesusampiw yanaptʼitani’ sasaw taqe chuyma confiytanjja, ukatwa bautisasiwaytanjja (Juan 14:1; 1 Pedro 2:21 liytʼañataki).

4, 5. ¿Kunatsa iyawsäwejj wali wakiskirejja?

⁴ Iyawsäwejj wali wakiskiripuniwa, ukaw kuntï jiwaspachpajj jan lurirjamäktan ukanak lurañatak yanaptʼistu (Mat. 21:21, 22). Amuytʼañataki, Pedrojj iyawsäwi laykuw uma patanjam saräna. Jiwasajj ukhamarakiw iyawsäwi laykojj kuntï jiwas pachpajj jan lurirjamäksna ukanak lurawaytanjja. Sañäni, waljaniw nayra sarnaqäwis jaytawaytanjja. Uñtʼapkistu uka jaqenakasa, jan nayrjamäjjatas qhan amuyapjje. Nayra sarnaqäwisjja, Jehová Diosar munasitas laykuw apanukuwaytanjja, Juparakiw ukham lurañatakejj yanaptʼawayistu (Colosenses 3:5-10 liytʼañataki). Ukhamarusa, iyawsäwinïtas laykurakiw Jehová Diosar jakäwis katuyastanjja, Jupampis sum apasiraktanjja. Jehová Diosamp jan yanaptʼatajj janiw kunsa lurkasänti (Efe. 2:8).

⁵ Iyawsäwejja, Supay contra saytʼañatakiw yanaptʼarakistu (Efe. 6:16). Jan waltʼäwinakar saykatañatakis yanaptʼarakistuwa. Jiwasatï Jehová Diosar taqe chuyma confiyañäni, jakäwisan Jupar serviñ nayrar uchañäni ukhajja, kunatï jakañatak munaski ukanakjja Diosajj churistaniwa (Mat. 6:30-34). Diosar taqe chuyma iyawsañäni ukhajja, wiñay jakañwa katoqarakiñäni (Juan 3:16).

6, 7. 1) Pedror ajjsaraykäna uka umasa, qota mathapinakasa ¿kunamp sasispasa? 2) ¿Kunatsa iyawsäwisajj aynachtʼaspawa sasin sistanjja?

⁶ Pedrot parltʼaskakiñäni. ¿Kunatsa uma patanjam sarkasajj ajjsarayasïna? Bibliajj siwa: “Thayajj wal thaytʼasinkatapwa amuythapisïna” sasa (Mat. 14:30). Iyawsäwipaw aynachtʼäna, ukatwa umar chhaqaranttäna. Pedror ajjsaraykäna uka thayasa, uma mathapinakasa, akapachankir jan waltʼäwinakampi sasispawa. Jan waltʼäwinakar saykatañajj wali chʼamäkchisa, Jehová Diosaw yanaptʼistaspa. Ukampis jan waltʼäwinakatak sinti llakisjjsna ukhajja, Diosajj uka jan waltʼäwinakar saykatañatak janis yanaptʼkistaspa ukhamwa amuyjjsna.

⁷ Iyawsäwisajj aynachtʼaspawa, uk janipun armañäniti. Bibliajj akham siwa: ‘Jiwasar apnaqkistu uka juchaw aynachtʼayistaspa’ sasa (Heb. 12:1). Jiwasatï jan waltʼäwinakasat Pedrjam sinti llakissna ukhajja, iyawsäwisajj aynachtʼaspawa. ¿Kunjamatsa iyawsäwisajj aynachtʼaskatap amuysna? Ukatakejj mä qawqha jisktʼanakaw yanaptʼistaspa, uk jichhajj uñjañäni.

8. ¿Kunatsa Diosan arsutanakapar jan confiyjjsna?

⁸ ¿Nayrjamat Jehová Diosan arsutanakapar confiyasktanjja? Jehová Diosajja, ‘niyaw Supayan apnaqat akapach tukjä’ sasaw arsuwayi. Ukampis akapachankir kʼuchirtʼäwinakampi apayassna ukhajja, akapachan tukusiñapatakejj wali jayas faltkaspa ukhamwa amuyjjsna (Hab. 2:3). Jichhajj yaqha toqet parltʼarakiñäni. Jehová Diosajja, ‘Jesusan jiwatap toqew juchanakamajj perdonatäspa’ sasaw sarakistu. Ukampis jiwasatï nayra juchanakasat lupʼiskaksna  ukhajja, Diosajj janis uka juchanakas perdonkistaspa ukham amuyjjsna (Hech. 3:19). Ukatsti, Diosarojj janiw kusisit chuymampi sirvjjsnati ni yatiyiris sarjjaraksnati.

