1. (a) Deskribí loke Pedro a eksperensiá durante un tormenta riba Laman di Galilea. (Wak e promé plachi.) (b) Dikon Pedro a kuminsá senk?

RIBA un anochi ku tabatin un tormenta, apòstel Pedro i algun disipel tabata rema nan boto ku hopi difikultat den Laman di Galilea. Diripiente, nan a mira Hesus ta kana riba laman. Pedro a puntra Hesus si e por a bini serka dje. Ora Hesus a bis’é pa bini, Pedro a baha for di e boto den e laman bruto, i el a kuminsá kana bai serka Hesus. Sinembargo, despues ku el a dal un par di stap, el a kuminsá senk. Dikon? Pasobra el a wak e tormenta i a haña miedu. Pedro a kuminsá grita pa Hesus yud’é. Mesora Hesus a gara su man i a bis’é: “Hòmber di poko fe, pakiko bo a kuminsá duda?”—Mat. 14:24-32.

2. Kiko nos lo analisá den e artíkulo akí?

² Laga nos analisá tres kos ku nos por siña tokante e fe di Pedro: (1) Kon Pedro a mustra fe den e yudansa di Dios, (2) Dikon el a kuminsá pèrdè fe i (3) Kiko a yud’é haña su fe bèk. E puntonan akí lo yuda nos “para firme den fe.”—1 Kor. 16:13.

3. Dikon Pedro a baha for di e boto, i kon nos a hasi algu paresido?

³ Pedro a demostrá fe ora el a baha for di e boto na momento ku Hesus a yam’é. E tabata sigur ku Dios su poder lo a yud’é meskos ku el a yuda Hesus. Meskos tambe, ora Hesus a invitá nos pa siguié, nos a dediká nos bida na Yehova i a batisá. Dikon? Pasobra nos tabatin fe den tantu Yehova komo Hesus, i nos tabatin sigur ku semper nan lo yuda nos.—Huan 14:1; lesa 1 Pedro 2:21.

4, 5. Dikon fe ta algu asina balioso?

⁴ Fe ta algu hopi balioso. Meskos ku fe a permití Pedro kana riba awa, nos fe por yuda nos hasi kosnan ku pa hende por parse imposibel. (Mat. 21:21, 22) Por ehèmpel, fe a yuda nos hasi kambionan asina grandi den nos aktitut i kondukta ku e hendenan ku tabata konosé nos ántes kasi no por rekonosé nos mas. Yehova a yuda nos pasobra nos a hasi e kambionan akí a base di nos fe den dje. (Lesa Kolosensenan 3:5-10.) E mesun fe ei a yuda nos dediká nos bida na Yehova i bira su amigu, algu ku nos lo no por a hasi nunka sin su yudansa.—Efe. 2:8.

⁵ E fe ku nos tin den Yehova ta sigui duna nos e forsa ku nos tin mester. Por ehèmpel, e ta yuda nos resistí e atakenan di Diabel, nos enemigu poderoso. (Efe. 6:16) Ademas, nos konfiansa den Yehova ta yuda nos pa ta ménos preokupá ora nos enfrentá problema. Yehova a primintí nos ku si nos tin fe i ta pone e Reino na promé lugá den nos bida, lo e perkurá pa nos nesesidatnan material. (Mat. 6:30-34) Mas importante ainda, nos fe lo yuda nos haña un regalo ku hamas nos lo por haña riba nos mes méritonan: bida eterno.—Huan 3:16.

6, 7. (a) Ku kiko nos por kompará e bientu i e olanan ku a bini riba Pedro? (b) Kiko ta importante pa nos kòrda?

⁶ Nos por kompará e bientu i e olanan ku tabata bini riba Pedro, ora ku e tabata kana riba awa, ku e prueba- i tentashonnan ku nos ta enfrentá komo sirbidónan di Dios. Asta ora e pruebanan akí ta hopi difísil, nos por soportá nan ku yudansa di Yehova. Kòrda ku no ta e bientu òf e olanan a pone Pedro senk. Pensa riba loke a pasa: “Ora el a wak e tormenta, el a haña miedu.” (Mat. 14:30) Ku otro palabra, ta ora Pedro a stòp di enfoká riba Hesus, el a pèrdè su fe. Nos tambe por kuminsá senk si nos “wak e tormenta.” Kon asina? Wèl, esei ta ora nos enfoká muchu riba nos problemanan i kuminsá duda ku Dios lo yuda nos.

⁷ Ta importante pa nos kòrda ku kualke un di nos por pèrdè fe, pasobra Beibel ta bisa ku falta di fe ta “e piká ku fásilmente ta stroba nos.” (Heb. 12:1) Manera e eksperensia di Pedro ta mustra, nos fe fásilmente por bira suak si nos enfoká riba e kosnan robes. Kon nos por sa si esei ta pasando ku nos? E siguiente preguntanan por yuda nos analisá nos mes.

