1. (a) Lu nyi i er Peteru shighe u zegeahumbe lu kpianger a Zegemnger u Galilia laa? (Nenge foto u a lu sha mhii u ngeren ne la.) (b) Peteru yange hii u miren sha ci u nyi?

APOSTOLI PETERU man mbahenen mbagenev lu nahan tso tugh sha u vea per Zegemnger u Galilia zum u zegeahumbe lu kpianger a mi yô. Ica i gbe ga yô, ve nenge a Yesu lu zenden sha mnger. Peteru maa yila Yesu, pine un aluer ka una zende sha mnger una za hen a na yô. Yesu kaan a na ér a va yô, a due shin tso, a gba zenden zan. Kpa ica i gbe ga yô, Peteru maa hii u miren. Sha ci u nyi? Sha ci u a nenge a ahumbe man agôndoamnger, nahan cier un iyol. Peteru ngor ér Yesu a yima un, nahan fese je Yesu naregh uwegh kôr un, maa kaa ér: ‘We u u lu a anjighjigh u nan kpeghee ne, ka nyi u te akperana?’—Mat. 14:24-32.

2. Se lu timen sha nyi?

² De se time nen sha akaa atar, a se fatyô u henen hen Peteru sha kwagh jighjigh u nan yô. Ka akaa shon je ne: (1) er Peteru hii lun a jighjigh u nan ér Aôndo una wase un yô, (2) kwagh u na ve jighjigh u nan u Peteru hii u ndôhôr yô, man (3) kwagh u wase Peteru ve  hide taver jighjigh na u nan yô. Aluer se time sha akaa ne yô, a a wase se u nengen er se fatyô u ‘tilen dông sha jighjigh u nan’ yô.—1 Kor. 16:13.

3. Peteru yange due shin tso sha ci u nyi, man se kpa se er kwagh er un nahan nena?

³ Lu jighjigh u nan wase Peteru ve due shin tso, gba zenden sha mnger ye. Shighe u Yesu kaa a Peteru ér a zende a va hen a na la, Peteru na jighjigh ér Aôndo una wase un sha tahav nav, er lu wasen Yesu nahan. Se kpa, shighe u se tsegha ayol a ase sha ci u Yehova, i er se batisema la, lu sha ci u se lu a jighjigh u nan. Yesu yange yila se ér se va lu mbadondon un. Nahan se na jighjigh ser Yesu man Aôndo cii vea wase se sha igbenda kposo kposo.—Yoh. 14:1; ôr 1 Peteru 2:21.

4, 5. Jighjigh u nan ka kwagh u injaa sha ci u nyi?

⁴ Mimi yô, jighjigh u nan ka kwagh u injaa. Er jighjigh u Peteru yange wase un u zenden sha mnger nahan, se kpa jighjigh wase una wase se u eren akaa a sha mnenge u uumace yô, ma se fetyô u eren ga la. (Mat. 21:21, 22) Ikyav i tesen yô, se kpishi se gema inja man ieren yase sha gbenda u vesen, je yô, ior mba ngise ve fa mlu wase la, ka vea nenge a vese hegen yô, ve kera kav ga. Yehova yange wase se se gema inja man ieren yase sha ci u se na un jighjigh. (Ôr Mbakolose 3:5-10.) Jighjigh wase la mgbeghan se, se mba tsegh ayol a ase sha ci u Yehova yô, se hingir azende a na. Luun er ka sha tahav asev yô, yange ma se fatyô u eren kwagh ne ga.—Ef. 2:8.

