1. (a) Ki ti ariv Pier kan ti ena enn tanpet lor Lamer Galile? (Get zimaz dan koumansman lartik.) (b) Kifer Pier ti koumans koule?

PE FER nwar, divan pe tap for lor Lamer Galile akoz enn tanpet. Lapot Pier ek bann lezot disip pe gagn boukou difikilte pou rame. Enn kout, zot trouv Zezi pe mars lor delo. Pier kriye Zezi ek demann li si li kapav mars lor delo pou vinn zwenn li. Letan Zezi dir li vini, Pier sorti dan bato ek koumans mars lor delo pou al zwenn Zezi. Me enn tigit apre, Pier koumans koule. Kifer? Parski li’nn get sa tanpet-la ek li’nn koumans gagn per. Pier kriye Zezi pou vinn sap li. Zezi degaze trap li ek dir li: “Twa ki ena tigit lafwa, kifer to’nn doute?”—Mat. 14:24-32, NW.

2. Ki nou pou examine dan sa lartik-la?

² Anou gete ki ti ariv Pier ek ki trwa kitsoz so lexanp kapav ansegn nou lor lafwa: (1) kouma o-koumansman Pier ti ena lafwa ki Zeova kapav ed li, (2) kifer Pier ti koumans perdi lafwa, ek (3) ki’nn ed Pier pou regagn so lafwa. Kan nou pou examinn sa bann pwin-la, nou pou trouve kouma nou kapav “tini ferm dan lafwa.”—1 Kor. 16:13, NW.

3. Kifer Pier ti sorti dan bato, ek dan ki fason nou osi nou’nn fer parey kouma li?

³ Pier ti ena enn gran lafwa. Kifer nou kapav dir sa? Parski kan Zezi ti apel li, Pier ti sorti dan bato ek ti mars lor delo. Li ti ena konfians ki Bondie pou donn li kapasite pou mars lor delo, parey kouma Li’nn fer pou Zezi. Li parey pou nou. Kan Zezi ti invit nou pou swiv li, nou’nn vwe nou lavi ar Zeova ek nou’nn batize. Kifer? Parski nou finn ena lafwa an Zeova ek Zezi ek nou finn ena konfians ki zot pou ed nou.—Zan 14:1; lir 1 Pier 2:21.

4, 5. Kifer lafwa se enn kitsoz ki ena enn gran valer?

⁴ Lafwa se enn kitsoz ki ena enn gran valer. Parey kouma lafwa Pier ti fer li mars lor delo, nou lafwa kapav permet nou fer bann kitsoz ki pou bann dimounn paret inposib. (Mat. 21:21, 22) Par exanp, boukou parmi nou finn telman sanz nou latitid ek nou fason azir ki lezot nepli rekonet nou. Zeova inn ed nou pou fer sa bann sanzman-la parski nou finn ena lafwa an Li. (Lir Kolosien 3:5-10.) Nou lafwa finn pous nou pou vwe nou lavi ar Zeova, ek nou finn vinn so bann kamarad. Sa se enn kitsoz ki zame nou pa ti pou kapav fer par noumem.—Efe. 2:8.

⁵ Nou lafwa kontign fer nou vinn for. Par exanp, gras-a nou lafwa, nou kapav reziste kont bann latak Lediab, nou lennmi bien pwisan. (Efe. 6:16) Anplis, kan nou ena lafwa an Zeova, nou pa pou trakase plis ki bizin kan nou ena bann problem. Zeova inn promet nou ki Li pou donn nou seki nou bizin, si nou ena lafwa an Li ek nou met so Rwayom an premie dan nou lavi. (Mat. 6:30-34) Pli inportan ankor, kan nou ena lafwa, Zeova pou donn nou pli zoli kado ki kapav ena, setadir lavi eternel.—Zan 3:16.

6, 7. (a) Ar ki kitsoz nou kapav konpar tanpet ek bann vag ki ti fer Pier gagn per? (b) Kifer nou bizin konpran ki li posib nou perdi nou lafwa?

