1. (a) Longosorani ivyo vikachitikira Petrosi pa Nyanja ya Galileya. (Wonani chithuzi chakwamba.) (b) Chifukwa wuli Petrosi wakamba kubira?

USIKU unyake apo Petrosi na ŵasambiri ŵanyake ŵakaŵa pa Nyanja ya Galileya, ŵakakumana na chimphepo. Mwamabuchi ŵakawona Yesu wakwenda pa nyanja. Petrosi wakapempha Yesu kuti nayo wende pa maji kuluta apo pakaŵa Yesu. Yesu wakamuzomerezga, ntheura Petrosi wakakhira mu boti nakwamba kwenda pa maji kulazga kwa Yesu. Petrosi wakati wendapo pachoko waka, wakamba kubira. Chifukwa wuli? Chifukwa wakamba kopa chimphepo na majigha. Pamasinda Petrosi wakapempha Yesu kuti wamovwire ndipo mwaluŵiro Yesu wakamukora. Yesu wakati kwa Petrosi: “Wamunthu wachipulikano chichoko iwe, chifukwa wuli wangukayika?”—Mat. 14:24-32.

2. Kasi mu nkhani iyi tisambirenge vichi?

² Tiyeni tiwone vinthu vitatu vyakukhwaskana na chipulikano ivyo tikusambira kwa Petrosi. (1) Petrosi wakaŵa na chipulikano kuti Chiuta wamovwirenge. (2) Ivyo vikapangiska kuti chipulikano cha Petrosi chambe kuchepa. (3) Ivyo vikawovwira Petrosi kuti wakhozge chipulikano chake. Fundo zitatu izi zitovwirenge kuyimilira “nganganga mu chipulikano.”—1 Kor. 16:13.

3. Chifukwa wuli Petrosi wakakhira mu boti? Kasi nase talongora wuli kuti tili na chipulikano?

³ Pakwamba Petrosi wakaŵa na chipulikano chikuru. Chifukwa wuli tikuyowoya nthena? Chifukwa Yesu wakati wamuchema kuti wize kwa iyo, Petrosi wakakhira mu boti na kwamba kwenda pa maji. Wakagomezganga kuti Yehova wamovwirenge nga umo wakawovwilira Yesu. Yesu wakati watichema kuti tiŵe ŵasambiri ŵake, nase tikajipeleka kwa Yehova ndipo tili kubatizika. Tili kuchita nthena chifukwa tili na chipulikano mwa Yehova na Yesu kweniso tikugomezga kuti ŵatovwirenge.—Yoh. 14:1; ŵazgani 1 Petrosi 2:21.

4, 5. Chifukwa wuli chipulikano ntchakuzirwa chomene?

⁴ Chipulikano ntchakuzirwa chomene. Petrosi wakenda pa maji chifukwa wakaŵa na chipulikano. Nase chipulikano chingatovwira kuti tichite vinthu ivyo ŵanthu ŵakuwona kuti munthu wangachita yayi. (Mat. 21:21, 22) Ŵanji ŵa ise tili kuleka nkharo zaukazuzi izo tikaŵa nazo, mwakuti ŵanthu ŵanandi awo ŵakatimanyanga ŵakupulikiska chara. Tili kuleka nkharo ziheni izi chifukwa chakuti tikutemwa Yehova, nakuti iyo wakatovwira kuti tisinthe. (Ŵazgani Ŵakolose 3:5-10.) Chipulikano chikatovwira kuti tijipeleke kwa Yehova. Ntheura tili paubwezi na Yehova chifukwa chakuti iyo wakutovwira.—Efe. 2:8.

⁵ Chipulikano chikutipa nkhongono zauzimu. Mwachiyelezgero, para mulwani withu Satana watiwukira, chipulikano chikutovwira kuti tileke kuthera. (Efe. 6:16) Pakuti tikugomezga Yehova, tikwenjerwa chomene chara para takumana na masuzgo. Yehova wali kulayizga kuti watovwirenge para tili na chipulikano mwa iyo ndiposo para tikuŵika Ufumu wake pakwamba mu umoyo withu. (Mat. 6:30-34) Kweniso chifukwa chakuti tili na chipulikano, Yehova wazamutipa umoyo wamuyirayira uwo ntchawanangwa chikuru chomene.—Yoh. 3:16.

6, 7. (a) Kasi chimphepo na majigha ivyo vikawofya Petrosi tingaviyaniska na vichi? (b) Chifukwa wuli tikwenera kuvikilira chipulikano chithu?

