NAMUNDAG ako kan 1927 sa sadit na banwaan nin Wakaw, Saskatchewan, Canada. Pito an nagin aki ni Tatay asin Nanay, apat na lalaki saka tulong babayi. Kaya aki pa ako, tuod na akong may kaibanan na dakul na tawo.

Kan dekada nin 1930, namati kan pamilya mi an epekto kan masakit na kamugtakan sa ekonomiya na inaapod na Great Depression. Bako kaming mayaman, pero dai man kami kinulang nin kakanon. Igwa kaming ataman na mga manok asin sarong baka, kaya pirmi kaming may sugok o bunay, gatas, krema, keso, saka mantikilya. Asin gabos kami sa pamilya nagtatarabangan sa mga trabaho sa harong pati sa uma.

Dakul na mauugmang pangyayari an nagigirumduman ko sa panahon na idto, arog kan mahamot na parong kan mga mansanas sa laog kan harong. Pag si Tatay kaya nagpapabanwa sa panahon nin tigrakdag (autumn) para magpabakal nin mga produkto mi sa uma, parati siyang nagpupuli na may darang sarong kahon nin bagong aning mga mansanas. Ugmahon talaga kami na may tigsararo kaming mahamis na mansanas aroaldaw!

Sais anyos ako kaidto kan maaraman kan sakong mga magurang an katotoohan. An matua mi kutanang tugang na si Johnny nagadan tulos pagkamundag. Hinapot kan sakong mamunduon na mga magurang an padi sa lugar mi, “Hain na po si Johnny?” Sinabi kan padi na mayo sa langit an aki ninda ta dai pa ini nabunyagan. Imbes, yaon daa ini sa Limbo. Sinabi pa kan padi na kun babayadan siya kan sakong mga magurang, puwede niyang ipamibi si Johnny para makahali sa Limbo dangan makasakat sa langit. Ano daw an mamamatian mo kun arog kaiyan an sinabi sa saimo? Disganadong marhay si Tatay asin Nanay kaya dai na sinda nakipag-ulay giraray sa padi. Pero, iniisip pa man giraray ninda kun ano an kamugtakan ni Johnny.

Sarong aldaw, nakakua si Nanay nin buklet na Where Are the Dead? na ipinublikar kan Mga Saksi ni Jehova. Binasa niya tulos iyan. Pag-abot ni Tatay, ugmahon na sinabi ni Nanay: “Aram ko na kun hain si Johnny! Nagtuturog siya ngunyan, pero maabot an panahon na mamata siya giraray.” Kan bangging idto, binasa ni Tatay an bilog na buklet. Naranga si Tatay saka si Nanay kan maaraman ninda an sinasabi sa Bibliya na an mga gadan nagtuturog asin magkakaigwa nin pagkabuhay liwat sa maabot na panahon.—Par. 9:5, 10; Gui. 24:15.

Binago kan nakua nindang katotoohan an buhay mi, asin nagtao iyan sa samo nin karangahan saka kaugmahan. Nakipag-adal sinda sa Bibliya sa mga Saksi asin nag-atender sa sadit na kongregasyon sa Wakaw, na an kadaklan mga Ukrainian. Dai nahaloy, nakikikabtang na sa paghuhulit si Tatay asin Nanay.

Pakalihis nin pirang panahon, nagbalyo kami sa British Columbia asin maugma kaming inako kan sarong kongregasyon duman. Nakakaugmang balik-balikan an ginigibo ming preparasyon kaidto bilang pamilya sa An Torrengbantayan para sa pagtiripon pag Domingo. Mas nagrarom an pagkamuot mi gabos ki Jehova asin sa katotoohan sa Bibliya. Nahiling ko  kun paano kami ‘pinayaman’ sa espirituwal asin binendisyunan ni Jehova.