⁶ Pier ti gagn per amezir ki li ti pe mars lor Lamer Galile. Kifer? Akoz divan ek bann vag. Nou kapav konpar sa bann kitsoz-la ar bann leprev ek tantasion ki bann Kretien gagne azordi. Mem kan sa bann problem-la bien difisil pou siporte, nou kapav tini ferm gras-a led Zeova. Li bon nou rapel ki Pier pa’nn koule akoz bann divan bien for ek bann gro vag. Okontrer Labib dir: “Letan li remark lafors divan, li gagn per.” (Mat. 14:30) Pier ti aret get Zezi ek ti fixe so latansion lor lafors sa tanpet-la. Se sa ki’nn fer so lafwa koumans diminie. Nou osi parey, si nou fixe nou latansion lor nou bann problem, nou kapav koumans ena dout ki Zeova pou ed nou.

⁷ Nou bizin konpran ki li posib nou perdi nou lafwa. Kifer? Parski Labib dir ki kan nou perdi lafwa, li enn “pese ki blok nou fasilman.” (Ebre 12:1, NW.) Kouma lexanp Pier montre nou, nou lafwa kapav diminie si nou fixe nou latansion lor bann move kitsoz. Alor kouma nou pou kone si nou lafwa an danze? Anou examinn sertin kestion ki pou ed nou analiz noumem.

8. Kouma li kapav arive ki nou perdi konfians ki nou ti ena avan dan bann promes Bondie?

⁸ Eski bann promes Bondie ankor reel pou mwa kouma avan? Par exanp, Bondie inn promet ki Li pou detrir lemond Satan. Me selman, eski nou les nou distrer par bann divertisman ki sa lemond-la ofer?  Si wi, nou kapav koumans ena bann dout ki lafin pre. (Aba. 2:3) Anou pran enn lot lexanp. Zeova finn donn nou laranson, ek Li finn promet nou ki Li pou pardonn nou bann erer. Me si nou kontign fixe nou latansion lor bann erer ki nou finn fer dan lepase, nou kapav ena bann dout ki Zeova finn pardonn nou vremem. (Zist. 3:19) Akoz sa, nou kapav perdi nou lazwa dan servis Bondie ek vinn inaktif.

9. Ki pou arive si nou konsantre nou zis lor bann lobzektif personel?

⁹ Eski mo ankor pe fer tou seki mo kapav pou Zeova parey kouma avan? Lapot Pol ti montre ki kan nou travay dir pou Zeova, nou pa pou ena ‘okenn dout konsernan nou lesperans ziska lafin.’ Me, ki pou arive si nou konsantre nou zis lor bann lobzektif personel? Par exanp, nou kapav aksepte enn travay ki pey bien, me ki pou blok nou dan nou servis pou Zeova. Sa riske diminie nou lafwa, ek nou kapav “vinn pares,” setadir fer mwins ki seki nou kapav pou Zeova.—Ebre 6:10-12.

10. Kouma nou montre nou lafwa an Zeova kan nou pardonn lezot?

¹⁰ Eski li difisil pou mo pardonn lezot? Kan lezot ofans mwa ouswa bles mwa, eski mo ankoler ar zot ouswa mo aret koz ar zot? Si wi, kitfwa nou pe tro konsantre nou lor nou bann santiman. Parkont si nou pardonn zot, nou pou montre ki nou ena lafwa an Zeova. Kouma? Bann ki fer pese kont nou, zot ena enn det anver nou, parey kouma nou ena enn det anver Bondie kan nou fer pese kont Li. (Lik 11:4) Alor, kan nou pardonn lezot, nou montre ki nou ena konfians an Zeova. Nou ena konfians ki Li pou beni nou bon latitid ek ki so benediksion ena plis valer ki fer enn dimounn peye pou seki li’nn  fer nou. Bann disip Zezi ti rekonet ki bizin ena lafwa pou kapav pardonn lezot. Kan Zezi ti demann so bann disip pou pardonn mem bann ki’nn fer pese kont zot plizir fwa, zot ti sipliye li ek zot ti dir: “Ogmant nou lafwa.”—Lik 17:1-5.

