1. а) Петрус билен нәхили вака болды? (Макаланың башындакы сурата середиң). б) Петрус нәме үчин гарк болды?

ГИҖЕ Җелиле көлүнде гүйчли гай турды. Петрус ресул ве бейлеки шәгиртлер бар гүйчлери билен гайыгы күрекләп барярдылар. Бирденкә оларың гөзлери Иса дүшди. Ол көлүң йүзүнден йөрәп барярды. Шонда Петрус Халыпасы Исадан сувуң йүзүнден йөрәп янына бармага ругсат сорады. Иса оны янына чагырды. Петрус гайыкдан дүшүп, мөвч урян толкунлардан йөрәп угранда, бирденкә гарк болуп башлады. Нәме үчин? Петрус даш-төверегинде турян апы-тупаны гөрүп горкды ве батлы сес билен гыгырып, Исаны көмеге чагырды. Иса оңа деррев элини узадып: «Эй аз иманлы адам, нәме үчин шүбхелендиң?» дийди (Мат. 14:24—32).

2. Биз нәхили сорагларың җогабыны билерис?

² Гелиң, Петрус билен болан ваканың үч айратынлыгына середелиң: 1. Петрус Аллатагаланың голдавына иман эдендигини нәдип гөркезди? 2. Онуң иманы нәме үчин говшады? 3. Петруса иманыны беркитмәге нәме көмек этди? Гелиң, бу сорагларың җогабыны билелиң. Себәби  олар бизе «иманда берк дурмага» көмек эдер (1 Кор. 16:13).

3. Петрус нәме үчин гайыкдан дүшди ве биз шуңа меңзеш нәме этдик?

³ Иса Петрусы янына чагыранда, ол гайыкдан дүшүп, сувуң йүзүнден йөрәп башлады. Нәме үчин? Себәби Петрусың берк иманы барды. Ол Худайың Исаны голдайшы ялы, өзүни хем голдаҗакдыгына ынанярды. Шонуң ялы-да, Иса бизи өз ызына эермәге чагырды. Биз хем Ехова өзүмизи багыш эдип, сувда чокундырылдык. Нәме үчин? Себәби биз Ехова билен Иса иман эдйәрис ве оларың бизи голдаҗакдыгына ынанярыс (Яхя 14:1; 1 Петрус 2:21-и окаң).

4, 5. Нәме үчин имана гымматлы хазына дийсе болар?

⁴ Иман — гымматлы хазына. Петрус иман билен ынсаның башарып билмеҗек задыны этди, ягны ол сувуң йүзүнден йөреди. Иман бизе-де мүмкин дәл ялы болуп гөрүнйән зады башармага көмек эдйәр (Мат. 21:21, 22). Мысал үчин, месихчилериң көпүси гарайшыны ве дурмушыны дүйпгөтер өзгертдилер велин, хатда өңки дост-ярлары олары танамадылар. Ехова бизиң иман билен эдйән тагаллаларымыза ак пата берйәр (Колоселилер 3:5—10-нҗы аятлары окаң). Биз берк иман билен Ехова өзүмизи багыш эдйәрис ве Онуң билен достлашярыс. Бу достлугы ынсан өз гүйҗи билен газанып билмейәр (Эфес. 2:8).

⁵ Иман бизе ганым душманымыз Шейтаның хүҗүмине гаршы дурмага гүйч-кувват берйәр (Эфес. 6:16). Биз хемише Ехова бил баглап, кынчылыкларда ченденаша гайга батып, рухдан дүшмейәрис. Биз иман эдип, Патышалыгы биринҗи орунда гойсак, Ехованың аладамызы этҗекдигине шүбхеленмерис (Мат. 6:30—34). Биз иман билен хич бир ынсаның газанып билмеҗек эбеди яшайшыны мирас аларыс (Яхя 3:16).

6, 7. а) Тупаны ве толкунлары нәмә меңзетсе болар? б) Биз нәме үчин иманымыз говшамаз дийип пикир этмели дәл?