Siyempre huling mga aki pa kami, bakong madali para sa samo na ipakipag-ulay sa mga tawo an satong pagtubod. Pero nakatabang na marhay sa sako asin sa nguhod kong tugang na si Eva an parati ming pagpreparar kan presentasyon sa paglilingkod sa langtad kan presenteng bulan para idemonstrar sa Pagtiripon sa Paglilingkod. Marahay na paagi nanggad idto para sa samo na, dawa masusupgon, makanuod na ipakipag-ulay sa iba an dapit sa Bibliya. Ipinagpapasalamat ko talaga na sa paaging iyan kami sinanay na maghulit!

An saro sa pinakamaugmang pangyayari kan kami mga aki pa iyo na pag may nagdadagos sa samo na mga nasa bilog na panahon na paglilingkod. Halimbawa, gustong-gusto mi pag nagdadalaw sa kongregasyon mi an samong paraataman nin sirkito na si Jack Nathan asin sa harong mi siya nagdadagos. * Nauugma kaming marhay sa kadakul niyang istorya, asin an sinserong komendasyon niya nagpakusog sa samo na padagos na maimbod na paglingkudan si Jehova.

Naiisip ko kaidto, “Pagdakula ko, gusto kong magin arog ni Brother Nathan.” Kan huri ko sana narealisar na an saiyang halimbawa nakatabang na maiandam ako sa sarong karera nin bilog na panahon na paglilingkod. Kan ako 15 anyos na, determinado na akong paglingkudan si Jehova. Nabawtismuhan kami ni Eva kan 1942.

Kan Giyera Mundiyal II, lakop na marhay an pagigin mamumuton sa nasyon. Sarong maestra na an pangaran Miss Scott, an pinahali sa klase niya an duwa kong tugang na babayi asin saro kong tugang na lalaki. Taano? Huling nagsayuma sinda na magsaludo sa bandera. Tapos, kinaulay niya an sakong maestra tanganing piriton na pahalion man ako. Pero sinabi kan maestra ko, “Sa nasyon ta, gabos may deretsong pumili kun maiba o dai sa nasyonalistikong mga seremonya.” Dawa ano pang gibuhon na pamimirit ni Miss Scott, marigon na sinabi kan maestra ko, “Dai na mababago an desisyon ko.”

Sinabi ni Miss Scott: “Bako ika an madesisyon kaiyan. Irereport taka pag dai mo pinahali si Melita.” Kinaulay kan maestra ko si Tatay saka Nanay asin sinabi sa sainda na para dai siya mawaran nin trabaho, mayo siyang ibang magiginibo kundi pahalion ako sa eskuwelahan dawa aram niyang bakong tama iyan. Pero dawa arog kaidto an nangyari, natawan kami nin mga libro sa eskuwelahan na puwede ming pag-adalan sa harong. Dai nahaloy, nagbalyo kami nin istaran, mga 32 kilometros an rayo, kun sain inako kami duman nin sarong eskuwelahan.

Huli sa giyera, ipinagbawal an satong mga babasahon; pero, nakakapagharong-harong pa man giraray kami gamit an Bibliya. Kaya nagin mahusay kaming maghulit kan maugmang bareta kan Kahadian nin direkta mismo sa Kasuratan. Huli kaiyan, nag-uswag kami sa espirituwal asin naeksperyensiyahan mi an tabang ni Jehova.

Pagkagradwar mi tulos ni Eva, nagpayunir na kami. Inot akong nagtrabaho sa sarong department store. Dangan, nagkua ako nin anom na bulan na kurso sa hairdressing, an gustong-gusto kong gibuhon pag nasa harong. Nakahanap ako nin trabaho sa sarong parlor na an laog ko duwang aldaw kada semana, saka nagtutukdo man ako nin hairdressing duwang beses kada bulan. Sa paaging iyan, nasuportaran ko an sakong pagpapayunir.

