1. Иухатт Петрыл Галилейӕйы денджызы цавӕр хабар ӕрцыд? (Кӕс нывмӕ статьяйы райдианы.)

ИУ ӔХСӔВ апостол Петр ӕмӕ ма ахуыргӕнинӕгтӕй цалдӕр Галилейӕйы денджызыл куы цыдысты, уӕд ахӕм тыхдымгӕ сыстад, ӕмӕ ма сӕ бӕлӕгъ размӕ тыххӕйты тардтой. Ӕнӕнхъӕлӕджы Йесойы доныл цӕугӕйӕ ауыдтой. Петр ын загъта, зӕгъгӕ мын уыцы хъару ратт, цӕмӕй дӕм доныл бацӕуон. Йесо йын куы загъта, рацу, зӕгъгӕ, уӕд Петр бӕлӕгъӕй рахызт ӕмӕ доныл Йесойы ’рдӕм араст. Фӕлӕ иугыццыл куы ацыд, уӕд ныгъуылын райдыдта. Цымӕ цӕмӕн? Уымӕн ӕмӕ тыхдымгӕ ӕмӕ стыр уылӕнтӕм акаст, ӕмӕ фӕтарст. Петр Йесомӕ ныхъхъӕр кодта, баххуыс мын кӕн, зӕгъгӕ, ӕмӕ йӕм уый дӕр йӕ къух фӕдардта, ацахста йӕ ӕмӕ йын загъта: «Кӕм ис дӕ уырнындзинад, цӕмӕн фӕдызӕрдыг дӕ?» (Матф. 14:24–32).

2. Ацы статьяйы цӕмӕ ӕркӕсдзыстӕм?

² Ацы статьяйы бӕстондӕр ӕркӕсдзыстӕм Петры хабармӕ ӕмӕ базондзыстӕм, уырнындзинадимӕ баст чи у, ӕртӕ ахӕм хъуыддаджы тыххӕй: 1) райдианы Петр куыд равдыста, Хуыцауы ӕххуысӕй йӕ фидар ныфс кӕй уыд, уый, 2) йӕ уырнындзинад цӕмӕн фӕцудыдта ӕмӕ 3) Петрӕн цы баххуыс кодта, цӕмӕй та йӕ уырнындзинад бафидар уыдаид. Ацы хъуыддӕгтыл лӕмбынӕг куы ахъуыды кӕнӕм, уӕд бамбардзыстӕм, нӕ бон цӕй фӕрцы бауыдзӕн «уырнындзинады фидар лӕууын» (1 Кор. 16:13).

3. Петр бӕлӕгъӕй цӕмӕн рахызт ӕмӕ нӕ хабар Петры хабары хуызӕн цӕмӕй у?

³ Петрӕн уыди фидар уырнындзинад. Цӕмӕ гӕсгӕ ис афтӕ зӕгъӕн? Уымӕн ӕмӕ йӕм Йесо куы бадзырдта, уӕд бӕлӕгъӕй рахызт ӕмӕ доныл ацыд. Петры уырныдта, Хуыцау ын ахӕм хъару кӕй ратдзӕн, цӕмӕй уый дӕр Йесойау доныл ацӕуа. Махӕн дӕр нӕ хабар афтӕ у. Йесо нӕ куы фӕхуыдта, мӕ фӕдыл рацӕут, зӕгъгӕ, уӕд мах дӕр нӕ цард Йегъовӕйӕн снывонд кодтам ӕмӕ донаргъуыд райстам. Цӕмӕн? Уымӕн ӕмӕ Йегъовӕйыл дӕр ӕмӕ Йесойыл дӕр баууӕндыдыстӕм, стӕй нӕ бауырныдта, кӕй нын ӕххуыс кӕндзысты, уый (Иоан. 14:1; бакӕс 1 Петры 2:21).

4, 5. Уырнындзинад зынаргъ хӕзна цӕмӕн у?