⁶ Петрус ресул сувуң йүзүнден йөрәп башланда, тупандыр толкунлар мөвч урярды. Олары Худая өзүмизи багыш эденимизден соңра душ гелйән сынаглара ве эрбет хөвеслере меңзетсе болар. Эмма биз сынагларда Ехованың голдавы билен берк дуруп билерис. Мукаддес Язгыларда Петрусың харасат я-да толкун себәпли дәл-де, «елиң гүйҗүни гөрүп горкандыгы» ве гарк боландыгы айдыляр (Мат. 14:30). Ол назарыны Исадан сованда, иманы говшады. Эгер бизем «елиң гүйҗүне» үнс берсек, Ехованың голдавына шүбхеленип, гарк болуп билерис.

⁷ Мукаддес Язгыларың айтмагына гөрә, «аңсатлык билен бүрән гүнәлер» себәпли иманымызың говшамагы мүмкин. Шонуң үчин биз иманымыз говшамаз дийип пикир этмек нәдогры боларды (Евр. 12:1). Петрус билен болан вакадан гөрнүши ялы, назарымызы кынчылыкларымыза диксек, бизиңем иманымыз говшар. Бизе иманымызы барламага нәме көмек эдер? Гелиң, кәбир сораглар аркалы өзүмизи барлап гөрелиң.

8. Худайың вадаларына болан иманымыз нәдип говшап билер?

⁸ Мен хәзирем Худайың вадаларына берк иман эдйәринми? Меселем, Аллатагала Шейтаның дүнйәсини ёк этмеги вада берди. Биз иманымызы говшадян дынч алышлара гызыгярысмы?  Дынч алмагың кәбир гөрнүшлери залым дүнйәниң соңуның голайдыгына шүбхе дөредйәр (Хаб. 2:3). Гелиң, ене бир мысала середелиң. Ехова бизиң гүнәлеримизи багышламак үчин төлег гурбаныны берди. Муңа гарамаздан, биз өңки эден ялңышларымыз себәпли рухдан дүшсек, Ехованың гүнәлеримизи «өчүрйәндигине» шүбхеленип башларыс (Рес. иш. 3:19). Нетиҗеде, Худая шатлык билен гуллук этмегиң дерегине, вагыз этмегимизи бес эдерис.

9. Биз өз пейдамызы гөзлесек нәме болар?

⁹ Мен хәзирем Аллатагала ыхласлы гуллук эдйәринми? Павлус ресул «умыдымыздан долы аркайын болмагымыз үчин... соңуна ченли» Ехова ыхаслы гуллук этмелидигимизи айтды. Эмма биз өз пейдамызы гөзлесек нәме болар? Меселем, биз көп газанч этмек үчин рухы затлара пәсгел берйән ише гирсек нәме? Шонда кем-кемден иманымыз говшар ве Ехова көпрәк гуллук этмәге мүмкинчилигимиз болса-да, «ялтанып», хер хили бахана гөзләп башларыс (Евр. 6:10—12).

10. Адамлары багышламак билен Ехова болан иманымызы нәдип гөркезйәрис?

¹⁰ Маңа гөвнүме деген адамы багышламак кын болярмы? Белки-де, гөвнүмизе дегенлеринде өз дуйгуларымыза ченденаша үнс берип, адамың йүзүни аляндырыс я-да онуң билен хич хили геплешйән дәлдирис. Эмма биз оны багышласак, Ехова иман эдйәндигимизи гөркезерис. Нәдип? Биз гүнә эденимизде Худая бергидар болшумыз ялы, гөвнүмизе деген адам хем бизе бергидар боляр (Лука 11:4). Биз адамлары багышласак, Ехова бил баглаяндыгымызы ве адамлар билен хаклашмакдан Худайың берйән берекетлерини гыммат сайяндыгымызы гөркезерис. Исаның шәгиртлери адамлары багышламак үчин берк иманың герекдигине дүшүнйәрдилер. Иса гайта-гайта гүнә  эден адамлары хем багышламалыдыгыны айтды. Шонда шәгиртлер: «Бизиң иманымызы көпелт!» дийип, оңа ялбардылар (Лука 17:1—5).

11. Мукаддес Язгыларың эсасында берлен маслахата эермәге нәме пәсгел берер?