 Kan 1955, nagplano akong mag-atender sa “Triumphant Kingdom” na asembleya sa New York, U.S.A., asin sa Nuremberg, Germany. Pero, bago ako magpa-New York, namidbid ko si Brother Nathan Knorr na hali sa pambilog na kinaban na headquarters. Nag-atender kaya siya asin an agom niya sa sarong kumbensiyon sa Vancouver, Canada. Sa saindang pagdalaw, pinakiulayan ako na ayuson an buhok ni Sister Knorr. Nagustuhan ni Brother Knorr su ginibo ko sa buhok ni Sister Knorr kaya gusto niya daa akong mamidbid. Kan nag-uulay na kami, nasambit ko na plano kong magpa-New York tapos magpa-Germany. Inimbitaran niya akong magboluntaryo nin siyam na aldaw sa Brooklyn Bethel.

Binago kan biyaheng iyan an buhay ko. Kan nasa New York na ako, nakamidbid ko an sarong hoben na brother na si Theodore (Ted) Jaracz. Nabigla ako kan ihapot niya, “Payunir ka?” “Bako,” an simbag ko. Nadangog palan ini kan amiga kong si LaVonne. “Iyo, payunir siya,” an saliot niya. Medyo naribong si Ted kaya hinapot niya si LaVonne, “Halat, siisay an mas nakakaaram, ika o siya?” Ipinaliwanag ko ki Ted na dati akong payunir asin mapayunir giraray ako pagbalik ko hali sa kumbensiyon.

Namundag si Ted sa Kentucky, U.S.A. kan 1925. Nabawtismuhan siya sa edad na 15. Pakalihis nin duwang taon, nagregular payunir siya dawa siya sana an Saksi sa pamilya niya. Diyan nagpuon an saiyang haros 67 taon nin bilog na panahon na paglilingkod.

Kan Hulyo 1946, sa edad na 20, naggradwar si Ted sa ikapitong klase kan Watchtower Bible School of Gilead. Pagkatapos, naglingkod siya bilang nagbibiyaheng paraataman sa Cleveland, Ohio. Pakalihis nin mga apat na taon, inasignaran siyang maglingkod bilang branch servant sa Australia.

Yaon man kaidto si Ted sa kumbensiyon sa Nuremberg, Germany, asin nagkaigwa kami nin pagkakataon na mamidbid an kada saro. Diyan nagpuon an samong istorya nin pagkaminuutan. Maugma ako na gustong-gusto niyang paglingkudan si Jehova sa bilog niyang buhay, iyan an pasuhan niya. Mahiguson siya sa trabaho, seryoso sa saiyang mga obligasyon pero mabuot saka makiamigo. Mas iniinot niya an kapakanan kan iba kisa sa sadiri niya. Pagkatapos kan kumbensiyon, nagbalik na si Ted sa Australia asin ako man sa Vancouver. Pero regular kaming nagpapadara nin surat sa kada saro.

Pakalihis nin mga limang taon sa Australia, nagbalik si Ted sa Estados Unidos. Dangan nagbalyo siya sa Vancouver para duman magpayunir. Maugma ako ta gustong-gusto siya kan mga kapamilya ko. Sa parati, an matua kong tugang na si Michael pirming nakabantay sa sako asin nahahadit siya pag may brother na nag-iilusyon sa sako. Pero, nasunuan tulos niya si Ted. “Aram mo Melita,” an sabi niya, “maray na tawo ining namidbid mo. Dapat asikasuhon mo siyang marhay saka dai mo pagpabayaan na mawara siya saimo.”

Nagustuhan ko man na marhay si Ted. Ikinasal kami kan Disyembre 10, 1956. Nagpayunir kami sa Vancouver, tapos sa California, dangan inasignaran kaming maglingkod sa mga sirkito sa Missouri asin Arkansas. Sa laog nin mga 18 taon na paglilingkod sa mahiwas na teritoryong iyan sa Estados Unidos, paburubalyo kami nin harong na pigdadagusan kada semana. Kadakul ming magagayon na eksperyensiya sa ministeryo, saka mauugmang pakikiasosyar sa mga tugang. Kaya dawa masakit an magpaburubalyo nin lugar kada semana, nauugma kami sa gibuhon na ini.

