1. (a) Ano an naeksperyensyahan ni Pedro durante han usa nga subasko ha Dagat han Galilea? (Kitaa an retrato hini nga pahina.) (b) Kay ano nga nagtikalunod hi Pedro?

USA ka gab-i, durante hin subasko, hi apostol Pedro ngan an pipira nga disipulo nagpinaniguro pagbugsay han ira baluto ha Dagat han Galilea. Katapos, tigda nga nakita nira hi Jesus nga naglalakat ha dagat. Naghangyo hi Pedro kan Jesus nga palakton hiya ha dagat tipakadto ha Iya. Han ginsidngan hiya ni Jesus nga dumaop ha iya, hinaw-as hi Pedro ha baluto ngan milagroso nga naglakat tipakadto kan Jesus. Kondi waray pag-iha, nagtikalunod hi Pedro. Kay ano? Tungod kay nagkita hiya ha subasko ngan nahadlok. Hi Pedro nangaro hin bulig kan Jesus, ngan ginkaptan dayon hiya ni Jesus ngan nagsiring: “Kagutiay han imo pagtoo. Kay ano nga nagruruhaduha ka?”—Mat. 14:24-32.

2. Ano an aton hihisgotan hini nga artikulo?

² Hisgotan naton an tulo nga butang mahitungod ha pagtoo nga aton hibabaroan ha eksperyensya ni Pedro: (1) kon paonan-o hiya nagpakita hin pagtoo nga bubuligan hiya han Dios, (2) kon kay ano nga nagluya an iya pagtoo, ngan (3) kon ano an nakabulig ha iya basi magin marig-on utro an iya pagtoo. An pag-usisa hini nga mga punto  makakabulig ha aton nga makita kon paonan-o kita magigin ‘marig-on ha pagtoo.’—1 Cor. 16:13.

3. Kay ano nga hinaw-as hi Pedro ha baluto, ngan ano an aton ginhimo nga puropariho hito?

³ Han hinaw-as hi Pedro ha baluto basi maglakat ha dagat, ginbuhat niya ito tungod han iya pagtoo. Gintawag hiya ni Jesus, ngan sinarig hi Pedro nga an gahum han Dios mabulig ha iya sugad la nga nabulig ito kan Jesus. Sugad man, han nagdedikar kita kan Jehova ngan nagpabawtismo, ginbuhat naton ito tungod han aton pagtoo. Gintawag kita ni Jesus basi magsunod han iya mga pitad. Kinahanglan magpakita kita hin pagtoo kan Jesus ngan ha Dios, nasarig nga bubuligan kita nira.—Juan 14:1; basaha an 1 Pedro 2:21.

4, 5. Kay ano nga an pagtoo birilhon nga panag-iya?

⁴ An pagtoo birilhon gud nga panag-iya. Nakabulig ito kan Pedro nga makalakat ha dagat, usa nga butang nga baga hin imposible ha tawo. An pagtoo makakabulig liwat ha aton nga magbuhat hin mga butang nga baga hin imposible. (Mat. 21:21, 22) Pananglitan, damu ha aton an naghimo hin dagku nga pagbag-o ha aton batasan ngan panggawi nga tungod hito haros diri na kita nakikilal-an han aton mga kakilala. Ginbuligan kita ni Jehova ha pagbuhat hito kay ginhimo naton ito tungod han aton pagtoo ha iya. (Basaha an Colosas 3:5-10.) Tungod kay an aton pagtoo nagpagios ha aton nga magdedikar kan Jehova, nagin sangkay kita niya. Diri gud naton ito mahihimo kon waray an iya bulig.—Efe. 2:8.

⁵ An aton pagtoo naghahatag ha aton hin kusog. Pananglitan, nabulig ito ha aton nga maatohan an mga pag-atake han aton gamhanan nga kaaway, an Yawa. (Efe. 6:16) Dugang pa, an pagsarig kan Jehova nabulig ha aton nga diri sobra nga mabaraka kon naatubang kita hin mga pagsari. Hi Jehova nagsiring nga kon may pagtoo kita ha iya ngan uunahon naton an iya Ginhadian, itatagana niya an aton materyal nga mga panginahanglan. (Mat. 6:30-34) Labaw pa hito, tungod han aton pagtoo, makarawat kita hin regalo nga diri gud makukuha han bisan hin-o pinaagi la han iya mga pangalimbasog—an kinabuhi nga waray kataposan.—Juan 3:16.

6, 7. (a) Ha ano naton mahimo ipariho an subasko ngan mga balud nga nakapalibot kan Pedro? (b) Kay ano nga sadang naton karawaton nga posible magluya an aton pagtoo?