⁴ Уырнындзинад у зынаргъ хӕзна. Петрӕн йӕ уырнындзинад баххуыс кодта, цӕмӕй, адӕймаджы хъуыдымӕ гӕсгӕ гӕнӕн кӕмӕн нӕ уыд, ахӕм хъуыддаг бакодтаид – доныл ацыдаид. Афтӕ махӕн дӕр уырнындзинады фӕрцы нӕ бон свӕййы, адӕймаджы хъуыдымӕ гӕсгӕ гӕнӕн цӕмӕн нӕй, уый бакӕнын (Матф. 21:21, 22). Зӕгъӕм, чидӕртӕ нӕ сӕ зондахаст ӕмӕ сӕ уагахаст афтӕ тынг аивтой, ӕмӕ сӕ раздӕр чи зыдта, уыдон сӕ нал базонынц. Йегъовӕ нын баххуыс кодта уыцы ивындзинӕдтӕ скӕнынӕн, уымӕн ӕмӕ уыдта, кӕй йыл ӕууӕндӕм, уый. (Бакӕс Колоссӕгтӕм 3:5–10.) Нӕ уырнындзинад нӕ баразӕнгард кодта, цӕмӕй нӕхи Йегъовӕйӕн снывонд кодтаиккам. Ӕмӕ уый фӕрцы та нӕ къухы бафтыд, нӕхи хъаруйы фӕрцы нӕ къухы чи никуы бафтыдаид, уыцы хъуыддаг – Йегъовӕйы хӕлӕрттӕ систӕм (Еф. 2:8).

⁵ Нӕ уырнындзинад нӕ стыр хъарутӕ уадзы. Зӕгъӕм, ӕххуыс нын кӕны, махӕй бирӕ тыхджындӕр чи у, уыцы знагимӕ, Хӕйрӕгимӕ, тох кӕнынӕн (Еф. 6:16). Стӕй ма, Йегъовӕйыл кӕй ӕууӕндӕм, уымӕ гӕсгӕ зындзинӕдты рӕстӕг афтӕ тынг нӕ фӕтыхсӕм. Йегъовӕ нын зӕрдӕ бавӕрдта: куы йыл ӕууӕндӕм ӕмӕ нын йӕ Паддзахад царды фыццаг бынаты куы уа, уӕд нӕ цух ницӕмӕй ныууадздзӕн (Матф. 6:30–34). Сӕйрагдӕр та, уырнындзинад нӕм куы уа, уӕд нӕ Йегъовӕ схайджын кӕндзӕн ӕнусон цардӕй, ӕмӕ уый та у, адӕймаг йӕхӕдӕг кӕй никуы самал кӕндзӕн, ахӕм лӕвар (Иоан. 3:16).

6, 7. а) Петр кӕмӕй фӕтарст, уыцы тыхдымгӕ ӕмӕ уылӕнтӕ цӕимӕ ис абарӕн? б) Афтӕ цӕуылнӕ хъуамӕ хъуыды кӕнӕм, ӕмӕ нӕ уырнындзинадӕн тӕссаг ницӕмӕй у?

⁶ Петр доныл куы цыди, уӕд цы тыхдымгӕ ӕмӕ уылӕнтӕй фӕтарсти, уыдон абарӕн ис, Хуыцауӕн лӕггад кӕнгӕйӕ цы фыдӕвзарӕнтӕ ӕмӕ фӕлварӕнтыл сӕмбӕлӕм, уыдонимӕ. Ӕмӕ уыцы зындзинӕдтӕ тынг карз куы вӕййынц, уӕд дӕр Йегъовӕйы ӕххуысы фӕрцы нӕ бон вӕййы фидар фӕлӕууын. Фӕлӕ-ма нӕ зӕрдыл ӕрлӕууын кӕнӕм, Петрыл цы ’рцыд, уый. Петр ныгъуылын уый тыххӕй нӕ райдыдта, ӕмӕ йӕ тыхдымгӕ ӕмӕ уылӕнтӕ хостой. Матфейы 14:30 стихы кӕсӕм: «Йӕ алыварс куы акаст ӕмӕ, куыд тынг дымы, уый куы федта, уӕд фӕтарст». Петр Йесомӕ нал касти, фӕлӕ, йӕ алыварс цытӕ цыди, уымӕ. Ӕмӕ уый тыххӕй йӕ уырнындзинад фӕцудыдта. Мах дӕр нӕ зындзинӕдтыл куы суӕм, уӕд, чи зоны, дызӕрдыг кӕнын райдайӕм, Йегъовӕ нын кӕй баххуыс кӕндзӕн, ууыл.

