1. (a) Galilea gohuna ai, Petero dekenai dahaka ia vara? (Laulau ginigunana herevalaia.) (b) Dahaka dainai Petero be davara lalonai ia diho matamaia?

HANUABOI ai lai badana ia toa, bona aposetolo Petero bona hahediba taudia haida be Galilea gohuna ai edia bouti amo idia hanaia totona idia hekwarahi noho. Bena idia itaia Iesu be davara latanai ia raka mai. Petero be Iesu ia nanadaia bema ia be davara latanai ia raka diba. Iesu ese Petero ia hamaoroa ia raka mai totona, Petero be bouti amo ia diho bena davara latanai Iesu dekenai ia raka lao matamaia. To, daudau lasi Petero be davara lalonai ia diho matamaia. Dahaka dainai? Badina Petero be lai badana ia itaia bona ia gari matamaia. Petero be Iesu dekenai ia boiboi, bena karaharaga Iesu be iena imana ia dogoatao, bona ia dekenai ia gwau: “Oi abidadama maragi tauna e, dahaka dainai oi daradara?”—Mat. 14:24-32.

2. Hari dahaka do ita herevalaia?

² Petero ena abidadama dainai ia vara gaudia foa do ita herevalaia: (1) matamanai heduru totona Dirava dekenai abidadama ia hahedinaraia dalana, (2) ena abidadama ia manoka matamaia ena  badina, bona (3) Petero ena abidadama ia hagoadaia lou gauna. Unai point toi ese ita do ia durua ‘abidadama dekenai ita gini goada’ totona.—1 Kor. 16:13.

3. Dahaka dainai Petero be bouti amo ia diho? Bona edena dala ai Petero ita tohotohoa diba?

³ Petero ena abidadama dainai bouti amo ia diho bona davara latanai ia raka. Iesu ese ia boiria neganai, ia badinaia sibona badina ia diba Dirava ena siahu amo Iesu ese ia do ia durua. Unai hegeregerena, iseda abidadama dainai eda mauri be Iehova dekenai ita gwauhamatalaia bona ita bapatiso. Iesu ese ita ia boiria ia do ita badinaia, iena aena gabudiai do ita raka. Namona be ita hahedinaraia Iesu bona Dirava ita abidadama henia, badina ita diba dala idauidau ai ita do idia durua.—Ioa. 14:1; 1 Petero 2:21 duahia.

4, 5. Dahaka dainai abidadama be harihari gauna hereadaena?

⁴ Abidadama be harihari gauna namona. Petero be iena abidadama ese ia durua dainai davara latanai ia raka, unai hegeregerena, iseda abidadama ese ita do ia durua taunimanima ese idia karaia diba lasi gaudia ita karaia totona. (Mat. 21:21, 22) Hegeregere, guna ita idia dibaia taudia be ita dekenai idia daradara badina hari iseda lalohadai bona kara ita haidaua. Iehova ita abidadama henia dainai iseda kara amo unai ita hahedinaraia bona ia ese ita ia durua. (Kolose 3:5-10 duahia.) Iehova ita abidadama henia dainai, iseda mauri ita gwauhamatalaia bona iena turana ai ita lao. Unai be sibona eda goada amo ita karaia diba lasi.—Efe. 2:8.

⁵ Iseda abidadama ese ita dekenai goada ia henia noho. Iseda abidadama amo Diabolo ita dadaraia diba. (Efe. 6:16) Danu, bema hekwakwanai idia vara negadiai Iehova dekenai ita tabekau, do ita lalohekwarahi momo lasi. Iehova ia gwauhamata bema ia ita abidadama henia bona Basileia ita atoa guna, ita dekenai mauri durua gaudia do ia henia. (Mat. 6:30-34) Danu, eda abidadama dainai, tanobada taudia ese idia abia diba lasi hahenamo do ita abia, unai be mauri hanaihanai.—Ioa. 3:16.

6, 7. (a) Petero ia itaia lai badana bona hurehure be dahaka ida ita hahegeregerea diba? (b) Dahaka dainai ita gwau diba iseda abidadama ia manoka haraga diba?