⁶ An makusog nga hangin ngan mga balud nga nakapalibot kan Pedro samtang naglalakat hiya ha dagat mahimo ipariho ha mga pagsari ngan pagsulay nga aton naieksperyensyahan. Bisan kon makuri gud ito, mahimo kita magin marig-on pinaagi han bulig ni Jehova. Hinumdumi nga nagtikalunod hi Pedro diri tungod han makusog nga hangin o daku nga balud kondi tungod kay nagkita hiya ha makusog nga subasko ngan nahadlok. (Mat. 14:30) Hi Pedro waray na magpokus kan Jesus, salit nagluya an iya pagtoo. Mahimo liwat magluya an aton pagtoo kon magpupokus kita ha aton mga problema ngan magruruhaduha nga bubuligan kita ni Jehova.

⁷ Sadang naton karawaton nga posible magluya an aton pagtoo tungod kay gin-unabi han Biblia an pagluya han pagtoo o an kawara han pagtoo sugad nga “an sala nga masayon la makaulang ha aton.” (Heb. 12:1) Pariho kan Pedro, an aton pagtoo mahimo magluya dayon kon magpupokus kita ha sayop nga mga butang. Paonan-o naton hibabaroan nga nagtitikaluya na an aton pagtoo? Tagda an pipira nga pakiana nga mahimo naton gamiton ha pag-usisa ha aton kalugaringon.

8. Paonan-o mahimo magtikaluya an aton pagtoo ha mga saad han Dios?

⁸ Nagtikaluya na ba an akon pagtoo ha mga saad han Dios? Pananglitan, nagsaad an Dios nga bubungkagon niya an kalibotan ni Satanas. Kondi, nagtitikaluya na ba an aton pagtoo hito nga saad  tungod han damu nga kaliawan nga igintatanyag hini nga kalibotan? Bangin magtikang kita pagruhaduha nga hirani na gud an kataposan. (Hab. 2:3) Tagda liwat ini nga ehemplo. Nagsaad an Dios nga papasayloon kita pinaagi han lukat. Pero, kon ginhihinunahuna la gihapon naton an aton mga sala hadto, bangin magtikang kita pagruhaduha kon ‘ginpapasaylo’ gud ba ni Jehova an ngatanan naton nga sala. (Buh. 3:19) Sugad nga resulta, bangin mawara an aton kalipay ha pag-alagad ha Dios ngan magin diri kita aktibo.

9. Ano an mahimo mahitabo kon magpupokus kita ha aton mga karuyag?

⁹ Maduruto pa ba ako ha pag-alagad ha Dios pariho hadto? Iginpakita ni apostol Pablo nga an pagin maduruto ha pag-alagad kan Jehova nabulig ha aton nga “bug-os nga makasiguro han paglaom” tubtob ha kataposan. Pero, ano an mahimo mahitabo kon magtikang kita pagpokus ha aton mga karuyag, sugad han pagkarawat hin trabaho nga daku an sweldo kondi makakaulang han aton pag-alagad? Mahimo magluya an aton pagtoo ngan “magin hubya” kita—gutiay la an ginhihimo para kan Jehova kay han puydi unta naton mahimo.—Heb. 6:10-12.

10. Paonan-o naton iginpapakita an pagtoo kan Jehova kon ginpapasaylo naton an iba?

¹⁰ Nakukurian ba ako ha pagpasaylo ha iba? Kon may nakasala o nakasakit ha aton, bangin magpokus kita ha aton inaabat ngan masina ha iya o diri na makiistorya ha iya. Ha luyo nga bahin, kon nagpapasaylo kita, nagpapakita kita hin pagtoo kan Jehova. Ha ano nga paagi? Adton nakakasala ha aton nagkakaada utang ha aton, sugad la nga nagkakaada kita utang ha Dios kon nakakasala kita ha iya. (Luc. 11:4) Kon nagpapasaylo kita ha iba, nasarig kita nga makakarawat naton an pag-uyon han Dios, nga mas importante gud kay ha pagsukot hadton may utang ha aton.  Maaram an mga disipulo ni Jesus nga kinahanglan an pagtoo basi mapasaylo an iba. Han ginsidngan hira ni Jesus nga pasayloon bisan adton pauroutro nga nakasala ha ira, hira nakimalooy: “Tagi kami hin dugang nga pagtoo.”—Luc. 17:1-5.

11. Kay ano nga bangin diri naton mapahimulosan an sagdon ha aton tikang ha Kasuratan?

¹¹ Nasisina ba ako kon ginsasagdonan ako? Imbes nga hunahunaon kon paonan-o kita magpapahimulos ha sagdon, bangin magpokus kita ha kon ano an sayop ha sagdon o ha kaluyahan han nagsasagdon. (Prob. 19:20) Tungod hito, bangin diri naton mapahimulosan an higayon nga maipahiuyon an aton panhunahuna ha panhunahuna han Dios.