⁷ Хъуамӕ афтӕ ма хъуыды кӕнӕм, зӕгъгӕ, мӕнӕн мӕ уырнындзинад никуы ӕрлӕмӕгъ уыдзӕн. Цӕуылнӕ? Уымӕн ӕмӕ, адӕймагӕн йӕ уырнындзинад кӕй ӕрлӕмӕгъ вӕййы, уый кой кӕнгӕйӕ Библи дзуры, зӕгъгӕ, уый у, адӕймаджы «ӕнцонӕй чи ӕрцахсы, уыцы тӕригъӕд» (Дзут. 12:1). Петры цӕвиттонӕй куыд зыны, афтӕмӕй адӕймаг йе ’ргом, цӕмӕ нӕ хъӕуы, уымӕ куы аздаха, уӕд, гӕнӕн ис, ӕмӕ йӕ уырнындзинад тагъд ӕрлӕмӕгъ уа. Уӕдӕ цымӕ куыд базонӕн ис, нӕ уырнындзинадӕн уымӕй тӕссаг у ӕви нӕ? Уый раиртасынӕн нын баххуыс кӕндзысты, дарддӕр кӕмӕ ӕркӕсдзыстӕм, уыцы фарстатӕ.

8. Уый гӕнӕн куыд ис, ӕмӕ нын Хуыцау зӕрдӕ цӕмӕй ӕвӕры, уыдӕттыл раздӕрау мауал ӕууӕндӕм?

⁸ Хуыцау нын зӕрдӕ цӕмӕй ӕвӕры, уыдӕттыл раздӕрау фидарӕй ӕууӕндын? Зӕгъӕм, Хуыцау зӕрдӕ бавӕрдта, Хӕйрӕджы дуне кӕй  фесафдзӕн, уымӕй. Фӕлӕ нӕ, мыййаг, ацы дунейы ирхӕфсӕнтӕ сӕ фӕдыл нӕ асайдтой? Кӕд о, уӕд, чи зоны, дызӕрдыг кӕнын райдайӕм, кӕрон тагъд кӕй уыдзӕн, ууыл (Ав. 2:3). Ноджыдӕр ма иу хабарыл ахъуыды кӕнӕм. Хуыцау нын зӕрдӕ ӕвӕры, Чырыстийы нывонды руаджы нын нӕ тӕригъӕдтӕ кӕй хатыр кӕны. Фӕлӕ нӕ раздӕры рӕдыдтыты тыххӕй ӕдзух нӕхи куы хӕрӕм, уӕд, чи зоны, дызӕрдыг кӕнын райдайӕм, Йегъовӕ нын нӕ тӕригъӕдтӕ кӕй ныххатыр кодта, ууыл (Хъуыд. 3:19). Афтӕмӕй нын Хуыцауӕн лӕггад кӕнын цины хос нал уыдзӕн ӕмӕ хъусын дӕр нал кӕндзыстӕм.

9. Нӕхицӕн куыд хуыздӕр у, ӕрмӕст ууыл хъуыды кӕнын куы райдайӕм, уӕд нын тӕссаг цӕмӕй уыдзӕн?

⁹ Хуыцауӕн раздӕрау ӕппӕт хъарутӕй лӕггад кӕнын? Хуыцауы хъуыддаджы зӕрдиагӕй куы архайӕм, уӕд нын фидӕнӕй цы ныфс ис, ууыл «кӕронмӕ фидарӕй ӕууӕнддзыстӕм». Фӕлӕ, нӕхицӕн куыд хуыздӕр у, ӕрмӕст ууыл хъуыды кӕнын куы райдайӕм, уӕд та? Зӕгъӕм, бацыдыстӕм, хорз кӕм фидынц, фӕлӕ Йегъовӕйӕн къаддӕр кӕй тыххӕй лӕггад кӕндзыстӕм, ахӕм куыстмӕ. Уӕд тӕссаг уыдзӕн, нӕ уырнындзинад кӕй ӕрлӕмӕгъ уыдзӕн ӕмӕ «зивӕггӕнаг» кӕй суыдзыстӕм, ома Йегъовӕйӕн, нӕ бон цас у, уыйбӕрц кӕй нал лӕггад кӕндзыстӕм, уымӕй (Дзут. 6:10–12).

10. Цӕмӕн ис афтӕ зӕгъӕн, ӕмӕ, иннӕтӕн куы хатыр кӕнӕм, уӕд бӕрӕг уыдзӕн, Йегъовӕйыл кӕй ӕууӕндӕм?