¹¹ Маңа Мукаддес Язгыларың эсасында маслахат беренлеринде гахарым гелйәрми? Кәте бизе маслахат берленде, онуң пейдасы хакда ойланман, маслахаты берени ягзарып, онуң айданларындан ялңышлык тапҗак болярыс (Сүл. тым. 19:20). Эгер биз шейле этсек, Ехованың гарайшына эерип билмерис.

12. Җогапкәрли борчлары ерине етирйән доганлардан хемише нәгиле болян адам барада нәме дийсе болар?

¹² Мен җогапкәр доганлардан нәгиле болярынмы? Иманы говшак он саны ичалының хабарыны эшиден мәхелле Муса билен Харуна нәгилелик билдирди. Шонда Ехова Муса: «Хачана ченли булар Маңа ынанмакдан боюн товлаҗаккалар?» дийди (Сан. 14:2—4, 11). Ысрайыллылар Худайың ёлбашчы эдип беллән Муса билен Харундан зейренип, Ехова иман этмейәндигини гөркезди. Бизем Аллатагаланың җогапкәрли борчлара беллән доганлардан хемише нәгиле болсак, иманымыз говшамазмы нәме?!

13. Иманымызың говшандыгыны билсек нәме үчин рухдан дүшмели дәл?

¹³ Сиз ёкарда агзалан сорагларың көмеги билен иманыңызың говшандыгыны билсеңиз рухдан дүшмәң. Ядыңызда болса, Петрус ресул хем горкудан яңа шүбхеленипди. Иса хем кәте ресулларына «иманы азлар» диййәрди (Мат. 16:8). Биз Петрус ресул билен болан вакадан ваҗып сапак эдинип билйәрис. Гелиң, онуң шүбхеленип, сувда гарк боландан соң нәме эдендигини билелиң.

14, 15. а) Петрус сувда гарк болуп башланда нәме этди? б) Иса назарымызы «дикмек» үчин нәме эдип билерис?

¹⁴ Петрус ресул сувда өкделик билен йүзүп билйәрди. Шол себәпли ол сувуң астына гидип башланда, деррев гайыга тарап йүзүп билерди (Яхя 21:7). Эмма Петрус өзүне бил багламагың дерегине, назарыны Иса дикип, ондан көмек сорады. Биз иманымызың говшандыгыны биленимизде, Петрусдан гөрелде алып билерис. Нәдип?

¹⁵ Петрус ялы бизем «гөзүмизи иманымызың Өңбашчысы, Кәмиллешдириҗиси Иса дикмели» (Еврейлер 12:2, 3-нҗи аятлары окаң). Элбетде, биз гөни маныда Исаны гөрүп билмейәрис, эмма Иса «гөзүмизи... дикмек» ве иманымызы беркитмек үчин, онуң таглыматларыны ве эден ишлерини өвренип, гөрелдесине эермели. Иса бизе нәхили гөрелде галдырды?

16. Мукаддес Язгылар нәдип иманымызы беркидйәр?

¹⁶ Мукаддес Язгыларың ынама мынасыпдыгына берк иман эдиң. Иса Мукаддес Язгыларың Худайың ылхамланан Сөзүдигини ве иң говы гөркезме берйәндигини билйәрди (Яхя 17:17). Биз Исаның гөрелдесине эерип, Мукаддес Язгылары хер гүн окамалы, чуңңур өзлешдирмели ве билен затларымыз барада ойланмалы. Шейле-де биз сорагларымызың җогабыны тапмак үчин шахсы окувыны гечирмели. Меселем, сиз соңкы гүнлерде яшаяндыгыңыза долы ынанярсыңызмы? Сиз соңкы гүнлер барадакы пыгамберликлери чуңңур өвренип, иманыңызы беркидип билерсиңиз. Сиз гелеҗекде ерине етҗек пыгамберликлере ынанярсыңызмы? Иманыңыз беркәр ялы Мукаддес Язгылардакы амала ашан пыгамберликлер барада өврениң. Сиз Мукаддес Язгыларың пейдалыдыгына  ынанярсыңызмы? Сиз Худайың Сөзүне эерип, дурмушыны өзгерден доган-уялар хакда оканыңызда иманыңызы беркидип билерсиңиз * (1 Сел. 2:13).

17. Иса агыр сынаглара нәдип дөз гелди ве биз ондан нәдип гөрелде алып билерис?

