MO’NN ne an 1927 dan enn ti lavil ki apel Wakaw, dan Saskatchewan, Canada. Mo bann paran ti ena set zanfan, kat garson trwa tifi. Alor, depi bien tipti mo’nn kone ki savedir viv avek enn kantite dimounn.

Ver bann lane 1930, lekonomi mondial ti tom bien ba. Ti apel sa lepok-la Gran Depresion ek nou fami finn resanti so lefe. Nou pa ti ena boukou kas, me nou pa ti mank manze. Nou ti ena de-trwa poul ek enn vas. Alor, dan nou lakwizinn touletan ti ena dizef, dile, lakrem dile, fromaz, ek diber. Kouma zot kapav mazine, travay pa ti manke. Sakenn ti ena enn travay pou fer, swa okip zanimo swa okip lakaz.

Kan mo pans sa lepok-la, sa rapel mwa bann bon souvenir, kouma par exanp parfin bann pom partou dan lakaz. An otonn, papa ti al anvil pou al vann bann prodwi laferm. Bien souvan li ti retourne avek enn bwat ranpli ar pom ki’nn fek kase lor pie. Mazine kouma sa ti enn vre plezir pou manz enn pom bien dou toulezour!

Mo ti ena si-z-an kan mo fami inn konn laverite. Mo gran frer Johnny, ti mor enn tipe apre so nesans. Mo bann paran ti bien abat. Alor zot inn al get pret vilaz ek zot inn demann li: “Kot Johnny ete?” Pret-la inn dir ki akoz Johnny pa ti ankor batize Katolik, li pa dan lesiel. Okontrer, li dan bann Limbes, enn landrwa ant paradi ek lanfer. Pret-la ti dir zot osi ki, si zot pey li, li pou priye pou Johnny. Koumsa li kapav sorti dan bann Limbes ek al dan lesiel. Ki to ti pou resanti si kikenn ti dir twa sa? Mo bann paran ti telman dekouraze ki apre sa, zame zot pa’nn rekoz ar sa pret-la ankor. Pourtan, enn kestion ti res dan zot lespri: Ki’nn ariv Johnny?

Enn zour mo mama inn tom lor brosir Kot Bann Mor Ete? (an Angle), pibliye par bann Temwin Zeova. Li ti inpasian pou lir sa brosir-la. Kan mo papa inn retourn lakaz tanto, avek enn lantouziasm li’nn dir li: “Mo kone kot Johnny ete! Asterla li pe dormi, me enn zour li pou leve.” Sa swar-la mo papa inn lir brosir-la net. Mama ek papa ti santi enn pwa sorti lor zot leker kan zot inn aprann seki Labib dir lor bann mor. Zot finn dekouver ki bann mor pe dormi ek ki dan lavenir pou ena enn rezireksion.—Ekle. 9:5, 10; Zist. 24:15.

Seki zot finn dekouver inn sanz nou lavi net. Sa finn amenn rekonfor ek boner dan nou fami. Mo bann paran inn koumans etidie Labib avek bann Temwin. Zot finn koumans asiste bann renion dan enn ti kongregasion ki ti trouv dan Wakaw, kot ti ena sirtou bann Ikrenien. Bien vit mama ek papa inn koumans prese.

 Pa tro lontan apre, nou’nn al res dan Colombie-Britannique. Laba ti ena enn ti kongregasion ki finn bien akeyir nou. Mo ankor rapel preparasion letid Latour Degard ki nou ti fer an fami pou renion dimans. Kan mo pans sa, mo resanti enn gran lazwa. Nou tou nou ti pe devlop enn lamour profon pou Zeova ek pou laverite ki trouv dan Labib. Mo ti trouve kouma nou lavi ti pe ameliore ek kouma Zeova ti pe beni nou.

Biensir, nou ti ankor zanfan ek li pa ti fasil pou nou koz lor nou bann krwayans ar lezot. Me, ena enn kitsoz ki’nn bien ed nou. Souvan, mo ti ser Eva ek mwa, nou ti prepar prezantasion ki’nn prevwar pou predikasion sak mwa. Apre, nou ti fer enn demonstrasion dan Renion Servis. Mem si nou ti bien timid, sa finn ed nou pou koz lor Labib ar lezot. Mo bien rekonesan pou sa formasion ki nou’nn gagne pou prese la!