12. Kon pirme nagrireklamo an usa kontra hadton ginagamit ni Jehova basi manguna ha iya katawohan, ano an iginpapakita hito?

¹² Nagrireklamo ba ako kontra ha kalalakin-an nga nangunguna ha kongregasyon? Han nagpokus an mga Israelita ha maraot nga sumat han napulo nga espiya nga waray pagtoo, nagreklamo hira kontra kanda Moises ngan Aaron. Hi Jehova nagpakiana kan Moises: “San-o pa ini hira totoo ha akon?” (Num. 14:2-4, 11) Oo, an pagreklamo han mga Israelita nagpakita nga waray hira pagsarig ha Dios, nga nagpili kanda Moises ngan Aaron. Sugad man, kon pirme kita nagrireklamo kontra hadton ginagamit han Dios basi manguna ha iya katawohan yana, iginpapakita hini nga nagluya na an aton pagtoo ha iya.

13. Kay ano nga diri kita sadang masubo kon nakita naton nga nagluya na an aton pagtoo?

¹³ Katapos tagdon ini nga mga pakiana, ayaw kasubo kon nakita mo nga nagluya na an imo pagtoo. Bisan hi Pedro, nga usa nga apostol, nahadlok ngan nagruhaduha. Ngani, may mga panahon nga ginsagdonan ni Jesus an ngatanan nga apostol tungod han ‘kagutiay han ira pagtoo.’ (Mat. 16:8) Hinumdumi nga mahibabaro kita hin importante nga leksyon ha eksperyensya ni Pedro tikang ha iya ginbuhat katapos magluya an iya pagtoo ngan han nagtikalunod hiya ha dagat.

14, 15. (a) Ano an ginbuhat ni Pedro han nagtikalunod hiya? (b) Paonan-o kita ‘magkikita hin maopay’ kan Jesus?

¹⁴ Ano an ginbuhat ni Pedro han nagtikalunod hiya? Maopay lumangoy hi Pedro salit puydi unta hiya lumangoy tipabalik ha baluto. (Juan 21:7) Pero imbes nga sumarig ha iya kalugaringon, nagpokus hiya utro kan Jesus ngan ginkarawat an bulig ni Jesus. Kon inaabat naton nga nagtitikaluya na an aton pagtoo, sadang naton subaron an ehemplo ni Pedro. Pero paonan-o naton ito mahihimo?

¹⁵ Sugad la nga nagpokus utro hi Pedro kan Jesus, kinahanglan liwat kita ‘magkita hin maopay ha Lider ngan Maghiringpit han aton pagtoo, hi Jesus.’ (Basaha an Hebreo 12:2, 3.) Syempre, diri naton literal nga makikita hi Jesus sugad la nga nakita hiya ni Pedro. Salit paonan-o kita ‘magkikita hin maopay’ kan Jesus? Pinaagi ha pag-usisa han iya katutdoan ngan mga buhat ngan pagsunod gud hito. Kon bubuhaton naton ini, makakarawat naton an bulig nga aton ginkikinahanglan basi maparig-on an aton pagtoo.Tagdon naton an pipira nga paagi nga masusubad naton hi Jesus.

16. Paonan-o makakabulig ha aton an Biblia ha pagparig-on han aton pagtoo?

¹⁶ Parig-ona an imo pagsarig ha Biblia. Hi Jesus kombinsido nga an Biblia Pulong han Dios, ngan ito an naghahatag han pinakamaopay nga giya ha aton pagkinabuhi. (Juan 17:17) Sugad nga pagsubad kan Jesus, kinahanglan naton basahon an Biblia kada adlaw, pag-adman ito, ngan pamalandungon an aton hinbabaroan. Kinahanglan liwat kita magsaliksik ha mga topiko nga bangin may-ada kita mga pakiana. Pananglitan, mahimo mo parig-unon an imo pagtoo nga hirani na gud an kataposan hini nga sistema pinaagi ha detalyado nga pag-aram han mga pamatuod ha Kasuratan nga nagkikinabuhi na kita ha kataposan nga mga adlaw. Parig-ona an imo pagsarig ha mga saad han Dios para ha tidaraon pinaagi ha pag-aram han damu nga tagna nga natuman na. Parig-ona an imo  pagtoo nga praktikal ngan mapulsanon gud an Biblia pinaagi ha pagbasa hin mga eksperyensya kon paonan-o nabag-o han Biblia an kinabuhi han pipira. *—1 Tes. 2:13.