⁶ Petrosi wakamba kuchita wofi apo wakendanga pa Nyanja ya Galileya. Chifukwa wuli wakamba kuchita wofi? Chifukwa cha chimphepo na majigha. Mazuŵa ghano, chimphepo na majigha ni masuzgo agho ŵabali na ŵadumbu ŵakukumana nagho. Nanga tikumane na masuzgo wuli, tikwenera kuŵa na chipulikano kuti Yehova watovwirenge kwimilira nganganga. Kweni kumbukirani ivyo vikachitikira Petrosi. Wakamba kubira chifukwa cha chimphepo na majigha chara. Baibolo likuti: “Pakuwona chimphepo, wakawopa.” (Mat. 14:30) Petrosi wakaleka kulaŵiska kwa Yesu, ndipo wakamba kudodoliska chimphepo. Lekani chipulikano chake chikamba kuchepa. Nase para tikuŵika waka maso ghithu pa masuzgo agho tikukumana nawo, tingamba kuwona nga kuti Yehova wangatovwira yayi.

⁷ Chipulikano chithu chingamara usange tingaleka kugomezga Yehova. Baibolo likuti kutaya chipulikano ‘nkhwananga uko kukutiwiska mwambura kusuzga.’ (Heb. 12:1) Nga umo Petrosi wakachitira, nase usange tikudodoliska pa vinthu viheni, chipulikano chithu chingalopwa chomene. Kasi tingamanya wuli kuti chipulikano chithu chamba kuchepa? Tiyeni tiwone mafumbo agho ghangatovwira kujisanda.

8. Chifukwa wuli ŵanyake ŵakuleka kugomezga malayizgo gha Yehova?

⁸ Kasi nichali kugomezga malayizgo gha Chiuta? Mwachiyelezgero, Chiuta walayizga kuti waparanyenge charu cha Satana ichi. Kweni kasi tikukopeka na vinthu vya mu charu ichi? Usange ni nthena, tingamba kukayikira kuti umaliro uli pafupi. (Hab. 2:3) Chiyelezgero chinyake ni ichi, Yehova wali kutipa sembe ya Yesu na kutilayizga kuti watigowokerenge maubudi ghithu. Kweni usange tikulutilira kughanaghanira maubudi  ghithu ghakale, tingamba kuwona nga kuti Yehova wandatigowokere zakwananga zithu. (Mil. 3:19) Ntheura tingaŵavya chimwemwe pakuteŵetera Yehova kweniso tingaleka kupharazga.

9. Kasi chingatichitikira ntchivichi para tamba kudodoliska pa vyakukhumba vithu?

⁹ Kasi nichali kulimbikira kuteŵetera Yehova? Para tikulimbikira kuteŵetera Yehova, tilutilirenge kugomezga ivyo iyo watilayizga. Kweni kasi ntchivichi chingatichitikira usange tamba kudodoliska pa vyakukhumba vithu? Mwachiyelezgero, tinganjira ntchito ya ndalama zinandi kweni yikutinora nyengo yakuteŵetera Yehova. Para vyaŵa nthena, chipulikano chithu chingalopwa, kweniso tingaŵa “ŵachizita” pakuchita khumbo la Yehova.—Heb. 6:10-12.

10. Kasi para tikugowokera ŵanyithu tikulongora vichi?

¹⁰ Kasi nkhusuzgika kugowokera ŵanji? Para ŵanyithu ŵatikhuŵazga, kasi tikuŵakwiyira na kuleka kuyowoya nawo? Usange tikuchita nthena, vikulongora kuti tikujighanaghanira waka tekha. Munthu uyo wakugomezga Yehova, wakugowokera ŵanyake para ŵamunangira. Uyo watinangira wakuyana waka na uyo wali na ngongoli yithu. Nase tili na ngongoli kwa Yehova chifukwa ndise ŵakwananga. (Luka 11:4) Ntheura para tikugowokera ŵanji tikulongora kuti tikugomezga Yehova. Tikumanya kuti Yehova watitumbikenge para tikugowokera ŵanyithu ndipo vitumbiko vyake vikuluska ngongoli iyo tikukhumba kuti ŵanyithu ŵatiwezgere. Ŵasambiri ŵa Yesu ŵakamanyanga kuti ŵakwenera kuŵa na chipulikano kuti ŵagowokere ŵanji. Apo Yesu wakaŵaphaliranga kuti nyengo zose ŵakwenera kugowokera munthu uyo waŵanangira, ŵasambiri ŵakapempha kuti: “Mutisazgireko chipulikano.”—Luka 17:1-5.

11. Chifukwa wuli nyengo zinyake chikuŵa chakusuzga kupokera ulongozgi?

 ¹¹ Kasi nkhukhuŵara para napika ulongozgi? Ntchiwemi kughanaghanira umo ulongozgi uwo tapika ungatovwilira m’malo mwa kulaŵiska maubudi gha uyo watipa ulongozgi panji umo wawupelekera. (Zinth. 19:20) Para tikuchita nthena, tilutilirenge kuwona vinthu nga umo Yehova wakuviwonera.

