1. (a) Niki ekyahika oku Petero ibane omwa ngetse ye Galilaya? (Lebaya ekisasani ekiri okw’itsuka.) (b) Ni kyahi ekyaleka Petero iniatsuka erithobera?

PETERO n’abandi bakwenda banemughendya obwathu okwa ngetse ye Galilaya omwa kihunga kinene bakanza erighenda okwa wundi musirya. Babere bane aho, bamalhangira Yesu inianemuthandaghira okwa maghetse. Neryo Petero akabirikira oku Yesu n’erimubulya nayu ng’anathandaghire oko maghetse eriya ey’ali. Yesu akabya akamubwira athi ase, Petero akalhua omwa bwathu n’eritsuka erithandaghira okwa mabisunda by’amaghetse. Aliwe akabya akinaghenda, akatsuka erithobera. Busana naki? Mwalhangira ekiyagha, amakwa obuba. Aho n’aho Petero akalhakira Yesu, nayu lhuba-lhuba akamuhamba n’erimubwira athi: ‘Iwe w’erikirirya like, busana naki wulyathika-thika kwehi?’—Mt. 14:24-32.

2. Thukendi kania okuki?

² Thulebaye bindu bisathu ebyabya oku Petero ebihambire okw’ikirirya: (1) ngoku Petero atsuka erikangania kw’awithe erikirirya indi Nyamuhanga akendi muwathikya, (2) ekyaleka Petero iniatsuka erihwa mw’erikirirya, na (3) ekya wathikaya Petero erithasyabya n’erikirirya. Erigha ndeke okwa myatsi eyi kikendi thuwathikya erilhangira  ngoku thwanga “sika omw’ikirirya.”—1 Kor. 16:13.

3. Ni kyahi ekyaleka Petero inialhua omwa bwathu, nethu thwabirikolha ekiri ng’ekyo thuthi?

³ Erikirirya ly’eryaleka Petero inialhua omwa bwathu n’erithandaghira okwa maghetse. Yesu abere amubirikira, Petero mwayikethera ngoku obuthoki bwa Nyamuhanga bukendi muthokesya ngoku bwanabirithokesya Yesu erithandaghira okwa maghetse. Kuthya nethu, erikirirya ly’eryaleka ithwayihayo oku Yehova n’eribatizibwa. Yesu athubirikira erikwama olhughobe lhwiwe lhwa ndeke. Thutholere ithw’ikirirya omu Yesu na Nyamuhanga, n’eriyikethera ngoku bakendi thusighika omwa nzira nyingyi.—Yn. 14:1; soma 1 Petero 2:21.

4, 5. Busana naki erikirirya ni kindu ky’omughaso munene?

⁴ Erikirirya ni ry’omughaso munene kutsibu. Ngoku erikirirya lyanathokesaya Petero erithandaghira okwa maghetse, nethu erikirirya lyo lyanga leka ithwathoka erikolha ebya bandu bakalhangira nga sibyanga thokekana. (Mt. 21:21, 22) Ng’eky’erileberyako, abangyi omw’ithwe babiri hindulha emibere yabu eyabya mibi kutsibu erihika okw’ileka n’ababya babasi kera ibabathaghalhwa. Yehova yuwabawathikaya erikolha esyombinduka esyo, kundi mubakangania ku bamuyikethere. (Soma Abanya Kolosai 3:5-10.) Erikirirya lyethu mulyaleka ithwayihayo oku Yehova, neryo amabya munywani wethu, ekindu ekya thuthe thwanga thokire omwa kaghalha kethu.—Efe. 2:8.

⁵ Erikirirya lyethu likathuha akaghalha. Erikirirya likathuthokesaya erirwanisya enzighu yethu ngulhu, Sitani. (Efe. 6:16) Kandi, eriyikethera Yehova likaleka ithwatha hangya-hangya kutsibu thukabana ebitsibu. Yehova akabugha athi erikirirya lyethu lyamaleka thukahira Obwami bw’embere iniakendi thuwathikya eribana ebya thukayithagha kinyamubiri. (Mt. 6:30-34) Kandi ekikulhu kutsibu, erikirirya lyethu irikendi leka ithwasyabana ekihembo ekya mundu athe angayibanira omwa kaghalha kiwe—ekihembo ky’engebe y’erikotha.—Yn. 3:16.

6, 7. (a) Erihunga n’ebisunda ebya Petero abyamu thwangana bilinganisya naki? (b) Busana naki thutholere ithwabya ithunasi ngoku erikirirya lyethu ryanganahwa?