⁵ Jighjigh wase u nan za hemen u taver se ken jijingi her. Ka jighjigh wase u nan la ka a na ve se fatyô u nôngon a Diabolo, orihyom wase u ageegh la, shighe u a te num sha a vese ye. (Ef. 6:16) Heela tseegh ga, ka jighjigh u se ne Yehova la ngu a wase se shighe u se tagher a mbamtaver, kpa ishima i nyian se i za kar ikyaa inya ga ye. Yehova kaa ér, aluer jighjigh wase la mgbegha se u vanden keren Tartor yô, una nenge sha mbamgbe asev mba yolough mbara. (Mat. 6:30-34) Shi ka sha jighjigh wase u nan la, se va ngohol iyua i uma u tsôron, i orumace môm nana fatyô u zuan a mi sha iniôngon i nan ga la ye.—Yoh. 3:16.

6, 7. (a) Se fatyô u tôôn ahumbe man agôndoamnger a Peteru tagher a mi la karen sha nyi? (b) Er nan ve i doo u se fa ser jighjigh wase una fatyô u ndôhôrô?

⁶ Se fatyô u tôôn ahumbe man agôndoamnger a Peteru tagher a mi, shighe u lu zenden sha mnger la, karen sha atsan man ameen a se tsegh ayol a ase sha ci u Aôndo ve, se lu tagher a mi la. Shighe u se tagher a atsan shin ameen tsung je kpa, sha iwasen i Yehova yô, se fatyô u tilen dông her. Umbur wer, yange lu ahumbe man agôndoamnger a a lu tan sha Peteru la na ve, hii u miren ga. Hide hen ase sha kwagh u yange za hemen la. Bibilo kaa ér: “Nengen ahumbe nga taver yô, a cia.” (Mat. 14:30) Peteru yange ver ishima sha Yesu ga, nahan jighjigh na u nan hii u tenger. Se kpa, aluer se ver ishima sha mbamzeyol asev yô, se hii u tan akperan ser Yehova una wase se ga.

⁷ Gba u se fa ser jighjigh wase u nan una fatyô u ndôhôr. Sha ci u nyi? Sha ci u Bibilo ôr kwagh u jighjigh u ndôhôr la ér ka ‘isholibo i ka i tseren se abur abur’ yô. (Heb. 12:1) Er kwagh u yange er Peteru la a tese nahan, aluer se ver ishima sha akaabo yô, jighjigh wase una ndôhôr fese je, a bur se a bur. Se er nan ve se fa ser jighjigh wase u nan hii u ndôhôrô? Time ase sha mbampin mba vea fatyô u wasen se u tôvon ayol a ase ne.

8. Alaghga uityendezwa mba Aôndo vea kera lu se kwagh u mimi er ngise lu se nahan ga nena?

⁸ M kera nengen uityendezwa mba Aôndo mer ka kwagh u mimi, er ngise lum nahan gaa? Ikyav i tesen yô, Aôndo tôndo zwa ér una va tim tar ne kera. Nahan kpa, se  de iemberyolough i tar ne ngi danen se, maa jighjigh u se ne kwagh u Aôndo a tende zwa u eren la ngu ndôhôrôô? Aluer kwagh ngu nahan yô, alaghga se hii u tan akperan ser mkur zurum ga. (Hab. 2:3) Nenge ase ikyav igen kpaa. Aôndo tôndo zwa ér una de se asorabo a ase sha ikyev i naagh ku ipaa ku Kristu kura. Nahan kpa, aluer hanma shighe ishima ngi nan se ibo sha akaabo a yange se er la yô, alaghga se hii u tan akperan ser Yehova ‘ese asorabo a ase kera’ cii ga. (Aer. 3:19) Aluer kwagh ngu nahan yô, alaghga a kera saan se iyol u eren tom u Aôndo ga, nahan se hingir u vôron ken jijingi.