9. Jehová Diosar serviñatï jakäwisan jan nayrankjjaspa ukhajja, ¿kunas pasaspa?

⁹ ¿Nayrjamat Jehová Diosar taqe chuyma servisktanjja? Jehová Diosar taqe chuyma serviñajja, jutïr pachan suma jakasiñ suytʼañatakiw yanaptʼistu. Ukampis Jehová Diosar serviñatï jakäwisan jan nayrankjjaspa ukhajja, ¿kunas pasaspa? Amuytʼañataki, inas suma pagat trabajon irnaqañ qalltsna, Diosar serviñat sipansa trabajow nayrankjjaspa. Ukhamatwa iyawsäwisajj aynachtʼaspa, Jehová Diosarus janirakiw taqe chuyma sirvjjsnati (Heb. 6:10-12).

10. Juchanak perdonasajj iyawsäwinïtaswa uñachtʼaytan sasajja, ¿kunatsa sistanjja?

¹⁰ ¿Perdonasir chuymanïtanti? Mayninakajj chuyma ustʼayapkistu ukhajja, colerasisajj inas jupanakamp jan parljjsnati. Ukham lurasajja, jaqe masisat jan llakisitaswa uñachtʼaysna. Ukampis juchanak perdonasajj Diosar iyawsäwinïtaswa uñachtʼaytanjja. ¿Kunatsa ukham sistanjja? Jehová Diosamp juchanakas perdonayasiñ munstan ukhajja, jaqe masisarojj perdonañasawa (Luc. 11:4). Perdontan ukhajja, Jehová Diosajj kusisiwa, juchanakassa perdonarakistaniwa. Chuymas ustʼayiriru ukhamat ukham lurañat sipansa, Diosampi perdonatäñaw jukʼamp wakiskirejja. Maysa toqetjja, iyawsäwinïñaw perdonañatak wakisi, Jesusan discipulonakapajj uk sum yatipjjäna. Amuytʼañataki, kunapachatï Jesusajj ‘chuyma ustʼayirinakamar perdonapjjam’ sasin discipulonakapar säna ukhajja, jupanakajj sapjjänwa: “Jukʼampi iyawsañ yaptʼapjjeta” sasa (Luc. 17:1-5).

11. ¿Kunsa ewjjtʼa katoqasiñatakejj jan lurañasäki?

¹¹ Bibliarjam ewjjtʼapkistu ukhajja, ¿colerastanti? Maynejj ewjjtʼistu ukhajja, kunjamsa ewjjtʼapajj yanaptʼistaspa ukwa amuytʼañasa. Ukampis ewjja katoqasiñat sipans ewjjtʼirin  pantjasitanakap thaqsna, jan ukajj kuna arunakampis ewjjtʼistu ukak amuyjjsna ukhajja, janiw ewjjapajj yanaptʼkistaspati (Pro. 19:20). Ukhamajj iyawsäwinïñasawa, ewjjtʼirin pantjasitanakap thaqhañat sipansa, Diosjam amuyañatakiw chʼamachasiñasa.

12. Tama sarayir jilatanak contra sapakuti parlasajja, ¿kunsa uñachtʼaysna?

¹² ¿Tama sarayir jilatanak contrati jan walinak parltanjja? Suma Oraqe uñaqeri tunka chachanakan jan wali yatiyäwinakap istʼasajja, israelitanakajj Moisés, Aarón chachanak contraw parlapjjäna. Ukatwa Diosajj Moisesar akham säna: “¿Kunapachkamas aka markajj jiskʼachaskakitani? ¿Kunapachkamas nayatjja pächasisipkakini, jupanak taypina milagronak lurkta ukkhasa?” sasa (Núm. 14:2-4, 11). Diosan uttʼayat chachanak contra parlasajja, israelitanakajj jan iyawsäwinïpjjatapwa uñachtʼayapjjäna. Jiwasatï Diosan uttʼayat jilatanak contra sapakuti parlsna ukhajja, israelitanakjamarakiw iyawsäwisan aynachtʼatas uñachtʼaysna.