¹⁷ Назарыңызы Ехованың берекетлерине дикиң. Иса назарыны «өңүнде гойлан бегенҗе» дикип, агыр сынаглара дөз гелди (Евр. 12:2). Ол бу дүнйәниң хөдүрлейән затларына хич хили гызмаярды (Мат. 4:8—10). Сиз Исадан гөрелде алып, Ехованың аҗайып вадалары барада ойланың ве өзүңизи тәзе дүнйәде гөз өңүне гетириң. Шейле-де этҗек ишлериңизи язып я-да оларың суратыны чекип билерсиңиз. Сиз дирелмегине гарашян адамларыңызың атларының ве олар билен гүррүң этҗек затларыңызың санавыны язып билерсиңиз. Сиз Худайың вадаларыны бүтин адамзада дәл-де, өзүңизе дегишли эдип җанландырың.

18. Биз дога эдип иманымызы нәдип беркидип билерис?

¹⁸ Берк иман барада дога эдиң. Иса шәгиртлерине Еховадан мукаддес рухы дилемелидигини өвретди (Лука 11:9, 13). Сизем шәгиртлериң гөрелдесине эерип, мукаддес рухуң мивеси болан берк иман барада дога эдип билерсиңиз. Шонда әхли кынчылыкларыңызы екән-екән айдың. Меселем, сизе адамлары багышламак кын дүшйән болса, онда гечиримли болмага ве иманыңызы беркитмәге Еховадан гүйч сораң.

19. Биз кимлер билен достлашмалы?

¹⁹ Иманы берк адамлар билен достлашың. Иса гатнашян адамларыны, эсасан-да, якын достларыны, ягны ресулларыны пайхаслы сайлаярды. Олар маслахата гулак асып, иманда беркдигини ве вепалыдыгыны гөркездилер (Яхя 15:14, 15-нҗи аятлары окаң). Сиз хем Исаның табшырыкларына гулак асян ве иманы берк адамлар билен достлашың. Говы достлар ачык гүррүңдешлик эдйәрлер ве бири-бирине маслахат беренлеринде өйке-кине этмейәрлер (Сүл. тым. 27:9).

20. Адамлара иманыны беркитмәге көмек этмегиң бизе нәхили пейдасы бар?

²⁰ Адамлара иманыны беркитмәге көмек эдиң. Иса сөзде ве иш йүзүнде шәгиртлериниң иманыны беркидйәрди (Мар. 11:20—24). Биз Исадан гөрелде алып, доган-уяларың иманыны биркитмәге көмек этсек, өз иманымызы хем беркидерис (Сүл. тым. 11:25). Биз вагыз эденимизде ве Мукаддес Язгылар окувыны гечиренимизде, Аллатагаланың бардыгына, бизиң аладамызы эдйәндигине, Мукаддес Язгыларың Худайың ылхамланан Сөзүдигине субутнамалар гетирсек говы болар. Шейле-де биз доган-уяларың иманыны беркитмәге көмек этмели. Эгер сиз кәбир доган-уяларың җогапкәрли борчлары ерине етирйән доганлардан нәгиле болуп, оларың айдянларына шүбхеленйәндигини гөрсеңиз, шейле доган-уялардан четде дурмагың дерегине, олара ховпдан горанмага ве иманыны беркитмәге көмек эдиң (Яхуда 22, 23). Мекдепде эволюция таглыматыны өвреденлеринде, сиз ярадылыша иман эдйәндигиңизи мертлик билен гүррүң бериң. Шонда сиз мугаллымыңыза ве сынпдашларыңыза нәхили тәсир эдйәндигини гөрүп, хайран галсаңыз герек.

21. Ехова бизе нәмәни вада берйәр?

²¹ Ехова Иса аркалы Петрус ресула горкусыны ве шүбхесини еңмәге көмек этди. Вагтың гечмеги билен, Петрусың өзи хем месихчилере иманда берк дурмага аҗайып гөрелде галдырды. Ехова бизе-де иманымызы беркитмәге көмек эдйәр (1 Петрус 5:9, 10-нҗы аятлары окаң). Бизем иманда берк дурмага тагалла этсек, Ехова бол берекет берер.