9. Aluer se ver ishima sha kwagh u kuren mbamgbe asev la yum yô, ka nyi ia fatyô u eren se?

⁹ M ngu eren Aôndo tom kpoghuloo er ngise m eren nahan kpa? Apostoli Paulu tese ér, ka sea eren Yehova tom kpoghuloo yô, kwagh ne a na se lu a “mfe u mimi u ishimaverenkeghen yase [la] zan zan mkur.” Nahan kpa, aluer se hii u veren ishima sha kwagh u kuren mbamgbe asev, er u eren tom u i lu kimbir se inyaregh kpishi, kpa u gem u lu yangen se u civir Aôndo la nahan yô, ka nyi ia fatyô u eren se? Jighjigh wase u nan una fatyô u ndôhôr, shi ‘iyol ia kpe se,’ nahan se kera gba eren Yehova tom er ma se lu eren la ga.—Heb. 6:10-12.

10. Shighe u se de mbagenev a kwaghbo yô, se mba tesen ser se na Yehova jighjigh nena?

¹⁰ Ka i taver mo kpishi u den mbagenev a kwaghbo? Shighe u mbagenev ve hii se shin ve er kwagh u a doo se ga yô, alaghga se vihi ishima a za kar ikyaa inya, maa se de u lamen a ve. Kpa aluer se de ve a kwaghbo yô, se mba tesen ser se na Yehova jighjigh. Nena yô? Mba ve er se kwaghbo yô, mba se a injô, er se kpa ka sea er Aôndo kwaghbo ve, se lu un a injô nahan. (Luka 11:4) Ka sea de mbagenev a kwaghbo yô, se mba tesen ser, iveren i Aôndo una na se la hemba u se keren ser se er a nan er nan er a vese la. Mbahenen mba Yesu yange ve kav ér gba u vea lu a jighjigh u nan ve vea fatyô u den mbagenev a kwaghbo ye. Shighe u Yesu kaa a ve ér ve deen mba ve  er ve kwaghbo acin imôngo kpaa la, ve zamber a na ér: “Seer se jighjigh u nan!”—Luka 17:1-5.

11. Alaghga a wa se kwagh kpa se zua a mtsera ker ga sha ci u nyi?

¹¹ Ka m venda kwagh u i wem ken Ruamabera laa? Zum u i we se kwagh yô, doo u se ker gbenda u se dondo kwaghwan la sha er se zua a mtsera yô; se ver ishima sha kwagh u a shi sha kwaghwan shon, shin mbamshi mba or u nan we se kwagh la ga. (Anz. 19:20) Aluer se venda kwaghwan yô, ian i ma se kôôm mhen wase ma a zough sha u Aôndo la ia kar se.

12. Aluer hanma shighe or ngu gban ahon sha kwagh u mba Yehova a tsough ve ér ve hemen ior nav la yô, tese ér nyi?

¹² M gbe ahon sha kwagh u mbatamen mba ken tiônnongo ve er yôô? Mbaiserael yange ve ver ishima sha ibaver i bo i mbagban mker mba puev, mba ve ban a jighjigh u nan la, nahan ve hii u gban ahon sha kwagh u Mose man Aron. Kwagh ne na yô, Yehova pine Mose ér: ‘Ka hanma shighe je man vea nam jighjigh?’ (Num. 14:2-4, 11) Mimi yô, er Mbaiserael lu gban ahon yô, tese ér ve na Aôndo, u yange tsua Mose man Aron ér ve hemen la, jighjigh ga. Se kpa aluer hanma shighe se mba gban ahon sha kwagh u mba Aôndo a tsough ve ér ve hemen ior nav la yô, se lu tesen ser se na Aôndo jighjigh taveraa ga.

13. Aluer se kav ser jighjigh wase u nan hii u ndôhôr kpa, doo u iyol ia kpe se ga sha ci u nyi?

¹³ Nahan cii kpa, aluer u tôv ishima iyol you man u kav wer jighjigh wou la ngu ndôhôr kpa, iyol i de kpen we ga. Peteru u lu apostoli la je kpa, yange cia kwagh shi ta akperan. Jighilii yô, ashighe agen Yesu a kôôm mbaapostoli nav cii ér mba a “anjighjigh u nan kpeghee.” (Mat. 16:8) Nahan kpa, se fatyô u henen kwagh u injaa ken kwagh u yange er Peteru la. Umbur kwagh u yange er un shighe u hii u tan akperan, maa gba miren shin mnger la.