8. Kiko por pone nos duda den e promesanan di Dios?

⁸ Dios su promesanan ta mes real pa mi awe ku nan tabata ántes? Por ehèmpel, Dios a primintí ku lo e destruí e mundu malbado akí. Akaso nos a kuminsá duda ku e fin ta serka debí ku nos a laga entretenimentu di e mundu akí distraí nos? (Hab. 2:3) Laga nos wak un otro ehèmpel. Dios ta primintí ku lo e pordoná  nos si nos tin fe den e reskate di Hesus. Pero, si nos keda enfoká riba nos foutnan di pasado, esei lo por pone nos duda ku di bèrdat Yehova a pordoná nos pikánan. (Echo. 3:19) Komo resultado, nos lo por pèrdè goso den nos sirbishi na Dios i asina bira inaktivo.

9. Kiko por pasa si nos kuminsá enfoká riba interesnan personal?

⁹ Ainda mi ta duna Yehova tur loke mi por? Apòstel Pablo a bisa ku si nos ke ta “sigur di [nos] speransa te na fin,” nos mester sigui traha duru pa Yehova. Pero kiko por pasa si nos kuminsá enfoká riba interesnan personal? Por ehèmpel, nos lo por tuma un trabou ku ta paga bon pero ku ta stroba nos di sirbi Dios. Esei lo por debilitá nos fe, hasi nos “floho” i pone ku nos no ta duna Yehova tur loke nos por.—Heb. 6:10-12.

10. Kon nos ta mustra ku nos tin fe den Yehova ora nos ta pordoná otro hende?

¹⁰ Mi ta haña ta difísil pa pordoná? Ora un hende faya ku nos, nos ta rabia i papia malu kuné òf asta keda sin papia kuné? Si nos tin fe den Yehova, nos lo pordon’é. Dikon? Wèl, ora un hende peka kontra nos, ta komo si fuera e debe nos. Asina tambe, ora nos peka kontra Dios, nos ta krea un debe serka dje. (Luk. 11:4) Ora nos ta pordoná e persona, nos ta mustra ku nos tin fe i ku nos ta duna mas balor na Dios su aprobashon ku na e debe ku e persona tin serka nos. Hesus su disipelnan a komprondé ku nan mester tabatin fe pa por pordoná otro hende. P’esei, ora Hesus a bisa nan pa pordoná asta esnan ku kada bes tabata ofendé nan, nan a rog’é: “Duna nos mas fe.”—Luk. 17:1-5.

11. Kiko lo por stroba nos di aseptá konseho?

 ¹¹ Mi ta disgustá ora mi haña konseho? Ora nos haña konseho, kisas nos ta enfoká muchu riba un supuesto fayo den e konseho òf e persona ku ta konsehá nos. Lo no ta mihó pa purba di mira kon e konseho por yuda nos mehorá i pa pensa mas manera Yehova ta pensa?—Prov. 19:20.

12. Kiko un kristian ta mustra ora e tin e kustumber di keha kontra esnan ku Dios a nombra pa dirigí e kongregashon?

¹² Mi ta keha kontra e rumannan ku ta dirigí e kongregashon? Debí ku e israelitanan a enfoká muchu riba e mal informe di e dies spionnan, nan a kuminsá murmurá kontra Moises i Aron. Despues, Yehova a puntra Moises: “Kuantu tempu mas nan lo no kere den mi?” (Num. 14:2-4, 11) En realidat, e israelitanan a mustra un falta di fe den Dios ora ku nan a murmurá kontra Moises i Aron, esnan ku Dios a nombra pa dirigí su pueblo. Asina nos tambe lo mustra un falta di fe den Dios si nos tin e kustumber di keha kontra esnan ku Dios a nombra pa dirigí su pueblo awe.

13. Dikon nos no mester desanimá ora nos ripará ku nos fe no ta mes fuerte ku nos a pensa?

¹³ Despues ku bo a analisá e preguntanan akí, kisas bo a ripará ku bo fe no ta mes fuerte ku bo a pensa. No desanimá. Kòrda ku asta apòstel Pedro a sinti miedu i a kuminsá duda. I tin biaha Hesus mester a konsehá tur su disipelnan pa motibu di nan “poko fe.” (Mat. 16:8) E lès mas importante ku nos por siña for di Pedro su eksperensia tin di haber ku loke el a hasi despues ku el a pèrdè fe i a kuminsá senk den laman.

14, 15. (a) Kiko Pedro a hasi ora el a kuminsá senk? (b) Aunke nos no por mira Hesus, kon nos por “fiha nos bista” riba dje?

¹⁴ Kiko Pedro por a hasi ora el a wak e tormenta i kuminsá senk? Debí ku e tabata un bon landadó, e por a landa bai bèk na e boto. (Huan 21:7) Pero en bes di konfia den su mes, el a bolbe enfoká riba Hesus i aseptá su yudansa. Si nos sinti ku nos a kuminsá pèrdè fe, nos mester imitá e ehèmpel di Pedro. Pero, kon nos por hasi esei?