An saro sa talagang hinahangaan ko ki Ted iyo na dai niya binabaliwala an relasyon niya ki Jehova. Pinapahalagahan niyang marhay an saiyang sagradong paglilingkod sa pinakadakulang Persona sa uniberso. Gustong-gusto ming magkaibanan na basahon asin pag-adalan an Bibliya. Sa banggi bago kami magturog, minaluhod kami sa kataid kan kama asin mamimibi  siya para sa samong duwa. Pagkatapos, makanya-kanya kami nin pamibi. Aram na aram ko pag may ikinakahadit si Ted. Minabangon siya sa kama, maluhod giraray, asin tuninong na mamimibi nin halawig. Hanga talaga ako na gustong-gusto niyang ipinapamibi ki Jehova an mga bagay-bagay, dakula man iyan o sadit.

Mga pirang taon pakatapos ming ikasal, sinabi sa sako ni Ted na mapuon na siyang magkakan asin mag-inom kan mga emblema sa Memoryal. “Ipinamibi ko na ining marhay para masigurado kong an gigibuhon ko iyo an talagang gusto ni Jehova na ipagibo sako,” an sabi niya. Dai na ako gayong nabigla na saro na siyang linahidan kan espiritu nin Diyos para maglingkod sa langit sa pag-abot nin panahon. Ibinibilang kong sarong pribilehiyo na suportaran an saro sa mga tugang ni Cristo.—Mat. 25:35-40.

Kan 1974, nasurpresa kaming marhay kan maimbitaran si Ted na magin miyembro kan Namamahalang Grupo kan Mga Saksi ni Jehova. Dangan, inapudan kami na maglingkod sa Brooklyn Bethel. Mantang inaasikaso ni Ted an saiyang mga responsabilidad bilang miyembro kan Namamahalang Grupo, ako man nagtatrabaho sa housekeeping o sa beauty shop.

Kaiba sa mga responsabilidad ni Ted an pagbisita sa manlain-lain na sangay. Interesado siyang marhay sa ginigibong paghuhulit sa mga nasyon kaidto sa Europa na nasa irarom kan Unyon Sobyet. Sarong beses, kan nagbabakasyon kami sa Sweden, sinabi ni Ted: “Bawal Melita an paghuhulit sa Poland, gusto kong tabangan an mga tugang duman.” Kaya nagkua kami nin visa asin nagpa-Poland. Nakipagtagbo si Ted sa ibang mga tugang duman na nag-aasikaso kan satong gibuhon, asin naglakaw-lakaw sinda para mayong makadangog sa pinag-uulayan ninda. Apat na aldaw sindang sigidong nagmiting, pero naugma ako kan mahiling ko kun gurano kaugma si Ted na matabangan an saiyang pamilya sa espirituwal.

Nagbalik kami sa Poland kan Nobyembre 1977. Si F. W. Franz, Daniel Sydlik, asin Ted magkairibang nagdalaw sa Poland—an kainot-inuting opisyal na pagdalaw nin mga miyembro kan Namamahalang Grupo. Ipinagbabawal pa an satong gibuhon duman, pero nakaulay kan tulong miyembro kan Namamahalang Grupo an mga paraataman, mga payunir, asin an haloy nang mga Saksi sa manlain-lain na siyudad.