11. Ki kitsoz kapav anpes nou tir profi ar enn konsey?

¹¹ Eski mo ofanse kan mo gagn konsey? Reflesi kouma nou kapav aplik enn konsey ki nou’nn gagne, olie ki nou rod tir lay dan sa konsey-la ouswa tir defo ar sa dimounn ki’nn donn nou sa konsey-la. (Prov. 19:20) Nou bizin touletan rod lokazion pou ena mem fason panse ki Zeova.

12. Ki sa montre kan enn dimounn touletan pe plengne kont bann ki Zeova servi pou diriz so pep?

¹² Eski mo kritik bann frer responsab dan kongregasion? Kan bann Izraelit ti konsantre zot lor move rapor ki sa dis espion-la ti done, zot ti kritik Moiz ek Aaron. Apre sa, Zeova ti demann Moiz: “Ziska kan zot pa pou ena lafwa an mwa?” (Nonb 14:2-4, 11) Zeova ti kone ki bann Izraelit pa ti fer Li konfians parski zot ti kritik Moiz ek Aaron, bann zom ki Li’nn swazir. Li parey pou nou osi, si touletan nou plengne kont bann ki Zeova servi pou diriz so pep azordi, sa pou montre ki nou lafwa an Bondie pe diminie.

13. Kifer fode pa nou dekouraze si nou remarke ki nou lafwa pe diminie?

¹³ Apre ki nou’nn examinn sa bann kestion-la, pa bizin dekouraze si ou remarke ki ou lafwa pe diminie. Pa bliye ki mem Pier ti gagn per ek ti koumans doute. Ofet, plizir fwa Zezi ti repros so bann disip ki zot ti ena enn “tigit lafwa.” (Mat. 16:8, NW.) Me, nou kapav aprann enn leson bien inportan ar lexanp Pier. Remarke ki li’nn fer apre ki so lafwa ti koumans diminie ek ki li’nn koule.

14, 15. (a) Ki Pier ti fer kan li ti koumans koule? (b) Kouma nou kapav “fixe nou lizie” lor Zezi?

¹⁴ Kan Pier ti get sa tanpet-la ek li’nn koumans koule, ki li’nn fer? Li ti enn bon nazer, alor li ti bien kapav esey naze ek rant dan bato par limem. (Zan 21:7) Me olie ki li’nn kont lor limem, li’nn refixe so latansion lor Zezi ek li’nn aksepte so led. Si nou remarke ki nou lafwa pe diminie, nou bizin imit lexanp Pier. Me kouma nou kapav fer sa?

¹⁵ Parey kouma Pier ti refixe so latansion lor Zezi, nou osi nou bizin “fixe nou lizie lor Zezi, Azan prinsipal nou lafwa ek sa Kikenn ki fer nou lafwa vinn parfe la.” (Lir Ebre 12:2, 3.) Biensir, nou pa kapav trouv Zezi parey kouma Pier ti trouv li. Alor, kouma nou kapav “fixe nou lizie” lor Zezi? Nou kapav etidie bann kitsoz ki li’nn ansegne ek ki li’nn fer. Lerla nou pou kapav imit li pli bien. Kan nou pou fer sa, nou pou gagn led ki nou bizin pou fortifie nou lafwa. Anou get sertin fason kot nou kapav imit Zezi.

16. Kouma Labib kapav ed nou pou ogmant nou lafwa?

¹⁶ Ogmant ou konfians dan Labib. Zezi ti sir ki Labib se Parol Bondie ek ki li donn nou meyer konsey. (Zan 17:17) Pou imit Zezi, nou bizin lir Labib toulezour, etidie ek medit lor bann leson ki nou aprann. Anplis ki nou etidie, nou bizin al an profonder pou gagn repons nou bann kestion. Par exanp, eski ou vremem sir ki nou pe viv bann dernie zour? Ou pou ogmant ou lafwa ki lafin li pros kan ou etidie bann profesi Labib ki prouve ki nou  pe viv bann dernie zour. Ou pou osi ogmant ou konfians dan bann promes ki Bondie inn fer pou lavenir kan ou examinn bann profesi Labib ki’nn fini realize. Eski ou vremem sir ki Labib li enn liv pratik azordi? Ou kapav lir kouma Labib inn ed boukou frer ek ser pou amelior zot lavi. *—1 Tes. 2:13.