¹⁵ Meskos ku Pedro a bolbe enfoká riba Hesus, nos tambe mester “fiha nos bista riba Hesus, e Representante Prinsipal di nos fe i Esun ku ta hiba esaki na perfekshon.” (Lesa Hebreonan 12:2, 3.) Naturalmente nos no por mira Hesus manera Pedro a mir’é. Pero nos ta “fiha nos bista” riba dje ora nos ta studia tokante su bida i siñansanan i purba di imitá su ehèmpel fielmente pa asina nos haña un fe firme. Laga nos analisá algun manera ku nos por hasi esei.

16. Kon estudio di Beibel por hasi nos fe mas fuerte?

¹⁶ Haña mas konfiansa den Beibel. Hesus tabata konvensí ku Beibel ta e Palabra di Dios i ku e ta duna nos e mihó guia den bida. (Huan 17:17) Si nos ke tin e mesun konvikshon ku Hesus, nos tin ku lesa Beibel tur dia, studi’é i meditá riba loke nos a siña. Ademas di esei, nos mester hasi investigashon riba e temanan ku nos por tin duda riba dje. Por ehèmpel, nos por fortalesé nos konvikshon ku e fin ta serka segun ku nos ta studia e profesianan di Beibel ku ta mustra ku nos ta bibando den e último dianan. Ora nos analisá e profesianan ku a kumpli  kaba, nos konfiansa den e profesianan ku mester kumpli ainda ta bira mas grandi. I pa nos haña mas konfiansa den e konsehonan di Beibel, ta bon pa nos lesa e eksperensianan ku ta mustra kon Beibel ta kambia bida di hende. *—1 Tes. 2:13.

17. (a) Kon Hesus a logra di keda fiel bou di prueba severo? (b) Kon nos por imitá Hesus?

¹⁷ Enfoká riba e bendishonnan ku Yehova a primintí. “Pa motibu di e goso ku tabata sper’é,” Hesus por a keda fiel bou di prueba severo. (Heb. 12:2) Nunka el a laga loke mundu tin di ofresé distraé. (Mat. 4:8-10) Kon nos por imitá Hesus den esaki? Esei ta ora nos ta meditá riba e maravioso promesanan ku Yehova a duna nos. Djis imaginá bo mes den e mundu nobo. Skirbi òf pinta kiko lo bo ke hasi einan. Traha un lista di hende ku bo ke topa ora nan resusitá, i skirbi ki pregunta lo bo ke hasi nan. Mira kada promesa ku Dios a hasi komo algu ku el a primintí abo personalmente.

18. Kon orashon por fortalesé bo fe?

¹⁸ Pidi Dios pa e duna bo mas fe. Hesus a bisa su siguidónan pa pidi Yehova pa spiritu santu. (Luk. 11:9, 13) Miéntras ku bo ta hasi esei, pidi tambe pa mas fe; e ta un di e kualidatnan di e fruta di spiritu. Sea spesífiko den bo orashonnan. Por ehèmpel, si bo ta haña ku ta difísil pa pordoná otro hende, pidi Dios yuda bo fortalesé bo fe pa asina bo por logra pordoná.

19. Ki tipo di amigu nos mester buska?

¹⁹ Anda ku hende ku tin un fe fuerte. Hesus a skohe su amigunan bon, spesialmente esnan ku tabata mas pegá kuné. Por ehèmpel, su apòstelnan, ku tabata su amigunan mas yegá, tabata hòmbernan di fe ku a demostrá nan lealtat dor di obedesé su mandamentunan. (Lesa Huan 15:14, 15.) Pues, nos por hasi meskos ora nos ta buska amigu entre hende ku tin fe i ku ta mustra esaki pa medio di nan obedensia na Hesus. Ademas, bon amigu por ta onesto ku otro, i nan por duna i aseptá konseho.—Pro. 27:9.

20. Ki benefisio nos ta haña ora nos yuda otronan fortalesé nan fe?

²⁰ Yuda otro hende fortalesé nan fe. Hesus a fortalesé e fe di su disipelnan tantu den loke el a bisa komo loke el a hasi. (Mar. 11:20-24) Si nos ta sigui su ehèmpel i fortalesé e fe di otronan, esei lo fortalesé nos fe tambe. (Pro. 11:25) Kon bo por logra esei? Den e trabou di prediká i siña hende, enfatisá e echo ku Dios ta eksistí, ku e ta interesá den hende i ku Beibel ta su palabra inspirá. Ademas, bo por fortalesé e fe di bo rumannan. Si bo ripará ku algun di nan ta kuminsá keha kontra e rumannan ku ta dirigí e kongregashon, no sea lihé pa rechasá nan. Mas bien, ku takto yuda nan rekobrá nan fe. (Hudas 22, 23) Komo hóben bo por haña bo mes ku lèsnan tokante evolushon. Si bo defendé bo fe den kreashon, lo bo por keda sorprendí kon otronan lo reakshoná.

21. Kiko Yehova a primintí nos?

²¹ Danki na e apoyo di Yehova i Hesus, Pedro por a vense su miedu i duda, i el a bira un pilá di e kongregashon di promé siglo. Di mes manera, Yehova ta yuda nos para firme den fe. (Lesa 1 Pedro 5:9, 10.) Ta bale la pena pa hasi esfuerso pa fortalesé nos fe, ya ku nos lo haña e bendishon di Dios.