Enn kitsoz ki’nn bien mark nou lanfans se kan bann serviter aplintan ti vinn res kot nou. Par exanp, nou ti extra kontan kan nou sirveyan sirkonskripsion, Jack Nathan, ti vizit nou kongregasion ek ti res kot nou. * Kan li ti rakont nou so bann zistwar, nou pa ti bouz enn pous! So bann felisitasion bien sinser inn fer nou anvi servi Zeova avek fidelite.

Mo rapel mo ti dir ar momem: “Kan mo vinn gran, mo ti pou kontan vinn kouma Frer Nathan.” Sa lepok-la, mo pa ti rann mwa kont ki so lexanp ti pe prepar mwa pou fer enn karyer dan servis aplintan. Ver laz 15 an, mo ti determine pou servi Zeova. An 1942, Eva ek mwa nou ti pran batem.

Pandan Deziem Lager Mondial, boukou dimounn ti bien fanatik pou zot pei. Enn profeser lekol ki ti apel Miss Scott, ti bien fanatik. Enn zour li’nn met mo de ser ek enn parmi mo bann frer deor dan lekol. Kifer? Parski zot ti refiz salie drapo. Apre sa, li’nn rant an kontak avek mo miss lekol ek li’nn sipliy li pou met mwa osi deor. Me mo profeser inn dir li: “Nou dan enn pei lib, nou ena drwa refiz fer bann seremoni patriotik.” Malgre tou bann presion ki Miss Scott ti met lor li, mo profeser inn dir avek boukou determinasion: “Sa se mo desizion.”

Miss Scott inn reponn: “Non, se pa to desizion, mo pou raport twa si to pa met Melita deor.” Mo profeser inn explik mo bann paran ki li pa anvi perdi so travay. Me li pena swa, li bizin met mwa deor, mem si li krwar ki seki li pe fer pa bon. Malgre sa, nou’nn reisi gagn bann materyel lekol pou ki nou kapav etidie lakaz. Enn tipe apre, nou’nn demenaze. Nou’nn al res 32 km pli lwin, ek la, zot inn aksepte nou dan enn lekol.

Akoz lager, nou bann piblikasion ti interdi pandan plizir lane. Kanmem sa, nou ti al prese lakaz par lakaz avek enn Labib. Rezilta: Tigit-tigit, nou ti bien konn servi Labib pou prese. An retour, sa finn ed nou grandi lor plan spiritiel ek trouve kouma Zeova soutenir nou.

Deswit kouma Eva ek mwa nou’nn fini lekol, nou’nn koumans fer pionie. Anmemtan mo ti pe travay. Dabor, mo’nn travay dan enn gran magazin. Apre, pandan sis mwa mo’nn swiv enn kour kwafir, enn kitsoz ki mo ti bien kontan fer. Mo ti gagn enn travay dan enn salon de fwa par semenn.  Anmemtan, mo ti pe kontign mo bann kour de fwa par mwa. Se koumsa ki mo’nn kapav fer mo servis aplintan.

An 1955, mo ti anvi asiste lasanble « Le Royaume triomphant » ki ti pe fer dan lavil New York, U.S.A., ek Nuremberg, l’Allemagne. Me, avan mo kit New York, mo ti zwenn Frer Nathan Knorr ki sorti dan biro mondial. Li ek so madam ti pe asiste enn lasanble dan Vancouver, Canada. Pandan zot vizit, finn demann mwa pou fer seve Ser Knorr. Frer Knorr ti bien kontan kan li’nn trouv kwafir so madam ek lerla li ti anvi zwenn mwa. Dan konversasion, mo’nn dir li ki mo pe pans pou vinn New York avan mo al l’Allemagne. Li’nn invit mwa pou vinn travay dan Béthel Brooklyn pou nef zour.

Sa vwayaz-la inn sanz mo lavi. Dan New York, mo’nn zwenn enn zenn frer ki apel Theodore (Ted) Jaracz. Enn tipe apre ki nou’nn zwenn, mo ti etone kan li ti dir mwa: “Eski to enn pionie.” Mo’nn dir li: “Non.” Mo kamarad ki apel LaVonne inn tann nou konversasion ek li’nn dir: “Wi, li pionie.” Ted inn gagn sok ek inn demann LaVonne: “Kisannla ki pli kone, twa ouswa li?” Mo’nn explik li ki mo ti pionie avan ek mo ena lintansion pou rekoumanse deswit kouma mo retourne apre lasanble.