⁶ Petero be davara latanai ia raka neganai, lai ia toa bona davara ena hurehure be bada. Dirava ena hesiai taudia danu be lai badana bona hurehure bamona hahetoho idauidau idia davaria. Herevana hahetoho be badadia, to Iehova ena heduru amo ita gini goada diba. Laloatao, Petero be lai badana o hurehure dainai davara lalonai ia diho lasi. Mani ia vara gauna ita laloa lou: Petero be ‘lai badana ia itaia dainai ia gari.’ (Mat. 14:30) Petero be Iesu ia itaia noho lasi, unai dainai ena abidadama ia manoka. Ita danu, bema ‘lai badana ita itaia’ iseda abidadama do ia manoka bona davara lalonai ita diho matamaia diba, unai neganai do ita daradara bema Iehova ese ita do ia durua eiava lasi.

⁷ Baibel ia hahedinaraia “ita idia guia noho kara dika” dainai, iseda abidadama ia manoka eiava abidadama ita haboioa diba. (Heb. 12:1) Petero ena haheitalai ese ia hahedinaraia, bema iseda abidadama idia durua lasi gaudia ita laloa, unai ese iseda abidadama ia hamanokaia haraga diba. Edena bamona do ita diba iseda abidadama ia manoka? Unai ita diba totona, mani henanadai haida ita laloa.

8. Edena dala ai iseda abidadama Dirava ena gwauhamata dekenai ia manoka diba?

⁸ Dirava ena gwauhamata be hari lau laloa bada lasi, a? Hegeregere, Dirava ia  gwauhamata inai tanobada dikana do ia haorea. To, tanobada ena moale karadia idauidau dainai emu abidadama Dirava ena gwauhamata dekenai ia manoka, a? Reana do ita laloa dokona be do daudau. (Hab. 2:3) Haheitalai be inai. Dirava ia gwauhamata mauri davalaia boubou gauna amo iseda kara dika do ia gwauatao. To, bema guna ita karaia kara dikadia dainai ita lalohisihisi noho, do ita daradara bema Iehova ese iseda ‘kara dika ia kokia’ momokani eiava lasi. (Kara 3:19) Bona Dirava ena hesiai gaukara do ita moalelaia lasi bona do ita manoka.

9. Bema sibona eda ura gaudia ita tahua, dahaka ia vara diba?

⁹ Guna lau karaia bamona, lau be Dirava ena hesiai gaukara lau goadalaia noho, a? Aposetolo Paulo ia hahedinaraia bema Dirava ena hesiai gaukara ita karaia goadagoada, ‘iseda helaro do ita dogoatao noho ela bona dokona.’ To, bema eda ura gaudia sibona ita tahua, hegeregere eda hebou karana ia hadikaia diba moni gaukara ita karaia, unai ese dahaka ia havaraia diba? Iseda abidadama ia manoka diba, bona do ita “hesiku,” bona iseda goada hegeregerena Dirava ena hesiai gaukara do ita karaia lasi.—Heb. 6:10-12.

10. Ma haida edia dika ita gwauatao neganai, edena dala ai Iehova dekenai abidadama ita hahedinaraia?

¹⁰ Ma haida edia dika lau gwauatao, a? Haida ese ita idia hadikaia o hahisia neganai, reana do ita badu bona idia ita gwau henia eiava do ita ura lasi idia ita hereva henia. To, bema edia dika ita gwauatao, ita hahedinaraia Iehova ita abidadama henia. Edena bamona? Ita idia kara dika henia taudia be mai edia abitorehai ita dekenai, hegeregere ita be mai eda abitorehai Dirava dekenai. (Luka 11:4) Haida edia dika ita gwauatao neganai, ita hahedinaraia ita ura lasi edia dika ena davana ita henia lou, bona mai anina bada gauna be ita diba Dirava be ita ia lalonamo  henia. Iesu ena hahediba taudia idia diba ma haida edia dika idia gwauatao neganai, abidadama idia hahedinaraia. Iesu ese ena hahediba taudia ia hagoadaia haida edia dika idia gwauatao totona, unai neganai ia dekenai idia noinoi: “Emai abidadama do oi habadaia.”—Luka 17:1-5.