12. Kasi para munthu wamba kudinginyikira ŵalara vikulongora vichi?

¹² Kasi nkhudinginyikira ŵalara mu mpingo? Ŵaisrayeli ŵakati ŵapulika lipoti lautesi ilo mphachi 10 zikayowoya, ŵakamba kudinginyikira Mozesi na Aroni. Ntheura Yehova wakafumba Mozesi kuti: ‘Kasi ŵatondekenge kupulikana nane m’paka pawuli?’ (Maŵa. 14:2-4, 11) Yehova ndiyo wakasankha Mozesi na Aroni kuti ŵalongozgenge Ŵaisrayeli. Ntheura apo Ŵaisrayeli ŵakadinginyikiranga Mozesi na Aroni, Yehova wakamanya kuti ŵaleka kumugomezga. Usange nase tikudinginyikira ŵalara awo Yehova wasankha, vikulongora kuti chipulikano chithu chamba kulopwa.

13. Chifukwa wuli tikwenera kugongowa yayi usange tawona kuti chipulikano chithu chamba kuchepa?

¹³ Mafumbo agho tadumbiskana ghatovwira kumanya umo chipulikano chithu chiliri. Usange tawona kuti chipulikano chithu chamba kuchepa, tingagongowanga yayi. Kumbukani kuti Petrosi nayo wakachita wofi ndipo wakamba kukayikira. Nyengo zinyake Yesu wakachenyanga ŵapositole ŵake chifukwa ŵakaŵa na ‘chipulikano chichoko.’ (Mat. 16:8) Kweni tingasambirapo kanthu pa ivyo vikachitikira Petrosi. Tiyeni tiwone ivyo wakachita wati wamba kubira chifukwa cha kukayika.

14, 15. (a) Kasi Petrosi wakachita wuli wati wamba kubira? (b) Kasi tingachita wuli kuti tilutilire kulaŵiska kwa Yesu?

¹⁴ Kasi Petrosi wakachita wuli wati wamba kubira? Petrosi wakhumbenge mphanyi wakaskamba na kuwelera mu boti chifukwa wakamanyanga kuskamba. (Yoh. 21:7) Petrosi wakajithemba yayi lekani wakalaŵiskaso kwa Yesu kuti wamovwire. Para nase tamba kuwona kuti chipulikano chithu chamba kuchepa, tikwenera kuyezga Petrosi. Kweni kasi tingamuyezga wuli Petrosi?

¹⁵ Nga umo Petrosi wakalaŵiskira kwa Yesu kuti wamovwire, nase tikwenera kulaŵiska “kwa Yesu uyo ni Mulongozgi Mulara na Wakufiska chipulikano chithu.” (Ŵazgani Ŵahebere 12:2, 3.) Yesu tingamuwona na maso ghithu yayi nga umo wakamuwonera Petrosi. Kweni kasi tingalaŵiska wuli kwa Yesu? Tingalaŵiska kwa Yesu para tikusambira ivyo wakachitanga na kumulondezga mwakugomezgeka. Para tikuchita nthena tikhozgenge chipulikano chithu. Tiyeni tiwone umo tingayezgera Yesu.

16. Kasi kusambira Baibolo kungatovwira wuli?

¹⁶ Baibolo lingatovwira kukhozga chipulikano chithu. Yesu wakamanyanga kuti Baibolo ni Mazgu gha Chiuta ndiposo kuti lili na ulongozgi wakovwira chomene. (Yoh. 17:17) Tingamuyezga Yesu para tikuŵazga Baibolo zuŵa lililose na kughanaghanirapo ivyo tikusambira. Tikweneraso kupenjerezga mazgoro gha mafumbo ghose agho tingaŵa nawo. Mwachiyelezgero, kasi tikugomezga kuti tikukhala mu mazuŵa ghaumaliro? Para tikuŵazga mauchimi gha mu Baibolo agho ghakulongora kuti tikukhala mu mazuŵa ghaumaliro, tikayikenge yayi kuti umaliro wuli pafupi. Chipulikano chithu chilutilirenge kukhora usange tikughanaghanira mauchimi gha mu Baibolo agho ghali kufiskika kale. Nkhani za mu Gongwe la Mulinda izo zikuŵa pa chigaŵa chakuti “Baibolo Likusintha Umoyo wa Ŵanthu,” zikulongora kuti Baibolo ndakovwira nadi. *—1 Tes. 2:13.