Ted inn ne an 1925 dan lavil Kentucky, U.S.A. Li’nn batize laz 15 an. Mem si okenn manb so fami pa ti dan laverite, li’nn koumans fer pionie permanan de-z-an plitar. Li’nn res dan servis aplintan pandan apepre 67 an.

An Ziliet 1946, laz 20 an, Ted ti gagn enn formasion dan setiem klas Lekol Biblik Guiléad. Apre so diplom, li’nn servi antan ki sirveyan sirkonskripsion dan Cleveland, Ohio. Apepre kat-r-an plitar, li’nn nome pou servi kouma serviter biro nasional dan l’Australie.

Ted ti al asiste lasanble dan Nuremberg, l’Allemagne. Nou’nn pas inpe letan ansam. Enn zistwar d’amour inn koumanse. Mo ti kontan ki pou li, so priorite se servi Zeova avek tou so leker. Li ti enn kikenn bien devwe ek serye dan tou seki li fer. Me anmemtan, li ti ena enn bon personalite, li ti bien amikal. Mo ti santi ki li ti touletan fer lintere lezot pas avan pou li. Apre sa lasanble-la, Ted inn retourn l’Australie, ek mwa mo’nn retourn Vancouver. Me nou’nn res an kontak par bann let.

Apre anviron sink an dan l’Australie, Ted inn retourn l’Amerique. Li’nn vinn fer pionie dan Vancouver. Mo ti bien kontan pou trouve ki kantite mo fami ti kontan li. Mo gran frer, Michael, ti touletan pe protez mwa. Souvan li ti trakase kan enn frer ti interese ar mwa. Me, bien vit Michael inn bien kontan Ted. Li’nn dir mwa: “Melita, to’nn gagn enn bon dimounn. To bizin tret li bien ek fer tou pou to pa perdi li.”

Mwa osi mo’nn koumans devlop enn gran lamour pou Ted. Nou’nn marye le 10 Desam 1956. Nou’nn fer pionie ansam dan Vancouver, apre dan Californie. Plitar, Ted inn nome sirveyan sirkonskripsion ek nou’nn servi dan Missouri ek Arkansas. Pandan preske 18 an, nou ti sanz lakaz toule semenn ek nou’nn vwayaz inpe partou dan l’États-Unis. Nou finn fer bann zoli lexperyans dan minister. Nou’nn bien kontan osi pou pas letan avek nou bann frer ek ser. Mem si li pa ti fasil pou demenaze sak semenn, nou ti bien kontan sa servis-la.

Enn kitsoz ki sirtou mo’nn bien apresie avek Ted se so relasion avek Zeova. Zame li’nn konsider sa kouma enn kitsoz banal. So servis sakre ki li ti pe fer pou pli gran Personaz liniver ti ena enn gran valer devan so lizie. Nou ti kontan lir ek etidie Labib  ansam. Aswar, avan nou al dormi, nou ti azenou pre kot nou lili, ek li ti priye pou nou. Apre sa, sakenn ti fer so prop lapriyer. Kan ti ena enn kitsoz ki ti trakas Ted, li ti desann lor lili, ek la li ti re-azenou ek li ti priye pandan lontan. Li ti touletan priye Zeova mem pou bann tipti ouswa gran kitsoz, ek sa se enn kitsoz ki mo ti bien apresie.

De-trwa lane apre nou maryaz, Ted inn explik mwa ki li pou koumans pran divin ek dipin pandan Memoryal. Li’nn dir mwa: “Mo’nn priye boukou lor la ek mo san poursan sir ki mo pe fer seki Zeova anvi mo fer.” Mo pa ti etone kan mo’nn aprann ki lespri sin inn swazir li pou servi dan lesiel. Mo konsider sa kouma enn privilez pou soutenir enn frer Kris.—Mat. 25:35-40.

An 1974, Ted ti gagn privilez pou vinn enn manb Komite Santral bann Temwin Zeova. Sa ti vremem enn sirpriz, parski se enn kitsoz ki zame nou ti atann. Antretan ti demann nou pou al servi dan Béthel Brooklyn. Kan Ted ti pe okip so bann responsabilite dan Komite Santral, mwa, mo ti pe netway bann lasam ouswa mo ti pe travay dan salon kwafir.