⁶ Ekiyagha n’ebisunda ebya Petero abyamu akathandaghira okwa maghetse byangana linganisibwa n’ebitsibu n’erilengwako ebya thukabana thwabiriyihayo oku Yehova. Ebitsibu ebi nomubyanga kalha kutsibu, busana n’obuwathikya bwa Yehova, ithukendi sighalha ithunasikire. Wibuke ngoku omutsundu w’ekiyagha n’ebisunda siw’aleka Petero iniathobera. Thasyalengekanaya ngoku byabya: “Omughulhu Petero alhangira erihunga, mw’ubaha.” (Mt. 14:30) Petero mwalengemeribwa, amalhusya amalengekania w’oku Yesu, neryo erikirirya liwe lyamakeha. Nethu kuthya ithwangana tsuka erithobera thwamatsomana ebitsibu byethu ebiri “ng’erihunga,” ithwasagha omutsundo walyo n’erithika-thika thuthi Yehova syendi thuwathikya.

⁷ Thutholere ithwaminya ngoku erikirirya lyethu lyanganakeha kundi e Biblia yikakanganaya ngoku n’erihwa mw’erikirirya ni kighuma ky’okwa “bibi ebikathuhamba.” (Ebr. 12:1) Ngoku kilhangirikire omwa ky’erileberyako kya Petero, erikirirya lyethu iryanganahwa endambi yosi-yosi thwamahwerya amalengekania wethu w’okwa bithatholere. Thwanga minya thuthi ngoku ekyo kikayathubyako? Thulebaye ebibulyo ebyanga thuwathikya eriyiminya.

8. Eriyikethera lyethu omwa milhaghe ya Yehova lyanga tsuka lithi erisebebera?

⁸ Mbwino eriyikethera lyaghe omwa  milhaghe ya Yehova siri kiri nga kera? Ng’eky’erileberyako, Nyamuhanga abirilhagha erighunzaho omughulhu mubi ono. Mbwino thunemulengemeribwa n’eby’eriyitsemesya ebyoswire omwa kihugho munabwire, n’erileka erikirirya lyethu iryahwa amani? Ithwangana tsuka eriyowa enduli nga yikine hali. (Hab. 2:3) Ekindi ky’erileberyako kya kino. Nyamuhanga abiriyilhagha eribya akathughanyira busana n’ekihongwa kya Yesu. Aliwe thwamalengekania kutsibu okwa bisobyo byethu eby’enyuma, ithwanganatsuka erithika-thika kwenene Yehova nga ‘mwanasangulha’ ebibi byethu byosi. (Emib. 3:19) Neryo lyolho-lyolho, ithwangana tsuka eribulha etseme omw’ikolera Nyamuhanga neryo ithwasebebera.

9. Ni kyahi ekyangabya thwamahira akaghalha kethu kosi k’okwa by’ekinyamubiri?

⁹ Ngakinawithe omuhwa owa nabya nawu? Omukwenda Paulo mwakangania ngoku erikolera Yehova n’akaghalha kosi likaleka “ithwaberererya amaha wethu” erihika okwa nduli. Aliwe ni kyahi ekyangabya wamatsuka erihira akaghalha kawu kosi okwa by’ekinyamubiri, ng’erithwamu erikolha omubiiri awali kw’esyosente nene aliwe kandi iniakakulemesaya eby’obunyakirimu? Erikirirya lyethu ilyangana tseka, ithwabya mw’obughatha neryo ithwakolera Yehova ya bike nibya ithunawithe n’akaghalha.—Ebr. 6:10-12.

10. Erighanyira abandi lyangakangania lithi ngoku thuwithe erikirirya?

¹⁰ Kikananyikalira erighanyira abakanyisoberaya? Omundu amakukolha nabi, obundi busana n’ekinigha iwangana thwamu erimutsurumira, kutse iwamugheghena isiwangathasya bugha nayu. Aliwe thwamaghanyira, thukakanganaya ku thuwithe erikirirya. Thuthi? Abakathukolha nabi bakathuyithagha kw’ekighanyiro, nethu ngoku thukayithagha oku Nyamuhanga kw’ekighanyiro busana n’ebibi byethu. (Lk. 11:4) Erisimwa na Yehova eryathukabana busana n’erighanyira abandi  lirengire ibo erilihira ekisobyo kyabu. Abigha ba Yesu babya ibanasi ngoku erighanyira likayithaghisaya eribya n’erikirirya. Omughulhu ababwira athi ibabaghanyira n’abakabasoberaya ngendo nyingyi, mubasaba bathi: “Wukanyaye erikirirya lyethu.”—Lk. 17:1-5.