¹⁰ Иннӕтӕн хатыр кӕнын мын зын у? Иннӕтӕ нӕ куы фӕхъыг кӕнынц кӕнӕ нын нӕ зӕрдӕ куы фӕриссын кӕнынц, уӕд сӕм, мыййаг, смӕсты вӕййӕм кӕнӕ семӕ нал фӕныхас кӕнӕм? Кӕд о, уӕд, ӕвӕццӕгӕн, нӕхиуыл ӕгӕр бирӕ хъуыды кӕнӕм. Иннӕтӕн хатыр кӕнын куы зонӕм, уӕд та бӕрӕг уыдзӕн, Йегъовӕйыл кӕй ӕууӕндӕм. Цӕмӕн ис афтӕ зӕгъӕн? Исчи нӕ куы фӕхъыг кӕны, уӕд зӕгъӕн ис, ӕмӕ нӕ разы хӕсджын свӕййы. Ӕмӕ мах дӕр, Йегъовӕйы раз куы фӕрӕдийӕм, уӕд дзы хӕсджын свӕййӕм (Лук. 11:4). Уӕдӕ иннӕтӕн сӕ рӕдыдтытӕ куы хатыр кӕнӕм, уӕд бӕрӕг уыдзӕн, фидарӕй нӕ кӕй уырны, Йегъовӕйы хорзӕх ссарын, иннӕтӕ нӕ цы «хӕс» дарынц, уымӕй бирӕ ахсджиагдӕр кӕй у. Йесойы ахуыргӕнинӕгтӕ дӕр ӕй ӕмбӕрстой, иннӕтӕн хатыр кӕнынӕн уырнындзинад кӕй хъӕуы. Йесо сын куы загъта, исчи уӕ бирӕ хӕттыты куы фӕхъыг кӕна, уӕддӕр ын хатыр  кӕнут, зӕгъгӕ, уӕд ын уыдон загътой: «Бафтау нын нӕ уырнындзинадыл» (Лук. 17:1–5).

11. Адӕймаджы уынаффӕмӕ байхъусын цы фӕхъыгдары?

¹¹ Библийӕ мын уынаффӕ куы раттынц, уӕд фӕхъыг вӕййын? Уынаффӕ дын куы раттынц, уӕд де ’ргом цӕмӕ аздахыс? Уыцы уынаффӕйы раст цы нӕ уыд, уымӕ кӕнӕ дын ӕй чи радта, уый лӕмӕгъдзинӕдтӕм? Ӕви лӕмбынӕг ахъуыды кӕныс, уыцы уынаффӕ дын куыд баххуыс кӕндзӕн, ууыл? (Ӕмб. 19:20). Библийӕ нын уынаффӕ куы раттынц, уӕд нын уый хорз фадат вӕййы, цӕмӕй, Йегъовӕ куыд хъуыды кӕны, афтӕ хъуыды кӕнын сахуыр уӕм. Ӕмӕ-иу уыцы фадат ма ауадз!

12. Йегъовӕ йӕ адӕмӕн разамынд кӕй уылты дӕтты, уыдонӕй ӕдзухдӕр чи хъаст кӕны, ахӕм адӕймагӕй цы ис зӕгъӕн?

¹² Ӕмбырды разамынд чи дӕтты, уыдонӕй фӕхъаст кӕнын? Израилӕгтӕн дӕс сгарӕджы Зӕрдӕвӕрд зӕххы тыххӕй ӕвзӕр хабӕрттӕ куы радзырдтой, уӕд уыцы хабӕртты йеддӕмӕ ӕндӕр ницӕуылуал хъуыды кодтой, ӕмӕ Моисей ӕмӕ Аароныл хъуыр-хъуыр кӕнын райдыдтой. Уӕд Йегъовӕ Моисейӕн загъта: «Уыйбӕрц диссӕгтӕ сарӕзтон, ӕмӕ мыл уӕддӕр не ’ууӕндынц. Кӕдмӕ кӕндзысты афтӕ?» (Ным. 14:2–4, 11). Ӕцӕгдӕр, израилӕгтӕ Хуыцауы ӕвӕрд лӕгтыл, Моисей ӕмӕ Аароныл, кӕй хъуыр-хъуыр кодтой, уый ууыл дзурӕг уыд, ӕмӕ Йегъовӕйыл не ’ууӕндыдысты. Афтӕ мах дӕр, Йегъовӕ йӕ адӕмӕн разамынд кӕй уылты дӕтты, уыдонӕй ӕдзухдӕр куы хъаст кӕнӕм, уӕд зӕгъӕн уыдзӕн, ӕмӕ Хуыцауыл раздӕрау нал ӕууӕндӕм.