Parmi bann responsabilite ki Ted ti gagne, li ti bizin al vizit plizir biro nasional. Li ti sirtou interese avek travay predikasion dan bann pei ki ti trouv lot kote frontier l’Europe. Enn zour, kan nou ti an vakans dan la Suède, Ted ti dir mwa: “Melita, travay predikasion interdi dan Pologne, mo ti pou kontan ed bann frer ki laba.” Alor nou’nn gagn nou viza ek nou’nn al Pologne. Ted ti zwenn sertin frer ki ti bien trakase pou travay predikasion. Zot ti mars enn long distans pou ki personn pa tann zot konversasion. Pandan kat zour bann frer ti fer bann renion bien inportan. Me mo ti kontan pou trouve kouma Ted ti kontan pou ed so bann frer ek ser spiritiel.

An Novam 1977 nou ti revizit Pologne. Frer Franz, Daniel Sydlik, ek Ted ti fer zot premie vizit ofisiel kouma bann manb Komite Santral. Travay predikasion ti ankor interdi. Selman, sa trwa frer-la finn kapav koz avek bann sirveyan sirkonskripsion, bann pionie ek bann proklamater ki ti pe prese depi lontan dan plizir lavil.

Lane apre, kan frer Milton Henschel ek Ted ti vizit Pologne, zot ti zwenn bann ofisie ki ti inpe plis toleran avek nou ek avek nou bann laktivite. An 1982, gouvernman Pologne ti donn permision pou fer enn zour lasanble. Lane apre finn kapav fer bann pli gran lasanble dan bann batiman ki ti lwe. Mem si ti ankor ena linterdiksion an 1985, nou ti kapav fer kat lasanble dan bann gran stad. Se an Me 1989, kan ti pe organiz bann gran lasanble ki gouvernman Pologne ti rekonet bann Temwin  Zeova kouma enn relizion legal. Sa ti enn lasanble ki ti fer Ted bien kontan.

An 2007 nou ti pe al asiste dedikas biro nasional dan l’Afrique du Sud. Me, an Angleterre, Ted ti gagn bann problem tansion, ek enn dokter ti konsey li pou ranvway so vwayaz. Apre ki so lasante ti refer, nou’nn retourn l’Amérique. Me de-trwa semenn apre, li ti fer enn atak serebral ki ti paraliz so kote drwat.

So lasante ti pran letan pou refer, ek koumansman li pa ti kapav al biro. Me erezman li ti kapav koze. Malgre so bann limit, li ti esey gard so bann labitid. Depi nou salon, li ti mem partisip par telefonn dan bann renion ki Komite Santral fer sak semenn.

Ted ti bien apresie tretman ki li ti pe gagne dan Béthel. Tigit-tigit, li’nn rekoumans fer bann mouvman. Li ti kapav okip sertin responsabilite teokratik, ek touletan li ti fer enn zefor pou res zwaye.

Trwa-z-an apre, Ted ti refer enn atak serebral ek li’nn mor Merkredi le 9 Zin 2010. Mem si mo ti touletan kone ki Ted pou bizin res fidel ziska lamor, selman mo pa kapav dekrir kouma so lamor ti bien dir pou mwa ek ki kantite mo mank li. Malgre sa, mo remersie Zeova toulezour ki mo finn kapav ed Ted. Nou finn pas plis ki 53 an ansam dan servis aplintan. Mo remersie Zeova ki Ted inn ed mwa pou vinn pli pros avek mo Papa ki dan lesiel. Aster, mo pena okenn dout ki so nouvo responsabilite fer li gagn lazwa ek satisfaksion.

Pandan tou sa bann lane ki mo’nn pase avek mo misie la, mo ti bien ere. Me apre, li pa ti fasil pou mo fer fas avek bann nouvo defi. Nou ti bien kontan zwenn bann viziter dan Béthel ek dan Lasal kot fer renion. Aster ki Ted pa la ek mo pena mem kouraz ki avan, mo pa tro kapav frekant lezot. Malgre sa, mo touzour kontan pou pas bann bon moman avek bann frer ek ser dan Béthel ek dan kongregasion. Lavi dan Béthel pa touzour fasil, me se enn gran lazwa pou servi Bondie dan sa fason-la. Mo lamour pou travay predikasion, sa pa’nn sanze. Mem si mo fatige vit ek mo pa kapav res boukou letan lor mo lipie, mo kontan pou prese lor semin ek kondir bann letid.

Kan mo get tou sa bann kitsoz orib ki pe pase dan lemond la, mo bien kontan ki mo’nn fer enn karyer dan servis Zeova ansam avek enn bon konzwin. Benediksion Zeova finn vremem fer mwa ena enn zoli lavi, enn lavi bien ris!—Prov. 10:22.