11. Baibel amo ita abia sisiba ese ita do ia durua lasi, bema dahaka ita karaia?

¹¹ Baibel amo lau ia sisiba henia tauna dekenai lau badu, a? Bema ita abia sisiba ena namo ita laloa lasi, do ita laloa sisiba ia henia tauna o ia henia sisiba be kerere. (Aon. 19:20) Bema unai bamona ita karaia, Dirava ena lalohadai do ita badinaia lasi.

12. Bema Dirava ese ia abia hidi taudia dekenai ita maumau momo, unai ese dahaka ia hahedinaraia?

¹² Kongrigeisen lalonai maduna idia huaia tadikaka dekenai lau maumau, a? Israela taudia be spai taudia edia ripoti dikana idia laloa bada dainai, Mose bona Arona dekenai idia maumau. Bena Iehova ese Mose ia nanadaia: “Edena negai lau dekenai do idia abidadama henia?” (Num. 14:2-4, 11) Israela taudia edia maumau karana ese ia hahedinaraia Dirava idia abidadama henia lasi, badina Mose bona Arona be Dirava ena hesiai taudia. Unai hegeregerena, bema Dirava ese ia abia hidi taudia dekenai ita maumau, unai ese do ia hahedinaraia iseda abidadama be ia manoka.

13. Bema ita laloparara eda abidadama ia manoka, dahaka dainai ita lalohisihisi lasi?

¹³ To, bema oi laloparara oi karaia karadia ese idia hahedinaraia emu abidadama ia manoka, oi lalohisihisi lasi. Aposetolo Petero be nega ta ia gari bona ia daradara danu. Momokani, Iesu be nega haida aposetolo taudia ia sisiba henia, badina idia be “abidadama maragimaragi taudia.” (Mat. 16:8) To laloatao, Petero ena abidadama ia manoka bona davara lalonai ia diho murinai ia karaia karana amo mai anina bada gauna ta ita dibaia.

14, 15. (a) Petero be davara lalonai ia diho neganai, dahaka ia karaia? (b) Matana korikori amo Iesu ita itaia diba lasi, to edena dala ai Iesu “ita itaia noho” diba?

¹⁴ Petero be lai badana ia itaia bona davara lalonai ia diho matamaia neganai, bouti dekenai ia nahu lao diba. (Ioa. 21:7) To, sibona dekenai ia tabekau lasi, to Iesu ia itaia bona ena heduru ia abia dae. Bema ita mamia iseda abidadama ia manoka, Petero ena haheitalai ita tohotohoa be namo. To, edena bamona unai do ita karaia diba?

¹⁵ Petero be Iesu ia itaia dainai, ita danu be “iseda abidadama ia Gunalaia Tauna bona ia Hagugurua Tauna, Iesu, ita itaia noho.” (Heberu 12:2, 3 duahia.) Momokani, iseda matana korikori amo Iesu ita itaia diba lasi, Petero ia karaia bamona. To, Iesu “ita itaia noho,” anina be ena hahediba herevadia bona kara ita stadilaia, bona ita badinaia. Iesu ena haheitalai amo ita dibaia gaudia haida mani ita laloa. Bema iseda mauri lalonai ia ita badinaia, heduru do ita abia iseda abidadama ita hagoadaia totona.

16. Edena dala ai Baibel ita stadilaia diba, unai amo eda abidadama ita hagoadaia?

¹⁶ Emu abidadama Baibel dekenai habadaia. Iesu ia diba momokani Baibel be Dirava ena Hereva, iseda mauri dalana totona hakaua hereva namodia ia henia. (Ioa. 17:17) Iesu ena haheitalai ita tohotohoa totona, dina ta ta ai Baibel ita duahia, ita stadilaia, bona ita laloa dobu be namo. Sibona emu Baibel stadilaia karana lalonai, oi daradaralaia henanadai haida edia haere oi tahua. Hegeregere, bema dina gabedia idia herevalaia Baibel siridia ita stadilaia namonamo, unai ese iseda abidadama do ia hagoadaia bona do ita abia dae ita be dina gabediai ita noho. Baibel ena peroveta herevadia vaira negana totona ita stadilaia neganai, vaira negana  namona totona iseda abidadama do ia hagoadaia. Baibel ese taunimanima ia durua daladia ita stadilaia neganai, do ita diba momokani Baibel be iseda mauri lalonai ita ia durua diba. *—1 Tes. 2:13.