17. Kasi ntchivichi icho chikawovwira Yesu kuzizipizga, ndipo ise tingamuyezga wuli?

 ¹⁷ Tighanaghanirenge vitumbiko ivyo Yehova watilayizga. Yesu wakazizipizga viyezgo chifukwa wakaghanaghaniranga chomene vitumbiko vyamunthazi. (Heb. 12:2) Wakatimbanizgika na vinthu vya mu charu yayi. (Mat. 4:8-10) Kasi tingamuyezga wuli Yesu pa nkhani yakughanaghanira vitumbiko ivyo Yehova watilayizga? Tingamuyezga para nase tikughanaghanira viwemi ivyo Yehova watilayizga. Tijiwonenge kuti tili kale mu charu chiphya. Panji tingalemba ivyo tikukhumba kuzakachita mu Paradiso. Tingalemba mazina gha ŵanthu awo tikukhumba kuti tizakawonaneso nawo, ndiposo tingalemba ivyo tikukhumba kuzakaŵaphalira. Nase tikwenera kugomezga kuti vyose ivyo Chiuta walayizga vizamufiskika.

18. Kasi Yehova wakutovwira wuli para tikumulomba?

¹⁸ Tilombenge kuti tiŵe na chipulikano chakukhora. Yesu wakasambizga ŵasambiri ŵake kuti ŵalombe Yehova kuti waŵape mzimu utuŵa. (Luka 11:9, 13) Nase para tikulomba, tikwenera kupempha Yehova kuti watipe mzimu utuŵa kweniso kuti watovwire kuŵa na chipulikano chakukhora. Chipulikano ntchimoza mwa vipambi vya mzimu utuŵa. Para tikulomba, ntchiwemi kuzunura ivyo tikukhumba. Mwachiyelezgero, usange tawona kuti vikutisuzga kugowokera ŵanyithu, tingalomba Yehova kuti watovwire kulutilira kuŵa na chipulikano chakukhora, kweniso kuti watovwire kuŵa na mzimu wakugowokera ŵanyithu.

19. Kasi mbanjani awo tingasankha kuti ŵaŵe ŵabwezi ŵithu?

¹⁹ Tiŵe paubwezi na awo ŵali na chipulikano chakukhora. Yesu wakasankha makora ŵabwezi ŵake. Wakasankha ŵapositole awo ŵakaŵa ŵakugomezgeka kweniso ŵakupulikira. (Ŵazgani Yohane 15:14, 15.) Nga ni Yesu, nase tikwenera kuŵa maso para tikusankha ŵanthu ŵakuti ŵaŵe ŵabwezi ŵithu. Tikwenera kusankha ŵanthu awo ŵali na chipulikano chakukhora ndiposo awo ŵakupulikira Yesu. Ŵabwezi ŵawemi ŵakuyowoya unenesko nyengo zose. Ŵakuŵa ŵakufwatuka kupeleka na kupokera ulongozgi.—Zinth. 27:9.

20. Chifukwa wuli tikwenera kovwira ŵanyithu kuti ŵaŵe na chipulikano chakukhora?

²⁰ Kovwira ŵanji kuti ŵaŵe na chipulikano chakukhora. Ivyo Yesu wakayowoyanga na kuchita vikawovwira ŵasambiri ŵake kuŵa na chipulikano chakukhora. (Mrk. 11:20-24) Para nase tikuyowoya na kuchita vinthu nga ni Yesu, tiŵenge na chipulikano chakukhora kweniso tikhozgenge chipulikano cha ŵanyithu. (Zinth. 11:25) Kasi tingawovwira wuli ŵanthu awo tikuŵapharazgira kuti nawo ŵaŵe na chipulikano chakukhora? Para tikuŵasambizga Baibolo tikwenera kupeleka ukaboni wakuti Chiuta waliko nadi, wakutipwelelera ndiposo kuti Baibolo ni Mazgu ghake. Kasi tingawovwira wuli ŵabali na ŵadumbu kuti ŵalutilire kuŵa na chipulikano chakukhora? Usange munyake wakudinginyikira ŵalara ŵa mpingo, kuleka luŵiro yayi kuchezga nayo. Tiyezge dankha kumovwira mwalusungu kuti wakhozgeso chipulikano chake. (Yuda 22, 23) Para ku sukulu tikusambira kuti vinthu vikachita kusintha kufuma ku vinthu vinyake, tikwenera kuŵa na chikanga kuvikilira chipulikano chithu chakuti vinthu vikachita kulengeka na Chiuta. Tizamukondwa chomene kuwona kuti tawovwira ŵanyithu ŵa ku sukulu kweniso ŵasambizgi kumanya kuti vinthu vikachita kulengeka.

21. Kasi Yehova wakutilayizga vichi?

²¹ Yehova na Yesu ŵakawovwira Petrosi kuti wamazge wofi na kukayikira. Pamanyuma, Petrosi wakalongora kuti wakaŵa na chipulikano chakukhora. Nase Yehova wakutovwira kuyimilira nganganga mu chipulikano. (Ŵazgani 1 Petrosi 5:9, 10.) Ntchipusu yayi kuŵa na chipulikano chakukhora, kweni usange tiŵikengepo mtima, Yehova watitumbikenge chomene.