13. Iyawsäwisan aynachtʼatas amuystan ukhajja, ¿kunatsa jan sint llakisiñasäki?

¹³ Uñjaniwayktan uka jisktʼanakat yatjjatasajja, inas iyawsäwisan aynachtʼaskatap amuystan. Ukhamächi ukhajj janiw sint llakisiñasäkiti. Amtañäni, apóstol Pedros ajjsarayasïnwa, iyawsäwipas aynachtʼänwa. Apostolonakasa, pisi iyawsäwinïpjjatap laykojj Jesusan cheqañchataw uñjasipjjäna (Mat. 16:8). Pedrosa apostolonakasa iyawsäwin aynachtʼapkchïnsa, kuntï Pedrojj qhepat lurkäna ukaw jiwasatak wali yateqaskayajja.

14, 15. 1) Umar chhaqaranttaskäna ukhajja, ¿kunsa Pedrojj luräna? 2) ¿Kunjamsa Jesusar uñtatas uñachtʼaysna?

¹⁴ Pedrojj umar chhaqaranttaskäna ukhajja, nadañ sum yatitapat ratukiw boter kuttʼaspäna (Juan 21:7). Ukampis Pedrojj janiw uk lurkänti. Jupa pachpa qhespiyasiñat sipansa, Jesusaruw uñtäna, ukatsti “¡Tata waysuta!” sasaw jupar yanap mayirakïna. Jiwasatï iyawsäwisan aynachtʼatas amuyasstan ukhajja, Pedrotwa yateqasiñasa. ¿Kunjamsa jiwasajj uk lursna?

¹⁵ Pedrojj Jesusaruw uñtäna, jiwasajj ukhamarakiw Jesusar uñtañasa (Hebreos 12:2, 3 liytʼañataki). Ukampis janiw jiwasajj kunjamtï Pedrojj Jesusar uñjkäna ukham uñjktanti. Ukhamajj ¿kunjamsa Jesusar uñtsna? Sarnaqäwipata, yatichäwinakapat yatjjatasa, ukhamarak jupat yateqasis sarnaqasaw Jesusar uñtatas uñachtʼaysna. Ukaw iyawsäwis chʼamañchtʼani. Jichhajj kunjamsa Jesusat yateqassna uk mä qawqha yatjjatañäni.

16. Jukʼamp iyawsäwinïñatakejj ¿kunjamsa Bibliat yatjjatañajj yanaptʼistaspa?

¹⁶ Bibliat yatjjatañajj Diosar jukʼamp confiyañatakiw yanaptʼistaspa. Bibliajj Diosan Arupawa, suma ewjjtʼanakanirakiwa, uk Jesusajj sum yatïna (Juan 17:17). Jiwasatï Jesusat yateqasiña, jupjam iyawsäwinïñ munstan ukhajja, sapüruw Biblia liyiñasa, yatjjatañasaraki, yateqatasatsa lupʼiñasarakiwa. Liykasin yaqhep cheqanakat pächasstan ukhajja, jukʼampiw yatjjatañasa. Amuytʼañataki, cheqapunit qhepa urunakan jakasktanjja janicha uka toqet jan pächasiñatakejja, qhepa arunakat parlir profecianakajj kunjamas phoqasiski uka toqetwa yatjjatsna. ‘Kuntï Diosajj jutïritak arsuwayki ukajj phoqasipuniniwa’ sasin confiyañatakejja, kuna profecianakas jichhürunakan phoqasjje uka toqet yatjjatañaw yanaptʼistani. Biblian ewjjanakapar jukʼamp confiyañatakejja, kunjamsa Biblian ewjjanakapajj waljanir yanaptʼawayi ukwa liytʼaraksna (1 Tes. 2:13). *

17. 1) ¿Kunas Jesusarojj jachʼa yantʼanakar saykatañatakejj yanaptʼäna? 2) ¿Kunjamsa jiwasajj jupat yateqassna?

 ¹⁷ Jehová Diosan arsutanakapat lupʼipjjañäni. Jesusajja, kuntï Diosajj jupar churañ amtkäna uka toqetwa lupʼïna. Ukaw jachʼa yantʼanakar saykatañatak yanaptʼäna (Heb. 12:2). Janipuniw akapachampejj apayaskänti (Mat. 4:8-10). ¿Kunjamatsa Jesusat yateqassna? Kuntï Diosajj churañ arsuwaykistu uka toqet lupʼiñasawa. Paraison niyas jakasjjsna ukham amuyasiñasawa. Paraison kun lurañsa munsna ukwa qellqtʼassna, jan ukajj dibujaraksna. Jaktanipkani ukanakat khitinakampis parlañ munsna ukwa mä lista lursna, ukatsti kuna toqetsa jupanakamp parlañ munsna ukanaksa qellqtʼasiraksnawa. Diosajj jiwasarus uka bendicionanak churämawa siskistaspa ukhamwa amuytʼañasa.