17. Dahaka dainai Iesu be hahetoho badadia ia haheaukalaia diba, bona edena dala ai ia oi tohotohoa diba?

¹⁷ Iehova ese ia gwauhamatalaia hahenamo laloa bada. Iesu be ena “vairanai ia noho moalena” ia laloa bada dainai, hahetoho badadia ia haheaukalaia. (Heb. 12:2) Tanobada ena kohu idauidau ese ena abidadama ia hadikaia lasi. (Mat. 4:8-10) Iesu ita tohotohoa totona, Iehova ena gwauhamata namodia ita laloa dobu. Dirava ese inai tanobada dikana ia hagoevaia murinai, do oi ura karaia gauna ta eiava laulau ta oi torea diba. Oi ura hedavari taudia, mase amo do idia toreisi lou taudia unai, edia ladadia be lista ta ai oi torea. Oi ura idia ida dahaka do umui herevalaia oi torea danu. Namona be oi abia dae Dirava ena gwauhamata be oi totona.

18. Edena dala ai guriguri karana ese emu abidadama ia hagoadaia diba?

¹⁸ Abidadama totona oi guriguri. Iesu ese ena hahediba taudia ia hadibaia lauma helaga totona Iehova do idia noia. (Luka 11:9, 13) Abidadama totona oi guriguri be namo, badina abidadama be lauma helaga ena huahua ta. Bema oi be mai emu manoka gaudia haida, hegeregere ma haida edia dika oi gwauatao be auka, namona be Dirava oi noia oi ia durua totona.

19. Edena bamona turadia oi abia hidi be namo?

¹⁹ Abidadama taudia tura henia. Iesu be ena turadia ia abia hidi namonamo, badina ia ida do idia gaukara hebou. Aposetolo taudia be abidadama idia hahedinaraia bona ena hahegani idia badinaia dainai, ena turadia ai idia lao. (Ioane 15:14, 15 duahia.) Unai dainai turadia oi abia hidi neganai, Iesu idia badinaia bona abidadama henia taudia oi tahua. Bona laloatao, tura namona ena kara ta be herevana sisiba idia henia o idia abia, to ta ta ida idia herevahereva namonamo.—Aon. 27:9.

20. Ma haida edia abidadama ia goada totona idia ita durua neganai, dahaka namo ita abia?

²⁰ Haida edia abidadama ita hagoadaia. Iesu be ena kara bona hereva amo ena hahediba taudia edia abidadama ia hagoadaia. (Mar. 11:20-24) Iena haheitalai ita tohotohoa be namo, badina ma haida durua karana ese edia abidadama bona iseda abidadama ia hagoadaia. (Aon. 11:25) Emu haroro bona hahediba gaukara lalonai, taunimanima dekenai oi hahedinaraia Dirava be ia noho, ita ia laloa bada, bona Baibel be ena Hereva. Emu tadikaka bona taihu oi durua edia abidadama idia hagoadaia totona. Bema haida be idia hahedinaraia idia daradara badina maduna idia huaia tadikaka idia maumauraia, idia oi dadaraia haraga lasi. To, idia oi durua, unai amo edia abidadama do ia goada lou. (Iuda 22, 23) Bema oi be sikuli ai bona evolusen idia herevalaia, mai gari lasi ida Dirava ese ia havaraia gaudia oi herevalaia—unai dala amo haida oi durua diba.

21. Ita ta ta eda abidadama dainai, Iehova be dahaka gwauhamata ia henia?

²¹ Iesu be Dirava ena siahu amo Petero ia durua. Unai dainai Petero be ia gari lasi bona daradara lasi, bona Keristani taudia ginigunadia edia abidadama ena du ai ia lao. Unai hegeregerena, Iehova ese ita ibounai do ia durua iseda abidadama dekenai ita gini goada totona. (1 Petero 5:9, 10 duahia.) Namona be ita gaukara goada iseda abidadama ita hagoadaia totona, badina abidadama karana ena hahenamo be momo.