14, 15. (a) Shighe u Peteru hii u miren la, a er nena? (b) Er i lu u se fatyô u nengen a Yesu sha ashe ga nahan kpa, se ‘ver ashe’ sha a na nena?

¹⁴ Shighe u Peteru kenger ahumbe ve hii u miren la, alaghga yange ma tsua u ôôn uwe hiden za nyôron shin tso. Kera kpa, fa uwe ôôn hundu sen, nahan lu kwagh u ma hii van un ken ishima je la. (Yoh. 21:7) Kpa suur sha tahav nav ga, a hide a ver ishima sha Yesu ér a wase un. Aluer se nenge ser jighjigh wase u nan hii u vôron yô, doo u se dondo ikyav i Peteru la. Kpa se er kwagh ne nena?

¹⁵ Er Peteru kpa yange hide ver ishima sha Yesu nahan, se kpa gba u se “veren nen ashe sha Yesu Orhemen man Orkuren u jighjigh wase u nan.” (Ôr Mbaheberu 12:2, 3.) Nahan kpa, se fatyô u nengen a Yesu sha ashe, er Peteru nahan ga. Ka se ‘ver ashe’ sha Yesu sha u timen sha atesen man aeren a na, shi dondon a vough vough. Nenge ase igbenda igen i se fatyô u dondon ikyav i Yesu yange ver la yô. Aluer se dondo igbenda ne yô, ia wase se se taver jighjigh wase u nan.

16. Se fatyô u henen Bibilo sha gbenda u a wase se u taver jighjigh wase u nan nena?

¹⁶ Taver jighjigh u u ne Mkaanem ma Aôndo la. Yesu yange na jighjigh ér Bibilo ka Mkaanem ma Aôndo; ka ma na se kwaghwan u hemban doon cii u una wase se ken uma yô. (Yoh. 17:17) Aluer se soo u dondon ikyav i Yesu la yô, gba kpee u se ôron Bibilo hanma iyange shi se henen i, shi se gbidyen kwar sha mi. Dugh Bibilo i henen la sha yô, doo u se tôôn shighe se tôvon sha atineakaa a se fe i kom se ga la. Ikyav i tesen yô, u fatyô u tôôn shighe henen akaa a Ruamabera a er u tesen wang ér se mba ken ayange a masejime la dike dike, sha er u seer lun a vangertiôr wer mimi je mkurtar mgbôghom yô. Shi taver jighjigh u u ne wer uityendezwa mba Aôndo mba i nger ken Bibilo, vea va kure ken hemen la sha u tôvon sha akaaôron a profeti kpishi, a a vande kuren la. Seer lun a vangertiôr ken  Bibilo wer ia wase u kpishi sha u ôron kwagh u ior mba Bibilo i wase ve, ve gem uuma vev la. *—1 Tes. 2:13.

17. Er nan ve Yesu yange za hemen u tilen sha mimi shin er tagher a ameen a vihin tsung nahan kpaa, man u dondo ikyav na la nena?

¹⁷ Ver ishima sha averen a Yehova a tende zwa u nan se la. Er Yesu lu veren ashe a “iember i i ver Un sha ishi” la yô, a kôrcio u tilen sha mimi her, shin er a tagher a ameen a vihin tsung nahan kpaa. (Heb. 12:2) Mayange de er akaa a taregh a dan un ga. (Mat. 4:8-10) We kpa u fatyô u dondon ikyav i Yesu la sha u gbidyen kwar sha akaa a doon tsung a Aôndo a tende zwa u eren sha ci wou la. U fatyô u eren kwagh ne sha u ngeren shin kpelan akaa a u lu veren ishima u va eren zum u Aôndo una tim botar ne kera la. Nger ati a ior mba u lu veren ashe u va zuan ishigh a ve shighe u a nder ve shin ku la kua akaa a u soo wer u va lam a ve sha mi la. De nengen wer Aôndo er uityendezwa mban sha ci u uumace cii tsô ga, kpa a er ve sha ci wou kpôô kpôô.