17. Kouma Zezi inn kapav res fidel mem dan bann pli gran leprev, ek kouma nou kapav imit li?

¹⁷ Fixe nou latansion lor bann benediksion ki Zeova inn promet. Kan Zezi ti fixe so latansion lor “lazwa ki ti pe atann li,” sa inn ed li pou res fidel mem dan bann pli gran leprev. (Ebre 12:2) Zame li pa’nn les li tante par seki lemond ti kapav ofer. (Mat. 4:8-10) Kouma ou kapav imit lexanp Zezi? Se kan ou medit lor bann promes extraordiner ki Zeova inn fer. Fer vizion ki ou dan lemond nouvo. Ekrir ouswa desinn seki ou ti pou kontan fer dan paradi. Fer enn lalis bann dimounn ki ou ti pou kontan zwenn kan pou ena rezireksion ek ki bann kitsoz ou ti pou kontan koze avek zot. Trouv bann promes Zeova kouma bann promes ki Li’nn fer ar ou personelman, pa ar limanite an zeneral.

18. Kouma lapriyer kapav ed ou pou fortifie ou lafwa?

¹⁸ Priye pou gagn plis lafwa. Zezi ti ansegn so bann disip pou demann Zeova lespri sin. (Lik 11:9, 13) Kan ou priye pou gagn lespri sin, demann Bondie plis lafwa, parski se enn laspe frwi lespri sin. Fer bann lapriyer presi. Par exanp, si ou remarke ki li difisil pou ou pardonn lezot, demann Zeova so led pou gard ou lafwa for ek pou ed ou pardone.

19. Kouma ou kapav swazir bann bon kamarad?

¹⁹ Frekant bann ki ena lafwa. Zezi ti fer bien atansion kan li ti swazir so bann kamarad. So bann bon kamarad, setadir bann zapot, ti montre ki zot ena lafwa ek ki zot fidel kan zot ti obeir so bann komannman. (Lir Zan 15:14, 15.) Alor, kan ou pe swazir ou bann kamarad, rod bann ki montre zot lafwa kan zot obeir Zezi. Ek rapel ki bann bon kamarad zot onet anver zot, mem si zot bizin donn ouswa aksepte konsey.—Prov. 27:9.

20. Ki bienfe nou gagne kan nou ed lezot pou ogmant zot lafwa?

²⁰ Ed lezot pou fortifie zot lafwa. Zezi ti ed so bann disip pou ogmant zot lafwa par seki li ti dir ek fer. (Mark 11:20-24) Nou bizin swiv lexanp Zezi, parski kan nou ed lezot pou ogmant zot lafwa, sa pou osi ogmant nou lafwa. (Prov. 11:25) Kan ou prese ek ansegn lezot, met laksan lor bann prev ki Bondie existe, ki Li gagn nou traka, ek ki Labib se so Parol. Ed osi ou bann frer ek ser pou kontign ogmant zot lafwa. Si enn parmi ou bann frer ek ser pe koumans mirmire kont bann frer responsab, pa evit li. Okontrer, avek takt ed li pou ki li kapav regagn so lafwa. (Zid 22, 23) Si to ankor lekol ek to profeser pe explik lor teori levolision, defann to lafwa lor kreasion avek kouraz. Kitfwa fason ki to profeser ek to bann kamarad reazir kapav etonn twa.

21. Ki Zeova inn promet sakenn parmi nou?

²¹ Gras-a led Zeova ek Zezi, Pier ti reisi sirmont so laper ek so bann dout. Koumsa, li finn les enn bon lexanp lor lafwa. Parey kouma Li’nn fer pou Pier, Zeova ed nou tou pou tini ferm dan lafwa. (Lir 1 Pier 5:9, 10.) Alor, li vo lapenn ki nou fer zefor pou ogmant nou lafwa, parski Zeova pou rekonpans nou.