11. Ni kyahi ekyanga thulemesya erighendera okw’ihabulha erya thukahebawa?

¹¹ Mbwino nganahithana ingahabulhwa? Omughulhu thukahabulhawa, ithwangana yisanga ithwabiritsomana obulemwa bw’omuhani omwakanya k’erilhangira nga thwangaghasirwa thuthi omw’ihano eryo. (Emi. 19:20) Ekyo ikyangana leka ithwaherya omughisa w’eribya n’amalengekania wa Nyamuhanga.

12. Omundu amabera eriyineghenia okwa ba Yehova akakolesaya erisondolha abandu biwe, kikangananayaki?

¹² Mbwino ngana yineghenaya okwa bakasondolha omwa kithunga? Omughulhu Abaisraeli baghendera okwa bya bughawa n’abalingyi ikumi, mubatsuka eriyineghenia oku Musa na Haruni. Yehova neryo mwabulya Musa: “Erihika emighulhu yingahi, sibendisya nyikirirya?” (Emig. 14:2-4, 11) Eriyineghenia ly’Abaisraeli mulyakangania ngoku sibayikethere Nyamuhanga oyuwasombolha Musa na Haruni. Kuthya nethu thwamabera erithonga abo Yehova akakolesaya erisondolha abandu biwe, ikikendi kangania kithi erikirirya lyethu lyabirikeha.

13. Busana naki sithutholere thukahwa amani hamabanika ekyamathuhambako omwa bibulyo ebyamakanibwako?

¹³ Okwa bibulyo ebi hamabya ekyamakuhambako, isiwahwa amani. Petero nomwanabya mukwenda, nayu mwanabya mw’erithika-thika n’erikwa obuba. Nibya ihakanayira Yesu iniatsumanga abakwenda busana n’eribya ‘n’erikirirya like.’ (Mt. 16:8) Wibuke ngoku erisomo eryathuk’igha ly’eriri omwa kya Petero akolha enyuma w’erikangania erikirirya like n’eritsuka erithobera omwa ngetse.

14, 15. (a) Petero abere akatsuka erithobera, mwakolhaki? (b) Nomwakine indi sithwanga lhangira Yesu, thwangamuhirako thuthi “ameso wethu”?

¹⁴ Petero mwabya akatsuka erithobera busana n’erihira amalengekania w’okwa kiyagha, anganathwiremu erisuba omwa bwathu kundi abya inianasi eriziha. Erithayighusa omwa maghetse isikitsibu okw’iyo. (Yn. 21:7) Aliriryo omwa kanya k’eriyikethera obuthoki bwiwe, mwasubya amalengekania wiwe oku Yesu n’eriligha obuwathikya bwiwe. Thwamayowa erikirirya lyethu iriri musebebera, thutholere ithwagherererya Petero. Aliwe ekyo thwanga kikolha thuthi?

¹⁵ Ngoku Petero anasubaya amalengekania w’oku Yesu, nethu thutholere ‘ithwahira ameso wethu w’oku Yesu oyukathuletha okw’ikirirya.’ (Soma Abaebrania 12:2, 3.) Ithwe sithwanga lhangira Yesu ngoku Petero abya amulhangire. Aliwe ithwe ‘thukahira ameso’ wethu w’oku Yesu omw’iyitheghererya ndeke eby’akangiriraya n’eby’akolha n’eribikwama ndeke. Thulebaye ebya thwanga kolha erithoka erigherererya Yesu. Thwamabihira omwa mikolere, ithukendi bana obuwathikya obwanga ghumya erikirirya lyethu.

16. Thwang’igha thuthi e Biblia omwa mibere eyangaleka ithwahimba erikirirya lyethu?

¹⁶ Ghumaya eriyikethera lyawu omwa Biblia. Yesu abya ayikethere ndeke ngoku e Biblia ni Kinywe kya Nyamuhanga, ekikaha obusondoli obuwene omwa ngebe. (Yn. 17:17) Omw’ikwama eky’erileberyako kya Yesu, thutholere ithwabya thukasoma n’erigha e Biblia buli kiro n’erighanirya okwa bya thuk’igha. Eryongera okw’isoma e Biblia, iwangana sekulya buuli okwa myatsi eyawukayibulhayako kutsibu. Ng’eky’erileberyako, wamanza erithasyaghumya ndeke ngoku enduli yiri hakuhi, iwangana sekulya buuli okwa bya Masako akabugha okwa Mighulhu  y’enyuma-nyuma. Iwanganaghumya eriyikethera lyawu omwa milhaghe ye Biblia omw’isekulya okwa maminyereri awabiribererera. Erighumya ndeke ngoku e Biblia yikawathikaya, iwanganasekulya okwa by’erileberyako by’abandu abo e Biblia yabiriwathikya omwa ngebe syabu. *—1 Tes. 2:13.