18. ¿Kunas jukʼamp iyawsäwinïñatak yanaptʼistaspa?

¹⁸ Jehová Diosaruw iyawsäwi mayiñasa. Diosarojj qollan ajayup mayipjjañamapuniwa sasaw Jesusajj arkirinakapar yatichäna (Luc. 11:9, 13). Iyawsäwejja qollan ajayun achupawa, uka qollan ajayuw jukʼamp iyawsäwinïñatak yanaptʼistani. Ukatjja kunanakatï iyawsäwisar aynachtʼayirjamäki ukanakar saykatañatakisa, Diosarojj yanaptʼa mayiñasarakiwa. Amuytʼañataki, mayninakar perdonañatï jiwasatak chʼamächi ukhajja, Diosaruw iyawsäwsa mayninakar perdonañataki yanaptʼsa mayiñasa.

19. ¿Kunjam amigonaksa ajlliñasa?

¹⁹ Diosar confiyiri amigonak ajllipjjañäni. Jesusajja, wali amuyumpiw amigonakap ajllirïna. Apostolonakaw jupan amigonakapänjja, jupanakajj Jesusar istʼasapuniw sarnaqapjjäna, janirakiw Jesusar jaytapkänti (Juan 15:14, 15 liytʼañataki). Jiwasajj ukhamarakiw suma amigonak ajlliñasa, khitinakatï Diosar confiyapki, Jesusarus istʼapki ukanakaruw ajlliñasa. Amtapuniñäni, suma amigonakajj janiw kunsa imtʼasipkiti. Wakischi ukhasa, purapat ewjjtʼasisaw yanaptʼasipjje (Pro. 27:9).

20. ¿Kunatsa mayninakan iyawsäwip chʼamañchtʼañasa?

²⁰ Mayninakar iyawsäwinïpjjañapatak yanaptʼapjjañäni. Jesusajja luratanakapampisa, arunakapampisa discipulonakaparojj jukʼamp iyawsäwinïpjjañapatakiw yanaptʼäna (Mar. 11:20-24). Jiwasajj Jesusjamarakiw mayninakar yanaptʼsna. Ukham lurañäni ukhajja, iyawsäwisajj jukʼampiw chʼamañchasini (Pro. 11:25). ¿Kunjamsa mayninakar yanaptʼsna? Yatiyir sarasaw yanaptʼsna, ukanwa jaqenakarojj Diosan cheqapuni utjatapa, jiwasat llakisitapa, Bibliajj jupan amuytʼayatäsin qellqatätap qhanañchsna. Tamansa, jilat kullakanakasarojj yanaptʼaraksnawa. Sañäni, maynirutï tama sarayir jilatanak contra parliri istʼañäni ukhajja, janiw jupat jan wal amuyañasäkiti ni jitheqtañasäkisa. Antisas Jehová Diosaru ukhamarak jilatanakar confiyañapatakiw yanaptʼañasa (Jud. 22, 23). Jumatï colegionkasksta ukhajja, kunapachatï profesoramajj ‘jaqejj monot jutatänwa’ sasin yatichani ukhajja, taqe kunas Diosan luratawa sasaw jan ajjsartʼasa qhanañchtʼasma. Ukham lurasajja, profesoramarusa, yateqer masinakamarus yanaptʼasmawa.

21. ¿Jehová Diosajj kamsistusa?

²¹ Kunjamtï yatjjataniwayktanjja, Pedrojj ajjsarayasïnwa, iyawsäwipas aynachtʼarakïnwa, ukampis jukʼamp iyawsäwinïñapatakisa, jan ajjsarañapatakisa Jehová Diosampi Jesusampiw yanaptʼapjjäna. Pedrojj jiwasatak wali yateqaskayawa. Diosajja, Pedrorjamarakiw iyawsäwin suma saytʼatäñatak yanaptʼistani (1 Pedro 5:9, 10 liytʼañataki). Jukʼamp iyawsäwinïñatakejj chʼamachasiñasawa. Ukhamtï lurañänejja, walja bendicionanakwa katoqañäni.