13. Нӕ уырнындзинад раздӕрау фидар кӕй нал у, уый куы бамбарӕм, уӕд дӕр нӕ ныфс цӕуылнӕ хъуамӕ асӕтта?

¹³ Кӕд ацы фарстатыл лӕмбынӕг ахъуыды кодтай ӕмӕ, дӕ уырнындзинад раздӕрау фидар кӕй нал у, уый бамбӕрстай, уӕд дӕ ныфс ма асӕттӕд. Рох дӕ ма уӕд, суанг ма апостол Петр дӕр кӕй фӕтарсти ӕмӕ дызӕрдыг кӕнын кӕй райдыдта. Стӕй-иу Йесо йӕ апостолтӕн се ’ппӕтӕн дӕр иуӕй-иу хатт бауайдзӕф кодта, «кӕм ис уӕ уырнындзинад», зӕгъгӕ (Матф. 16:8). Фӕлӕ уӕддӕр Петры цӕвиттонӕй ахуыр кӕнӕм иу ахсджиаг хъуыддагыл. Дӕ хъус-ма ӕрдар, Петр куы фӕдызӕрдыг ӕмӕ ныгъуылын куы райдыдта, уый фӕстӕ цы сарӕзта, уымӕ.

14, 15. а) Петр ныгъуылын куы райдыдта, уӕд цы сарӕзта? б) Нӕ бон куыд у Йесомӕ «лӕмбынӕг кӕсын»?

¹⁴ Петр ныгъуылын куы райдыдта, уӕд цы сарӕзта? Петр ленк кӕнын хорз зыдта, ӕмӕ йӕ бон уыди фӕстӕмӕ бӕлӕгъмӕ баленк кӕнын бафӕлварын (Иоан. 21:7). Фӕлӕ цымӕ афтӕ цӕуылнӕ бакодта? Уымӕн ӕмӕ йӕ зӕрдӕ йӕхиуыл нӕ дардта. Петр та йе ’ргом фӕстӕмӕ Йесомӕ раздӕхта ӕмӕ ӕххуыс уымӕй ракуырдта. Уӕдӕ кӕд мах дӕр бамбӕрстам, нӕ уырнындзинад раздӕрау фидар кӕй нал у, уӕд хъуамӕ Петры бафӕзмӕм. Цымӕ йӕ нӕ бон куыд у бафӕзмын?

¹⁵ Петр йе ’ргом Йесомӕ куыд раздӕхта, афтӕ йӕм мах дӕр хъуамӕ «лӕмбынӕг кӕсӕм», ома дзы ӕххуыс агурӕм. (Бакӕс Дзуттӕгтӕм 12:2, 3.) Фӕлӕ махӕн нӕ бон нӕу Петрау Йесойы уынын. Цымӕ уӕд уый гӕнӕн куыд ис, ӕмӕ Йесомӕ «лӕмбынӕг кӕсӕм»? Нӕ бон у, Йесо цы амыдта ӕмӕ цы арӕзта, уыдӕттӕ иртасын ӕмӕ йӕ фӕзмын. Афтӕ куы кӕнӕм, уӕд нӕ уырнындзинад бафидар уыдзӕн. Цӕй ӕмӕ ӕркӕсӕм, цавӕр хъуыддӕгты у нӕ бон Йесойы фӕзмын.

16. Цӕмӕй нӕ уырнындзинад фидардӕр кӕна, уый тыххӕй Библи куыд хъуамӕ ахуыр кӕнӕм?