17. Kay ano nga nakapabilin nga matinumanon hi Jesus bisan pa han magkuri nga pagsari, ngan paonan-o mo hiya masusubad?

¹⁷ Pagpokus ha mga bendisyon nga iginsaad ni Jehova. Tungod kay nagpokus hi Jesus ha “kalipay nga iginbutang ha iya atubangan,” nakapabilin hiya nga matinumanon bisan pa han magkuri nga pagsari. (Heb. 12:2) Waray gud hiya magpadara ha mga igintatanyag han kalibotan. (Mat. 4:8-10) Masusubad mo hi Jesus pinaagi ha pagpamalandong han mag-opay nga saad ni Jehova para ha imo. Handurawa an imo kalugaringon nga aadto ha bag-o nga kalibotan. Mahimo mo isurat o idrowing kon ano an imo bubuhaton ha Paraiso. O mahimo mo ilista an mga tawo nga karuyag mo makaistorya kon mabanhaw na hira ngan kon ano an karuyag mo ig-istorya ha ira. Hunahunaa nga ini nga mga saad han Dios diri la para ha mga tawo ha kabug-osan, kondi para ha imo mismo.

18. Paonan-o makakabulig an pag-ampo ha pagparig-on han imo pagtoo?

¹⁸ Pag-ampo para hin dugang nga pagtoo. Gintutdoan ni Jesus an iya mga disipulo nga maghangyo kan Jehova hin baraan nga espiritu. (Luc. 11:9, 13) Samtang nag-aampo ka para hito, hangyoa liwat hi Jehova nga tagan ka hin dugang nga pagtoo; usa ini nga bahin han bunga han espiritu. Magin espisipiko ha imo mga pag-ampo. Pananglitan, mahimo ka maghangyo ha Dios nga buligan ka nga maatohan an anoman nga kinaiya nga nagpapakita nga nagtitikaluya na an imo pagtoo, sugad han pagin diri mapinasayloon.

19. Paonan-o kita makakapili hin maopay nga kasangkayan?

¹⁹ Pakig-upod hadton may marig-on nga pagtoo. Hi Jesus maaramon nga nagpili hin kasangkayan, labi na adton nagin duok niya nga mga kaupod. An mga apostol—an pinakaduok niya nga kasangkayan—matinumanon, maunungon, ngan masinugtanon ha iya. (Basaha an Juan 15:14, 15.) Salit kon nagpipili hin kasangkayan, pilia adton may marig-on nga pagtoo ngan masinugtanon kan Jesus. Ngan hinumdumi nga tigaman han tinuod nga pagkamagsangkay an pagkaada abrido nga komunikasyon, bisan kon nag-uupod ito hin pagsagdon o pagkarawat hin sagdon.—Prob. 27:9.

20. Ano nga kapulsanan an aton nakakarawat kon ginbubuligan naton an iba nga maparig-on an ira pagtoo?

²⁰ Buligi an iba nga maparig-on an ira pagtoo. Pinaagi ha pulong ngan buhat, ginparig-on ni Jesus an pagtoo han iya mga disipulo. (Mar. 11:20-24) Sadang naton subaron an ehemplo ni Jesus tungod kay an pagbulig ha iba nga maparig-on an ira pagtoo nagpaparig-on liwat han aton pagtoo. (Prob. 11:25) Ha imo pagsangyaw ngan pagtutdo ha iba, pamatud-i nga naeksister an Dios, hinigugma kita niya, ngan giniyahan niya nga Pulong an Biblia. Buligi liwat an kabugtoan nga maparig-on an ira pagtoo. Kon may bugto nga nagpapakita hin tigaman han pagruhaduha, bangin pinaagi ha pagreklamo kontra ha kalalakin-an nga pinili nga manguna ha kongregasyon, ayaw dayon hiya likayi. Lugod, ha mataktika nga paagi, buligi hiya nga maibalik an iya pagtoo. (Jud. 22, 23) Kon estudyante ka, ngan ginhihisgotan ha iyo klase an teoriya han ebolusyon, may kaisog nga depensahi an imo pagtoo ha paglarang. Bangin mahipausa ka gud ha maopay nga reaksyon han imo titser ngan mga kaklase.

21. Ano an iginsasaad ni Jehova ha tagsa ha aton?

²¹ Ha bulig ni Jehova pinaagi kan Jesus, nadaog ni Pedro an kahadlok ngan pagruhaduha. Ha urhi, nagin maopay gud hi Pedro nga susbaranan ha siyahan-siglo nga mga Kristiano tungod han iya pagtoo. Ha pariho nga paagi, kita ngatanan ginbubuligan ni Jehova basi magin marig-on an aton pagtoo. (Basaha an 1 Pedro 5:9, 10.) Diri gud makakarag an aton mga pangalimbasog nga parig-unon an aton pagtoo kay waray kapariho an mga balos nga ihahatag ha aton ni Jehova.