18. Msen una wase u u taver jighjigh wou u nan nena?

¹⁸ Sôn Aôndo a seer taver jighjigh wou. Yesu yange tese mbahenen nav ér ve sôn Yehova a na ve icighan jijingi na. (Luka 11:9, 13) Wea sônon Aôndo wer a na u icighan jijingi na yô, sôn un a seer taver jighjigh wou u a lu vegher u ityamegh ki jijingi la kpaa. Sôn Aôndo kwagh u ú soo la jighilii, zamber a na a wase u u hemban ma ieren you i i tese ér jighjigh wou ngu ndôhôr la, er ieren i den or a kwaghbo ga la nahan.

19. Ka ieren i nyi i doo u se nenge ser ijende yase i lu a mi?

¹⁹ Luun imôngo vea mba ve lu a jighjigh u nan taveraa yô. Yesu yange tsua azende a na a kôôsôô la sha kwaghfan. Mbaapostoli mba ve hemba lun a na kôôsôô la, yange ve tese ér mba a jighjigh u nan shi ve tile sha mimi sha u dondon akaawan a na. (Ôr Yohane 15:14, 15.) Nahan shighe u u lu tsuan azende a ou yô, ker ior mba ve tese ér mba a jighjigh u nan sha u ungwan imo i Yesu la. Umbur wer or u nan lu ijende i dedoo yô, ka nan ôron we kwagh u mimi, shighe u i gbe u nana wa u kwagh shin we u wa nan kwagh la je kpaa.—Anz. 27:9.

20. Ka sea wase mbagenev vea seer taver jighjigh ve u nan yô, ka mtsera u nyi ka se zua a mini?

²⁰ Wase mbagenev ve taver jighjigh ve. Yesu yange taver jighjigh u mbahenen nav sha kwaghôron man ieren na. (Mar. 11:20-24) Doo u se dondo ikyav na la sha ci u ka sea wase mbagenev vea taver jighjigh ve u nan yô, se kpa jighjigh wase a taver. (Anz. 11:25) Zum u ú lu pasen kwagh yô, tese ior wang wer Aôndo ngu, shi we se ikyo shi ka un a ne i nger Bibilo i i lu Mkaanem nam la ye. Wase anmgbianev ou mba nomso man mba kasev ve kpa ve taver jighjigh ve u nan. Aluer ikyav tese ér mô ve nan ngu tan akperan, sha u gban ahon sha kwagh u mbatamen ve er nahan yô, de gem ijime a nan fese ga. Kpa wase nan sha kwaghfan, nana er kwagh u una na jighjigh u nan una hide a taver yô. (Yuda 22, 23) Aluer u ngu ken makeranta man mba tesen kwagh u akaa a uma gba duen abu tsô la yô, pase vangertiôr wer ka Aôndo a gbe akaa a uma cii ye. Aluer u er nahan yô, alaghga kwagh ne una wase mbagenev je a kpiligh we iyol.

21. Ka ityendezwa i nyi Yehova a er a hanma wase sha kwagh u jighjighi?

²¹ Iwasen i Aôndo na Peteru sha ikyev i Yesu la na yô, a hemba mciem kua akperan, nahan a hingir imaagh ki jighjigh u nan hen atô u Mbakristu mba sha ayange a mbaapostoli la. Nahan se kpa, Yehova wasen se cii u tilen dông sha jighjigh u nan. (Ôr 1 Peteru 5:9, 10.) Iniôngon i ka se nôngo se taver jighjigh wase u nan la ia saa gbilin ga, sha ci u averen a Yehova una na se sha jighjigh wase u nan la aa hemba cii.