¹⁶ Хуыцауы Ныхасыл тынгдӕр ӕууӕнд. Йесо фидарӕй ӕууӕндыд, Фыстад Хуыцауы Ныхас кӕй у ӕмӕ дзы ӕппӕты хуыздӕр разамынд кӕй ис (Иоан. 17:17). Цӕмӕй мах дӕр ууыл фидарӕй ӕууӕндӕм, уый тыххӕй хъуамӕ Библи алы бон дӕр кӕсӕм, ахуыр ӕй кӕнӕм ӕмӕ-иу, цы базонӕм, ууыл лӕмбынӕг хъуыды кӕнӕм. Уымӕй уӕлдай ма-иу хъуамӕ дзуапп бацагурӕм, цы фарстатӕ нӕм фӕзыны, уыдонӕн. Зӕгъӕм, ацы дунейӕн йӕ кӕрон ӕцӕгдӕр ӕввахс кӕй у, уый дӕ цӕмӕй ноджы фидардӕрӕй уырна, уый тыххӕй дӕ бон цы у саразын? Бӕстон раиртас, фӕстаг бонты кӕй цӕрӕм, уый чи бӕлвырд кӕны, уыцы пехуымпарӕдтӕ. Цӕмӕй, Библийы фидӕны тыххӕй цы фыст ис, ууыл тынгдӕр ӕууӕндай, уый тыххӕй та лӕмбынӕг ӕркӕс, ныронг цы бирӕ пехуымпарӕдтӕ сӕххӕст, уыдонмӕ. Библийы  фӕрцы йӕ цард хуыздӕрырдӕм кӕмӕн фӕивта, уыдоны цӕвиттонтӕм куы ’ркӕсай, уӕд та нӕ дызӕрдыг кӕндзынӕ, Библи нын абон дӕр царды стыр ӕххуыс кӕй у, ууыл * (1 Фес. 2:13).

17. Йесо уӕззау фӕлварӕнты дӕр иузӕрдионӕй цӕй фӕрцы баззад ӕмӕ йӕ дӕ бон бафӕзмын куыд у?

¹⁷ Дӕ хъуыдытӕ уӕнт, Йегъовӕ зӕрдӕ кӕмӕй ӕвӕры, уыцы арфӕдзинӕдтыл. Йесойӕн йӕ хъуыдытӕ уыдысты, фидӕны йӕм цы арфӕдзинӕдтӕ ӕнхъӕлмӕ каст, уыдоныл, ӕмӕ уый фӕрцы уӕззау фӕлварӕнты рӕстӕг дӕр иузӕрдионӕй баззад (Дзут. 12:2). Ацы дунейы йын цы фадӕттӕ уыд, уыдонмӕ йе ’ргом никуы аздӕхта (Матф. 4:8–10). Дӕ бон куыд у Йесойы фӕзмын? Йегъовӕ нын зӕрдӕ цы диссаджы арфӕдзинӕдтӕй бавӕрдта, уыдоныл-иу хъуыды кӕн. Дӕ цӕстытыл-иу ауайын кӕн, цыма ног дунейы дӕ. Зӕгъӕм, дӕ бон у, Дзӕнӕты цытӕ араздзынӕ, уый ныффыссын кӕнӕ нынныв кӕнын. Йе та дӕ бон у, чи райгас уыдзӕн, уыдонӕй дӕ кӕй фенын фӕндид ӕмӕ семӕ цӕуыл аныхас кӕнис, уый ныффыссын. Фидӕны арфӕдзинӕдтӕм ахӕм цӕстӕй кӕс, цыма сӕ Хуыцау ӕрмӕст иннӕты тыххӕй нӕ, фӕлӕ дӕу тыххӕй дӕр ӕрцӕттӕ кодта.

18. Хуыцаумӕ куы кувай, уӕд дӕ уырнындзинад куыд фидар кӕндзӕн?

¹⁸ Хуыцаумӕ кув, цӕмӕй дын дӕ уырнындзинад фидар кӕнынӕн ӕххуыс кӕна. Йесо йӕ ахуыргӕнинӕгтӕн бацамыдта, цӕмӕй Йегъовӕйӕ сыгъдӕг тых курой (Лук. 11:9, 13). Хуыцауӕй сыгъдӕг тых куы курай, уӕд-иу дзы ракур, цӕмӕй дын дӕ уырнындзинад дӕр бафидар кӕна, уымӕн ӕмӕ уырнындзинад у, сыгъдӕг тыхы дыргъмӕ цы миниуджытӕ хауы, уыдонӕй сӕ иу. Кувгӕйӕ бӕлвырд хъуыддӕгты тыххӕй дзур. Зӕгъӕм, кӕд ӕй бафиппайдтай, дӕ уырнындзинад кӕй ӕрлӕмӕгъ ӕмӕ дын уый тыххӕй хатыр кӕнын зын кӕй у, уӕд Хуыцаумӕ кув, цӕмӕй дын уыцы хъуыддаджы баххуыс кӕна.

19. Нӕ бон куыд у нӕхицӕн хорз ӕмбӕлттӕ ссарын?