17. Ni kyahi ekya wathikaya Yesu eribya iniane muthaleghulha nomwanabana erilengwako erikalire, nawu wanga mugherererya wuthi?

¹⁷ Ghaniraya okwa bibuya ebyo Yehova abirilhagha. Yesu mwabya muthaleghulha busana n’erighanirya okwa “butseme obwasyabya bwiwe.” (Ebr. 12:2) Ebindu by’ekihugho mubithamulengemerya. (Mt. 4:8-10) Iwangana gherererya Yesu omw’ighanirya okwa bibuya eby’abirikulhagha. Iwangana handika kutse erithera ebya wukalengekanaya erisyakolha Nyamuhanga abirighunzaho omughulhu mubi ono. Thondogholha abawanzire iwasyalholhako bakalhubuka n’ebya wanzire imwasyakaniako. Wutholere iwalhangira emilhaghe eyi Nyamuhanga ng’akakulhaghayo iwe ng’omundu.

18. Omusabe angawathikya athi erighumya erikirirya lyawu?

¹⁸ Saba eribya n’erikirirya erighumire. Yesu mwakangirirya abigha biwe eribya bakasaba Yehova y’omulimu abuyirire. (Lk. 11:9, 13) Nawu saba eribya n’erikirirya erighumire; kundi ni mubere ow’akalhua okwa mulimu abuyirire. Isiwasaririra okwa nzumwa wukasaba Yehova. Ng’eky’erileberyako wamalhangira iwabiryasa mw’omubere w’erithendi ghanyira ambi iwasaba Nyamuhanga akuwathikaye erirwanisya omubere mubi ng’oyo.

19. Omunywani mubuya atholere iniabya na mibere yahi?

¹⁹ Nywana abawithe erikirirya erighumire. Yesu mwasombolha ndeke abanywani biwe b’okwa ndungu. Abakwenda babya banywani biwe b’okwa ndungu, babya bathaleghulha kandi ibakowa ebihano biwe. (Soma Yoane 15:14, 15.) Neryo ambi wukasombolha abanywani, sombolha abakakanganaya erikirirya omw’ighondera ebihano bya Yesu. Kandi abanywani b’okwenene bakakaniranaya okuthe eriyibisirira, nibya omughulhu bakahabulha kutse erihabulhwa.—Emi. 27:9.

20. Thukaghasirawa thuthi thwamawathikya abandi erihimba erikirirya lyabu?

²⁰ Wathikaya abandi baghumaye erikirirya lyabu. Yesu mwahimba erikirirya ly’abigha biwe omwa binywe n’omwa mikolere. (Mk 11:20-24) Thutholere ithwamugherererya kundi eriwathikya abandi erihimba erikirirya lyabu kikaghumaya erikirirya lyethu. (Emi. 11:25) Wukathulira n’erikangirirya, kanganaya ndeke-ndeke ngoku Nyamuhanga aneho, ngoku athutsomene, kandi ngoku e Biblia ni Kinywe kiwe. Wathikaya n’abalikyenyu eribya n’erikirirya erighumire. Balikyenyu bamatsuka erithika-thika, obundi ibatsuka erithonga baghalha bethu abakasondolha, isiwalhuaho wukabaghana. Aliriryo omwa menge bawathikaye bathoke erithasyabya n’erikirirya. (Yuda 22, 23) Wamabya iwuli munya sukuru neryo ibabakangirirya ambu ebindu byayibuthukira, ambi omwa buthubaha iwalhwira okw’ikirirya lyawu ngoku ebindu byahangikawa—isiwasweka bakakuhulikirira n’eriligha.

21. Yehova abiritulhaghanisyaki thwamabya n’erikirirya?

²¹ Nyamuhanga mwawathikya Petero erilhabira omu Yesu erikinda obuba n’erithika-thika liwe. Petero mwabya nduyi y’erikirirya omwa Bakristayo abakera. Kuthya nethu Yehova akathuwathikaya eribya ithunasikire omw’ikirirya. (Soma 1 Petero 5:9, 10.) Thutholere ithwahiraho akaghalha erithoka erihimba erikirirya lyethu kandi Yehova iniakendi syathuhemba.