Sa suminunod na taon, kan magdalaw si Milton Henschel asin Ted sa Poland, nakipagmiting sinda sa mga opisyal kan gobyerno na kan panahon na idto dai na gayong nagkokontra sa sato asin sa satong gibuhon. Kan 1982, nagtugot an gobyerno nin Poland na magkaigwa an satong mga tugang nin sarong aldaw na mga asembleya. Kan suminunod pang taon, nagkaigwa na nin darakulang kumbensiyon na an kadaklan ginibo sa inarkilang mga pasilidad. Dawa may pagbabawal pa kan 1985, tinugutan kitang magkaigwa nin apat na kumbensiyon sa darakulang istadyum. Dangan kan Mayo 1989, mantang nagpaplano para sa mas darakula pang kumbensiyon, inaprubaran kan gobyerno nin Poland bilang legal na  relihiyon an Mga Saksi ni Jehova. Ini an saro sa mga pangyayari na sobrang ikinaugma ni Ted.

Kan 2007, nagbiyahe kami pasiring sa South Africa para sa pagdedikar kan sangang opisina duman. Kan nasa England na kami, naglangkaw an blood pressure ni Ted, asin sinabihan siya kan doktor na dai na idagos an pagbiyahe. Kan magrahay na an pagmati ni Ted, nagbalik kami sa Estados Unidos. Pero pakalihis nin pirang semana, na-stroke siya asin nagin paralisado an tuong parte kan hawak niya.

Haloy an pagrahay ni Ted, kaya kan primero, dai siya makatrabaho sa opisina. Pero nagpapasalamat kami ta normal man an saiyang pagtaram. Sa ibong kan saiyang kondisyon, hinihinguwa niyang magibo an mga kinaugalian na niyang gibuhon, na nagpapartisipar pa ngani sa semanal na miting kan Namamahalang Grupo gamit an telepono mi sa sala.

Nagpapasalamat talaga si Ted sa mahusay na terapi sa saiya kan infirmary sa Bethel. Padiit-diit, nahihiro na niya an haros bilog niyang hawak. Nagigibo na niya an nagkapira sa teokratikong mga asignasyon, asin parati siyang masinggaya.

Kan Miyerkules, Hunyo 9, 2010, pakalihis nin tulong taon, na-stroke siya giraray asin nagadan. Dawa aram ko man na kaipuhan na magadan si Ted para makamtan niya an saiyang langitnon na balos, makulugon sa sako kaidto an pagkawara niya saka napupungaw akong marhay sa saiya. Pero, aroaldaw kong pinapasalamatan si Jehova sa mga nakaya kong gibuhon para matabangan si Ted. Magkaibanan kaming naglingkod nin bilog na panahon sa laog nin labing 53 na taon. Nagpapasalamat ako ki Jehova huling tinabangan ako ni Ted na mas maparani sa sakong Ama sa langit. Sigurado akong maugmang marhay ngunyan si Ted sa saiyang bagong asignasyon.

Pagkatapos nin masibot asin maugmang mga taon kaiba kan sakong agom, bakong madali na atubangon an mga pagbalo na inaatubang ko ngunyan. Gustong-gusto mi ni Ted kaidto na makipag-ulay sa mga bisita sa Bethel asin sa Kingdom Hall mi. Ngunyan na mayo na an namumutan kong si Ted asin medyo nagluluya na man an sakong hawak, limitado na an pakikiasosyar ko sa mga tugang. Pero, gustong-gusto ko pa man giraray na makaibanan an mga tugang sa Bethel asin sa kongregasyon. Bakong pasil an aroaldaw na buhay sa Bethel, pero nakukua ko an kaugmahan sa arog kaining paagi nin paglilingkod sa Diyos. Asin dai lamang nainaan an pagkamuot ko sa paghuhulit. Dawa madali na akong mapagal asin dai ko na kayang magtindog nin haloy, ugmahon ako sa pakikikabtang sa pagpapatotoo sa tinampo saka sa pagkokondukta nin pag-adal sa Bibliya.

Pag nahihiling ko an mararaot na pangyayari sa kinaban, maugma nanggad ako na nakapaglingkod ako ki Jehova kaiba nin sarong marahayon na agom! Tunay na ‘pinayaman’ ako kan mga bendisyon ni Jehova.—Tal. 10:22.