¹⁹ Йӕ уырнындзинад фидар кӕмӕн у, дӕхицӕн ахӕм ӕмбӕлттӕ ӕвзар. Йесойӕн йе ’мбӕлттӕ чи уыдысты, уымӕ куыдфӕндыйы цӕстӕй нӕ касти. Йе ’ввахс ӕмбӕлттӕ, ома йӕ апостолтӕ, йӕ коммӕ кӕй кастысты, уымӕй равдыстой, уырнындзинад сӕм кӕй уыди ӕмӕ иузӕрдион кӕй уыдысты. (Бакӕс Иоанны 15:14, 15.) Уӕдӕ дӕхицӕн ӕмбӕлттӕ агур, йӕ уырнындзинад фидар кӕмӕн у ӕмӕ Йесойӕн коммӕгӕс чи у, уыдоны ’хсӕн. Ӕцӕг ӕмбӕлттӕ кӕрӕдзиимӕ ӕргом фӕныхас кӕнынц, дзырд уынаффӕ раттыныл кӕнӕ уынаффӕмӕ байхъусыныл куы цӕуа, уӕд дӕр (Ӕмб. 27:9).

20. Иннӕтӕн сӕ уырнындзинад фидар кӕнынӕн куы ’ххуыс кӕнӕм, уӕд нын уый цавӕр пайда ӕрхӕсдзӕн?

²⁰ Иннӕтӕн сӕ уырнындзинад фидар кӕнынӕн ӕххуыс кӕн. Йесо йӕ ахуыргӕнинӕгты уырнындзинад фидар кодта ныхасӕй дӕр ӕмӕ хъуыддагӕй дӕр (Мар. 11:20–24). Мах дӕр хъуамӕ афтӕ кӕнӕм, уымӕн ӕмӕ иннӕты уырнындзинад куы фидар кӕнӕм, уӕд нӕхи уырнындзинад дӕр фидар кӕндзӕн (Ӕмб. 11:25). Кӕмӕн хъусын кӕныс кӕнӕ Библи кӕимӕ ахуыр кӕныс, уыдонӕн фидар бӕлвырдгӕнӕнтӕ хӕсс, Хуыцау кӕй ис, кӕй ныл тыхсы ӕмӕ Библи йӕ Ныхас кӕй у, уымӕн. Дӕ хотӕ ӕмӕ де ’фсымӕртӕн дӕр ӕххуыс кӕн сӕ уырнындзинад фидар кӕнынӕн. Зӕгъӕм сӕ исчи бӕрнон ӕфсымӕртыл хъуыр-хъуыр кӕнын куы райдайа, уӕд-иу дзы уайтагъд дӕхи дард ласын ма райдай, фӕлӕ-иу ын фӕлмӕнӕй баххуыс кӕн йӕ уырнындзинад бафидар кӕнынӕн (Иуд. 22, 23). Кӕд скъоладзау дӕ ӕмӕ эволюцийы теори ахуыр кӕнут, уӕд та-иу, цӕуыл ӕууӕндыс, уый сӕрыл хъӕбатырӕй дзур. Дӕ ныхӕстӕ иннӕтыл, чи зоны, ӕнхъӕл дӕр куыд нӕ дӕ, афтӕ фӕзыной.

21. Йегъовӕ махӕй алкӕмӕн дӕр зӕрдӕ цӕмӕй ӕвӕры?

²¹ Йегъовӕ ӕмӕ Йесойы ӕххуысы фӕрцы Петр фӕуӕлахиз, йӕ зӕрдӕйы цы тас ӕмӕ цы дызӕрдыггаг хъуыдытӕ фӕзынд, уыдоныл. Ӕмӕ фӕстӕдӕр Петр сси, йӕ уырнындзинадӕй иннӕтӕн фӕзминаг чи уыд, ахӕм адӕймаг. Йегъовӕ махӕн дӕр ӕххуыс кӕны, цӕмӕй «уырнындзинады фидар уӕм». (Бакӕс 1 Петры 5:9, 10.) Нӕ уырнындзинад фидар кӕнынӕн нӕ бирӕ хъарутӕ ӕрӕвӕрын фӕхъӕуы, фӕлӕ уый йӕ фыдӕбоны аргъ у, уымӕн ӕмӕ нӕ уӕд Йегъовӕ схайджын кӕндзӕн диссаджы арфӕдзинӕдтӕй!